Chawnghilh's Blog

Red Indian tawng thi thei tawh lo

Posted in Qualitus : Habitus by chawnghilh on October 4, 2009

30hl91x[1]

American Red Indian tawng thi thei tawh lo … i târlang hlawm teh ang. Alphabetical-in bei chho ta ila, USA-a state hrang hrang atangin khawrh ila, a remchâng mai àwm e.

ALASKA … Alaska tih hi Eskimo-ho tawng thumal atanga chhawm a ni a, a awmzia chu ‘peninsula (tuipuia khawmual inkhawh lùt)’ tihna  a ni. Indians-ho khàn vûrrama chèng hnam chi khat kha Eskimo tiin an hnam hming atân an vuahsak a, Eskimo tih awmzia tak pawh hi ‘people who eat their meat raw (a hela thil ei mai mai mi)‘ tihna a ni. Alaska-ah hian tùnhmâ kha chuan Eskimo, Aleut, Athabascan, Tlingit, Tsimshian leh Haida hnam an chèng thìn a; tùnah erawh chuan hèng hnamte hi la chèng tho mah se —an tlêm tham hle tawh a ni.

ALABAMA awmzia hi “Hnim-hnawk ka thian fai (I clear away the ticket)” tihna a ni a, Indian hnam chi khat Alabama-te helai hmunah hian an lo chèng ve  tawh thìn a. Alabama State-ah hian tùn hmâ chuan Mound Builder, Alabama, Creek, Cherokee, Choctaw leh Yuchi hnamte an khawsa thìn; tùnah erawh chuan Atmore chhehvèlah Creek-ho an la khawsa a, hnam dangte erawh chu an awm zui tawh lo. Alabama-ho hi tùnlai chuan Texas leh Oklahoma-ah an chèng deuh ber tawh. Alabama State-a Tuscaloosa khaw hming awmzia hi an Lal chhuanawm tak “Black Warrior” hmingchawia phuah a ni a; an khaw hming pakhat Mobile an tih pawh hi tùn hmà lama Indians-ho khaw hming an la chhawm zui a ni.

ARIZONA pawh hi Indian-ho tawng, “Tangkarua” an tihna a ni. Tùn hma lam kha chuan Navaho, Apache, Hopi, Mojave (Mohave), Havasupai, Hualapai, Chemehuevi, Maricopa, Paiute, Papago leh Pima hnamte an chèng thìn a, kum za vèl lai a lo inher liam hnuin Reservation lamah an khung khàwm ta thung a. Kum sawmriat liamtà vèl khân Indian hnam chi khat Yaqui an tihte chu Mexico atangin Arizona hi an pan chiam bawk. Arizona-a khawpui hming làr tak Tucson (Too-son) awmzia hi “luikàwr ruam thim (black creek)” tihna a ni. Navaho tih pawh hi Tewa-ho hnam tawng, “Vaimîm hmun zau tak (large cornfield)” tihna a ni. Apache tih pawh hi an kianga chetlà ve thìn Zuni Indians-hovin an phuah a ni a, a awmzia chu a ngeiawm khawp —”hmêlmàte” tihna a ni. Hopi tih awmzia hi anmahni Hopi tawngin “râlmuanga chèng mipuite” tihna a ni bawk. Cochise tia kan hriat zui tàk hi Apache-ho lal hmingthang tak hmingchawia phuah a ni bawk e.

Arizona State chhûngah chian Grand Canyon National Park an tih chu tlâng leh ruam zau tak —engmah chìn theih lohna lung khawkrawk, ruam thùk taka Colorado Lui luang paw chuai a ni thung —Mizoram aia zau mah a ni.

ARKANSAS — Kansas tih hi “Khen-Jas” tia lamrìk a ni a; Arkansas ve thung erawh hi chu AR-KHEN-SAW tih a ni huh mai! Mingo hovin Arkansas hnam hi “ACANSEA” tiin an lo ko ve mai thin a. Arkansas-ho hming dang leh chu QUAPAW an ti bawk thìn.  Lamrìk fîmkhùr a ngai! Arkansas State-ah hian tùn hmâ chuan Mound Builder, Caddo, Miami, Osage, Quapaw an chèng thìn a, hun rei lo tè chhûng Cherokee-ho pawh an chèng ve zuai. Tùnah zet chuan hèng hnam zawng zawngte hian Oklahoma an pan fai vek tawh.

CALIFORNIA —tùnlai chhanah chuan USA Meidìl a ni ringawt ta mai, kàngmei hian a rûn reng a ni ta ber e. In leh lo, thlai leh ranvulh an chân nasa hle a, a ramin a chhiat phah hle. Mihring nunna hial pawhin a tuar nasa hle a ni.

Tùn dinhmunah hian California State-ah Mizo chhûngkua 16 lai an khawsa ve mèk nia hriat a ni.

Tùn hma lamah han kuai lùt zawk ila —California chhim lama Red Indian chèng thìnte kha Spanish rawn lùt hmasahote khàn sal ang thàwthângin an lo chhawr tawh thìn a. Mission Indians an tih hmingchawiin an dah khàwm hlawm a, chùng hnam zîngah chuan hèngho hi an tel —Cahuilla, Luiseno, Chumash. Hnam dang awm vete chu Diggers (Lei cho phuttu) tiin an ko el mai a —a chhan leh vàng nia lang pawh, lo neih lam ngaihthaha kàmrah leh thing zung an chawh chiam chiam thin vàng a ni. Chùng lei cho phuttute chu Maidus leh Modocs-te an ni a; anniho bàkah hian Hupa, Pomo, Yuma leh Yurok-ho an la awm ve cheu bawk.

Tùnah zet chuan hèng hnamte hi Sixteen Reservation leh Ninety-nine Rancherias an tih hmun, tùnhmâa an lo khawsakna hmun atanga hnai tèah —di in chung chih in te reuh tè tè luahin an khawsa ve leh tawh a ni. California State-a Tulare an tih hming awmzia hi Red Indian tawnga “rairuang hmun” tihna a ni. Ojai awmzia pawh hi “khaw-thlang” tihna a ni a. Modoc awmzia hi “chhim lama mi chèngte” tihna a ni bawk. Tehama pawh “sâng tak atanga tuikhawhthlà” tihna a ni a, Napa an tih awmzia pawh hi “Khawpui” emaw “In” tihna a ni.

COLORADO state-ah hian Mizo chhûngkaw 4 an khawsa ve mêk a; tùn hma lam hunah te kha chuan Folsom Man, Basket Maker, Cliff Dweller, Ute, Arapahoe, Cheyenne hnamte an lo chèng tawh thìn a. Tùnlai chuan  Colorado state chhûnga chhim-thlang lama Ute Reservation-ah an chèng khàwm tawh thung. Cliff Dwellers an tihho phei chu New Mexico-a Pueblos hnamho va awm finin —an pêm fai vek tawh a. Arapahoes leh Cheyennes-te erawh chu Oklahoma leh Wyoming-ah an khawsa zui hlen ta a ni.  Manitou an tih awmzia hi “Thlarau Namailo” tihna a ni a, Saguache awmzia pawh “khawvèl pawl ruih chìm piltu tuipui” tihna a ni. Left Hand Creek an tih tàk hian Arapahoe hnama an Lal làr tak Left Hand-a hming a chhawm azâra nei a ni. Ouray an tih huai huai pawh hi Ute-ho lal hmingchawia phuah a ni.

CONNECTICUT —awmzia hi “thli chhèm fàwn delh delh lui tui luang dem dem” tihna a ni daih hi a mak mai mai asin; ‘thil inzawm chhum leh si” tihna a àn vei nèn! Connecticut State-ah hian tùnhmâ chuan Pequot hnam an khawsa thìn a; tùn thleng pawhin tlêm azâwng chu an la chèng ve reng.

He State chhûnga an thil hming la lam rìk fo chu Higganum a ni a, a awmzia chu “tomahawk lung” tihna  a ni, hetiang lung chang hi an hreitê (tomahawk) hà atân an hmang kher thìn. Housatonic an tih fo awmzia pawh hi “lui inchhuang/induh lungpui hrût tlanga luang chhuak” tihna a ni a; Willimantic an tih awmzia pawh “mi vengva chin” tihna a ni e.

DELAWARE —Delaware Indians hi an awm ve hranpa liau liau va, anmahni tak phei chuan Leni-Lenape an inti a, “mi tak tak” an intihna a ni. Tùn Delaware State-ah hian Delaware Indians-ho an awm tawh lo va; Oklahoma leh Kansas-a chèng MOORS an tih mai hote hi Delaware hnam zînga Nanticole an tihhote thlah chhàwng zèl nia rin an ni —Indian River kam tuak vèla chèng Indians-ho an ni ta ber e. Chawnghilh pawh, Indian River-ah chuan duhtàwkin a thian Red Indian leh sàp-hote nèn lui dung zawhin lawng an inkar thla chiam tawh. “Lawng kàrna lamah ka kut a durh vek,” tiin thawnthu ngaihnawm tak sawi tùr a nei ve hial a ni. Delaware State-a Nanticoke River hi Nanticoke hnam hmingchawia phuah a ni a, a awmzia chu “tuifàwna chènghote,” tihna a ni e.

FLORIDA —he State-ah hian Mizo chhûngkaw 7 an awm ve mêk. Tùn hma chuan Mound Builder, Calusa, Timucua, Seminole (Creek hnam chi khat hmàr lam atanga rawn pêm)-te leh Apalachee-ho an khawsa thìn a; tùnah erawh chuan Seminole-ho an la awm a, Calusas tam zàwkte erawh chuan Cuba ram an pan daih tawh hlawm. Apalachees-ho chuan Creeks-ho leh Indian hnam dangte an khawsàkfin thung.

Seminole tih awmzia hi “tlànbo” tihna a ni. Lake Okeechebee an tih awmzia pawh hi Dil hming, “Tui hmun zau tak,” tihna a ni. Tallahassee awmzia pawh “Khawpui hlui,” tihna a ni a. Tampa hi “hnai tèah,” tihna a ni. Pensacola awmzia pawh “mihring hmul/sam ngah” tihna a ni kher a. Eng vànga “mihring hmul/sam ngah” ti nge an ni tih hi ngaihtuah zau a ngai khawp —an sawi fo dànin Chakma-te pawh hian zak-hmul leh kap-hmul an nei vak lo ni àwma sawi thàwm hi a tam a, Chawngte ‘C’ Hospital-a Mizo Nurse thawkte pawhin nau-hring an chhar zing a, “kap-hmul leh zak-hmul’ Chakma a hmei a pate’n an neih mang loh thu an sawi ve tlat a; chutiang bawkin, American Native-ho hi kap-hmul leh zak-hmul nei vak lova sawi an ni a —Pensacola an tih bìk kherte hian an lo nei buk tha deuh emaw ni dâwn le? Florida hmàr lama Apalachian Mountain an tih tàk pawh hi Spanish thleng thla hmasaten Apalachees-ho hmingchawia tlângdung sei hming an lo phuah ni àwmin an sawi.

GEORGIAMound Builder, Creek, Yuchi leh Cherokee-ho an lo chèn tawhna hmun a ni. Tùnah erawh chuan tumah an awm tawh lo! Creek leh Yuchi-te chu Oklahoma, Texas leh Louisiana lamah an thle phei dial tawh a. Cherokee-ho chu Okalahoma-ah a bupuiin an la inkhuar a; reservation an neihna hmun tak erawh chu North Carolina-ah a ni.

Creek hi Indian hnam chi khat a ni a; chumi hmingchawi chuan English rawn pêm lùtten kawr-ruam leh lui ruam hi Creek tih hming an puttìr ve ta hmiah asin le! Creeks-ho phei chuan anmahni a inkoh dàn ang tak phei chu Muskogee an inti a, a awmzia pawh “dùm hmun” tihna tluk a ni. Savannah hi Creek Indians-ho chuan “Shawnee” tiin an lam rì a; awmze dang a neih leh chu “chhimlama mi chèngte” tihna a ni thung. Chattahoochee awmzia hi “lung rawnga hnawih” tihna a ni a; Tallapoosa awmzia pawh, “tui-zàngkhauh” tihna a ni. Unadilla awmzia pawh “intawhkhàwmna hmun” tihna  a ni. Etowah pawh sàphovin an lo lam rì chiangkuang thiam chiah lo va, Hightower tiin an lo lam rì mai pèk a, a nihna takah chuan Cherokee-ho chènna khawpui hming a ni. Georgia State-ah hian Mizo chhûngkaw 1 an awm mêk!

IDAHO —Indian-ho thumal ni mah se, a awmzia hi hriat a ni tawh tlat lo! Bannock, Shoshone, Nez Percé, Coeur d’Alêne-te an lo chèng tawh thìn a —tùnah pawh an la chèng zui zèl bawk. An awmna hmunah hian reservation pawh an nei chhunzawm a ni.

Bannock tih awmzia hi “chhim lama chèng mipui” tihna  a ni a; Nez Percé hi French tawng a ni ve daih thung a, a awmzia chu “hnâr verh kaw-ho,” tihna a ni. Hèng hnamho hian inchei nâna thil an inthuamna thenkhat, an hnâr verh kuaa an tàr thin vàng a ni. Coeur d’Alené awmzia hi “hriau thinlung” tihna a ni a, thinlung sîn tak —French tawng leh bawk a ni. Indians-ho leh French-ho inkâra insumdàwntàwnnaa an hlêp chhetè tàrlanna dàwrâwm te a ni chauh bawk.

ILLINOIS —Professor Siamkima Khawlhring pawh min tihrechhuak rum rum e! Il-li-noi tia lam rìk a ni, a hmâwr tàwpa ‘S’ hi lam rìk tel kher an remti lo a niang! A awmzia pawh “mihring” an tihna a ni e. Hnam engemaw zàt infin khàwm, thawk tlângho tùra insuihkhàwmte an ni. Tùn hmâ chuan Mound Builder Cahokia, Kaskaskia, Peoria te fuankhàwmna a ni a —hèngho hi Illinois League an tih te chu an ni. Tùnah erawh chuan an awm tawh lo! Oklahoma lamah Illinois League-ho chu an bet hlen ta.

Peoria awmzia chu “thil phurtu” tihna a ni mai a; Chicago awmzia pawh hi “ram-purùn hmun” tihna mai a ni, chuti lo pawhin “hmun rimchhia” tihna a ni. Winnetka erawh hi chu “hmun mawi tak” tihna a ni daih thung. He State-ah hian Mizo chhûngkaw 3 an khawsa ve mêk a ni.

INDIANAIndian tih atanga he hming hi chherchhuah a ni, an lam rìk dàn bera lang chu “In-dì-ênna” ti anga lam rìk a ni e. Tùnhma lam te kha chuan Mound Builders, Miami-te an khawsa thìn a. Delawares hnam chi khat Munsees an tihho pawh an tam tham viau, Munsees tih awmzia hi “lung chhèk khàwmna hmun” tihna tluk a ni. Indiana-ah hian hun engemaw ti chhûng an chèn hnuin —khawchhak lam panin an pêm bo ta thung.

Tùn dinhmunah chuan —Miami thisen kai thiau, hnam chi lî an la khawsa zui a. A bàk zawng chu Oklahoma lamah an pêm dial tawh. Muncie tih hi Munsee tiin an sipel tho bawk a. An chènna khawpui pawh Delaware-a Munsee-ho inhlàwm khàwm hming puttîr an ni. Wabash an tih awmzia hi “thli atanga chhùm rawn insiam” tihna a ni bawk. Miami Lal hmingthang tak thìn kha Mingo-hovin Mishawaka tiin an sawi ve mai thìn a, a awmze ril tak erawh chu “satel notè” tihna a ni. Indiana State-ah hian Mizo chhûngkaw 5 an khawsa ve mêk a ni.

IOWA —Indian hnam chi khat atanga he IOWA hming hi chhawm a ni ve leh tho bawk. A awmzia pawh “mut-chhuak tak tak ho,” tihna a ni. Tùn hma lam hunah te khân Mound Builder, Iowa an tihte khawsakna hmun a ni a. Sauk leh Fox hnamte pawh an chèng ve hle tawh thìn. Sauk awmzia hi “lui hnâra chèng mipuite” tihna a ni a. Mingo-hoten chùng hnamho zawng zawng chu Fox tiin an lo ko thìn a. Fox Indians-hote erawh chuan anmahni an inkoh dàn tak erawh chu “Lei sena chèng mipuite (Red Earth People)” an inti tlat thung.

Mizo awm vena Kentucky-ah chhûngkaw 3, Maryland-ah chhûngkaw 149, Massechussets-ah chhûngkaw 2, Michigan-ah chhûngkaw 8, Minessota-ah chhûngkaw 3, Missouri-ah chhûngkaw 1, Nevada-ah chhûngkaw 1, New Jersey-ah chhûngkaw 2, New Mexico-ah chhûngkaw 1, New York-ah chhûngkaw 1, North Carolina-ah 2, Ohio-ah chhûngkaw 2, Pennsylvania-ah chhûngkaw 7, South Carolina-ah 1, Texas-ah chhûngkaw 5, Vermont-ah chhûngkaw 1, Virginia-ah chhûngkaw 2, Wisconsin-ah chhûngkaw 1 … chùng chanchin rawn up-load chhunzawm zèl tùr hi lo ngaihven la, i hlàwkpui khawp ang!

 …………………………. chhunzawm zèl atân khèk rih ang …..

Advertisements

4 Responses

Subscribe to comments with RSS.

  1. mzvision said, on October 4, 2009 at 8:37 pm

    Arkansas Joneboro te Memphis te hi ka lam zing khawp thawkhat chu

  2. Zaia said, on October 5, 2009 at 8:20 am

    E, hei, blog te i lo siam ta a ni maw? A ngaihnawm dawn e. Misual-a i comment-na pawh a ngaihnawm thin a, i blog phei chu a ‘class’ dawn hian ka’n hre khawp a. Ka lo chhiar ziah dawn a nia.. han ti tak tak teh.

  3. H. Vangchhia said, on October 11, 2009 at 2:10 am

    They killed most of the Indians but kept their name.

  4. zoluz said, on October 11, 2009 at 9:49 am

    Missouri-a chhungkaw khat hi keimahni kan nih ngei ka ring.kan lo nih loh palh hlauh takin….tu te nge tih min hrilh thei em aw….khua a har thei teh mai a nia…..columbia,MO,65203

    IOWA-ah Mizo chhungkua 6 leh tlangval pa 2.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: