Chawnghilh's Blog

Tleiràwlna, Mupui anga siamthar

Posted in Qualitus : Habitus by chawnghilh on November 16, 2009

 

“I tleiràwlna chu mupui angin siam tharin a awm leh thìn,” —Sam 103:5b 
 
Mahni rau rauva kan chanchin ngaihnawm leh lung tilêng ber thìn chu mahni vànglai hun hi a ni tlângpui àwm e. Pathian Ropui tak chuan KAN VÂNGLAI HUN THEUH hi min lova siam nawmsak kim èm! LALPA ISUA chu fakin awm zèl rawh se. HALLELU YAH!  Lal Solomon-a chuan, “Thalai te u, in that lai chèn ula, in la naupan viau lai hian hlim rawh u; amaherawhchu, Pathianin in chungah ro a rêl dâwn tih hre reng ang che u. Engmah engto nei suh ula, in pang tinatu awm hek suh se, in that lai hun a rei dâwn lo. Tin, i vànglai hian i Siamtu hre reng rawh, Ni tha lote a lo thlen hma leh làwmna rèng rèng ka nei lo ve i tihna tùr kum te a lo hnaih hma hian…” (Thuhriltu 12:1) tiin min zilhin min fuih a ni. Tùnlai tleiràwl inchei duh dânte hi i rîlrem zàwng a ni ve em? Sneaker man to tak tak, jeans leh denim, salwar, kurta, cell-phone tha ber ber  chi —nu leh pate ko tirittu i ni vem em? Make-up leh thil dangah te i intlakral nasa ve thìn em? I chhûngril nungchang a lan chhuahna mai a ni ta awm e.
 
LO INBIH CHIANG VE TEH—USA chuan an National Emblem atân Turkey (sai-âr) kha thlang ta lovin, Eagle (Mupui) an thlang hnuhnawh ta kha a ni a. German ram kâwlhrâwng tak pawh khàn Mupui tho an emblem atân an hmang a. Kaisara hun laia Rom Lalram ropui takah pawh khân Vth & Xth Legion-ten mupui tho tho kha chhinchhiah nân an lo hmang zu nia! Kristian Thalai rualte pawhin, “Mupui” ngei hi kan chhinchhiahna ni tùra LALPAN min lo thlanfelsak chu a ni tih i hre chhuak ang u. “I tleiràwlna chu mupui anga siam tharin a awm leh thìn,” tia ziaksak kan ni! Grik thufing chuan, “Mupui tar tawh pawhin vamùr viak tha tak hi zawng a la hen e,” an lo ti hial thìn zu nia! Thil chìk mi i nih angin han ngaihtuah zau ve mah teh. Mupui dam reizia leh chakzia hi Grik hnam fingte mai khàn an lo zir chhuak a ni bìk hlei ne’m! Tùn laia mithiamte meuh pawh hian engtia rei nge a dam an la chhùt chhuak bìk lo ni àwmin an sawi! Davida pawhin Thlarau Thianghlim hriattìrna ngei hmangin ENGEMAW TÀRLAN TUR RIL TAK min neihsak tlat tih kan hriat chian a pawimawh hle mai.
 
Thalaite hi mupui anga siamtharna chang kan ni ngei dâwn lo’m ni? Mupui hmâah a thil man tùr an insaseng bo hman ngai meuh lo! Chutiang bawkin mupui thlàwk chho chuan hùm hàwn a nei lo ngai lo zu nia! Hlawhtling leh hmuingîl taka mahnî bu zâwla thlawh kìr leh theihna fo chu Kristian Thalaite dinhmun atân a va han awhawm tak èm! Chau tawhte hnèna thiltihtheihna mawlh mai pawh chu! Chakna rèng nei tawh lote hnèna chak thar lehna pawh chu thalaiten kan mamawh ta!
 
Thalai duh tak te u, han inbih thùk leh hret teh u. Chauvin in hah ve em? Chak zàwk tùra ngaih tlangvâlte pawh in tlu thal dèr ang e aw! Nulate leh tleiràwlte u, i inthlîr chiang teh ang u. Hah lova tlàn tùrin, chau lova kea kal tùrin —fei thar lehna kan va mamawh lulai tak èm!
 
LALPA Pathian chuan, “Ngai teh u, nîte chu an lo thleng mêk a ni, chùng niah te chuan ramah tàm ka tîr ang a, chaw tàmna ni lovin, tui tàmna ni hek lovin, LALPA thu hriat tàmna zàwk chu. Tin, tuifinriat atangin tuifinriatah leh hmàr atangin chhakah pawh an vàkvai ang a; LALPA thu chu zawng tùrin kil tinah an tlàn ang a, an hmu lo vang. Chumi niah chuan nula tha leh tlangvâlte chu tuihàlin an thidang ang a,” tih thu hial Amosa 8:11-13-ah kan hmu. Chùng zînga mi chu i ni ve palh hlauh ang e aw!
 
Ngai teh! Khàm chhawrdawh hmun sânga lungtohlàwt kârah chuan mupui notèten riltâmin a pui thlàwk kìr an lo ngaichâng ve thìn asin! “A pa hmusittu leh a nu thu awi ngainèptu mit chu, phai choàkin an kher chhuak ang a, mupui noten an ei ang,” tih hla Thufingte 30:17 thu hi i bih chiang ngun tawh ngai em? Inchhùngkhur atanga thil zir tùr pawimawh tak a lang a ni. Tin, mupui notè te thlawh chhuahtîr dân thu leh hla ngaihnawm leh bengvàrthlàk tak chu kan sawi kim sêng rih ta lo; lo dap zau ve mai tùrin ka chah ang che.

 

Keiniho zîngah pawh hian, “Min tihnawk apiang leh sual keimahnia bet tlat chu i dah ve ang u; tin, Isua, kan rinna siamtu leh tifamkimtu lam chu enin, kan hmaa intlànsiakna tùr awmah hian chhel takin i tlàn zêl ang u,” tiin Hebrai 12:1f chuan min fuih ngun hle.

“Mu chiten sa an ei,” tih kan zir hun lai te kha!! In zir hman ve emaw chu le? A va han dik tak èm! Mu chi thum chanchin kimtawiin târlang ila:

Mulukawlh (vulture), Mu âr-la (kite/hawk) leh Mupui (eagle) te hi! A eng ber khi nge kan Kristianna kalphung chu ni ta ang le? Kan lo inbih chian ve theih nân i târlang ngam teh tlat ang!
 
Mulukawlh : A chènna chu lei chhuat, hmun hniam a ni. An bu chhehna pawh! Sa ruang rinràwlah an neih a, man-hlim —sa tharlâmin an infah puar ve ngai bar bawk lo. A huhovin an tawlh dùl dùl ringawt mai a ni lo’m ni?

Mu-ârla : Boruakah tum mumal nei hran lo pawhin an thlàwk kual an thlàwk kual thìn. Chimawm leh huatthlala tak an ni. “Ka âr aw birù birù, Mùin a hèl a hèl a che, ka âr aw biru biru,” tih a ngaih fo thin kha! Tin, Mu-ârla hian a thisâwn sa, a rimchhe tawh leh man thar—thianghlim tak pawh an ei kawp thei a. An fawm kawp thiam ngei e. An thliar fel hrang ngai lo! A bu chhehna pawh thing lèrah a ni tlângpuinain thlipui leh ruahpuiin a bu chhehna chu a kar-phàwng chhe thei zu nia! Kim hlel thil zawng a lo tlo hran lo ve!

Mupui erawh hi zawng —tum neiin chak takin a thlàwk chhuak chauh va; hùm hàwn nei lovin a kìr leh ngai lo a ni ber. Mal-tlat (a mal) pawhin a chèng hlim thei thìn. A bu chhehna chuti maiin thlipui leh ruahpui nuai chhiat theih a ni ve lo. Sa tharlâm, man chawp, a ei thìn! A thara Pathian min koh hranna dik tak chu hei ang ngei hi a lo ni. Mawhphurhna leh chanvo sâng tak thalaiten kan nei thar ta vek e. LALPAN a tharin thalaite tân a thu hi malsàwm rawh se.

Tum mumal neiin mupui chu chak takin a thlàwk chhuak thìn : Lêng kualin a thlàwk mai mai ngai lo ni àwmin an sawi. ‘Nula fel an fawr ngai lo, nula fawr an fel ngai lo,’  tia LEIKHI MISS-in thàwm a lo nei hlut thîn pawh kha a dik ru viau lo maw? Mupui chuan a hmulte a thing tìl thìn a; hmul thar a chawr no leh thîn —mawi tak leh hrisèl takin a hun a hmang thar leh thîn ni àwmin an sawi lehzèl!

Mupui (eagle) bu chhehna chu khawi hmunah nge?
“Khâm kovah te a chèng a, lung tohlàwt hmun him takah a riak thìn. Chuta tang chuan ei tùr a bihthla a, a mit chuan hla tak a hmu,” tih thu Joba 39:28f-ah kan hmu. Khàm ko hmun sâng leh hima Lungtohlàwt (Messia/Krista) kianga riak fo thìn kan ni ve lo’m ni? Thlarau lam chaw tùr pawh ni tin a thar thlîr a, hla taka mi pawh mupui anga fiah taka hmu thei kan ni ve tawh hlawm lo’m ni?

Mupui chuan a man tùr a hlah ngai lo : Thlarau Thianghlim chuan, “Mupui tum nei bir angin,” tiin Joba 9:26-ah mupui nungchang mak danglam bìk chu kan entawn thiam nân a lo ziak leh zu nia! Tum mumal nei lovin Kristian Thalaite hi i sapa-tàl mai mai lo vang u. Thlarau lama lukhàwng nei tha tùr i melh fîmkhur ang u. Dâwt thu inlailang leh mai tùr lakah pawh fihlìm i tum thar fo vang u.

Mupui thlâwk chho hian awmze ril tak a nei em? Nei ni ngeiin a lang! “Chau hnènah te chuan thiltihtheihna a pe thìn a; chakna rèng nei lo te chu a tichak thìn. Tleiràwlte meuh pawh an chauvin an hah ang a, tlangvâlte pawh an tlu dèr ang: LALPA nghâktute erawh chuan an chakna an siam thar leh ang a; mipuite angin thlain an thlàwk chho vang a, hah lovin an tlàn ang a; chau lovin kein an kal ang,” tih thu zàwlnei Isaia 40:29-31-ah kan hmu.

I tleiràwl vànglai tha aia tha kha LALPAN siam sak leh ngei che a tum. Lo inbuatsaih ve tawh ang che. LALPAN malsàwm theuh che u rawh se.
 
“I tleiràwlna chu mupui angin siam tharin a awm leh thîn.” —Sam 103:5b 
 
Amen.

 

Advertisements

One Response

Subscribe to comments with RSS.

  1. Tysons F. Gautreaux said, on April 14, 2010 at 8:24 am

    Hi, Nice jeans in your post, I love that great jeans, I need to find one for me, Bill


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: