Chawnghilh's Blog

Biblical Romance from the Book of Ruth —Thuhmahruai

Posted in Qualitus : Habitus by chawnghilh on November 17, 2009

 
Ruthi 1:1-2
Rorêltute chuan ro an rêl laiin heti hi a ni a, chu mi ramah chuan tàm a lo tla a. 1:2 Tin, Bethlehem-Juda-a mi pakhat Moab rama awm tûrin amah leh a nupui leh a fapate pahnih nen an kal a. Chu mi hming chu Elimeleka a ni a, a nupui hming chu Naomi a ni a, a fapate pahniha hming chu Mahlona leh Kiliona, Bethlehem-Juda-a Ephrath mi an ni. Moab ramah chuan an kal a, chuta chuan an awm ta reng a.
 
 
 

Literature subject tem ve zuaia hun rei lo tè ka hman ve lai khân kan Hotupa khàn Bible chhiar zauh zauh tùrin mi tùr nasa thei khawp mai! A mi tùr chhan leh vàng kha ka lo chhùt pha ngai hauh lo va; eng ualah mah khân ka lo ngai hran lèm si lo —ka va kaw lo tak! Literature kawnga a mi duhsakna kha ka lo hre phàk lo hle a lo ni ber e! A pawi ngawt mai, thil zir that duh loh man hi —eng’ruai kan nih phah ta lo rèng a ni!

Nia le, RUTHI BU hi i ngaihven teh ang. Bible bu chilhkhàwm 66 kan neihah hian a Bu Riat-na a ni ngei mai le. Bung 4-a then sawm a ni a, châng (verse) zawng zawng belhkhàwm 85 chauh a nei. Zawhna (Questions) 16 a pai a, thupèk (commands) 30 lai a awm a, thutiam (promises) 2 a keng tel. Hrilhlàwkna (prophecy) tel miah lo leh Pathian atanga thu rawn thleng (particular message from God) inziak a awm miah lohna Bu hmasa ber, ti ila a fuh ber mai àwm e. Engtik hun laia ziak nge? A ziaktu Author tunge? —Hriat chian a har viau!

 

 

 

Lehkhabu i chhiar rèng rèng hian —i chhiar liam puat thìn nge, thu pawimawh tak tak luhchilh ngun tùr a awm hmasa thìn tih ringin thumal tinrêng i chìk cheuh cheuh thìn? Lehkha chhiar-mi i nih tak tak chuan ‘thuziak bul intan dàn’-ah chiang hmasa fo ang che. Chiang hmasa lovin, i chhiar thui hman lutuk ang a —a awmzia i man lo palh ang e.

Ruthi 1:1-2 thuziak chinah ringawt pawh khian BIH CHIAN hmasak atâna ka duhpui che chu —“Rorêltute chuan ro an rèl laiin,”; “chumi ramah chuan tàm a lo tlà a,” “Bethlehem-juda”; “Moab rama awm turin,” tih chin chauh pawh hi ni se —chhui chian hmasak tùr chin tlêmtè pawh hi a ngaihnawm tham hian ka hria. Intichhel hràm hràm tùrin ka duhsak che a. Harsa takin miin an zir a, sum pawh an sêng nasa. Awlsam têin, sum sènso ngai tam lovin he thu i chhiar atang hian Pathian Thu a nih mai bàkah, literature lama i mit a lo keu vena tùrin engemaw tal thangtharte tâna chhiar tùr khung luh ka duh ve tlat a ni. (Ka thiam lo; mahse, min lo dawhthei a niang chu!) 

Rorèltute chuan ro an rèl laiin —tiin bul a rawn intan màwp mai a. Ruthi Bu hmakhalhah hian RORELTUTE tih Bu a awm a. Thlìr hmasa puat ila. Rorêltute ziaktu (Author) hian thil a khaikhin thiam hle a —Rorêltute Bung 1:1 leh Rorêltute Bung tàwp ber, châng tàwp ber (21:25) nèn hian KHAIKHIN phawt ila.

“Tin, Joshua thih hnu chuan heti hi a ni a, Israela thlahte chuan, “Kanaan hote chu dova kan tâna bei tùrin tunge han kal hmasa phawt ang le?” tiin LALPA chu an râwn a.” —tih thu Rorêltute 1:1-ah a lo inziak ang. An thil tih dâwna LALPA (Yahweh) râwn hmasa an nih thu hi a pawimawh hle. Abrahama pawh khàn a thil tih dâwn rèng rèngah Pathian a râwn hmasa ziah a —puan ina Hagari a chhai dâwn erawh kha chuan Pathian a râwn hmasa hauh lo!

Rorêltute Bu chhûng thu hi a ngaihnawm chho hle a. Ram tiam Kanaan-a Israel fate an luh tantirh hun lai —Indona nasa tak an hmachhawn reng reng hun lai leh LAL an la neih hmâa RORELTUTE an neih hun lai kha a ni a; Pathian an ràwn hmasak apianga hmuingîl, an ràwn loh chânga vànduai an nihzia pawh zir chian tùr a awm nual ang. Tin, literature-ah kan lùt ti-tuai deuh bawk a. PROSE leh POETRY hriat hran chian lehzual nân Rorêltute Bung 4 leh Bung 5 hi kan khaikhin chian peih phawt chuan prose leh poetry lamah pawh kan mitmeng a fiah kàwk kàwk a rinawm!

Rorêltute Bung 4 hi PROSE-a ziak a ni a; thu thuhmun tho kha POETRY-in Bung 5-naah hian an târlang ve leh a. Chu chu kan zir chian poh leh PROSE leh POETRY kalphung danglamna hret kan man chiang ngei bawk ang.

Rorèltute 21:25 i bih leh zuai teh ang, “Chùng lai chuan Israelte zîngah lal rèng rèng an awm lo va; mi tinin mahni tha tihzâwng zâwngin an ti mai a ni,” tih thu a lo inziak ta tlat mai! Khaikhin rawh —Roreltute 1:1-ah chuan “LALPA an râwn,” tih a ni —Rorêltute 21:25-ah ve thung chuan, “mi tinin mahnî tha tihzâwng zâwngin an ti mai a ni,” tih a lo ni ta thung! A chhe lam zâwngin Zângkhua a bungbu chiang ngei mai! Chutiang hnuaiah chuan MALSAWMNA leh HMUINGILNA a awm thei dâwn rèng em ni?

RUTHI Bu-ah pakai nghàl teh le, “Rorêltute chuan ro an rèl laiinheti hi a ni a …” tih thu —engemaw tak chu a thleng ta. Chu chu eng thil nge ni ta le? “… Chumi ramah chuan tàm a lo tlà a,” tih thuin a rawn zui ta!

Tàm tlàkna ram ni ta tlat mai chu “hnutetui leh khawizu luanna ram” tia Exodus 3:8-a Pathianin a hruai luhna kha a ni si lo’m ni? Hnute tui leh khawizu luanna ramah chuan TAM A TLA thei ta tlat mai maw?

Tih tak èmah chuan Deuteronomy 26:15 thute hi a va ngaihnobei lawi si èm! “I awmna thianghlim vàn atang chuan rawn en la, hnutetui leh khawizu luanna ram, kan pî leh pûte pèk tùra chhia i lo chham tawh ang khân i mi Israelte leh i leilung min pèk hi malsàwm ang che,” in ti tùr a ni,” tih a nih kha —hetiang hian an tawngtai zui ta lo a ni ngei ang le! “Mi tinin mahni tha tihzâwng zâwngin an ti mai a ni,” tih thu hi zir chian a ngai hle mai! Government a mumal lo va; Pathian an ngai lo riau ni pawhin a lang tlat! Leviticus 25-27 inkâr thute hi a va pawimawh tak èm! Pathian Dàn an zawm chuan MALSAWMNA —an bawrh erawh chuan ANCHHIA.

 

 

 

“Chumi ramah chuan tàm a lo tla a … Beth Lehem-juda …” —Tàm a tlàk nachhan a awm chiang a ni! Hnutetui leh khawizu luanna ram kha tàm tlàkna ram a lo ni ta —paradox lutuk thil kan chhiar thleng ta tlat mai! Bethlehem khua hi hmun hniha awm thìn a ni a, he laia Bethlehem khua erawh hi chu Judai ram Bethlehem a ni bìk kher bawk a. Ruthi Bu ziaktu (Author) hian kan ngaihfin palh a remti lo khawp mai! Judai rama Bethlehem khua hi Ephrath tia thual nawn a ni kher bawk thìn a, chumi awmzia chu Chawr-no/Rahchhuah tihna a ni a —Krista (Messia) rawn pianna tùra hmâkhawsâng atanga ruatlàwk a ni hrim hrim bawk (Cf. Mika 5:2). Mika 5:2 thu hi Kristâ rawn pian hun lai khân Khawchhak mifingte (Magi) leh Juda mipui-hote khàn an lo chhiar chiang vak lo a ni tih pawh a hriat theih a —Lal Heroda pawh khàn a lo chhiar chiang lo a ni mai thei —mahse, nausên-mipa suat a han nih leh khân Heroda meuh pawh khàn Mika 5:2 thu hi a hre thawi leh hnuhnàwh pawh a ni mah nà! (Joshua 19:15; Rorêltute  12:10 kan bih chianin Zebulun rama Bethlehem khua a awm ve thu a lang).

Beth-Lehem hming awmzia hi hre chiang leh ila —  Beth=In, Lehem=Chhang “Chhang In” tihna a ni. Chhang han tih hian rinrâwla an neih CHAW sawina a ni. CHAW awmna In ber hming pu Beth-Lehem khuaah tàm a tla ta si maw? He khuaah ngei hian Vàn-Chaw (Vàn-Chhang) Yahshua Messiah (Isua Krista) kha khawvèl mi zawng zawng tân a rawn piang tawh a nih kha!

“Moab rama awm tùrin,”  tih thu kan han chhiar lai lai hian, eng rilru nge kan put le? Rorêltute 3:14 thu i chhiar ngai tawh em? “Tin, Israela thlahte chu Moab lal Eglona thuhnuaiah kum 18 an awm a …” tih thu kan chhiar tlat mai. Châng 15-naah, “Nimahsela, Israela thlahte chuan LALPA an han auh veleh LALPAN Gera fapa Ehuda, Benjamin mi, mi veikhawr, chhandamtu a rawn siamsak a …” tih thu —chhanchhuahna thu kan chhiar chhunzawm a. Israel fate leh Moab chu hnam inhal leh inhmêlmàk an nihzia kan hre thei a ni. Deuteronomy 23:3 hi i chhiar leh teh ang, “Amon mite leh Moab mite chu LALPA mite pungkhàwm zîngah an tel tùr a ni lo …” tih a ni khauh bur mai!

Israel-te leh Moab hnam inkâr chanchin kan hre chiang ta —hnam inhmêlmàk èm èm, inneih pawlh thiang lo … mahse, Romeo (Montague) leh Juliet (Capulet) thawnthu ang deuh mai a ni dâwn ta tlat; chu mai a la ni lo —Rorêltute zînga mi chak hmingthang Samsona leh Delili (Philistine) te pawh kha kan hrechhuak uai uai thei àwm e. 

LOVE STORY hi hnam inhal leh inhmêlmàkna kâra ROMANCE lo awm laklawhte hian a tingaihnawm lehzual bìk a. Tùnlaia Tuikuk Buaina kârah pawh hian Tuikuk nula leh Mizo tlangvâl inkâra ROMANCE ziak thiam tak awm sela chuan —hnam leh hnam inpùmna khawp a awm thei mawlh ang! Arab and Jew (Wounded Spirits in a Promised Land by David K. Shipler) pawh hi chhiar nuam tham tak a tling asin! KUCH LUCH HOTA HEIN pawh kha —a changtute hming atang ringawt pawhin Hindu leh Muslim inkâr a ni chiang khawp mai! Rilru a khawih dàn a danglam bìkin a thùk zual bìk thìn!

RUTHI BU pawh hi JUDA leh GENTILE inkar a ni chiang dawn khawp mai! Juda-ten UICHO an tih Gentile hnam atanga RUTHI kha a changtunu a ni dâwn —Mizo fiamthu nuihzàtthlàk pakhatah chuan Mizo pitar —tar lutuk tawh tawngtaina thu hetiang hian an sawi thìn, “Lalpa, En teh, hei i pi hi …” tiin! He Mizo pitar hi a tar ve àwm ngawt mai! Mahse, RUTHI hi Isua pî (the great granny of Jesus) tak tak a ni a, Isua Pî (Ruthi) chanchin kan la ziak chhunzawm zèl ang … hei hi a THUHMAHRUAI chinah i nei rih ang aw ….

 

The Pilgrim’s Progress Part I by John Bunyan-ah chuan character 100 leh khuate kha an hmingput ang zèla khawsa an ni hlawm tih i hria e —Khawvèlthilafinga, Boralna Khua, Zahna Kàwn, Tihmawha, Beiseia, Rinawma, Thlèmsama etc., chutiang bawkin Bible i chhiar rèng rèngin Khua leh Mihring hmingte hian awmzia a nei vek zèl a. Elimelech, Naomi, Mahlon, Chilion, Ruth, Orpah tih te pawh hian awmzia an rawn nei vek dâwn tih hrelàwk ang che … Tin,  CRITICISM an tih —subject awlsam vak  lo kan vaihmà pah nghàl dâwn a lo ni ber e.  

 

Acknowledgement : Thlalàk mawi leh lungtilêng ka rawn hman theihna mi(sual).com-a mi —mzvision, XaiA etc., te chungah ka làwm hle. Tin, thlalàk ka rawn hman latute (photo-graphers) hming zawng zawng ka rawn târlang kim thei lo —engpawh ni se, an zârah ka thuziak ka rawn chei mawi thei a —ka hlimin an chungah làwmthu ka sawi e.

 

To be continued

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: