Chawnghilh's Blog

Back from Luray, Virginia

Posted in Qualitus : Habitus by chawnghilh on November 9, 2009

Berlin Wall chhut chim kum 20-na (1989-2009) champhaphàk a lo thleng leh ta reng mai! Korean-ho pawh rilruah an rawn lang thar uai uai! Engtikah tak—hetiang ang hun hi—la tawng ve thei ang maw? 

Ngaihtuahna fîm ka hman ve thiam hmâin, ka pa khàn Berlin khaw chanchin, zan khat thilthua barbed-wire-a daidan a nih dàn leh chhûngkhat zàn lêng chhuak an inhmuh leh theih tawh loh thu min hrilh kha ka hrechhuak rum rum mai! Min hrilh lai chuan Magazine pakhat hi a rawn hàwn tel a. Thlalàk innemkaite kha ngun takin kan thlîrho va … an chanchin ningkhàwng Russian Communism a inrawlh dànte kha ka hrethiam pha lo hle —tlaikhawhnuah kha Magazine kha kan chhuar emaw thingrem khawimaw laiah a la awm mial tàkin, tiin ka zawng nawn leh nasa mai a —ka hmu zo tawh si lo!

November 7-a kan tlànchhuak chu I-495 a remchâng hmasa ber bawk a, chuta tanga I-66W-a pakai tùr kan ni a. Kan pakai hnuin Virginia State-a I-66W Exit 45A chu ka va melh zauh va. Ka lung a tilêng riau va —Smithsonian Air and Space Museum panna lam kawng June 20, 2009-a ka va tlawh kha a ni a. Berlin Airlift 60th Anniversary (1948/49 – 2009) lawmna hun pawimawh kha a ni pah a, an motto chu, “Friends, Always” tih a ni a … Berlin Wall kan sawi kai tàk rau rauvah chuan Berlin Airlift 60th Anniversary ka’n sawi kai zauh a ni ber e. June 20, 2009 khân Virginia-ah ka zu chhim ve tak asin!

Smithsonian Air and Space Museum ka tlawh tum khân—ka hmanhmawh lutuk aleiah—car ka park fel hnuin, kawng an siama kea kal tha hle hle ta mai lovin, thingkùng an phunna hlobet hring dup chungah, shortcut ka insiam chawp rawk pek a. Kawngpui ka thleng fel hman chiah tihin Car pakhat hi ka hmâ chiahah a rawn ding nalh a. Pa pakhat a rawn chhuk nghàl a. Police Officer thuam chi kim veka inthuam—polite takin, “Hlobet chunga kal kha kan remti lo va. Khawngaih takin kìr leh la, kawng kan siam hi kal nân rawn hmang ta che,” min ti a. Thil sawi nawi chi a ni tawh lo. Kawng ka thleng hman tawh nàin, ka kìr leh a. Ani pawh chuan mi thlîr zui a. Kawng an siamah kher chuan—thui mah se—ka kal tha leh ta a nih chu! Chumi tuma tualchâra Thlawhtheihna an hùn chhuah zozaite chu ràlkhat atangin an thlâ ka zuk la a —ka che khir hle a ni. Hangar chhûngah thlawhna chi tinrêng an hûngin, ceiling-ah an khai tiar tuar bawk a. Ka la khèk hlawm a, ka la rawn târlang rih lo mai a ni e. Chu thlalak atang chuan Virginia Police Officer-in mi hauh hun ni leh darkar pawh in lo hre thei mai ang  :mrgreen:

 

DSC_0223

 

November 7, 2009-a ka zinna lam chanchin-ah i kìr ang :::: huphurh ai daihin Luray Town kan thleng hmâ. Dârkâr 1:45 chiah chauh a thlen nân hun kan hmang a. Kal lam chu kal lam a ni khawp mai!  Thla a sik tan ta bawk a, sakhi leh sazukten motor kawngpui blacktop luma zàna bawh an chîng tan leh ta a ang khawp mai —an ruang tharlâm tak tak pawh hmuh tùr a khât tàwkin a awm nual—English-a ziah ngam loh lam, Zin report a ni tlat—thlasik laiin feh chhuak zauh zauh ila chu, a rèp thar fê fê tùr leh an chek tui hàwp tùr kan hmu thluah ta ve ang. 

Luray Town hi khaw te tak tè, WHITE-ho chènna hmun a ni a. An che COUNTRY reuh khawp. A hmu apiangin KHAW FAI leh THIANGHLIM an tih a ni zèl a. A hmun leh a ramthlèng hi a mawi èm èm bawk. Police-ho hi duty-in kawtthlèr tinah an tlàn tawn reng a —Luray Town-ah hian In-kawngkapui tala-a kalh a ngai lo! Khawtuala inrawk leh thil rùk a thleng ngai lova sawi a ni a. Pathian biakna Biak In rèng a tam mai!

Caverns chhehvèl hi kum khat chhûng ringawt pawhin an lo thuam danglam hman hle a. Private property lamin an lo bawh hle tih pawh a hriat. In thar sak è ti lovin, a chung pawp sà ngeiin, hlui taka lang nghàl sàin in thar an lo sate khàn, an khawsak dàn hlui vawnthat an tum chianzia a tilang khawp mai! High-rise lama lung tilêng ngai lo mi ka ni bawk a, chùng thil thar hmuh nuam tak tak te chuan mit a titlai hle mai. 

 

DSC_0019

 

Kalkawng I-66 dung tluan hi a mawi hle a; mahse, chàng a tlai hman hret a—thing hnah mawi tak takte an lo tìl nasa hmanin, a la tìl lote an lo vuai khawro hman hret tawh a. Kàngmei a chhuah palh a hlauhawm hun lai tak a ni! Tùn atanga hun rei lo tèah vûr-khàwn-thlipui a rawn thawk tan dâwn chu a ni ta reng mai le! Windshield chhana lak hi a mawi mawh hle a, duh aiin vànte hi a dumpàwl duk duh mah mah a —tlàn dìng laklawh laia han PULL-OVER phalna chi lah hi a ni mang thìn si lo!

A bìk riauva i hriat atân, Inter-State Kawngpui ODD NUMBER nei tawh phawt hi chu Chhim leh Hmàr zâwnga tlàn an ni a; Inter-State Kawngpui EVEN NUMBER nei tawh phawt hi chu Chhak leh Thlang zâwnga tlàn an ni thung. US Route-te erawh chuan chutiang an ni hran ve lo.

 

DSC_0062

 

Luray Caverns hi hmun lùn tak a ni … tlawhtu hi englai pawhin a an awm reng a. Sum a làkluh pawh a tam tham hle ang. Indian vaiho pawh sari kaih delh delha rawn tei lùt hmuh tùr an awm ve reng mai! Sawi tawh angin, a pùk chhûnga zuk luh hi ka kham ve ti-tih tawh a —a kawtkaia lèn khawthawn erawh hi chu ka ning phal ngàng bìk lo. Ràlkhatah Blueridge Mountain a han lang paw chûk mai leh, romei chhùmin a han bawh vèl ve chiaite pawh hi a thlâ ka rawn la tel e.

 

DSC_0095

 

LURAY CAVERNS —ever since discovery in AD 1878 by a tinsmith and a local photographer, visitors by the millions have made Luray Caverns the most popular cave in eastern US and an internationally acclaimed destination.

4,000,000 centuries in the making beneath Virginia’s Shenandoah Valley, this “must see” US Natural landmark awaits your discovery. One hour guided tours, from well-lighted, paved walkways lead visitors through cathedral-sized rooms with ceilings 10 stories high. Enormous chambers are filled with towering stone columns, shimmering draperies and crystal-clear pools.

“Hear Rocks Sing” in this subterranean wonderland as you experience the haunting sounds of the world’s largest musical instrument, The great Stalacpipe Organ. Completely unique are the beautiful tones created by this one-of-a-kind instrument, which makes music of concert quality from the surrounding stalactite formations covering more than three acres.

For more than 125 years, Luray Caverns has been renowned as one of the world’s most spectacular natural wonders. A world of magic and majesty, still as marvelously beautiful as described in the newspaper headlines over a century ago. Come see —what you’ve been missing. Luray Caverns, it’s everything you can imagine at least from the website …

 

DSC_0176

 

Luray Caverns ep lam hi ram ruak a ni thìn a; mahse, kum khat chhûng hmuh loh kârin in thar an lo nasa hman leh tawh khawp mai. Sa thar hlim mah ni se, hlui tak anga lantîr tumin, a chung chih pawp hèk lai te an han siam chawp lui ngei a. Kum 200 liamta vèla mi ni àwm takin an sà thar a ni ber e. A pal inhung dànte hian Cowboy nunram min ngaihtîr a, ka lunga tilêng viau zèl mai! Zoram-in lung a tilêng a, helam pawhin lung tihlèn riauna pawh a nei ve tho niin a lang ber e.

 

DSC_0181

 

Luray Caverns tual sîrah hian Garden Maze an tih hi a awm tel ve bawk a. Zig-zag, riddle/puzzle ang hrìmin evergreen trees 1,500 aia tam, feet 8-a sang thiau an phun a, thingkùng leh thingkùng insi chèt kâr àwlah kalna kawng chèp tak mêl ½ vèla thui, kikawi tak taka kal theihna … tawn fuh neih châng pawh a awm ang, tawn fuh lem loh neih châng pawh —hmêltha tàwk, rilru vawm beina thlawp tùr kan mihring kawppui hlen ngawih ngawih tùr nèn GARDEN MAZE-ah chuan inhre làwk miah lovin han intawng rawih ta mai ila, a ROMANTIC viau lo’ng maw? He ornamental Garden Maze zau zâwng hi acre 1 a ni tawp mai a, a hmun a mawi bawk si —Mid-Atlantic-ah chuan hetianga huan an siam zînga ZAU BER a ni bawk e.

 

DSC_0185

 

Garden Maze chhak lawkah hian Car hlui dah khàwmna Museum hi a awm a. Car chi hrang hrang 125 zet an dah khàwm. Khawih an phal lo va, a chhûnga làwn luh pawh an phal lo. An roh khawp mai!  An thlâ pawh ka la kim thawkhat viau —kum AD 1725 hun lai atanga an Costume Dress-te pawh Car bula nula leh tlangvâlten an lo ha nual bawk a. Hun remchângah Car chi hrang hrang —a leikàn chhoh dàn zèl tàrlanna ni pahfàwma la rawn display ka tum dâwn nia! Mahse, ka weblog hi chhiartu ka ngah vak lo va; a lùn ber nîin mi 400 tling lo deuh hretin an chhiar a. Ni khata vawikhat mah visitor a hmuh loh nî pawh a awm —tùnah hian mi 100 – 150 vèlin ni khatah an tlawh chauh va, ziah tehchiam a phù hran rih lo a ang ber.

 

DSC_0191

 

Toward agently rolling fairways on the Caverns Country Club Resort overlook the fabled Shenandoah River. You would hardly believe your eyes!

Kum AD 1990 khân, Palakol Water-lock (Andra Pradesh, West Godavari District)-ah Bullock Cart accident lai ka mit ngeiin a tawngfuh tawh a. Ko-pang awihah bàwng leh a hnung hnuh tawlailìra coconut a phurh nèn, a neitupa hrilhhai tak nèna an inbun thla rum rum lai ka hmu tawh a. An thlâ ka la hman a, ka roh khawp leh nghàl. Ka la kawl that ka inring. November 7, 2009 pawh hian Thlawhna accident hlim hlawl ka va nang fuh hman a. An zak angreng khawp mai a. An thla ka là pawh —an hmai an hup chawih chawih a. Mahse, an hup thlen hmain ka la hman nasa mai si! “Puih theihna che u ka nei em?” tiin ka zàwt a. An hmêl an tihlim thiam khawp mai! Ka thiam zâwng a tam lo bawk a, inrawlh loh mai kha a finthlàk zàwk bawk a … ka tlànsan leh ta  a ni.

 

DSC_0196

 

Lake Arrowhead hian ka lung a tilêng viau mai zèl a, tlawh lo hian hun ka hmang thei ngai lo a ni ber e. Mahse, thing hnah rawng mawi zual lai ber hun a lo pèl fel hman a, thlalàk mawi tak ka hàwn thei ta lo! Hàwn kawngah SILO mawi tak, lung tilêng thei fahran mai hi ka hmu fuh a. Ka’n la hman hràm a. Luray Town atang chuan US Route 211 E zawh chhovin, Skyline Drive-ah kan tlàn kawi chho ta zuai zuai a. Zoram kawng ai mahin Meghalaya kawng a ang zàwk a —râwlthar laia College kan kal ve lai hunte min dàwnkìrtîr ang reng fû! He kawnga tlàn chhoh lai hian Shenandoah National Park Skyline Drive a ni tih hai chi rual a ni lo! Skyline Drive-a kalte chuan Blue Ridge Mountain an fang chiam tihna a ni mai!

Shenandoah National Park receives 1.5 million visitors each year who enjoy over 197,000 acres of land and 500 miles of hiking trails, including 101 miles of the Appalachian Trail. The unique georaphy, stunning waterfalls, plentiful wildlife, and more than 75 viewing points along the historic Skyline Drive, are some of the area’s most popular attractions. The Drive winds 105 miles along the crest of the mountains, providing spectacular vistas to the east and west. Natural and cultural exhibits and special information programs are offered seasonally within the Park. There are 4 campgrounds, 3 lodging facilities, dining, retail, and much more. In the year AD 2011, the Park will be celebrating its 75th anniversary with numerous special events.

 

DSC_0354

 

A hnuaia picture tàrlan — Luray Singing Tower chu ka hmu nawn leh pawhin ka inring tawh lo. Feet 117 laia sânga lungrem TOWER a ni a —the Tower contains a carillon of 47 bells, the largest weighing 7,640 pounds. This is one of the country’s major carillons and free carillon recitals are held from spring through fall in a picturesque park opposite Luray Caverns.

 

DSC_0097

 

 

Hàwn kawng chu kal lam aiin a thui ta fê … tin, Weekend hmang an lo tam tham bawk a … Inter-State Highway chu tuipui lian a tawlh dùl dùl ang maiin —dinglam leh vei lamah Car chhiarsèn rual lohvin kan zawh kûl zùk zùk a ang ber e … speed phal zàt ang pawha tlàn theih lohna hmun a tam hle. Dârkâr 3½ vèl lai mahnî in thlen nân hun kan hmang ta thung a ni. Luray vel ka kal nachhan ber chu thla ka lo lak tawh zozai, computer chhe taah a awm vek avangin engmah ka kawl tawh si lo va —Luray Caverns, Luray Town, Lake Arrowhead leh a dai hnai Skyline Dirve hmuh kim hrim hrim hi thil namai lo a ni ve pakhat tlat atin a ni!

Thlalàk frame 377 lai ka hàwn ve thei a, nihlawh ka inti hle. Zinchhuah hi thil harsâ, American mi tam takin chàk ena an en loh hial a ni —chutih lai kâra he chance nei theia ka awm hi … ka nihlawh khawp mai! Chaw kan fàkna hmun Mimslyn Inn vèl pawh tàrlan ka chàk viau nàin, remchâng dang i ngaichâng tawh mai teh ang.

Chawnghilh’s Weblog i rawn tlawh ve thin avàngin, ka làwm e.

 

DSC_0400

Advertisements

2 Responses

Subscribe to comments with RSS.

  1. hmingtea said, on November 9, 2009 at 7:25 pm

    pic i nei toih ngei mai

  2. tetea7 said, on November 11, 2009 at 5:00 am

    I computer kha tichhe tawh suh aw! Repair mai lah a remchang tawh mang si loh hmel sia!


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: