Chawnghilh's Blog

Mizo Bible-a Genesis Bung 3-na lehlin dik lo

Posted in Qualitus : Habitus by chawnghilh on November 13, 2009

Zotawng Bible thu hi chìk ngun a va ngai lehzual tawh tak èm! Zàwlnei Jeremia 8:8-a chuan, “Ngai teh u, lehkhaziaktute kawlawm dawthei chuan dàwtah a chantîr ta zàwk a ni,” tih a  târlang ngam a. Nehemia 8:8-ah ve thung chuan, “Tin, lehkhabu, Pathian dàn bua mi chu fiah takin an chhiar a; a awmzia an hrilhfiah a, tichuan an chhiar chu an hriat chiantîr zèl a,” tih thu kan hmu bawk a ni.

Pathian Lehkha Thu hi kan chhiar liam satliah fo ta mai! Philipa chuan, “I chhiar kha a awmzia i hria em?” a ti rawih a; Mitilreh chuan, “Tuma mi hrilhfiah lohvin engtin nge ka hriat theih ang?” a ti ve phawng bawk a nih kha (Cf. TT 8:30,31).

Thlarau Thianghlim puihna tel lo chuan hriat fiah theih a ni lo.

Mi thenkhat hnènah Zotawng Bible lehlin dik lo thenkhat laite târlangin ka titipui ve ta zauh zauh va; thenkhatin an chìk ngun duh laiin a thente erawh chuan, “Chhandamna khawp a inziak tho,” tia aw ki sâng ka tawng ve ta fo mai! A tlângpuiin Sàptawng bih chiang thiam lote ànkâ a ni bìk deuh emaw ni dâwn chu àw ka tih châng a tam zàwk!

“Chhandamna khawp a inziak lo,” tia sawi zawng ka ni bìk hauh lo—entîrnân Genesis 3, MIHRING KAN TLUKNA BUL BER chanchin a inziahna hmasa hi chìk taka thlìrpui che ka duh. Kan Zotawng Bible-ah chuan, “Tin, LALPA Pathianin ram sa a siam zawng zawng zîngah rûl a fing vervèk ber a (Genesis 3:1)” tiin i chhiar ve ngeiin ka ring.

He lai chângah hian LALPA Pathianin ram sa a siam zawng zawng zîngah … ZINGAH … rûl a fing vervèk ber… tiin kan thinlunga riak nghet êm êm tawh chu ramsa a siam zîngah rûl chu a fing vervèk ber niin kan pai fel diam tawh zawng a nih hi! King James Version (English) keu ve chiah teh… “Now the serpent was more subtil THAN any beast of the field which the LORD God had made,” tih a lo ni daih—rûl chu LALPA Pathianin ramsa a siamte AI CHUAN a fing vervèk zàwk thu a ziak thung a nih hi!

Chu Rûl chu thilsiam dangte aia fing vervèk zàwk maw lo ni le? Thilsiam dangte zînga khung tel ve chi a ni ta lo! Bumtu, Setana—diabola a lo ni fâl nalh mai! Ngaihtuah ngun nawn hle ang che. “Ramsa zawng zawngte zîngah” tih ai chuan, “ramsa zawng zawngte aiin…” tih a àwn zâwk lo’m ni? A kawh a rilin, a thùk daih tawh zàwk bawk ang.

Genesis 3:5 pawh hi, “in ei nî apang chuan in mit a lo vâr ang a, a chhia leh a tha hriain Pathian ang in lo ni dâwn…” tiin kan nei lehpek a. King James Version-ah chuan —ye shall be as gods… tih a ni leh thung a; ‘pathiante’ tihna a kàwk mah mah ang em le? Ngaihtuah ril peih mi tân chuan zir tùr tam tham tak a kawhhmuh thar theiin ka ring.

Tin, Genesis 3:22 mawlh mai hi i thlarau nun a nêk hlein ka ring. Kan Zotawngah hian, “Tin, LALPA Pathian chuan, “Ngai teh u, mihring chu a chhia leh a tha hriain keimahni ang a lo ni ta; tùnah chuan a kuta banin, nunna thing rah chu lova eiin, kumkhuain a nung dah ang e,” a ti a,” tih hi i lo chìk ve fo tawh pawh a rinawm!

He lai châng an lo lehlin dàn vèl hi mak i ti ve em? Evi leh Adama chuan ei loh tùr an ei a, PATHIAN ang an ni thei zâwk ta tlat hi ngun lehzualin i zir chiang hlawm teh ang u.

Zawhna ka zàwt a che —Zotawng Bible thu ang chuan Setana (Rûl) kha Pathian ai hian a dik zàwkmah tihna em ni dâwn le? Rûl khàn Pathian ang tùrin a kawhhmuh a —chu chu a BUM kan ti lawi si a! Evi leh Adama chu bum- thlùka an awm hnu khân LALPA Pathian ngeiin keimahni ang tiin a lo sawi leh thei chiah si amaw? Pathian an an tawh ber ahnu —kumkhuain an nung dah ang e tih a han ni leh lawi a!! A inluh kual thelh dàn leh hnawkzia chu i man thiam em? Han ngaihtuah chiang leh teh.

A nih leh bawhchhiat cheu hnua Pathian ang an nih a, LALPA Pathian ngei pawhin keimahni ang a tih miau si chuan Setana chu LALPA Pathian ai chuan a dawthei lo zàwk daih tihna a ni dâwn lo’m ni? Tang fan fan rawh le! Harh la, meng rawh. Hei hi ka hrilh duh a che. I thlarau muthlu kha harh rawh se. Zàm hek suh!

King James Version (English) kan en chuan, “And the LORD God said, Behold, the man is become as one of us…” a ti thung a lo ni! “Tin, LALPA Pathian chuan, “Ngai teh u, mihring chu a chhia leh a tha hriain kan zînga pakhat ang a lo ni ta…” a tihna a ni zàwk dâwn lo’m ni? An zînga pakhat thin kha Rûlpui Diabola ngei kha a ni thei tlat!

The Daily Study Bible by William Barclay (The Revelation Volume 1) phèk 153-naah chuan, “In the Genesis story of the garden, the accusation against Adam is that he has eaten of the fruit of the forbidden tree and become like one of us (Genesis 3:22). It may be that the idea of the elders has something to do with the idea of God’s council surrounding him,” a ti. Vàn hmun seating arrangement a hre chiang a; Lucifer-a pawh an zînga pakhat thìn kha a nih a hai bìk lo niin a ngaih theih!

“Chhandamna khawp a inziak tho,” tia tankhawh i lo nih ve pawhin, “Boralna khawpa lehlin,” a lo nih theihzia pawh hre thar la, fîmkhur takin Pathian Thutak i zir thar leh ang u. Eng vàngin nge Chunglam Hrin kher i nih a tùl tia ka zawh chian leh che chuan Pathian tlûksana Setana anna nei i nihzia kan Chhandamtu Lal Iesuan a hre chiang che êm alàwm!

Hawi kìr rawh. Lalpan a ngaidam duh a che.

WELCOME!

Len luhna thlàkhlelhawm with great infatuation —

Advertisements

12 Responses

Subscribe to comments with RSS.

  1. mzvision said, on November 14, 2009 at 11:57 pm

    Ka chian phah kuarh mai. Mahse Beast i lehlin dan hi hei aia chiang hi a awm ang em le? Ramsa zingah pawh chak leh theih avanga midang te tihluma ei ching ang hi Beast chu ani em? Nge Beast tih ang thumal hi kan nei lo zawk? Ramsa zz Beast kawh tir hi chu ka helh deuh

    • chawnghilh said, on November 15, 2009 at 1:27 am

      BEAST lehlin dan hi Zotawng Bible letlingtute hman chiah chiah kha ka rawn hmang rih mai, wild leh domestic pawh a huap tel vek tih chu a chiang reng mai a! I feel honored and blessed, His Truth is marching on!

  2. mzvision said, on November 15, 2009 at 1:46 am

    (Genesis 3:1)“Tin, LALPA Pathianin ram sa a siam zawng zawng zîngah rûl a fing vervèk ber a….” hi Mizo Bible lehlin tharah chuan Lalpa Pathian siam ramsa zingah rul hi a fing vervek bera, ….

  3. mzvision said, on November 15, 2009 at 1:51 am

    Genesis 3:5 “in ei nî apang chuan in mit a lo vâr ang a, a chhia leh a tha hriain Pathian ang in lo ni dâwn…” Mizo Bible lehlin tharah chuan tihian – In ei veleh in mit a lo var ang a, Pathian angin a chhia a tha in thlei ve tawh dawn tih Pathian chuan a hria alawm a in ziak

    • chawnghilh said, on November 15, 2009 at 2:27 am

      Genesis 3:5 “but God knows that as soon as you eat of it your eyes will be opened and you will be like divine beings who know good and bad,” tiin ETZ HAYIM, Juda-ho chelek bìk liau liau Bible-a a inziak dàn nèn a inpâwl ang reng fù a nih chu!

      “divine beings” tih khi “Pathian angin” tia an dah ngam mai khi chu a fuh ka la ti chuang lo. Divine beings (plural) a la ni cheu va, “Pathian (singular)” lamhawi a nih ka la hmin lo.

  4. BW said, on November 15, 2009 at 10:00 am

    LK-ah kan lo post pawp a nia. Hope you don’t mind.

    Best,
    BW@LK

    • chawnghilh said, on November 15, 2009 at 2:00 pm

      Good job. That’s for all mankind. Back to the Bible-truth and back to God’s way. Literal translation will not ruin anybody’s TRUE faith based on Biblical teachings.

  5. Jaspi said, on March 6, 2010 at 12:44 am

    Bengvar thlak hle mai. Theologians lar tak tak leh Scholars hmingthang ho pawhin, Genesis (a bik in Eden story) hi chu, Bible thu zawng zawnga, hrilhfiah theih loh leh, engtikah mah hrilhfiahna famkim kan pek theih loh tur an lo tih si. A hnawk em a sin…! Kan Mizo Bible hi chu kan chik chian chu a ngai reng a ni.
    Eve leh Adamte chungchangah hi chuan John Wesleya ka tawmpui. “Bum” a ni lo, “duhthlanna” liau liau a ni. Rulin thei ei tura a thlem hma khan, Pathianin “ei loh tur” a ti hmak tawh. Thupek a hmasa tlat….! Kha kha “Bum” ah keichuan ka pawm thei lo. Ka chhungte’n “zu in suh” min ti. Ka thiante’n “zu i in chuan, i huai ang a, i tih ngam loh i ngam tawh ang, chasss try nan a tha…” min lo ti ta se! “Zu” kha lo in ta ila,…ka thiante’n minbum ah ka ngai lo. “keima duh thlanna reng a ni”…chhut chiang tawlh tawlh leh ka pawm tawlh tawlh…”Duh thlannna”

    • chawnghilh said, on March 7, 2010 at 7:59 pm

      I hriat rengah an BUM thei tho che.

      “All things work together for those …” tih Rom Bung 8:28-30 chungchangah WORK TOGETHER lohna siamin Calvin leh Wesley-te an buai ta a nih kha, thumal hranpa ve ve, chang thuhmuna mi si an hik chhuak ve ve a … an tum lohvin an kal thui ta a ni ber zawk e.

      BUMNA (deception) hi THUTAK aiin kan hmangaih zawk za-lel thei bawk! Chu tak chu BUMNA a ni ngawih ngawih!

  6. Jaspi said, on March 8, 2010 at 11:35 pm

    Ngaihtuah chiang teh.!! “BUMNA” ah i ngaichiah mo?
    Ka hriat rengah min “BUM” tawp thei lo, ka duhthlana tel lo chuan! “BUM” a nih loh na chu, Pathianin a hrilh hmasa a, a karfui tawh bawk.
    Keichu “BUMNA” ah ka ngai lo, Eve-i duhthlanna ah ka ngai. Pathian in “ei suh U” a lo tih hmasak tawh vangin! Thupek a awm hmasa tlat. Mahse,…kan sawi theih chu awm lova, ngaidan sawi ho hi a nuam ve a. Philosophy lamah luh a ngai leh dawn tlat.

    Genesis vang hian, kan professor nen tawp thei lovin, kan inhnial tawh a! 😛
    Thawnthu a nia, a ti sam et si a…! Keiai a knowledge leh thiamna a sang in min nghial dantur a hria in, thu a thiam si a..! Thlan a sa duh phat phat khawp mai.

    • chawnghilh said, on March 9, 2010 at 12:28 pm

      @Dear Jaspi : II Korinth 11:3 Nimahsela, rul chuan a ngamthlemnain Evi a bum ang khan Krista lama takna leh thianghlimna ata chu eng emaw tiin in rilru chu an tikhawlo dah ang e, tih ka hlauthawng a ni.

      Korinth khuaa Pathian Kohhranho awmte pawh khi thil hre ve tho, mahse, ngamthlemnaa bum theih tho an nih ve lohna turin Paula chuan a fuih uar hle.

      Buma i ngaih loh kha, Tirhkoh Paula hi chuan “BUM” a ti miau va, Tirhkoh Paula sawi dan anga i sawi ve hunah kan inlungrual hle chuan ka ring. “Evi duhthlanna” tiin Paula hi chuan a sawi hauh lo thung.

      TMEF hmaihmaa ka lo tawn tawhte pawh —dak veh vawh chuan an haw ngai miah lo asin!

      He Bible chang hi chhiar belh ngei ang che : Wesley-a leh Tirhkoh Paula pawh hi INKALH tak an nihzia hrechhuak ang che.

      I Timothea 2:14 Tin, Adama chu bumin a awm lo va, hmeichhia erawh chu bumin a awm a, bawhchhiatnaah a tlu ta a.

  7. Jaspi said, on March 15, 2010 at 5:31 pm

    Ka hmu ta e! Computer thiam loh zarah ka inzawng buai nasa.
    “Bum” leh “duhthlanna”! Bible-ah hian eng Version-ah pawh “duhthlanna”-in a inziak lo va. John Wesley-a pawh hian “duhthlanna” tiin a sawi lo. Wesley-a leh Paula Theology hi a inhrul tlangpui. Mahse, Methodism ka hriatphak phak chinah chuan, “mihring sual vang (rul bum vang ngawt ni lovin)” ti a ni. A chhan engnge?
    chawnghilh, Pathian thu hre tak leh chik tak i ni a… han ngaihtuah ve la.
    Original Sin i pawm em? Original Sin i pawm a nih ngat chuan, “rulin a bum vang a ni, mihring (Eve) sualna a awm lo, a bum miau si alawm” tih hi i helh ve hlein ka hria. Original Sin pawm lo or sawizam tumho hian he “Bum” tih word hi an interpret nasa hle a. He word pakhat te hian doctrine a khawih pawiin thuk tak a sawh nghing tawh thin a, a sawh nghing mek bawk a ni.

    Chuvangin “Bum” tih word i interpret dan erawh ka hre lo va; mahse, kei chuan “Bum” ti lovin,..”mihring suala kan tlukna”…”Mihring sual vang” “Evi’n Pathian thupek a awih loh vang”-ah ka ngai tang tang. He word “Bum” tih hi a la vung zingah ka tel ve lo, a ni ber mai.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: