Chawnghilh's Blog

Vàn ram —beih vaka pâwnglàk?

Posted in Qualitus : Habitus by chawnghilh on November 15, 2009

 
Hei le, Sermon Maksak!
 
 
 

Vawikhat chu thuhriltu tuemawin, “Chau deuh mah ila, theihpatàwpa kan tih ve fan fan phawt chuan, vàn ram chu kan pâwnglàk hrim hrim tho vang,” tih thu a sawi kha —ka ngaihtuah nawn zui fo thìn!

Ephesi 2:8 thu nèn a inhmeh tawh lo hle. SAVING GRACE chanchin hi a mawi a—SAVING RACE ti pâwl lah an awm tho bawk!

 

Ephesi 2:4 Nimahsela Pathian chuan khawngaihna a ngahin a mi hmangaihna nasa tak avàng khân, 2:5 kan bawhchhiatnate avànga thi kan nih lai meuh pawhin Krista rualin min tinung ve a, (khawngaihnaa chhandam in ni ta e,)  2:6 Krista Isuaah chuan ama rual veka min kai thovin, van hmunahte ama hnenah min thuttir ta a: 2:7 chutichuan hun lo la thleng turahte chuan Krista Isuaah hian kan chungah ngilneiin a khawngaihna ngah nasatzia chu a entir thei ang. 2:8 Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; 2:9 thiltih avang a ni lo ve, chutilochuan miin an chhuang dah ang e. 2:10 Thil tha ti atan Krista Isuaah chuan siama awmin ama kut chhuak kan ni si a; chu thil tha tih chu kan awmna turin Pathianin a buatsaih lawk a ni.

 

Ngai teh, thu sawitu khàn, “Sual dovin thisen chhuak khawpin in la tang lo va ….” (Heb. 12:4) tih thua rawn pakai chhovin—a insehruh ta viau mai a. A ruh ruh leh thahnemngaih ang ang chuan kha thuhriltu khàn Mark pawh a hmu sâng hlein a rinawm. Mahse, tehfung dik tak atanga mark pèk a nih dâwn si chuan—a hmu sâng ngùt ang emaw chu le?

Mahni ruh ruha thahnemngaih a; VAN RAM pâwnglàk theih mai anga inzirtîrna leh mahni duh dàn ang sawivàwng a, thisen inchhuah duhna khawp hial pawha tharum thawh leh kutthlàk duhna pawh thil thaah a ngai dàwn dàwn ni tein a lang thei awm e. “Sual dovin thisen chhuak khawpin in la tang lo va ….” tih thu pawh —tuartu thisen a chhuah hialna lama ngai lovin, va beituin thahnemngaihna avànga thisen a va chhuah zàwk tùrah a keuh deuh tlat bawk si!

Thutak chu engnge ni ta?

“Abela … atanga … Zakaria…” tih thu hi kan hriatthiam chian lehzual theih nân—Pathian Lehkhabu hi tùnlaia Kristianten kan chilhkhàwm dàn angin Hebrai-hoten an lo chilhkhàwm ve lo va. Hebrai-ten Thuthlung Hlui Bu (Tanakh) hi chheh thumah, a hnuaia tàrlan dàn anga indawtin an chhep thìn.

1. Dàn (Pentateuch)Genesis, Exodus, Leviticus, Numbers, Deuteronomy

2. Zàwlneite —Joshua, Rorèltute, Samuela, Lalte (Historical); Isaia, Jeremia, Ezekiela, Hosea, Joela, Amosa, Obadia, Jona, Mika, Nahuma, Habakuka, Zephania, Hagaia, Zakaria, Malakia

3. Thuziak (Hagiographa) Sàm, Thufingte, Joba, Solomona Hlate, Ruthi, Tah Hla, Thuhriltute (Thufing ziaknate); Estheri, Daniela, Ezra, Nehemia, Chronicles (Historical).

(Canon of the Old Testament, New Bible Dictionary, 2nd Edition, p. 168)

 A chunga ziak atang khian Genesis atanga Chronicles chu Juda-te Bible (Tanakh) a ni thung a; a Bu hmatâwng ber Genesis-a martar hmasa ber kha Abela a ni a; an Bible-a a tàwpna ber Bu kha Chronicles a nih angin martar hnuhnùng ber record pawh kha Zakaria a ni.

“Abela mi fel tak thisen atangin, Pathian biak in leh maichàm inkâra Barakia fapa Zakaria in thaha thisen thleng khân, lei chunga mi fel thisen an chhuah zawng zawng chu nangmahni chungah a lo la thleng thei ang. Tih tak meuhvin ka hrilh a che u, chùng zawng zawng chu tùn lai chhuante chungah hian a lo la thleng ang. “Aw Jerusalem, Jerusalem! Zàwlneiho thattu, i hnèna an rawn tirhte lunga lo dêng hlumtu, àrpuiin a note a thla hnuaia a awp khàwm angin i fate vawi engzàt nge awp khàwm ka tum kha! Nimahsela in duh si lo. En teh u, in in chu a ruaka hnutchhiah che uin a awm ta (Matt. 23:32-38) ti khân Isuan a sawi.

He lai thu pawimawh tak mai hi ka thurchhuak a, Kohhranin Pastor a chhawrlai pathum, kan kianga thu vete hnènah zawhna ka siam ta thut mai a. An zînga pakhat Pastor Q chuan vàn ram chu pâwnglàk mai theih ni àwmin a lo la ngai cheu mai! Kan hrilhfiah a, Sàptawng Bible lam atangin kan khawrh a.
 
“Vàn ram chu kan theihna zawng zawnga kan beih vak phawt chuan —pâwnglàkin a luh luih theih,” tia Bible thuin sawi a tum loh lam zàwkah an zirtîr châwk thìn. Lal Isuan, “Keimaha kal lo chu tumah Pa hnènah an thleng (an lo kal) ngai lo,” (Johana 14:6) tia a sawi nèn phei chuan a inpersan hle niin a lang. A thuhrimin a hman hmanin theihna zawng zawng nèna beih vak a, vàn ram luh luih (pâwnglàk) theih han ni ta mai se zawng —Lal Isua kha khawvèla a lo kal a ngai hauh lo tùr ale!
 
He thu-ah hian Baptistu Johana chu Lalpa ngaihin mi lian (Luka 1:15) a ni a; Johana chhûngah khân Vàn ram—Pathian Lalram Thu Nung (Thutak) a awm tihna a ni.
 
Chu thil—amaha Thutak awm avàng chuan mite hnènah Simna Thu a hril thìn a; mi tam takin a hnènah simna baptisma an chang a (Cf. Matt. 3:5f). Tin, khàng hun lai vèk khân Johana’n Lal Heroda hnènah, “I unau Philipa nupui (Herodi) i neihsak hi a thiang lo a ni,” tia a lo zilh tawh avàngin khurbîng Herodi chuan Baptistu Johana kha a hal ta sauh va. Tihhlumna hun remchâng tak mai, Heroda pian champhaphàkah a lo hmu fuh ta a, Johana lû a la (pàwnglàk) ta (Marka 6:17-29, Matt.14:1-12) a nih kha.
 
Lal Isuan Baptistu Johana thihna changchàwiin Vàn Lalram nun neitu dik tak te chu khawvèl-tisa-mi (diabola faten) an thil tihsual laka an nun sual humhim/hliahkhuh nân —adik adawk pawh thlu lovin an bei vak thìn a; an nunna an pâwnglàksak thìn tih a sawina a ni zàwk e.
 
Tin, Isua vèkin, “Chutiang bawkin Mihring Fapa pawh hian an lakah a tuar ve dàwn a ni,” (Matt. 17:12) tia a sawi ang ngeiin, Amah Isua ngei pawh kha pâwnglàka tihhlum a ni zui ta a.
 
Tin, Zàwlneite leh Stephana an tihhlum dànhmang pawh kha pâwnglàk vek a ni (Cf. TT 7:51-53). Chùng bàkah Bible-a an hming chuang ve hman ta lo Isua zirtîr—Apostol-te leh tùn thlenga Mosia Hla leh Messia Hriattîrna Hlapui sa kawp, Martyr-a thi ta zawng zawngte pawh hi an duh rèng vànga thi pakhatmah an awm lo. Anmahnia Pathian Lalram nun awm chu a hrethiam lotuten an do va, “An pâwnglàk thìn,” tih min hrilhna a ni.
 
Pâwnglàk tih tawngkam a rawn pianchhuahna bul, Isuan a sawi angin, “Atìr ata tualthattu, thil tisualtu chu diabola a ni,” (Joh. 8:44ff; 1 Joh. 3:8). Pathianin lei vaivuta a siam mihringte Rûlin a tihtlùk thu (Cf. Gen 3:1-7) ngun taka kan chhiarin, Dragon Rùlpui tar ni ta—diabola’n a la tingmit mêkte rilruah chuan vàrpawh lohna avàngin pâwnglàka beitu nihna chu an la thlang ta mah mah zàwk thìn a nih hi!
 
Keini, he thuziak chhiartute erawh hi chuan, rinnaa mihuai kal hmasate hniakhnung zuiin—thisen chhuak (tisa thihna) mai mai te chu kan tawrh a ngai zàwk a lo ni e. Lalpan hriatthiamna dik pe theuh che u rawh se. Amen. Abela leh zakaria thih inkar chhung zawng khan
 
 Lalram nun neitute khàn mi kut (kutthlàk) an tuar zàwk thìn a nih kha! Chu mai bàkah Iesuan, “Baptistu Johana awm achin tùn thlengin vàn ram chuan bei vakna a tàwk thìn a, a bei vakte chuan an pàwnglâk thìn,”  tih thu hi i pâwnglàk chiam avànga Vànram lùt thei i nih tùr thu sawina a ni lo—Pathian mi (vàn mi) i nih tikah, Sual hnathawhin tihchhiat che a duh ang, Chanchin Tha avànga a thah duh hialna che kha—van ram pâwnglàk an tih tak zàwk chu a ni thung e. Chuvàng tak chuan, tisa tihlum thei chu a hlauhawm lo; mahse, tisa leh thlarau tihlum theitu chu hlauh zàwk tùr thu Isuan min hrilh hial a nih kha. 
 
Chauh châng ni chuan, Pathian dinglama TUNA min Sawipuitu Advocate —Tholeh Isua Krista (chatuana kan Puithiam Lalber), kan aiawha ding kan nei mêk a ni. Apostol Kohhran hmasaten kal lehzèlna tùr an hriat tawh loh mêk laia an beidàwn mêk laia an harh thar lehna kha a ni tih Hebrai Mite hnèna Lehkhathawn i chhiar chângin hrechhuak thìn ang che. Keini pawhin kan chauh chânga kan Oasis lo ni ve bawk thìn rawh se. 
 
“Tin, taksa tihluma thlarau tihlum thei lotute chu hlau suh ula; Gehenna-a thlarau leh taksa tiboral theitu erawh chu hlau zàwk ang che u.Matthaia 10:28
Advertisements

One Response

Subscribe to comments with RSS.

  1. bhruaitea said, on November 16, 2009 at 7:25 am

    Ka ngaihdan chiah i rawn ziak chhuak ni berin ka hria. Ka lawm e..


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: