Chawnghilh's Blog

Vûrsûr hmatâwng kan hmabàk ta (Awaiting first flakes)

Posted in Qualitus : Habitus by chawnghilh on November 10, 2009

November 10, 2009 a ni ta. November 1, 2009 atanga dârkâr khat herh kìr azârah zîng dâr 6:30 AM vèlah leilung a rawn lang ve dèt dèt a, tlai lam dâr 5:30PM-ah ‘unau hmêlhai’ hun kan hmang ve leh thei ta! Khaw-èn hun a rei lo ta hle mai! Thlasik rim a nam tan ve ta tak tak e.

 

DSC_0001

Car ka hmuh tawh azàwngah he car hi a la tè ber —a pilsîn viau!

DSC_0003

 

DSC_0018

 

“Thou shalt love thy neighbor,” han tih tehchiam pawh hi he ramah hi chuan a APPLY tak tak theih loh! Chuvàngin, thingtlâng-nun (Country-life) an la chhawm nunna khuaah te chuan a nuam deuh mah nà! Berkeley leh Luray khawtlâng nun hi ka mil tàwk chauh a ni.

Kan chènna chhehvèla thing hnahte a tla kawlh hle tawh a —hnah la châmbâng hnufual zual thlâ làin ka teichhuak a. Chawlhkâr lo awm leh tùrah chuan thingkùng hnah nei kan hmu tawh rih dâwn lo a ang. Thlasìk vûr a hnai ta … November thla a nih tawh hi chuan vûr hian kan kawtkai a rawn bawh tan ti-tih tawh a ni mai!

Kawngkapui bulah hian suahdûr kan tung ràn mai a —chu chu kan lo inrâlrin làwkna a ni ta ber mai! “SHOVELING,” kan ti mai a, kawtkaia vûr tlà kha a khal-ruh zual hmâin suahdûrin kan làwk hlawih hlawih a. Paih kian vat loh chuan vûr kha a khang ve vat mai a, a tlàkna chhuat rawng dum a làn tlang aleiah a dum ral mai a —black-ice an tih phah a. A nàl èm èm a, dai-sual palha inhliamna khawpa tlùksual awl èm èm a ni. Hmuh mai pawh a harsâ a, rahsual rual ruala thàl tawp rualin black-ice a awm tih kan hre chauh va —a pawi thui hman duh khawp! Motor pawh khalh fîmkhur a ngai hle a —vûr khal tihtuina hmanrua atân chi phultu Truck an vei vut vut reng thìn a. Truck thenkhatte chuan dozer-blade vuahin vùr an nawr khawk thìn. Vûr hi a tla hnem thei hle a —feet 9 dâwn dâwn te pawhin a tla mai zèl!

In chung pawh hi an chih fîmkhur asin! Di-thli-fàr-fêm atanga vûrkhàwn a rawn tlàk thlàk mai theih lohna tùrin di-thli-fàr-fêm chung lawkah hian thìr-filawr an dah tiar tuar thìn a, (a hnuaia thlalàk en chiang teh) chu chuan vûrkhàwn tawlh tùr kha a vêng ve riau a. Ni sâin a èm-tui a nih chuan tuidàwnah a luang ve leh mai bawk a. Vûrtlàng kha rit leh khàwn tàwkin rawn tla thei ta huk sela, mihring tân pawh a hlauhawm dâwn tlat a. Chuvàngin, inhmâkhua dàn hi a ram sik leh sâ azìrin an lo thiam khawp mai!

 

DSC_0024

 

 

Khua hi a’n vàwt thei lailêng khawp a —sawiin a siak mawlh lo. Kawtkaia vûr tla thenfai hi hna hautak fê a ni thàm a. US Dollar 20 hlawh tumin mi an rawn inlan thìn a. Boot rawng sâng a chhûng lum tàwk, kutkawr chhah tàwk, jacket lum tak nèn an rawn inthuam a. An rawn thaw khu hluah hluah  mai a. Inhlawhna rawn zawng an kàt ve nuk thìn.

Ka che maksak lui duh ve hrim hrim bawk a —tàwnzau dàr-bah sîn hàin, kutlàwng leh fitflop (bathroom-slipper) nèn SHOVELLING hi ka tilui hrim hrim thìn. Tin, ka thenawmte kawtkai hi ka thenfaisak vek bawk thìn a, pawisa min pèk an tum pawhin, fiamthu hian “US $ 1,000 min pe phal làw làw a nih loh chuan —min pe suh u. Ka pui che u a ni e,” ka ti mai a. Pèk luih min tum pawhin ka la duh dèr lo va. An làwm thei khawp mai!

An thilneih tui tak tak hi min rawn suah liam liam thìn. Thenawm-khawvênga inhriattîr kan duh chuan chu chu thil ngai a ni ve tlat! Thenawmte hi kan han inpawh zui lo teh mai a nia! Thenawm lawkah mi thar an rawn lùt ang a; an car kan hmuh khàt leh deuh chuan, “An insuan chhuak leh tawh a ni maw?” kan ti èt mai! Neighborhood-a mite hi hmèl na nà nà chu kan inhria, kan inbe tam lèm hlei lo va. Kawnga kan intàwk a nih leh mawihnai takin, nui hmèl pu sêngin kan in-WISH liam ve mai a. Kan inkàlpawh mawhin kan inlèn chilh lo khawp mai!

Halloween zànah, TRICK ‘N’ TREAT thupuia hmangin CANDY khawn khàwmin—nu leh paten an fate an rawn hruai ang a—kawtkai chin chauh an rawn thleng ang. An rawn thlen hlat berah kawngkâ an rawn kik chauh vang. Chu bàk bàk, a kumleh nghah a ni tawh mai! A kumleh a thlen hmâ loh chu an rawn lêng lùt leh tawh chuang lo vang.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: