Chawnghilh's Blog

Sawma-Pakhat —RUKSAK nge SUAM?

Posted in Qualitus : Habitus by chawnghilh on November 15, 2009

SUAM nge RUKSAK?

‘Sawma-Pakhat —Rùksak nge Suam?,’ tih hi kan thupui a ni tlat mai; sâwma-pakhat pêk tawhsa …. KAWNG BO chanchin hi kan zîngah sawi tûr a awm ang tih a hlauhawm. “Berâm rual an rinawm laia, berâmpute chêt dân tehchiam si hi zawng…?” tih ngaihtuahna hi a awm thei ve tlat mai! “Khawi khuaah nge sawma-pakhat sum a luh thlen a; chuta tanga chhuak ta lova a rîral zawh thin?” tih thute hi Thalaiten QUIZ COMPETITION-ah an inzâwt riau riau ang a—chhânna dik hian kan khua a timualpho palh ve ang e! I fîmkhur ang u. Han tick zeuh teh, a eng ber hi nge i nih?

Hming ……………………………………………………………………….

Sawma-Pakhat hi —

a) Ka la hre ngai lo
b) Ka pe ngai lo
c) Ka pe regular
d) Pêk ka inthlahdah
e) Pêk ka duh ve ta
f) Ka pe dâwn lo
g) Ka pe kim chiah ngai lo
h) Sawma-Pakhat bâkah Thilpêk dang nên ka hlân
i) Ka pe zeuh zeuh
j) Sum lovin ka pe mai thîn
k) Pêk bâkah mite ka zirtîr
l) Kan lâkluh dân thlîrin pe ngam chi kan ni lo
m) Kum tâwpah ka tlalam
n) A haw zawng zawng atangin ka pe regular

Thai tûr hmang khian mahni han infiah hmasa phawt ila, Pathianin FIAH a chona êm êm subject hi kan luhchilh chauh dâwn nia!  Sawma-Pakhat la hre ngai lo tân : ‘Sawma-Pakhat’ hi Hebrai tawng chuan ‘mà‘asér’; Grik tawng erawh chuan ‘dekatè’ an ti. Sâptawngin ‘tithe’ an ti a; Old English-a teogothian [sawmna] an tih, tûn laia ‘tenth’ tih ni ta a ni. ‘Sawma-Pakhat’ hi ‘10%’ tluk a ni.

Tlûkna Eden Huana Adam-Hmasa-a’n ‘Sawma-pakhat,’ chungchâng hi a hre ngût ang emaw? Amaherawhchu, kan chhandamna Adam-Hnuhnûngbera (Isua) erawh chuan ‘sawma-pakhat’ pêk chungchâng hi Gethsemane Huana fianrialna a hman hmâ lawk pawh khân tha a tih thu—

“Nangni lehkhaziaktu leh Pharisai vervêkte u, in chung a pik e! Pudina te, mohuri te, zîra te chu sâwmah pakhat in pe thîn a, dân thu pawimawh zâwk —felna te, khawngaihna te, rinawmna te chu —in ngaihthah si thîn; nimahsela, chûng chu asin in tih tûr ni, a dangte chu tihthulh chuang lovin,” tiin, a tlip chiang hman tih hi i hre chiang. (Cf. Matt. 23:23).

Kai tawi ta ila, Sawma-Pakhat hi felna te, khawngaihna te, rinawmna te tela pêk tûr tihna a nih chu!

Sawma-Pakhat pe ngai lo tân: Mizo-te hian tawngkam hranpà hret han chher thar hi nuam kan tihzâwng a ni awm e —Mizo Bible-ah hial pawh ‘sawma-pakhat,’ tih ni na-reng hi ‘Pathian Ram,’ tiin emaw, ‘Pathian Ramzauna,’ tiin emaw ‘PRZ,’ ti tâwk apui pawh kan bo lo.

A tobul leh a nghawng : Sâwma-pakhat pêk hi Abrama (Abrahama) hriatchhuah a ni; a chîn chhuah erawh chu a ni lo mai thei (cf. Gen. 14:18-22 cf Hebrai 7:1). Salem Lal, Chungnungbera Puithiam —Melkisedeka hnênah Abrama râl that hâwin sâwma-pakhat a hlân kha Bible-a ziak duma record kan hmuh hmasak ber erawh a ni thung. Salem Lal, Chungnungbera Puithiam Melkisedeka khân Thuthlung Thar huna kan Puithiam Lalber Isua Krista kâwk lâwkin a lo tinzâwn a; tûn hun atân hian sâwma-pakhat chu kan Chatuan Puithiam Lalber Isua Krista puala hlan a ni zui ta thung a ni (Cf. Hebrai 6:20). Melkisedeka’n Abrama mal a sâwm lêt ang ngei khân—tûnah hian sâwma-pakhat petute chu Isua Kristan mal a sâwm lêt ve ngei bawk thîn!

Ngawi lawk teh, a chînchhuak atangin i chhui law law teh ang. Abrama’n sawma-pakhat a pêk hmaa chîn thin a lo ni fê tawha a lanna zuk awm a! Bible Commentators-te chuan Kaina leh Abela thilhlante kha sawma-pakhat nên inlaichînna nei thûk hlein an ngai. An thar hmasa ve ve an hlân niin a lang a. Kaina thilhlan kha chheh fel a nih tâwk loh avânga Pathianin pawm lovah an ngai a ni. Septuagint-a Genesis 4:7 thu hi, “Hast thou not sinned if thou hast brought it rightly, but not rightly divided it?” tih a inziak miau! A awmzia chu, “Dik takin rawn la ni la chu i tisual lo tûr; mahse, i chhep dik lo a ni lo’m ni?” tihna tluk a ni!

Khimi denchhen chiah khian Hebrai Lehkhathawn ziaktu chuan, “Rinnain Abela chuan Kaina ai chuan in- thawina tha zâwk Pathian hnênah a hlân a, chu mi avâng chuan mi fel a ni tih hriattîrna a hlawh a, Pathianin a thilpêkte kawngah chuan thu a hriattîr a; tin, chumi rinna avâng chuan ani chuan thi tawh hnuin thu a la sawi ta fo a ni,” (Hebrai 11:4) tiin! Khi laia ‘tha zâwk,’ tih khi sâptawng chuan ‘more excellent,’ tih a ni a; ‘excellent,’ tih tak mai khi a ngial a ngan ang tûr chuan, ‘tam (abundant),’ tih a kâwk zâwk bawk. Rinna rah thuawihna ber mai kha Pathian chuan A lo pawma chu a ni!

Engkim hi Siamtu Pathian ta vek a lo ni  : Pathian (Elohim) anpuia siam kan ni nâ khân, kan hloh ta si a. Kan enkawl tûr zawng zawng kha Messia zâra neih thar leh a nih leh hmâ kha chuan, kan nihphung dik tak chu saruaka piang, saruaka kîr leh mai tûr kan ni. Engmah hi kan ta a lo awm ta lo! Messia zârah erawh chuan Chatuana Nunna bâkah Krista (Messia) ro luahpui tûrte kan ni thung si! Messia tel lo chuan khawvêl zawng hi ‘engmah lo mai’ a lo ni. Chuti a nih si chuan, Pathian ta vek a ni tih hi i zir chhuak phal phawt ang u. (Leviticus 27:30; Genesis 14:19; Sâm 24:1; Exodus 19:5; Joba 41:11).

“Khawvêl pumah Chanchin Tha Kim —The Whole Gospel to the Whole World’ tih hi kan Kohhran rawng bâwlna thupui a ni. Vântirhkohten chu mawhphurhna chu an chang lo va; keini hi a changtute, ‘Krista (Messia) aia Palai,’ kan ni. Kohhran hian chu mawhphurhna chu a chang chiang a ni. Chu mawhphurhna hautak tak tihlawhtling tûr chuan Sâwma-pakhat kan pêk a ngai a. Pathian hi a retheih êm avânga suma chhawmdâwl lêt erawh chu kan ni lo! Remruattu Dik leh Fel chuan a hmangchâng a hria a. Messia Thisen hlua tlan tawhte atangin sâwma-pakhat hi a phût bîk tûr pawh a ni! Inbih chiang ila, kan chênna rama khua leh tui rinawm kan nih angin lei man chhiah pawh khêl lova Sorkâr hnêna Land & Revenue Deptt. etc., kaltlanga kan pêk thin hi le—Vân khua-leh-tui nihna Messia zâra chang tawhte hian tih tûr pawimawh chu kan nei chiang a ni! —(thle sawn ngawt suh!)  Sâwma-pakhat pêk hi Pathian Chibai kan bûk (worship)-na chi khat a ni :  “I sumin LALPA chawimawi la, I thil lo pung hmasa ber zawng zawngte nên; tichuan, i buh in chu a lo khat liam ang a, I sâwrkhur uain tharin a luang liam ang. — Thufingte 3:9-10

Sâwma-pakhat pêk loh tlukpui (tantamount) chu ‘Rawk/Suam’ a ni!

“Mihringin Pathian ta a suam tûr em ni? Mahse, nangni chuan min suam thîn. Nangni erawh chuan, ‘Engahte hian nge kan suam che?’ in ti a, Sâwma-pakhat leh thilhlanahte hian; ânchhia lawh in ni ta; nangni he hnam pum pui hian Kei hi min suam si thîn a. Ka inah ei tûr a awm theih nân sâwma-pakhat zawng zawng chu Thawhlàwm Inah rawn la rawh u, Vân tukverhte chu hawnsak che uin malsâwm dawn sen loh khawp hial ka vûr dâwn che u nge dâwn lo, min han fiah teh rêng u, Sipaihote LALPA chuan a ti. Eiraltu chu ka khapsak ang che u a; Tichuan, in lei rahte chu a tihchhiatsak tawh lo vang che u a, Huana in grêp rah chu a hlamtla ral tawh hek lo vang, Sipaihote LALPA chuan a ti. Tin, hnam zawng zawngin engthâwl an ti ang che u a, Ram duhawm tak in la nih dâwn avângin….— Malakia 3:8-12

‘SUAM’ —sâptawnga ‘ROB’ an tih chu vawi li lai kan hmu! PÊK chuan …. Grêp rah hlamtla thîn kha a hminduk tawh dâwn a; sihal notêin a pâr a nêk tilh thin pawh kha vênsak an ni dâwn ta (Cf. Hla Thlankhàwmte 2:15). Sawma-Pakhat pe ngai loten an hriat ve a va ngai ve le! Pastor hialte pawh hian Sawma-pakhat Campaign hi an tîm lek lekin a lang thîn (anmahni hlawh tûr um ang deuhva an inchanin) —sawma-pakhat pêk an hril tîm miau chuan, “…. pêk loh hian Pathian kan suam—kan rawk,” tih an zirtîr ngam ngei ngei tûr a ni thung!

Chhangdawidim Telhloh Kût (Abib 15-21)—Messia thawhlehna leh Puithiam Lalber rawng bâwlna Kût Chawlhkâr Kût/Pentekos Kût an tih bawk, kum tin Sivan 4 – 11 inkâra thleng thei thîn, Apostol Kohhrana Thlarau Thianghlim a rawn thlenna Kût. Bâwkte Kût (Ethanim 15 – 21) ….Lal Ieua lokal lehna leh mithianghlimte tâna ram buatsaih rawn thlen famkimna leh sawma-pakhat hi inkungkaih tlat an ni. Yahweh Inkhâwmpui Thianghlimte (Lev. 23) hi Lal Isua min chhandamna rahbi a ni a; chhandam rawng bâwlna leh sawma-pakhat pêk hi thil inzawm nghet tlat a ni bawk. Tin, Thuthlung Hmasaah phei kha chuan THU AWIH fiahna chu Thupêk Sawmah pawh Sabbath serhah leh Sâwma-pakhat pêk leh pêk hunbi bîkah khân a ni thîn. (Kût ni vângthla denchhen ngeia chhûnluh a ni ziah).

Pathian vênhimna hmu chiangtu leh chu mi avânga lâwm ver ver Jakoba (Abrahama tupa) khân Sâwma-pakhat hi pêk a tiamin a tiam hial a nih kha!

Sâwma-pakhat hi chi thum a awm :

a) Puithiam Levia chite rawng bâwlna chhawmdâwl nân (Numbers 18:21-28);
b) LALPA Inkhâwmpui Thianghlimte nêna inkungkaih a ni (Deut. 14:22-27);
c) Mi retheite chhawmdâwlna atân/kum 3-naa lâkkhâwm thin a ni (Deut. 14:28-29).

Thupêk Sawm zawm leh bawrh kawngah malsâwmna leh ânchhia (Lev. 26:3-45 cf Malakia 3) a awm ang bawk khân sawma-pakhat pêk dik leh pêk loh kawngah malsâwmna leh ânchhia a awm ve leh chiah bawk a ni.

Sawma-pakhat pêk kawngah Pathian mite an inthlahdah chho va; Nehemia hun lai khân tharthawhna beihpui thlâk that leh a ni (Cf. Nehemia 13 chhiar ngei rawh).  Sawma-pakhat tlahniam awmzia hian mipui rilru leh thlarau sawprawpna a phawrh mualpho. Puithiamte hnufûmna a thlen phah thei bawk. Sawma-pakhat hlamchhiah hi Pathian leh a mite inzawmna hnuk chhut chauhna hmanraw remchâng atân Setana rawn inrawlhna a ni. I inkuangkuahna chhan kha chhût chiang rawh le! Retheite’n zârzo tûr an neih tlêm phah ngei bawk ang. Tin, i retheih phahin i tâna voh malsâwmna chhiarsên loh khawp inchhêkkhâwl kha i chân then phah ngei bawk ang.

Zâwlnei Malakia hun laia an hnam suahsualna râpthlâk tak kha chhui chiang rawh! Malakia a tlângau hnuah sawma-pakhat an han pe tha ta tak tak a; Hasmonian Dynasty hun lai phei kha chuan an buhtun vui chuan mihring kal (kidney) a tiat thuak thîn, an ti zu nia!! Mahse, Setana hian thinlung thuai herna remchâng a lo zawng hmu ve leh vat thîn si a. Sawma-pakhat pêk uar hle mah se, a tûl pawimawh an bosalsan leh si thîn!

“Nangni lehkhaziaktu leh Pharisai vervêkte u, in chung a pik e! Pudina te, mohuri te, zira te chu sâwmah pakhat in pe thîn a. Dân thu pawimawh zâwk— felna te, khawngaihna te, rinawmna te chu—in ngaihthah si thîn; nimahsela, chûng chu asin in tih tûr ni, a dangte chu tih thulh chuang lovin — Matthaia 23:23

Dânin a phût miau avânga tawngpâwng pêk ngawt a ni lo; pêk loh theih lohva ui chunga pêk hrâm pawh a ni lo!! Thangthat lâk tum a, Kohhran Report-a lan mawi tum vânga pêk a ni bawk hek lo! A vûrlêt lehna hlâwk zâwk chànga tlawn lungawina pawh a ni lo. Isua khân pêk dàn kalphung a sawi chiang hle! Sawma-pakhat hi ‘donation’ a ni lo! ‘Lottery/Raffle ticket system’ leh ‘In aid of …. ’ emaw ‘down line’ a ni ngawt bawk hek lo! Ka thian phunglung deuhte sawi ka la hriat reng thin chu, “Sawma-pakhat pêk hi a lo kîr leh a hlâwk a; mahni chhûngte chauh a thatzia hrilh phal chi chauh a ni,” an ti—fiamthu thawh thiam an ni a; an fiamthu pawh a ni mah na! Mahse, mi zawng zawng hriat atân Lalpa chuan a duh si!

Rilru hi Messia kha chuan a en chîk hle a ni; hmeithaiin a thawh kha a tlêm chiang! Mi hausate zâwk kha chuan a chhiara han chhiar râlah chuan an thawh hnem zâwk! Mahse, lang lo lam Iesuan a thlîr miau si (a mitmeng a kalh ru tlat!) Hmeithai khêl ruak hiau ta kha—neih zawng zawng thawh phal ni miau hêk! In lama an kawl melh kawp rânin Isuan hausate kha a lo thlîr ve thung si! A thlîr chikim a ni ber e.

Messia thisena nemngheh Thuthlung Tharah chuan a kalphung a thlarau ruih tawh a. Temple leh Puithiam rawng bâwlna inthlâk danglamah chuan sawma-pakhat chu Messia kaltlangin rawng bâwltu Pastor leh Evangelist, Kohhran hmasâwnna pual a lo ni chho ve ta! (I Kor. 3:16; Ephesi 2:19-22; TT 4:35-37).

Sâwma-pakhat pêk ngei hian Châwmtu leh Siamtu thilphalna leh A hmasial lohzia a entîr pah bawk. Ui chung ni lo, Hlim taka petu A hmangaih a ni! A hmangaih hle che a ni! Amen.

“Hlim tak” —hei hi ngaihtuah kai leh teh—Rûkrûk mah a khap a (Cf. Exodus 20:15); Pathian ta chu i suam/rawk suh ang u. Malakia 3:9-ah chuan Hnam pum pui suahsualna chu “Sâwma-pakhat pêk loh,” a nih tâk thu record chian a ni. Chumi rual rualin sawma-pakhat pêkin Pathian thilphalna nasatzia a chochhuah theihzia kan hmu bawk a. Pêkin lukhâwng a neihzia chu Vân tukverh hawnsak ngei tûrin Pathianin chhechham meuhva tinghetin—a tiam thar leh ta nghe nghe a nih kha! Double Blessings (malsawmna thuah hnih) a inhawnzia dap chiang ila; double trouble (buaina thuah hnih) pawhin kil lehlamah a kik ve tho tih pawh hai loh tûr! Kan Mizo tawng Bible letlingtute hian sâptawnga ‘rob’; Hebrai tawnga qâba‘ hi heti zozaia an revised fê hnu pawhin min la dah fuhsak lo—‘ru’ ang lekfangin min la dahsak! A neitu hriat loh leh inrin loh hlànah rùkru chuan thil a ru thîn; Pathian Yahweh leh a Fapa Isuan hriat loh hlàn an nei lo! Rawk erawh hi zawng a ràwvà deuh—a neitu hriat lai ngeia hnehchhuh ngam, a neitu pawh kutthlàk ngam hial—a nunràwng hle mai!

Dân Bu panga (Torah)-a inziak Thupêk Sawm hi kross hnu lamah pawh a la nung reng a; Thupêk Sawm lungphêk pahniha ker mai kha ni tawh lovin ringtû thinlung chhûngah Lalpan min ziak luhsak tawh si a. (Cf. Jeremia 31:31-33; Hebrai 8, 10).  Pathian hian kan rilru ngaihtuahna hi hmang ve mawlh tûrin CHHIAR tûr thil thenkhat min pe a.  Tin, a Capital atang ni lovin—a pung atanga chhût/chhiara sawma-pakhat chhep hrang thiam tûrin min duh ngawih ngawih bawk. A pung atanga sâwma-pakhat hi chhût a ni; malsâwmna kawng tinrêng kan dawn atanga pèk a ni.

Mission Vêngthlang-a nupa tuak khat chuan buh an thar chhe ang reng hle a; Pathian lakah an nu pawh a vui deuh va; an pa—khuma pumpui nâ veia let reng chuan, “Bawihi nu, vui ma ta che. Tîn engemaw zât lai Lalpan min la pêk kha! A sî fang khat pawh i siam thiam em ni?” tia a chhuahchhalh ka la hre reng thîn.

Malsâwmna min vûrtu hi hriat reng a pawimawh; sawma-pakhat hi Siamtu, Châwmtu, Malsawmtu chawimawina pawh a lo ni! Mal min sâwmtu ta hi kan enkawl a, steward (enkawltu) tiin Bible chuan min târlang (Cf. I Kor. 4:1)! Enkawltu rinawm leh rinawm lo an awm tho bawk! A khawi zâwk nge kan nih ve le? Pharisai-te angin sawma-pakhat pe ve tho siin, enkawltu rinawm lo a nih ve theih a. Pêk ngai loh phei chuan enkawltu rinawm kan ni thei ngai lo tih hriat tel a tha.

Sawma-pakhat hi kan sum lâkluh engemaw zât atanga sih hêk a ni satliah mai lo; Pathianin engkim a nei tih kan hriatpuina leh târlanna a ni ngei tûr a ni. Thalai kan neih zîngah—sipai leh police-a tangten râl ram atang pawhin sawma-pakhat an chhep hrang thlap thlap. Pathian Kohhrana mi entawntlâk tak an ni. Kristian chhûngkuaa nu leh paten an fate leh tuchhuante hnênah lehzêl pawh sawma-pakhat pêk an zirtîr hlawhtling tih kan hriatnate an ni. A remchân dân azira Missionary ni tûr kan ni satliah ngawt lo va; NGEI NGEI-a missionary ni tûr kan ni zâwk e.

Aigupta mite ranrual an pulh puk puk laia Israel fate ranrual humtu kha Tunge? Buh-thlai malsâwmna Petu hi tunge maw ni le? Mizo Bible-ah hian “Buh neitupa,” tiin (Cf. Mat. 9:38; Luka 10:2) min dahsak a, ka khawpkham thlâwt lo! A chêk thûk hran lo hle hian zuk hria ia! “Ti-leh-lutuka,” min ti pawh a ni mai thei, Sâptawng-ah chuan, “Lord of the harvest,” tih a ni ruih mai si! Kan ‘buh-thlai tharchhuah theihna Lalpa,’ chu Isua Krista a nihzia a kâwk; chu Lalpa chu i ngaisângin i chawimawi mawlh ang u.

‘Colgate toothpaste,’ hi i hre chêk ang! A siamchhuaktu William Colgate-a hming chhawm zuia phuah a ni ta a. Sahbon leh mombati siama New York-a kum zabi 19-na tawntirha zuar ve mai lah ni! Mahse, sawma-pakhat pe ngat ngat mi a ni a. Malsâwmna a dawnzui zia hi khawvèl hringmi engemaw zâtte tûk tin zan tin kamthuahah hian a lang chiang! Tin, America rama an dâwrkai lian ber ber te zîngah khuan ‘JC Penny,’ hi langsâr tâwk tak a ni. Ràngkachak fiana tûkthuan-zanriah kîlsaa piang zawng an ni bîk lo. JC hi sawma-pakhat pe tha êm êm thîn a ni. A dang leh, ‘Lopchu Tea,’ an tih—thingpuife tui tak hi i in ve tawh em? He thingpuife Company lian tak neitu hi sawma-pakhat pe thîn a ni. Malsâwmna an va han dawng nasa ngai êm!! Aizâwl-ah pawh hian sawma-pakhat pe tha tak tak an awm. Kulikawn-a driver dingchhuak pakhat chuan Truck engemaw zât lai a neih bâkah Dâwr lian tak tak a hûng a. Car chhuak thar apiang lei zêl mai tûrin a beng a sik chhin ve eih lo. Amah tak chuan sawma-pakhat pêk a ngaihsak lem lo! Mahse, a nupui a fel a. Dik takin a pe thlap thlap a. Malsâwmna an in chhûngkhurah a luang lût liam tak meuh meuh a ni.

Sawma-pakhat pe ngai lo mi chuan Pathian malsâwmna an chhiar thiam lo tihna a ni! An rilru uikawmzia, huamhapzia, mahnihmasialzia an târlang mualpho bawk. Sawma-pakhat —Sawi nawn fo a nuam, “I sumin LALPA chawimawi la,” tih a nih miau avângin Sawma-Pakhat pêk hi Pathian chibai bûkna (chawimawina) chi khat a ni.

Min phût : I sumin LALPA chawimawi la, I thil lo pung hmasa ber zawng zawngte nên;

A vûrlêtna : Tichuan, i buh in chu a lo khat liam ang a, I sâwrkhur uain tharin a luang liam ang.

— Thufingte 3:9-10

A chunga thu pawimawh bîk khi i lâwrkhâwm leh teh ang —‘Sum,’ ‘thil lo pung hmasa ber (firstfruits) zawng zawng,’ tih thu tè khian a huam zau hle mai. Eng hnâr atang mai pawhin LALPA hian sawma-pakhat hi a mite lak atang hian a duh! Malsâwmna chhiar kim fîmkhur thiam chuan sawma-pakhat pêk lêt hi Malsâwmtu hnênah a ui ngai lo. Sawma-pakhat hian malsâwmna rawn sûr nawn leh hi a nei chiang hle a. ‘Buh in khat liam,’ ‘Sàwrkhur uain thara luang liam,’ tih thu hian LALPA atanga hnianghnârna namên lo rawn haw leh tûr a hrillâwk chiang hle.

Hei hi kan sawi lo palh riau riau ang e—Israel fanute zîngah nawhchizuar an awm tûr a ni lo va, Israel fapate zîngah mipa inzuar an awm tûr a ni hek lo. Nawhchi zawrhna man emaw, uicho man emaw, thutiam nân LALPA in Pathian inah in keng tûr a ni lo; a eng ve ve pawh chu LALPA in Pathian ngaihin thil tenawm a ni. — Deuteronomy 23:17,18

Rawngbawltu pakhat chuan, “Kan chhûngkua atangin LALPAN a chanpual hi chang sela; LALPA hnên atangin kan chanpual hi kan dawng ve mai dâwn a ni,” a ti. “Leiba rulh hma, enga-maha hman hmâa sawma-pakhat hi chu chheh hran hmasak tûr a ni,” a ti bawk.

Pathian chu thilpêkah hneh bân theih a ni lo (Cf. Sam 34:9) Theh tlêm chuan a ât tlêm, theh tam chuan a seng tam ang (Cf. I Kor. 9:6). Khawvêla mi hausa ber Bill Gates, $ 46 billions nei-a chuan thliarkâr —a dung lam mêl khat vêla thui a lei thei âwrh. Kan Pathian YAH hausakzia i teh thiam dâwn chauh a nih chu!

Kan Lalpa ISUÂ rochun tûr zozai leh a roluahpui tûrte Messia min tlanna azârah kan chang dâwn ta si! A va ropui êm! Fiaha inchona chu sawma-pakhatah hian a ni mawlh mai le. I fiah ve ngei ngei ang u.  Orthodox Kohhran rêng rêng leh Scotland, England-a Kohhranten Sawma-Pakhat an pêk duh lohna kum 100 a pêl chiang ta! An rawihin an ropuina pawh a ro lam zêl a ni!

Chutih mêk laiin in ârchhiar bih tûrin pitarte u, chakna tharin han dingdihlîp leh hrâm teh u. Ârtui etc., etc., etc., atang pawhin a pêk theih tho! Sawma-pakhat pe ngai lo pa pakhat chuan sawma-pakhat pêkin lukhâwng a nei tih a hrechhuak a. A pe ta hial a. “Ka pêk loh lai khân kan sum neihchhun hi kan khawpkham ngai lo. Dam loh hritlân thil thuah kan hmang zo hrim hrim a; pûk belh châng pawh kan nei. Sawma-pakhat ka pêk achinah chuan kan fate pawh an hrisêl ta a. Kan inchhûngkhura sum kan neih pawh tlêm tham hle mah se, kan indaih ta!” a ti.Burma-Mizo sumdâwngho tawngkam han hawh ta ila; “Sum Lu” atangin a ni leu; “a pung” atanga chhût a ni zâwk!

Sawma-pakhat tih hi Latin tawng kalphung chuan voluntarily angin a lang a; Anglo Saxon ve thung chuan willingly angin an sawi (II Kor. 9:6-8; TT 20:35). Deut. 14:22, 28; II Chro. 31:5; Deut. 14:28, Luka 6:38; 16:10-ah Tithes chi thum târlan chian a ni).(Cf. Genesis 28:20-22). Malsawmna a dawng lêt nasa a ni ngei ang…. sabbath serh that lâwmman zâwlnei Isaia puanchhuahah pawh, “LALPA (Yahweh) chungah chuan i lâwm ang a; leilung hmun sângahte chuan ka chuantîr ang chia, i pu Jakoba rochun thilin ka châwm ang che… (Isaia 58:14)” tih a ni zui hial ta a nih kha! Isaia 58:8-14 inkârah hian The Truth-ho sawi uar double blessing (Joba 1:1-3 cf. 42:10-17) aia tam, “blessings in score” —”malsâwmna sawmhnih” a awm asin! Double Blessing aia tam kan duh chuan Lalpâ SABBATH!

Pathian Lehkhathu ang chuan, dàn a ni (Scripturally, it’ a law) —— Deut. 14:22; Malachi 3:10

Thinlung lamah chuan, leibat a ni (Morally, it’s a debt)

Renchema lâk râlah, sum chhèkkhàwl a ni (Economically, it’s an investment)

Thlarau lam hawiin, malsàwmna (Spiritually, it’s a blessing)

— Matt. 6:20; Luke 6:38

— Malachi 3:10

Khaikhin chet chet ralah pawh, thilpek inphû tàwk a ni (Comparatively; it’s a proportional giving)

— Luke 12:48

Thurin lama tehin, Pathian Lehkhathu mil thlarh a ni (Doctrinally, it’s biblically sound) — I Tim 1:8, 10; 4:6; Malachi 3:8, 9

Min Chhandamtu, kan Lalpa ISUA KRISTA —Chatuana kan Puithiam Lalber awmchhun chuan malsâwm zêl che u rawh se, Amen.

Advertisements

4 Responses

Subscribe to comments with RSS.

  1. tetea7 said, on November 15, 2009 at 5:35 pm

    ZUALKO: Maengi (V. Lalengpari) w/o. C. Vanlallawma, Sikulpuikawn chu nimin (Inrinni) tlai dar 5/6 vel khan Pancreatitis natnain Aizawl Hospital-ah a thi thut. Pancreatitis chu pum hi namen lovin a na thin, nachhawkna chak ber ber chi pawhin a chhawk mang lo. Doctor ho sawi dan chuan hetiang ang natna vei hi 4% vel bak an damchhuak mang lo, an ti. Maengi chu i hriat ka ring. Celebrant Singers-ah pawh Saizikpuii nen a tel dun thin, zaidam nunnem tak kha. Fapa thla 2 leh tlem mi a kalsan. A pasal Pu Lawmtea pawh i hre tho vang. Nupui pakhat (U Hruaiteii) lo sun tawh kha.

    Pu Lawmtea a khawngaihthlak khawp mai a. Maengi pawh a lainatawm takzet. Vawiin khan kan vuiliam ta. Vuitu pawh kan thahnem khawp mai.

  2. tetea7 said, on November 15, 2009 at 5:42 pm

    Kan damchhung kum te hi thawnthu angin kan ti tawp thin…

    • chawnghilh said, on November 15, 2009 at 6:15 pm

      He thu thlabâr ka lo hriat hian pawi ka ti takzet a ni. Philosopher Lawma leh Maengi (Guide Captain of Hrawva English School) an innei tih ka lo hre hman lo va. Hruaiteii, USA-a a awm laia a chaw-chhumna bêl kha uluk takin chaw chhum nân ka la hmang ve ngar ngar a. Làwma chu a vànduai riau mai! Ka rilru a khawih hle. Ka mi-hriat, vàntlâng mi-thlìr tham ve ve, Lalpan an tân engkim rèl felsak se. Ka hrilhhai ve khawp mai!

  3. Chhana said, on November 21, 2009 at 9:53 pm

    Khaia, a va zialo ve..


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: