Chawnghilh's Blog

Las Vegas, Nevada

Posted in Qualitus : Habitus by chawnghilh on October 5, 2009

 

‘The Plain Truth’ tih Christian Magazine kha ka chhiar hnem ve khawp a. P. L. Liandinga tih dàn takah, sàptawng ka zirna Magazine bulfùk ber pawh a ni. Plain Truth kâwmah khân mawi tak takin Las Vegas khawpui kawtthlèr, in chhàwng vèl an rawn tilang thìn a. Hmuhnawm ti takin ka lo thlîr ve tawh thìn a ni.

Chu khawpuiah chuan tlai thim dâwnah kan lùt ve ta rawih mai chu … chhùn-pachanga luh nèn chuan a inthlau khawp ta ve ang. Thlanglam kâwl eng no phuai bàkah —a khawpui cheimawina èng chi tin, rawng chi tin mai te chuan khawpui a cheimawi na’ngiang mai! Sawiin a siak lo —car windshield chhana a thlâ ka làk hi han târlang zeuh zeuh ila, chu chuan a tifiah ber mai àwm e.

Crustal Lung mawia sak chu an ni èm si lo!

Crustal Lung mawia sak chu an ni èm si lo!

Bellagio an tih hial chu!

Bellagio an tih hial chu!Chhùn-pachanga a lan dàn ai chuan a mawi zàwk hmèl!

Paris tenau pawh a lo inchhawp ve tho!

Paris tenau pawh a lo inchhawp ve tho!

 

‘Thlìrna lam apiang a mawi —zahmawh rawngkai tak tak pawh a tam, chùng chu eng atân mah an ngai tawh chuang lo! A ni ve tùr hrim hrimah an ruat chiang lutuk tawh! Zawn rùk ka nei ràn a, chu chu “Biak In” a ni. Las Vegas khaw chhûngah hian Biak In 15 vèl zet a awm ve tlatin an sawi a. Chiang takin pahnih chu tlàn pahin ka hmu a. Hotel leh Cassino-te nèna khaikhin râlah chuan Biak In tètzia tètzia mai chu —sawiin a siak thlàwt lo! Biak Inah chuan mi 12 vèl chu an len theih àwrh chauh ka ring!

Thlenna tùr chu kan chiang làwk hmasa vek tawh a. Booked làwk vek kan nih avàngin! An kawtthler fan kual hmasak kha a tih chi tlat! Atùk khawvâr nghàk ta ila, light chi tina inkàp èng kha kan chan dawn si … kan fang kual ta poh a, mit a tlai ngei mai! Khawpui dang danga an downtown kan kal ve fo, Las Vegas chu a lo dang khawp mai!

MGM Grand chu a lian tham hle mai a, khawvèla Hotel room ngah ber dawttu nia an sawi a ni. Kàngmei pawh ràpthlàk taka a lo tuar tawh chanchin khawvèl lehlam atangin ka lo chhiar ve zauh zauh tawh a. A taka han hmuh chu hmulthì pawh a ding ve dâwn dâwn a ni àwm e! Car Parking-ah kan tlàn luh chu a ngai hmasa phawt a, building-ah kan kual chho kan kual chho ta mai a, parking àwl lai kan melh reng a. Hmuh hun chu a awm ve mai … kan park-na flat number A AW B leh kan dahna lai chiah number kan chhinchhiah thlap a, Reception Counter panna lam tùr kawng melh chiang ràn ràn pahin … escalator kan chhuka kan làwnna chhinchhiah chet chet vekin —rilrù tak taka chèt a ngai. Rui phût mai ila, kan car zawng hmu leh tùr hian kan vàk chhàwlhàl chau thei viau ta ve ang!

Counter lamah CHECK IN tùrin kan inak bâwr khawp mai, hnuh kawi thil nèn! Kan hming kan han sawi a, an Computer inchhawpah an han thlèk zuai a, a fel chu a ni mai. Room No. leh a kawngkhàr chabi min pèk chu Mizo-pâ hriatthiam dàn tùr ang berin ka’n sawi ang e —visiting card ang mai, khawng felh fawlh hi min pe a, a hawlh luh dàn tùr zâwng a lem nèn a lo chuang vek a. Tihsual khat khat châng pawh a awm, a inhawn hmâ chu a dik dàn tùr ang bera tih a ngai a ni mai.

Kan pindan tùr kha a awmna a sâng nasa mai a, elevator lah a tam viau mai a. A khawi ber atanga pan tùr nge tih kha hriat chian fê a ngai. Min guide-tu a felin a hmêltha vâw vâw khawp mai. Ni tin min hrilh nawn ziah se, a pawi vak hran lo tùr! Hriat chian loh chuan Hotel chhûnga kawtthlêr dang daihah kan vei màwl mai mai dâwn a ang tlat!

Room chu a changkàng teh mai —bual in pawh … istiri leh a nawhna dawhkàn chenin a lo awm vek a, hair-dryer chenin —towel pawh a tam mai … sahbon chi tin, inhnawih rimtuina chi tin chi tang nèn; tin, tui leh in tùr dang neite tâna tihvawhna tùrin lobby khawi’maw laiah vûr bâwm changkàng tàwk a awm a; mahnia va inlàk mai tùr a ni. Tin, soda lam chi, pawisa-nawi thlàk luha a bottle-a rawn lum chhuak nawlh nawlh thei tùr hian hmun remchâng laiah a inbun fer fur mai!

Hotel luh phata mit la nghàl èm èm chu Ultimate Fight an inbeihna steel ring tih vèl kha a ni … ka’n thlèk chiang ngial thìn! Vànglai a va ngaihawm èm! Thlîrtu mipui thutna tùr hmun àwl zozai te kha —an tân kawmchâr leikapui ang lek a ni si!

Cassino an khelhna hmun mawlh mai chu … a zauvin a va thui tak èm! A khâwl kha engzàt tak inbùn ang maw? A tam tham viau, pawisa khèltuten an thutchilh fur mai a —zànlai a awm lo, zìng a awm lo, tlai a awm eih lo … hunin ro a rêl tawh lo. Bangah sanapui inkhai a awm map lo. Chumi kiangah chuan bar a awm chek chuk a, peg khat $ 8 (Rs 380 hù). Engkim hi a to hle vek mai! Pawisa-khelhna hmanrua hi chi hrang hrang a lova tam thei tak èm! Tuai vir mup mup, keyboard hmeh zeuh zeuha vir chur chur … sawi kim sèn chi-ah ka ngai lo. Fèn chhîng tak tak fêngin vun ngo tak tak, chhe lo bâwr bâwr-ten tray-in thil an chawi —va supply an nei chàmchî. Meizùk an khap chuang lo; mahse, pindan zau tham kha mei khu rimin a luah èm èm pawh a hriat chuang hauh loh!

Restaurant, Cafe … Western Attire … Dàwr chi hrang hrang, nîsâ-in a èm ngai miah loh a intlar nalh hle vek a, a thlèrpui zawh uluk a ngai khawp. Khawthlang lam, khawchhak lam, chhim leh hmàr lam tiin an thliar fel ve hle a. Bo theih zak zak tak a ni tho. A hriate zawh vat a tha ber —mahse, a chhûnga mi tam zàwk khàn an hre chiang vek chuang lo. Mikhual pawisa khèl an ni ve miau! Rei tak tak bo ve tho pawh ka tawng nual!

Kil khat dârthlalang pindana sakeibaknei an han khawi ve ngawtte pawh kha, thil hi an tihautak thiam nge, hmuh tùr an chhawp kim ni zàwk le âw! A kimchang a ni ber e. Hmeichhia pawh $ 32 man atanga $ 2,500 man thleng an awm vek! Mipa lam inzuar chu ngaihven hman a ni lo! 

Iptepui kan bànna Hotel MGM Grand

Iptepui kan bànna Hotel MGM Grand

Fairy Tales hriatchhuah nawn a awl

Fairy Tales hriatchhuah nawn a awl

Golden City èm chu a ni si lo!

Golden City èm chu a ni si lo!

Van boruak emaw i ti elo? Lei hnuai Cassino ceiling a nih khi

Van boruak emaw i ti elo? Lei hnuai Cassino ceiling a nih khi

 

Pâwn chhuah a nuam —thlèr tin khawi’maw laiah hian tlangvâl rualin lehkha them an lo keng ang … deck of card an shuffle ri tuar tuar ang hian chùng cards chu an lo shuffle ri tuar tuar ang a, kutphah ben rìk zeuh nân an han hmang zo chiah kha … card (visiting card) tiat lek chu an pe ang che. Thlîr chiang rawh —nula lem, saruak —engemaw lang lem … mutpui man tùr zàt inziaksa thlap a lo ni ang. An hmuh lai là làa khawlaia an hùn trash-can-a paih pawh a pawi lo —duh dâwn viau tàk leh ah that hmak mai tùr. Phone Number a lo awm vek ang, nula hmêl pawh a chhe deuh leh tha deuh, pian nalh leh nalh vak lo deuh pawh … koh thlen hmâa hmuh làwk theih vek a ni ta mai!

Music hi hmun tinah a ri thùm khul khul mai a, Caesar’s Palace an tih kawtkai phei chu dìl mawi tak a ni a. A sîrah mi an zi huai huai a. Chuta kan kal phei lai takin —thin phùtna dàwrh khawpin thil a puak a. Bomb puak emaw tih mai tùrin … a lo ni àwzâwng lo mai! Dìl atang khân mawi lutukin FOUNTAIN thle nghual nghual, sang taka invawrh chang neiin —rawng chi tinrênga khawh mawi rawn … thlìr ninawm lo fahran mai an rawn show hi a ni a. Mipuiin an thlîr thuap a —ennawm mak tak, ninawm rèng rèng lo, hmuhnawm mak dangdai a tling. Mipui pawh chi tam an awm —a then Viking anga inthuam, a then Pirates inthuam —hmuhnawm hlìrin thlèr tin a khat vek … zu rui buai tumah erawh an awm lo thung. Police car a vei sek reng bawk a, motor thenkhatah nula saruak lem intâr a tlàn zut zut bawk.

Las Vegas khaw Biak Inte chu Pastor-in an vil chilh ve fir fer a, innei duh apiang —man chawiin an lo inkutsuihtîr ve mai zèl a, pastor-te tân pawh eihmuhna samkhai tak a ni letling!

Advertisements

One Response

Subscribe to comments with RSS.

  1. Zaia said, on October 6, 2009 at 6:00 am

    A ngaihnawm. I blog-ah kan nileng thei mai dawn alawm mawle!!


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: