Chawnghilh's Blog

Inhmâkhualàwkna Tha —Picnic, Luia chèthonaah etc.,

Posted in Qualitus : Habitus by chawnghilh on November 11, 2009

 https://chawnghilh.wordpress.com/2009/11/03/li-leh-tuikhuah-kan-him-zawk-nan/

DSC_0119

 

Huho leh pâwl, thianzà, Class leh School (Institution) angte pawhin PICNIC-a chhuahvah châng a awm ve zauh thìn. Hlim taka kalchhuakho zîngah vànduaina tàwk ta bìk tlat a awm theih châwk. Mihring chin hi kan inhre làwk si lo! Mahse, chutiang chu a thlen fo loh nân inhmâkhua làwkna engemaw tal kan nei ve thei nameuh mai. Dr Thangchungnunga (Ortho) chuan picnick-na hmun a ni emaw, komol sùa Kohhran thalai inhlawhnaah a ni emaw —emergency thulha hman mai tùr mautlàwn pahnih-khat tal kan inchhawp làwk tùr a ni, a ti.

Hmangchâng hriat lohnaah thil pawi a thleng hman châwk thìn. Chuvàngin, HMANGCHANG hriat a ngai a, a nâwlpuia kalte leh Hruaitute—hmangchâng tlachawp ngaihtuah chhuah kawnga an intluk thial mai chuan—eng ual kan ang chuang lo vang. Hruaitute an pawimawh hle a ni. Vànduaina chi hrang hrang a rawn thlen palh pawha belhtlàk HRUAITU kan neih a ngai.

HRUAITU —a huhova thil tihna rèng rèngah HRUAITU FEL leh tlachawp thila REMHRE TAK an awm hian, a thlamuanthlàk bìk thìn a ni. Outdoor activities hi thil chàkawm, mi tinrêng an phùrna a ni tlângpui. Helhhawlh tak tak pawh an awm theih châwk. Mi chèt bàk bàka chèt chîng pawh huho zîngah an awm ngei ngei a, mi tih ang ti ve ngam lova kimkî pawh an bàng bìk chuang ngai lo. Chuvàngin, a chintàwk bithliahsak thiam a ngai a. Hruaitû mawhphurhna liau liau a ni thìn. Mizo zîngah Hruaitu fel tak tak, rintlàk leh remhria an tam.

Rawtna fel tak nèn PICNIC neihna HMUN leh HUN tùr chu thlìthlai làwka —remruatna fel tak nèna bawhzui ngei tùr a ni a. Mi ram changkàngte dinhmun ang kan la phàk kim ve loh avàngin, THIL TUL tùr pawimawh pawh kan daplàwk thiam ngei tùr a ni. Kan Mizo hmâsâng hun lai pawhin, vâl-upa fel leh rorêl thiamte kaihhruaina hnuaiah—hna inchan sem kawngah te, bùk sual leh a nghah, hnèphnàwl dapchawp leh hâng sotu tùr chenin—kawnghmang nei taka rêl feltu Vâl-upa an awm ziah thìn. 

Lui leh Dìla chètsualna kan neih châng pawhin inzirna lam kan tiri mawh khawp mai! Chesual tâ lawina Kohhran Pastor-in Thlamuanna Thuchah a rawn sawi a ni leh mai a —tuifinriat hnaih lo taka khawsa kan nih avàngin tui lamah pawh kan thiam leh thil hriat a nèp a. Chètsualna erawh chu a thleng chàmchî si thìn —kan inzir ngun chu a ngai ta hle a, tuitla ruang chungah tùna Thuziak angte hi han ngaithla dap dap mai ila, hmâ chu kan sàwn a rinawm. Chumi rualin Thlamuanna Thuchah chu sawi a ni tho dâwn bawk nèn —kan inzir belh a ngai ta hle! Tuia chèt kan thiam loh aleia tuia tlahlum ve fo kan ni miau si!

A hun : Picnic neih dâwn chuan sik leh sâ nawm hun lai, khaw-chin hre chianga thlan thiam a ngai. Khawchhiat nî chu mahni inhremna mai mai a ni thei a. Lui tui lian thut leh sabereka-khuangkaih pawh a hlauhawm thei. Chuvàngin, favàng àwllèn khaw nawm lai a thlan chì viau ang. Kohhran Thalaite pawhin puan sùa an inhlawh a nih pawhin, puansùk pho ro a theihna nî tùr—khaw-nàwm nî tho tho an thlan thiam a ngai. Chawhma lam khaw tha, chawhnu lam ruahsûr thut a nih pawhin, tùnlai chhanah chuan mobile-phone kan nei fer fur tawh a, khawpui lamah ruah a sûr nge sûr lo tih pawh kan zàwt mai tùr a ni. Tuilian thutin min rawn hnàwl palh loh nân! Khaw chinchâng hrethiam an pawimawh hle ang.

A hmun : Khawilai hmuna picnic tùr nge kan nih —chènna khua a inang lo ang bawkin, picnick-na hmun tùr pawh duhthlan a inang lo thei ang. Amaherawhchu, kan picnick-na hmun tùrah kan chiang tàwk hle tùr a ni. Mississippi luia Lawng Captain—a hun zawng zawng chu luidunga hmangtuin zawhna a dawn pakhat chu, “Captain, Mississippi luidungah hian lungpui khawkrawk hriam leh a hlauhawm lai zawng zawng pawh i hre chiang kìlhkèlh vek tawh ang maw?” tih a ni. Ani chuan, “Ka hun zawng zawng Mississippi luidungah hian ka hmang a —a him lai ka hre chiang hle,” tiin a chhâng. A him lai hre chiangtu chuan —hriat chian dang a nei tho vang le!

Kan picnick-na hmuna Lipui thùk zâwng, tuiluang a khauhna zàwn, li-vir a awmna, li chhuat a him tàwk em—tui thiam lote tâna a him tùr chin pawh—chhinchhiah hmasak vek tùr a ni. Hruaitu berin tui a thiam lo a nih pawhin, tui-thiamte mawhphurhnaah a dah hmasa ngei ngei tùr a ni. Chu chu ram-changkànga Swimming Pool-ah pawh an tihdàn vek a ni. Khùp chena kal ngam te, mal thlenga dai ngam te, kàwng thleng, nghâwng thleng —pil leh ban pil chinte pawh kan hre chiang vek tùr a ni a. Kalhote pawh kan hrilh chiang hmasa vek tùr a ni. A hmun thlena—mahnî duh dàn dàna khawsak mai mai tùr a ni ngai lo va. Discipline hi engemaw chen tal lekkawh ngei ngei tùr a ni.

Eiphung bâwltu FATU pawh kan inruat hranpà ziah thìn a, thuk bun dàn tùr pawh fatute chuan thuk hma lam thlifîm dawng zâwngin an bun thiam tùr a ni bawk.  Chu aia pawimawh zàwk, thihna kan pumpelh ngei ngei nân—tuithiam WATCHMEN pahnih emaw pathum emaw, englai pawha mi dangte vêng rengtu an awm tùr a ni. Tin, picnick-na hmunah pawh chuan OUT OF BOUND (kal phal loh chin) inhrilhhriat hmasak vek tùr a ni bawk—nungchang puthmang hi a inchen lo va; zû leh ruihtheih thil tiru duh an awm a nih pawhin—discipline tho tho a pawimawh hle tih hriat tùr a ni. Khawmual leh tuiah kal phal chin neih ngei ngei tùr a ni. Tuiah chuan a him chin hriatna tùrin thingtuai emaw tal sawh-phun ngei ngei tùr a ni. Chu chu khawi Beach-ah pawh hnam fing zàwkte tih dàn vek a ni.

Chètsualna a thlen hnua khaw thenawm hnaivai zawng zawnga YMA member ruang zawng tùra chhuah mup mup ai chuan, kan picnic ve tumin fîmkhur thiam ila —tuithiam kan zîngah an awm lo hulhual a nih pawhin, tuithiam min kìlkawitu tùr man neiin chhawr mai ila. Sènso chu nun chhan nân inhuam ngam ila, chètsual hnua sènso hautak leh khawtlâng bawhbuaia kan khawsak zui chiam lohna dap thiam làwk a ngai tawh hle. Sairàng Tlawng luia chetla tùr chuan Sairàng tuithiam man neiin ruai mai se … chètsual lohna hi a pawimawh ber a ni.

J. Lianchungnunga khàn truck tube leh life-jacket pawh Sairàng YMA hnènah a pèk hlawm hial kha! Kan mi awmthei leh hausate hian hetiang lamah pawh hian thilphal chhuah zèl se, kan nihlawh ni mai tùr! Hetiang kalhmang hi Central YMA pawh hian Branch tin YMA hnènah zirtîr uar sela, khawtlâng nun a tha zâwngin kan inzir belh zèl tihna pawh a ni ang. 

Thiam leh theih inchen lote thliar fel : Hruaitu fel chuan a naupangte a hre chiang hle tùr a ni. An thiam leh theih chin a inang lo tih hriatpuiin—a inkawp tùr (Buddy System/buddy plan) a thliar fel thiam tùr a ni. Chu chu hnam fingte tih dàn kalhmang pawh a ni. Tui thiam kiangah tui thiam a awm tùr a ni a; tui thiam lo leh tui thiam lo an inkawp tùr a ni bawk. An inthlahin an inkalsan tùr a ni lo. Nilêngin an inkawp tùr a ni.  Boy Scouts of America-ho zîngah chuan ‘Buddy Check’ tih a nihin a kawppui tùra ruat a va vuan ang—mahni maia tuia luh a thiang ngai rèng rèng lo va—kawppui nèn chauhva luh dùn hi Buddy System an ti.

A tlângpuithuin, Group thuma inthen hi a kawnghmang fû —tui thiam hauh lo GROUP, thiam sawlh sawlh GROUP leh tuichèng thiam GROUP. Tui chèn hun dârkâr hi fel taka ruat ni bawk sela, chumi hun a thlen hmâ leh a pelh hnu chuan duh duha zuan luh mai mai phal ni bawk lo se.

 Tui tla palh chhanchhuak tùra tuithiamin a va hleuh chilh a nih pawhin—va inman buai mai lova—tuitlàin an lo man tùr kamis, kekawr emaw pèk ni thei sela. Inhambuai chiam a pumpelh lehzual ngei bawk ang. Hruizên leh hmawlh remchâng va pèk maina phàk a nih loh pawhin, lawnga va pan chilh emaw, mau/changêl-pùm emaw pawh hman tùr remchâng a awm thei ang.

Buddy system, Thian inkawp

Tui thiam lo leh tui thiam lo inkawp chuan li vir leh tuizàngkhauh lai an pan dùn hauh lo vang —tui an dai lùt ve a nih pawhin, ngal chen emaw chauh an dai dùn ngam dâwn a. A bàk an ngam lo vang, innawr luih an ngam lo ve ve dâwn bawk a. A him china awm an duh dùn zèl bawk ang. Hetiang ang taka kawppui chheh fel a nih chuan hlim tak leh him dam takin nilêng-vànvuai a hman theih a ni. Hnam fing zîngah pawh DISCIPLINE an vawn thatnaah hetianga Buddy System/buddy plan hi an tihdàn than leh chìn dàn tha bera an ngaih a ni.

Chètsualna : Tuia pil ta mai, a pil lai hriat si loh a nih chuan —kawppui a nei lo tih a hriat mai! Tin, vêngtu hmuh loh hlàna thil thleng a nih chuan vêngtu inthlahdah vàng a ni thei. Eng vang nge? Buddy System/buddy plan-a a khawsak loh vàng a ni. Heti chung pawha la chesual palh tàlh kan nih chuan —inchhanchhuah dàn kawnghmang fel tak a la awm cheu!

Tuithiam, tuia tlà lùt sual palh kan la awm cheu chuan —kan kawr hàk laiah boruak thun luh nachâng hriat a ngai—chu chuan tuiah min tilâng rei thei lehzual a. “HELP” tiin, aw râwl kan chhuah hman bawk ang. Tin, tuidungchhir thiamte tân chuan kekawrtlawn tihhuh chhûngah boruak ham luhin, kekawr ke hmâwr lam ve ve suih zawm nghâwng tuam nâna hman theih a ni a, life-jacket dungthùla hman theih a ni. Mahse, kekawr hul a nih chuan a chhûngah boruak a inkhàwl rei thei lo va; tihhuh ngei a ngai tih pawh hriat a tha tel a ni. 

 

DSC_0086

 

Tuithiam lo tân chuan —vaukama thian dùna teihawi ve mai mai hi a hlimawm thovin, tuia tlàkhlum a har ber mai! Tirhkoh Petera pawh sangha mana eizawng mi a ni nà khân, tuifàwn leh thlipuiah meuh chuan a chèttlatna thanah pawh a thaw a kiar vat mai a —chhanchhuaktu a nei hlauh va, a nihlawh a nih kha! A letlinga khenbeh a nih theihna chhan pawh kha tuia tlahlum mai tùra khàn chhartu a neih fuh vàng a ni khawp ang le!

Hruizên, changêl-pùm leh mautlàwn a awm remchâng lo a nih pawhin, tlangvâl remhria leh huaisenten kut insuih zawmin kan ding tlar pût thei a. Tuitla bera kha va manin —kut invuan nghet tlat hmangin kan inkaichhuak thei. Tin, vaukama thing leh lung nghet taka vuanin, tui tlàin a lo man theih tùrin kan ke kan va pe thei bawk a ni. Tlachawp zèlin inchhanchhuah dàn kalhmang rang tak—hmanhmawha virpilh chuang si lovin—kan ti thei chiang a ni.

 

Fun in the Water : Some of our happiest hours could be the occasion we spend at the waterfront, swimming and diving with our friends. But, we get much more at the waterfront than just fun. Here we also learn how many experienced groups make sure that swimming is safe where there is good leadership and good followers, how you can save the lives of people in trouble in the water.

The Safe Swim Defense Plan : The way that YOU CAN ensure a safe swim is by seeing to it that all defensive measures are taken to prevent a swimming accident. There are eight of these defenses :

  1. Trained Supervisor —All YOUR swimming must be in charge of an adult leader. He must be qualified with water safety training or must use trained assistants under his direction.
  2. Medical Examination  —The next defense is a thorough medical examination to make sure that you are in condition to stand the vigorous exercise that swimming is.
  3. Safe swimming area —The bottom of the swimming area has been examined and is without holes, stumps, or rocks. The swimming area is marked off in three sections : Not more than 3½ feet deep for nonswimmers, up to just-over-head deep for beginners, deep water for swimmers.
  4. Lifeguards —At least two expert swimmers are stationed ashore as lifeguards, equipped with lifeline.
  5. Lookout —A lookout stands at a point from which he can watch all swimmers.
  6. Ability Groups —The picnickers may be divided into three groups : Nonswimmers who are just learning; beginners who have swum 50 feet; swimmers who have made 100 yards, 25 of them on the back, and who can float. Each group stays in its area during the swim.
  7. Buddy Plan —Each member is paired with another boy/girl of the same swimming ability. Buddies check in together, keep within 10 feet of each other at all times, and check out together. Whenever a buddy signal is sounded during the swim, buddies grasp each other by the hand and hold their arms high, so that the lookout can check the number of buddy teams.
  8. Good Discipline —The person in charge of the waterfront sees to it that there is good discipline—with strict attention to the rules, but with a chance for everyone to have a good time.

NO MORE BUNGLING, so that we can always get back HOME happily together! It is wonderful to know the YOU ARE SAFE when swimming—but it is even more wonderful when you know that YOU ARE ABLE TO SAVE SOMEONE ELSE who would otherwise drown!

Hlim tak leh phùr taka Picnic tùra chhuak tlâng —a then boral ta bìka hàwn leh hi HRUAITUTE tân pawha thil zahthlàk tàwpkhàwk a tling a —he thuziak hi eng Chanchinbu-ah pawh —”YMA Chanchinbu” etc.,-a chhuah duh in awm chuan chhuah chhàwn phalsak in ni e.

 

Advertisements

2 Responses

Subscribe to comments with RSS.

  1. dr_feelgood said, on November 12, 2009 at 5:54 am

    Boys Scout lam hotupa chu i la hriat hmel fu mai. Very informative.

    • chawnghilh said, on January 30, 2010 at 4:31 am

      Dr-feelgood : Thanks for the compliments, we NEED these kind of instructions and guidances. Outing in joy, back in sadness has no complete fun!


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: