Chawnghilh's Blog

Dârkâr khatin kan herh kìr

Posted in Qualitus : Habitus by chawnghilh on November 1, 2009

November 1, 2009 a lo ni ve ta! Zîng dâr 6:30-a tho thìn kha dar 6:30-ah tho thovin khua a lo èng hman ve ta! Sana manual chi-ah chuan herh kìr chawp a ngai vek a, digital thil rèng rèngah chuan mi fate thluak hi a lo tha kim khawp mai … a nih tùr ang thlapa an duanlàwk dànin, a hun takah a dik takin a rawn per dik ta mai a ni.

Big Ben hun vawn dikzia te kha an sawi thìn; kum zabi thar kan kai dâwn khân, ‘minute 1 vèlin an herh mil ve e,’ an tih kha! Hun vawn dik hi hnam fingte inelna a lo ni khawp mai! Jonathan Swift-a thawnthu ziak Gulliver’s Travel kha min tihrechhuak uai uai … Gulliver-a khàn Kumpinu Sorkâr lian leh ropui a lo entîrah ka ngai a; mi tè (dwarf/liliputian)-ho awmna rama a zin kual khàn ‘hnam dang zawng zawngte kha chu an lo hmu tè hle-ah’ min ngaihtîr cham cham bawk a —allegory huatthlalà, thawnthu chapo tham tak pawh a tling hial àwm e. Kha thawnthuah khân sana an lo hmuchhuak hman tawh a ni tih a lang chiang khawp mai! Saidawiûm lai rèka tiauvut thun khah, an hùn lehlin zak zak hun kha chu an pèl fel tawh ni àwm tak a ni … a kàwnga a sana pai, khaidiat sîn mawi taka hlin kha a phawrh chhèn thin kha! Hun kha mihringin a vawng tawh lo a ang viau —hun zàwk khàn mihring leikàng chin kha chu a control hneh tawh hle ni te pawhin a lang rum rum e. Sawi thui chiam lo ila —

Nia le, October 31 zîng dâr 6:30 AM-ah te khân khua a la vâr hman ngai meuh lo va; mahse, November 1, 2009 atang hian dârkâr khatin USA leh Canada chuan a herh kìr tawp —zîng dâr 6:30 AM-ah chuan leilung a lang ve rû rû thei tawh bawk ang a, tlai lam dâr 6:30 PM vèlah khua a thim ve chhulh thei tawh bawk ang.

Digital khawvèl hi a mak khawp asin —mobile-phone nei changkâng in awm ngei ang  —lo chhin ve mai mai teh u —time zone hrang hrang a lan kha … in adjust hranpà ngai miah lovin in mobile-phone-ah khân USA leh Canada hun, dârkâr khat herh kìr hi a lo lang iar mai ang. In tihchawp ngai miah lovin!

Kei ngei pawhin tùnhmâ pawha mak ka lo tih thin, a thente tâna thil thar pawh a ni mah nà! Tin, a hre tawhte pawhin min lo ngaihhnathiam dâwn nia. Intehre lutukah min puh lo ula!

Sawi kai tàk rau rauvah chuan, i mobile-phone emaw, i computer keyboard kha ngun takin en chiang nawn leh la —5 awmna button khawi’maw  berah khân pimple (thil bawl/arngêng) a awm ngei ngei tùr a ni —mitdelte tâna hriat a samkhai ve theihna tùra duan a nih hrim hrim kha. Mitdelte hriat, mitvâr neiten kan lo hre lo palh ang e.

En chiang rawh, 5 awmna button ber kherah khân pimple a awm  ngei ngei tùr a ni. Mitdelte pawhin samkhai zàwka button an hriat theihna tùrin 5 button-ah khân pimple dah a ni e. Chuta tanga chung lamah ‘2 button,’ a vei lamah ‘4 button,’ a dinglamah ‘6 button,’ a hnuai lamah ‘8 button’ a awm tih an hre zung zung thei tawh bawk.

Thil siamtute hian an tawngpâwng siam mai mai lo va —kawnghmang nei takin an siam thlip thlep tih hriatpui ve a tha tho.

Ka làwm e.

Belh lawk ila, October 31 zàn kan hmang liam ta, he lamah chuan Kristian inti tho siin Halloween an hmang nasa mai a, zàninah ringawt pawh neighborhood naupang za chuang hnènah candy engemaw zàt lai kan sem tawh, an rawn kal zut mai. Ramhuai puala Kùtpui neih hi Kristian-te tihdàn tùr a nih lo vei nèn! Lady Obama pawh keite (leopard) angin a inchei a —a tak tak emaw ka ti hial!

I Korinth 6:14 Ring lo mite nèn rual lo taka nghâwngkawl bàt dùnin awm suh u; suahsualna leh felnain engnge intàwmna an neih? A nih loh leh thim leh èngin engnge inpàwlna an neih? 6:15 Beliara leh Krista pawhin engnge inngeihna an neih? A nih loh leh ring lo leh ringtu chuan engnge chan dun an neih? 6:16 Milemte leh Pathian biak in (naos) pawhin engnge inremna an neih? Keini zawng Pathian nung biak in kan ni si; Pathianin, “Anmahniah ka awm ang a, Anmahniah ka leng bawk ang; Tin, an Pathian ka ni ang a, Anni pawh ka mite an ni ang,” a tih ang khân. 6:17 Chuvàngin, “An zîng ata lo chhuak ula, A hrangin awm rawh u, Thil bawlhhlawh rèng rèng pawh dek suh u,’ LALPAN (Yahweh)-in a ti,” chutichuan, ” ‘Ka làwm ang che u a, 6:18 In tân Pa ka ni ang a, Nangni pawh ka tan fanu fapa in ni ang,’ LALPA Engkimtitheia chuan a ti,”

 

Tirhkoh Paula khian ramhuai dawhkàn leh Kristâ dawhkàn, Beliara leh Krista (Messia)  a inhnimhnaih theih loh thu a sawi chiang viau! Zoram-ah engtikah tak INTRODUCE ve leh ang maw?

Kristianna hi a dal lam zèlin a kal ta! : I fîmkhur viau teh ang u,” tih thuin ka rawn sâwm nawn a che u.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: