Chawnghilh's Blog

Road Repair

Posted in Qualitus : Habitus by chawnghilh on October 15, 2009

DSC_0094

 

 

DSC_0091

 

 

 

 

DSC_0096

 

ACCIDENT tih thuthang mai pawh ni lo, chètsualna leh thihna, chhiatna, ramtuileilova chan hlenna, damloh bawrhsàwmna min thlen ta a thleng zing malh malh hle mai. Fùrtui tlàk hnem lai a ni a, ruahsûr laia kawr kàn pawh fîmkhùr ahnèkin kan ngam riau tho va. Muthi Lui-a sabereka-khuangkaih kan dàwl zawh loh hnuah Bethlehem pitar kawr kàn tlusual pawh tuizàngkhauhvin a làk leh thute nèn! A pawi teh a ni.

Rih Dìl en haw lam Bus accident-ah Salvation Army thalai thî leh hliam kan awm nual a, a lirthei bera lah chhe bawk. Thênzâwl atanga KTP kìr lehlam Chàngte kama an chètsualna ràpthlàk tak te, Hnahlàn atanga UPC thalai bus radiator tuisovin a phuh chiam chanchin te, Rawpuichhìp leh Dàpchhuah inkâra Sumo accident leh thihna, inhliamna chanchin te …. zualko thu kengten thu min rawn hrilh thlen rual rualin chhiattawhna dangin a rawn ùm pha hman zèl ni berin a lang. Kalchhuah dâwnin Pathian kut-chakah kan inkawltîr ngun em?

FIMKHUR hi a ngai khawp mai. Sakei seh aiin motor accident-te hi a hlauhawm daih tawh zàwk tih hre chiangtute vek kan ni ta. Chhûngkua kuaa car-a zinhote hi ka duh ve hauh lo! Chhûngkaw mang thakna a thleng thei tih ka hai tlat lo! Kan lamliante pawh —Zoram-ah chuan National Highway 54 ni ve tumhrang mah se, a la zîm hle a. A aia zau zàwka tih ngei tumna policy pawh Ministry chelh mêktu chuan an Party Policy, mipuihmaa an inzawrhnaah an ziak lang a. An tih ngei pawh beisei vat bawk ila.

Nimahsela, kawng zîm kan la neih chhûng hi chuan —driver-te leh làmliana kal ve rèng rèngte pawhin fîmkhùr kan chhuah tlàn vek a ngai hle. Sai pawh hi keini mihringte ai hian fîmkhùr a chhuah zàwk em ni a tih theih —a kalna tùr hi a nghet nge nghet lo tiin a finfiah hmasa ziahin —a nawn sensitive tak leh a ke hma lam hmangin a chhinlàwk vek zèl. Rah ngam loh chu a rap zui lo mai a ni. Chutiang bawkin, kan Mizo driver-te pawh hian mi nunna hlu tak tak leh ama nunna kha steering wheel vuantu a nihnaah a mawhphurhna a sâng tih hre chiang lehzual se, clutch leh brake pedals leh stick shift gears maiah a thiamna hi tàwp suh se. Fùr tui tam lai chuan metal chin bàk rap lo ngam se, intihhuaisen kha thihna leh kumkhaw chawrlohnaah a chang palh ang e. Indian Jawan-ho pawh hi motor kawnga intawh chângin an ngêng hlein kan hria, “A va dai lèr/sîr ngam lo,” ti tein kan dem lek lek thìn. An inzirnaah a dik takin thil an zir a, metal inphah dum chin bàk rah a thiang lo va, an rap lo mai a ni. Accident pawh an ngah lo deuh nge nge. Sipai-ah phei chuan motor khalh dànte hi a dang vek —chho zâwnga First gear a ngaihna chiahah —a chhuk zâwnga tlàn pawhin First gear thovin a tlàn ngei ngei tùr a ni. An fîmkhur hle a ni. A chuangliamin an inti-mipa  duh lo.

Tin, kan ramah mobile phone pawh kan hùm kim a ni deuhthàw tawh mai a; kawng chhia leh a mìn hlauhthàwnawm kan hmuh rèng rèng hi chu kawngpui enkawltute hnèna a rang lama inhrilh hriat zung zung hi zin veivak mite chuan kan kovah dah ve ngam ta ila. Kawng lam enkawltute pawhin ùmzui vat zèl se. Heti zâwng hian a tharin tan la leh ta ila, kan kalphungah CHANGE duhawm leh tangkai zàwk i dapchhuak teh ang u.

Hèng Khawthlang-ramah te pawh kawng a la chhiat hman loh teh rèng nèn, road repair hi an ti vat vat mai zèl a, a lema ka rawn tàrlan —an kawng repair lai khi ka va thlîr ngial a. Kan ram kawngpui boulder leh rawrâ, alkatra leh rawrà chhuan-pawlh kan phah nèn chuan inchhah hleih bêr bêr tak a ni. An kawng repair-na laia cement an chhùn luh thùk zâwng hi feet 3 dâwn thuak zuk ni a! A nghet tha mep mep teh ang chu.

Kan ram building tam tak leh a chhûnga furniture ropui tham tak tak te han chhùt rùk neuh neuh hian —kan ram kawng chu tha lutuk tùr ziazang a ni bawk lo a ni! Liam tawh chu liam tawh ni se —a thara ram kan indin a ngai a. Hruaitute hi rinawm leh fel chauh ni ringawt lo —hna thawk chak leh taima, hna thawk tha kan mamawh ta. Kawngpui hmang nî tintu —driver-ten himdam taka kan kalna hmun tùr theuh min thlen hi a duhthusàmawm hle ta.

Chhim lama ramchhuak dùn inkah palh thuin thinlung a dêng hle bawk. Ramsa chanchin hre chiangin —ramchhuak dun ni se, inhai hauh loh nân kawr sen ve ve hàk nachâng hria sela chu —an inkàp palh hauh lo vang le! A pawi hman ta, thil kan tih ve hian —kimchang taka ngaihtuah làwk a ngai khawp mai!

Lawngtlai atanga Bûngtlâng South tlàn thla tùrte Lawngtlai daihnai hmun zâwl remchâng takah “Tawngtaina” an hmang ziah thìn a. Chutah chuan Pastor pakhat zin thla ve hi a awm a. Mizoram State Transport Bus driver lah khàn zu a rui nu phût mai a, tawngtai tùr chuan Pastor a ding ta tharh a, “Aw Lalpa, I kut chakah kan rawn inhlàn vek e. Min han thlîr chiang la, kan driver ber lah heti phêt phût khawp hian a rui a …” tiin a chham tel kher a ni! Pathianin tluang takin a hruai hlawm a —Driver pawh khati khawpa nù phêt phût kha, fîmkhur taka a khalh tàkah chuan —him takin passenger-ten an tum-ram, dam leh tluang takin an thleng ta vek hlawm.

Kan ni tin zinkawng hi a bumboh châng awm thìn  mah se, tumram him taka min thlentu lìrthei leh a driver fimkhur tak te kan mamawh zual  ta hle. Chutianga fîmkhur DRIVER chu Zofa-ten kan la ngah a ni. A tharin, tan i la leh ang u. Abrahama Pathian, Isaaka Pathian, Jakoba Pathian —kan Pathianin Mizoram leh a mipuite mal min sàwm nawn leh rawh se. Kawng engkima kan thil tawnah —ropuina leh chawimawina Lalpa Isua Kristan (Yahshua ha Messiah) chang zèl rawh se.

Advertisements

4 Responses

Subscribe to comments with RSS.

  1. Mzvision said, on October 24, 2009 at 6:06 pm

    Ka va lawm em, ka beisei reng thrin mi(sual) a leng lo i han tithei hi, ka chhuang che, ka lawm bawk, chhunzawm zel rawh, thrianpa thrianpa

    • chawnghilh said, on October 29, 2009 at 10:45 pm

      Mi phut lui em a, ka rawn ti ve ta mai a ni. Ka thiam vak lo. Ka kutchhuak hian mi(sual).com a tluk lo khawp mai! Min fuihpawrh vanga rawn ti ka ni chauh e.

  2. Mzvision said, on October 26, 2009 at 9:06 am

    Ka rindan in pics a kawng han en hian pot hole insiam tran tur niin an lang. miramah chuan kawng an repair hian a hnuailam an haichhuak chawk. Chu chu fill leh turin premix hi an rawn phur thrin batching plant atrangin. Chumi fill lai chu a ang e

  3. hmingtea said, on November 3, 2009 at 8:23 pm

    In truck ang kha he lamah poh an uar khawp mai US pumchhuak poh a tam ve khawp mai


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: