Chawnghilh's Blog

Beggars in USA

Posted in Qualitus : Habitus by chawnghilh on November 15, 2009

Black-beggar

Ram hausa leh hmuingîl mah ni se, dinhmun tleu —ke chhehna rem dapte ram tin atanga an fuan khawmna ram ngang a ni a; chu chu he ram History bul intan dàn pawh niin a lang. Dinhmun a inchen lo khawp mai! Traffic Light azirin, tlàn sawn theih lawk lohna hmun a awm tam thei ve hle a. Chutih lai chiah chuh chuan “HOMELESS” inti leh ramtuileilo kutdawhten mite thilphal hun nangchìn tumin ni an lo tumtawi ve thìn a ni!

A hnuaia nu pakhat kutdawh pawh hian hreh ngawih ngawih, mittui tla chungin PLACARD a rawn keng lang a; chutah chuan, “FA PAHNIH PAWM KA NI; MAHSE, KA HNA ATANGIN KA THLAWN A, I KHAWNGAIH THILPEKAH KA RAWN PANGCHANG,” tih thu inziak a keng a. A lainatawm hle; mahse, Green light a rawn èng hman leh ta si a —ka tlànsan lo thei ta si lo!

Hmun tam takah KUTDAWH hi an awm ve a ni. Pumraw nalh tak tak, kan rama IDOL ni ve thei mai àwma pumrua pawh an pû! An thla ka la hman vek kher lo a ni mai —chhe lo tak tak pawh an awm ve tlat!

DSC_0251

Pianphunga thahrui ngah hmêl tak tak kutdawh pawh an awm ve nual! Khawngaih thilpèk an dawn khàwm hi zu leh ruihtheihthil tih nân mai maia hmang zui tâwk pawh an awm ve leh tho. Hetih rual hian KUTDAWH NIHLAWH tak pakhat chanchin Dr Luka ziak ka rawn târlang chàk tlat mai!

Methods used to reduce begging —

Ireland : A new law targets beggars who threaten violence, beg repeatedly in one place, or use children as props.

India —Motorists can be fined of they give to beggars at traffic lights.

US —Denver’s “sit and lie” Law says people can’t block sidewalks. The police give warnings; outreach workers offer help. Arresr are a last resort.

Tirhkohte Thiltih 3:1-10
Tin, Petera leh Johana chu behliang mun hunin tawngtai hun lai chuan Pathian biak ina lùt tùrin an chho va. Tin, patling tuemaw —a piantirh ata kebai an rawn zàwn a, chu mi chu biak ina lùtte hnèna kut dawh atân, biak in kawngkhàr, Mawi an tih bulah chuan ni tin an muttîr thìn a ni a; chu mi chuan Petera leh Johana Pathian biak ina lùt tùr chu a hmu a, kut a dawh a.
Tin, Petera’n ani chu a en reng a, Johana pawhin; tin, Petera’n, “Min han en rawh,” a ti a. Tin, ani chuan an lakah engemaw hmuh a beisei a, a han en a.
Nimahsela Petera’n, “Tangka leh rangkachak engmah ka nei lo; nimahsela, ka neihchhun ka pe ang che: Nazaret Isua Krista hmingin kein kal tawh rawh,” a ti a.
Tin, a kut ding lam a chelh a, a kai tho ta a; tin, thàwklehkhatan a kete leh a kheimit ruhte chu a lo chak ta nghàl a.
Tin, ani chu a zuang tho va, a ding a, kein a kal tan ta a. Tin, kea kal kal leh, zuang zuang leh, Pathian fak chung zèlin biak inah chuan a lùt ve ta a. Tin, kea a kal leh Pathian a fak chu mi zawng zawngin an hmu a; biak in Kawngkhàr Mawi bula kut dawha thu thìn kha a ni tih an hria a; a chunga thil thleng chu mak an ti èm èm a, an buai hle mai a.
Apostol-te khàn Jerusalem Tempul kha an tihdàn pângngai ang thovin, Juda-te tawngtai hunbi ang zèlah tawngtai tùrin an la chhim zui ve zèl thìn a. Middle East-ah Biak In apui hi tùn thlengin a tam hle. Tempula Pathian be tùrte chu—mi rilru ngîl leh thilphal an nih ngei pawh—kutdawh rethei chhuanchhamte chuan an ring a—inkhàwm tùr nafàm chuan thawhlàwm tùr engemaw tal an ken ngei pawh an ring ve a ni. Chu chu an zanriah leh tùkthuan leh tùr atân an lo dîl pêng ve thìn a ni.
Jerusalem Tempul-ah ngei pawh chuan, Petera leh Hmangaih Johana te thian dùn chu tawngtai tùrin an rawn kal ve a. Kawngkhàr Mawi (tùna Golden Gate inkhàr rih ta) awmna lai takah kutdawh, a nu puma pai lai a nih atang tawh rènga rualbanlo tùr hrim hrima kha—mite tanpuina a dîl theih nân mi thenkhatin an rawn zàwn thleng a ni. He kutdawh hian lainattute a haihchham lo viau—a hmangaituten an rawn zàwn thleng tawh pang a ni.
Thu dangah ka’n lut kawi lawk,  Kolasib Zaia (LAIRIL) tih dàn ka’n thìk ve lawk!
Zankhat chu Shillong panin, Bus-ah ka chuang thla a. East Siang District (Arunachal Pradesh) pana kal mêk ka ni. Kum AD 1997 April vèl kha ni tàin ka hria.
Ka kiangah chuan Mizo hmeichhe namai lo tak tak pahnih an chuang ve a. English-a mi namai lo an ni—an Doctorate degree la tùra Convocation chhim tùr an ni tàin ka hria. An hming ka sawi kher lo vang.
Kan titì thla zèl a … kei tak pawh ka titì nasa khawp mai! Chuta hmeichhe ropui pahnihte nèna kan nuihpui, ka khabe atanga pùt liam chu hei hi a ni. Petera kamchhuak, “Tangka leh rangkachak …” tih ber mai kha!

Literature lama inhre tlâng, inkìlkawi hrep tawh hlawm kan ni bawk a. Literature-ah chuan a originality hi hriat chian a nih poh leh, zir zau belha hriat chianna hian a chèk thùk bìk thìn lahtak a. Petera dangàwk tùrzia kha ka hisâp ta chiam mai a—abìk takin Galilean-ho hi thingtlâng lam mi, lehkha zir sâng vak lo, sangha mana eizawng—thu leh hla lamah pawh Hebrai tawng thiam zìktluak mang raih lo, Grik tawng thiam sil sawih sawih deuh chauh an ni bawk si. Aramik tawng dazàt tak kha an thiam bel hlur ringawt mai a. An àwkâ-chhuak hi thu leh hla hi a ngaihnobei vak lo va, dangàwk niah nuah vei nèn, Petera pawh khàn, “Ta ta tang…ka leh …” a’n ti vèl tùr kha kan nuihpui nasa mai a. “Ra ra ra rangka … chak …” a han tihphàr vèl dàn tùr—chumi chhûnga kutdawh a lo phùr tawh tùrzia vèl kha kan han zèldin kual leh a. Kutdawh ber mai kha— “silver leh gold nei tùrah pawh a lo inngai hman rum rum mai thei tawh asin le,” ti mai mai khân—kan nuiho tlàwrh tlàwrh a. A chhan leh vàng ber pawh, Galilean-ho dangàwk vàng phiangsen, Jerusalem-a an kal ve châng pawha Synagog-ah Malsàwmna (benediction) an sawi ve pawh an phal ngai lo kha a nia! Dangàwk tawng buai nuai hnua inkhàwm an han tìn tur kha an ngaingam ngai lo a ni.

“Pèk tùr che …” a’n tih kai chhoh lai khân—kutdawha rilrù puthmang tùr kha … emotionalist ve tak a ni ngei àwm si! A begging-bowl ung leh bàl sawi tak a zuk thlìr pawhin, chhir bo tak a nàp hman ve viau tawh mai thei asin,” tiin!

“Ka nei lo,” tih thu —buai buh nuaia a han sawi chhunzawm chiah leh … kutdawhpâ hmêl dâng bawi bawi ta mai kha … up and down emotions, sentimental and so on and so forth … kan va nui nasa kiah kiah tak èm!

Kan thawnthu kha Sonapur thlen hmâ hret atanga sawi tan kha kan ni a; Alu-kudam kan thlen chuan zînglam dâr 4:00 AM vèl a ni hman a … kham lo takin kan sawi zo lui ta hràm a nih ber kha! Khami nî kha chuan kan pite pahnih kha an hàm bawi bawi nilêng ve ngei chuan ka ring! Chumi hnuah inhmuh leh tik nî rèng kan nei ta lo!

CHUTICHUAN … kan thawnthu sawi chhuah ber, Dr Luka ziak —tlar tlêmtè kha kan han elucidiate ta tak tak mai kha, inhmu khàwm leh hlawm pawh ni ta ila, kan theihnghilh kher chuan ka ring tawh lo. Kan sawi chhuah kher nachhan pawh, Silchar-a bus ticket ka lo book-na hmunah naupang pakhat —bàl khir èm èm mai hian kut a rawn dawh a. Chêng hnih zawr-bàl deuh mai hi ka lo pe a. Mahse, kha naupang khàn a’n la ngawt nà khân —a’n bih chiang a. A thlèr zawr lulai èm lahtak a! A ìtawm lo hle a ni.

A làk phat khân—a hman leh dàn tùr kha rang lutuka a han dàwnin—hmang thei dâwn chuang lova a inhriat tlat vàngin DUHTUI a chhuah a; “Doosra he? Naya dijee,” tiin —“A dang, a thar zàwk min pe la,” tia min dìl vàng kha a ni. Kutdawh akâra duhthlang thei ngat nih pawh thil namai lo tak niin ka hria!

Petera’n, “Nimahsela, ka neihchhun ka pe ang che …” a han ti leh hràm kha —khatih lai chiah, rilru zawng zawng a chìmchhiat buaih laia beiseina kâwl rawn èng leh tùr chiah kha … eng thil tak chu inpe dâwn chu ni ta le? Beisei phàk bàk thil a thleng ta. Kutdawhah pawh a riangvai bera kan hriata chuan ISUA KRISTA (Yahshua ha Messiah) hmingin damna chiang tak a chang ta! Chawplehchilha damna —damkàwr theithùr chàk lam thil a ni ve lo!

Juda-ten Tempul leh a kawtzâwl chhûng chauhva Pathian laka thil beisei an neih thin kha —Lal Isua Krista Chanchin Tha-ah erawh chuan Tempul thlen hmâ Kawngkhàr Mawi kutdawhte hmun lùnah Pathian ropuina a rawn thleng ta thung zàwk a ni.

Pathian ropuizia hi —nangma chunga a thlen ve chianzia puang chhunzawm ve tawh mai rawh …

WELCOME!

Len luhna thlàkhlelhawm with great infatuation —
Advertisements

One Response

Subscribe to comments with RSS.

  1. Zaia said, on November 16, 2009 at 5:10 am

    Ngaihnawm tak a ni. Ram changkangah kudawh hmeltha an awm a ni maw?
    Thil chhuidawn leh chhut ril peih tan lo chuan thu leh hla tuipuiah hian thlen thui a har viau ta ve ang.

    Pathian thu thleng maia ropui tak leh ril si, keini angin kan hriatthiam theih tho sia i han dah chhuak thin hian i blog hi a ti hlu ka ti a. Hetianga Peter-a te history te hi Pathian thu-a titi nuam ti em em ka Pa hnenah ka lo hrilh chhawng ve leh anga, vannei a inti leh dawn mang e!


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: