Chawnghilh's Blog

English Spelling Mizo-ten kan tihsual langsàrte

Posted in Qualitus : Habitus by chawnghilh on November 1, 2009

DSC_0251

 

 

Thil ho tè anga kan ngaih, kan nàmnùl leh hriat chian loh hi a tam thei duh fû àwm e. Inzir belh ngai zèl kan ni a, kan hriat chin a dik hnem poh leh mi nihlawh leh vànnei bìk kan ni mai!

Guiter kan ti fo —guitar a ni zàwk e. Acoustic pawh hi accoustic tih awl khawp. Hla leh rimawi ngaina hnam kan nih teh rèng nèn, solfa tia ziak fo sol-fa thiam tak tak an tam mai! Professor Dârchhàwna deuh chiahin sol-fa tiin a ziak, a ziak dik awm chhun a ni hial mai àwm e. Lêngzèm chanchinbu enkawltute leh Synod lama Kristian Hla Bu viltute meuh pawhin solfa tiin an ziak deuh ber. A spelling dik SOL-FA ti ngeiin an la ziak thiam ve vat tùrah i ngai ang.

Lumèttu (hazam)-te’n an Dàwr hming SALOON tiin an ziak châwk, SALON tia ziak zàwk àwm tak! Hotel nei changkàng fu fute pawhin accomodation tia ziak ang chîng —double cc leh double mm a awm kawp a ni tih hre renga “accommodation” tia ziak an la chîng zui ve mai ang. Fooding and Lodging tih hi India ramah an chîng zualkai, Middle East-ah pawh an chîng fû —Food and Lodging tiin, a tawng neitute chuan an ziak deuh ber. Ka thianpa Joseph Kay chu kum 90 mi a ni a, hmàn nî chu, “Kay, Britisher tih thumal hi English-hovin in nei em?” tiin ka zàwt fiam a; “Kan nei rèng rèng lo —British tih kan nei,” tiin, min chhâng. Occasion pawh hi Ocassion tia ziak chîng riau an awm —dik tak chuan pronunciation hi kan hman dik chuan, spelling hi a khirh èm èm hran vak lo. Message hi Magazine-ah an ziak chawk a; spelling tihsual palh chuan MASSAGE a tih theih ve tlat! College leh Collage awmzia hre hrang pâwl tak nia lang chu Châltlâng-a SCERT-hote khi an ni. Calendar ziak sual hràt pawhin Calender an ti daih zel —puan nàwt martu (calender)-ah an chhuah daih thìn asin le!

Grammer ti tàwk apui pawh kan tam, grammar tih a dik zàwk bawk e. “Artui plate thum ka lei,” ti fote ai chuan, a dik taka “Artui crate thum ka lei,” titu an vâng pharh zàwk! Lehkha ziak pawh kan peih —Magagine nge Magazine tia rilru tibuai fo pawh kan awm ngei ang, Magazine chhiar tùr tha tak tak Mizo-te pawhin kan nei ve dâwn a ang ta! Lehkhabu ziaktu tam tak ten Forward leh Foreword hre hrang lo —lehkhabu hmêl mawi ve taka FORWARD tia ziak ve ta mai mai pawh an awm nàwk! Lalkhama IAS leh Brig T Sailo-te pawhin an ngaihhaih palh a ni ngei ang —an Lehkhabu-ah FOREWORD ti lovin FORWARD tiin an ziak tlat! Milian leh intipawimawh chinten an tihsual zin pâwl chu Memorundum tia an ziak fo hi i lo chhinchhiahsak ngai em? Memorandum titha ve hle hle mai se. Pastor Quarters, PWD Quarters tih tùrah Pastor Quater/Quarter emaw PWD Quater/Quarter tia ziak kan chîng zauh zauh bawk, chènna in a nih chuan quarters tih ngei ngei a ngai. Government ti lova Goverment tia ziak an awm zauh zauh; vedio tih hi a awl —video tih hi hriat a harsa ru riau a niang!

Chanchinbu kan chhuah ve ta fo, FORTHNIGHTLY tia ziak ka hmu fo mai —a dik lo a ni tih hre lo chuang lo kan la tam hle leh nghàl. A dik tak tùr ang chuan FORTNIGHTLY tih mawlh tùr  a ni. FORT hi fourteen lamtawi a ni a —chawlhkâr hnih huap Chanchinbu a ni tih hi hre chiang ila. Tin, Forty (40) tih tùra FOURTY tia ziak an awm phauh phauh bawk.  Postpone tih thumal hi kan lamrìk dànin a zir chiah lo a ni ngei ang; postpond tia kan ziah fo nachhan hi! Mizoram-a kan MALL lian ber leh changkàng ber hming pawh hi kan ziak sual fo—MILLENNIUM Centre—double LL leh double NN a awm tih hre chiang vek hlawm ila maw le! Centre tih leh Center hi chu duhzàwk hman thiang ni mai se —chèttlatna hmun azirin Aizâwl-a mi chu—kan British deuh hlek zàwk bawk a—Centre tih a mawihnai mai thei! Tum khat chu GOVERNMENT lamtawi hi Century Board-ah ka lo ziak ve khanglâng a. Professor pakhat hian, “Engati nge apostrophe tela i ziak kher?” tiin min chhuahchhàl a. GOV’T tiin ka lo ziak ve  miau si. Mi tihdàn ni miau hek. Chumi kum 1975 atang chuan GOVT ti char charin ka ziak ve ta. Zirtîrtu changkâng fu fu GOV’T tia ziak ka hmu hnem thei khawp mai! Professor tih spelling pawh hi mi tam takin Proffessor tia ziak ka hmu leh zauh thìn! Hnam changkàng zàwkten Advent Christmas kalphung bìk leh a hun chhûng bìk neia an hman (Christmas a thlen hma Sunday pali chhûngkhung inbuatsaihna hun)-a an hman laiin Mizoram-ah ve thung chuan ADVANCED Christmas a awm thei tlat thung bawk!

1964 AD tih ai chuan AD 1964 tih zàwk tùr (figure hmaa AD dah ngei ngei tùr); BC 345 tih ai chuan 345 BC tih zàwk tùr (BC dah dâwn chuan figure hnu-ah BC dah a ni thìn) —BC leh AD ziak dànah fîmkhur taka ziaktu Historian-te meuh pawh an la vâng hle. Tin, 1st December tih chu kan ziak dik, 11st December tia ziak mai kan awm palh fo, elevenTH a nih hre rengin 11th tia ziak ngei ngei tùr. 21th tiin i ziak ngawt ang e, twenty-firST tih hre rengin 21st tia ziak ni se. Number hi lam rì hmasa thìn ila, twentysecoND tia i lam rìk chuan 22nd tia ziak i thiam mai ang, twentythiRD pawh 23rd, thirteenTH pawh 13th —a va THIAM awlsam ta si ve le! Congratulations!

SPELLING piah lamah pronunciation dik lo hi tàrlan zauh a tha tel bawk. L. Keivom te, Dr Laltluangliana Khiangte te hian sàptawng thumal ni si —Mizo sipel-a an dah luih thin avàng hian nakinah chuan spelling dik kan ngaipawimawh lo thei mai ang em aw? “Cigarette ka va lei ngheng mai, CARTOON thum lai ka va lei,” titu hian, a sawi tum tak zàwk chu “CARTON thum” a ni zàwk! February pawh Fe-bua-ri tia lam kan tam. Bale (secondhand bale), belt (fan belt) leh bail (mi man an bail chhuak) hre hrang chiangkuang lo pawh kan tam tho àwm e.  Motorcycle leh Scootie pawh kan ngah ve ta, a dinglam throttle han tuai vira revolution han pèk ham ham hi a lamtawiin ‘rev’ tih a ni a; mahse, raise/raze tiin kan lamri tlângpui —tih leh hunah chuan, “Han rev ham ham teh,” kan ti tawh dâwn nia. Tin, torchlight hi TOSS-light tia lamrìk a awlsam a niang —mi tam tak lam rìk dàn a ni ve tlat! American takin Flashlight tiin lam thang ila, kan lam dik mai ang!

Sawi kai ta zèl ila —vaipurùnsen hi en chiang teh —a shape hi a bulbous (puar kiar pap) reuh a; chutiang takin Electric BULB kan nei zui ta a — Chhûngkaw tam takin, “BULB” tia lam ri lovin —Balf/bulf ti lam lek leka lam rì ka hre hnem tlat! Lamrìk dàn chheh that a harsàt vak ka ring lo. Kan sawi kai ta sa sa Electric pawh hi ElectricT tia ziak kan awm nual, ELECTRIC tih hi a dik tàwk viau! A tàwp lama T hi bonus belh kher a ngai hranpà lo ve! Electric wire han cheh chhum nânte hian Plyers (thìrchaicheh) kan mamawh fo —mi tam tak chuan PLYERS hi kan sawi players fo mai! Nula tam takin PALMOLIVE lamrìk dàn an la thiam tàwk lo fo —PAL+MO+LIVE tiin, syllable thumin an lam rì ka hre châwk —a dik lo. PALM + OLIVE a ni zawk a; chuvàngin, Palm Olive tia lamrìk a dik fê zàwk. Nula changkàng tak tak, lam ri dik map lo kan la tam hlein ka hria! Tin, a tlângpuiin tute mai pawh —Mizo zîngah leh vaiho zîngah pawh EVEREADY hi EVER+READY tia lam rì ka hre hnem viau mai! An thil mamawh èm èm an hre chiang lo hle niin a lang. A hming phuahtute phuah dàn kalhmang dik tak zàwkah erawh chuan —tlai lam EVE a lo niha INPUAHCHAH LAWK (ready) veka an neih hming angin a kal zàwk a, chu chu EVE READY (Tlai atâna inhmâkhualàwkna) tihna a ni daih zàwk. “Eng lai pawha Inpeih” tihna ni lovin, “Tlai lam atâna Inpuahchahlàwkna (Eve Ready) a ni zàwk bawk e.

Sipai bâng (Ex-Servicemen)-ten Lushai Hills hun lai khân Sàptawng thumal an rawn hàwnpui nasa hle —fawng (kho) khat lawih aia tam an rawn hàwn thleng hrim hrim a. An lamrìk (pronounce) dàn ang anga vàntlângin kan chhawm nun zuipui a tam hle bawk. Abìk takin Mechanism/Technical terms lam thila part/cog hmingte an ni tlângpui. Chùngte chu muangchângin kan la chhui zau zui lehzual dâwn nia!

Acknowledge sipel hian kan rilru a luah hneh mah mah a ni mai thei, privilege tih mai tùrah privileDge kan tih phah fo mai!

 

Ka ziak chhunzawm zèl dâwn —ngaihven peihte tân!

Advertisements

4 Responses

Subscribe to comments with RSS.

  1. Kima said, on November 2, 2009 at 5:28 am

    Very informative and useful post. Hotupa chu i ti tha hle mai.

  2. lalvetteia said, on November 4, 2009 at 6:56 pm

    Pu chawnghilh…. va tha em em ve…ka thiante hnenah ka lo forward ang

  3. Zoram_Genesis said, on November 6, 2009 at 5:10 am

    Bengvarthlak tak zet a ni! Mizoram Newspaper-ah chhuah ngei chi a va ni em!

  4. Epistemology said, on April 2, 2010 at 10:22 pm

    I thil post chu, ka ngaihven zawng tak a ni. A ngaihnawm bakah ngaihtuah zui tlak a ni. I tum loh lam zawngin lo kuai her hram ila, “i va han chhe zet zawt e aw!” min lo ti em lovang chu…

    Sap tawng kan han ti tak nain, khawvel hmun hrang hrangah hmangtu an tam tial tial a, khawmualpui dangah pawh Sap ho tawng kalpui dan lo a piang ve mek zel a. India ah pawh Khuswant Singh pawhin “hinglish” alo ti hial a. Ram thenkhat phei chuan, global kalchho mekah Sap ta bik anga ngaih pawh an duh meuh tawh lova. An ram leh hnam milin an lo duan belh a, Hetah tak mai hian, english mi ngei ho duan ang h “si- trick” takin kan zui reng tur em ni?

    Britisher tih ang chi hi- English ho ten nei chiah lo mahse, academic ah emaw article thenkhatah tawngkam thluaithlum nan an hmang viau zel mai. Concept pakhat ang a ni ve thei mai ang chu.

    A bak i sawi zawng zawng hi ka pawm e. Mizo te global tial tial mek lai hian hetiang lam inzirtirna hi a tam tawh lova, a tha takzetin ka hria. Tin, tunlai computer kan hmang nasa lutuk hian spelling min ti weak zo tawhin ka hria. Grammer…oh khaih ah… grammar a rawn pek fuh loh phei chuan- a dik lo nuai zel mai.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: