Chawnghilh's Blog

Punctuation in Mizo-script

Posted in Qualitus : Habitus by chawnghilh on November 3, 2009

DSC_0746

 

Punctuation hi Literature lama Traffic Lights ang a ni ve a. Period/full stop (.) a awm chuan CHAWLH ngei ngei a ngai a ni. Comma (,) a lo awm pawhin YIELD —ngaichâng paha chawlhdèt a ngai ve hrim hrim. Semi-colon (;) a lo awm phei chuan; thu kal tluang a inchhawp laiin a hnial kalh hret (negative) lam hawiin thu a rawn invawrh chho dâwn tih pawh hriat a tùl hmasa khawp mai. Mizo Literature-ah chuan PERIOD (full stop), COMMA, SEMI-COLON te hi kan hmang hnem ber. Chuvàngin, he paragraph tawi tèah hian ka ziak lang chiang hmasa duh kher a ni.

Sign leh Mark dang neuh neuh te pawh Mizoten kan hmang ve nual. Muang marin, a tahtawl deuhvin ziak ila —chhiartute tân pawh hriatthiam chian a nih ngei theih nân zàwk le. Theihpatàwp chhuaha in zir ve chuan in thiam thei chiang a ni. Kei pawh—Mizo Vernacular subject la bìk lo—mahse, Mizo tawng hi Institution pâwna ka khawsak hnuin ka hràt làk a. Intihuaisen deuhvin—hre zàwkte kian phal lovin—ka rawn târlang ngam a nih pek hi.

PUNCTUATION hi a pawimawh teh rèng nèn; kan rama thu ziaktu tam tak te pawh punctuation lama kaw lo tak tak an tam ve mai! Ni tin Chanchinbu leh Kâr tin Chanchinbu lama ziaktu thenkhatte phei chuan punctuation hi a hranpàa zir fê ngai a ni tih hre lo ang maiin; an duh duh dànin an thai tawp tawp ni berin a lang. Punctuation a mumal loh chuan thu chhiar a harsa bìk a, chhiar ngaihnàwm a khirh ru deuh bìk tlat. Zir chian a ngai a ni.

Vainu pakhat nèn Assamese tawngin kan inbia a. Upper Assam atanga Mizoram-a rawn zin a ni nghe nghe a. Kan inbiak kârlàkah; Mizo tawngin mi be chhunzawm ta thut mai a. Mak ka ti takzet a! A thiam reuh zèk leh nghàl a! “Mizo tawng a hàr angreng vei nèn —i va thiam ve,” ka’n ti dêk dèk a. Rang fahran hian, “Thiam chuan; har lo …” tiin min chhâng a. Kan nui dùn ta kiah kiah mai a.

THIAM CHUAN, thil hi a lo har hauh lo a ni ber e. Chipchiar zàwkin MIZO PUNCTUATION kalphung rawn chhawp chhuak ta ila —

 

PARAGRAPH —article, essay, Lehkhabu emaw rèng rèngah paragraph fel taka then a nih chhan a awm. Ziak-mite standard teh rùk nân a tihchi khawp. Thu tum hlàwm khat dahna a ni tlângpui a; paragraph thar hian thu hlàwm dang a rawn nei leh châwk thìn. Then fel thiam lo tân chuan thu a sai-sàin, a chawhchawrawi phah hial thei. Paragraph hmasa leh a dawttu inkâr ti-âwl an awm a; ti-àwl hran lo pawh an awm tho —a enga pawh chu ni se, Em/En khat vèla indent hreta pùk lùta bul tan a mawihnai duh fû. Paragraph sei lutuk fahran chu chhiar a hahthlàk a; tawi kim fel tàwka reh bun thiam a pawimawh. Sentence khat ringawt pawh—a thu azirin—paragraph khata hman theih a awm ve bawk.

Baden Powell-a pawhin “I was a boy once,” tih sentence tawi tè hi paragraph khat atân a hmang. Copy maktaduai chuang published a ni daih tawh. Achâng chuan paragraph thar siam hi a awlsam hran lo, Hebrai Mite hnèna Lehkhathawn hi i chhiar ngun chuan —paragraph thar bul tannaah, “Chutichuan …” tih te, “Chuvàngin …” ti tein a intan nawk nawk mai! Paragraph a sei lutuk loh nâna paragraph-a then luih hrim hrim pawh an an châng a tam.

CAPITAL —hawrawppui hi chi hnih a awm a, Upper-case Capital leh Lower-case-capital. Chumi then hrang thiam lo Mizo scholar-ho zîngah pawh an la awm nual! An hmu thuhmun vek ringawt a, CAPITAL tiin an ko hlawm tawp mai. Tin, scholar rau rau —an taste a inchen loh mai bàkah, inthiam hleih chu an lo awm khawp mai! A thente chuan an thiam na’ngiang e. 

Capital chi hnih hi —hman hun leh hman dàn a hrang hret. Thu uarna laia han hman bìk atân te—Lehkhabu thuziak bul tanna vèl cheimawi hret nânte—hnampui fing hmasa zàwkte hi chuan an hmang; chu chu Mizo literature nèna inkalh tlat tùra duan a ni hauh lo. Kan ram chanchinbu leh thuziak han puah-mawi lehzual nâna hmang zalèntu hmasa ber ka ni hial bawk. Sawisèl ka hlawh a; mahse—hnam dang lehkhabute ka thlìr chian cheuh cheuhvin—an mi sawisèlnate chu thu-narànah ka ngai thung!

Mark Twain-a TOM SAWYER hi  kum AD 1876 hun laia mi daih tawh kha a ni.  Lower-case Capital leh Upper-case Capital a hman dàn hian aw-râwl inrin hleih a lantîr chiang hle. Duh duha Mark Twain-a’n a dah vèl mai mai a ni hauh lo. Tom Sawyer —Bung bul ber a intan dàn a nih hi, a hnuaia rawn lanchiantîr hi thlêk chiang hlawm ila :

 

DSC_0156

 

Upper-case Capital chu sentence bul tanna, mimal leh hmun hming bìk (personal/place)-ah te, Kristian leh Judate Pathian hming leh chumi kungkaih nihna (title —Lalpa, Thlarau Thianghlim, Mihring Fapa)-a hman ngei ngei chi a ni. Tin, quotation (mi thusawi chhinchhiahna ” … “ ) bul tanna atâna hman ngei ngei tùr a ni bawk. Poetry/Poem tlar bul zèla hman ngei chi pawh a ni. Personal name hmakhalha nihna (title) —Sir, Dr., Rev., Prof., Mr., tih-ah te hian Upper-case Capital hman zèl a ni thìn. Thu lamtawi YMA, MHIP etc., leh an pâwl hming lam pum thumal intanna zèlah pawh Upper-case Capital hi hman thin tùr a ni —Young Mizo Association, Mizo Hmeichhe Insuihkhàwm wl ti tein. Thu zawhna sign (?) leh Interjectory sign (!) zawh chiahah Upper-case Capital bawka tan leh ziah tùr a ni bawk. Entîr nân —”I pa a dam em? A hmêl kha a tha ka ti thei lutuk.”  “E heu! I pa ai mahin i hmêl a tha zàwk elo?” tih angah te.

Thupui Caption hi a tlângpuithuin, space-in a daih phawt chuan Upper-case Capital an hmang châwk; mahse, hman ngei ngei tùr tihna bur a ni chuang lo. Chanchinbu phèk hmasa ber thupui pawh Bold letter-a ziak an chîng tawh zàwkmah. Essay Thupui atânte chuan BAWNGCHAL KAWLH CHANCHIN ti te pawha ziak a pawi lo. Tin, BC leh AD dah dàn tùr chungchângah chuan hnam fing zàwkte tih dàn làkchhàwn ve mai hi a kawnghmang ber. Entîrnân,Kum 4 BC-ah Isua a piang a, AD 30-ah a thi,” tia ziak a nih hian kum zàt figure (4) dah zawhah BC —nimahsela, AD hian kum figure (30) a hmakhalh ve leh thung ngei ngei thìn. Hetiang kawnghmang la hre lova lehkhabu ziaktu Mizo-te zîngah kan la tam phian a; Press neitu leh thawktute, lehkhabu ziaktute pawh heti lam kawngah hian ngawng rei lo ila a tha khawp ang. MBSE kutchhuak “Mizo Tawng Ziah Dàn” tih Bu thehlêpah khân mi kaihhruaina tùr mumal an la nei ngam lo deuh.

 

 Awm zèl tùr … hman remchàn huna ziak zawm zèl tura khèk a ni rih e

Advertisements

2 Responses

Subscribe to comments with RSS.

  1. […] is the original post: Punctuation in Mizo-script « Chawnghilh's Blog By admin | category: blog script | tags: 2009-chawnghilh, awm-chuan, full-stop, leave, […]

  2. Samuelapa said, on November 23, 2009 at 5:44 pm

    Ka tan che, han ti zel teh khai


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: