Chawnghilh's Blog

Mi inlungrual paliin Zeng an zàwn

Posted in Qualitus : Habitus by chawnghilh on November 19, 2009

 
 
Marka 2:1 Tin, ni engemaw zàt lai hnuah Kapernaum khuaa a lo luh lehin, inah chuan a awm tih thu a lo thang ta a. 2:2 Tichuan, kawngka bulah pawh awmna rèng awm lo khawp hialin mi tam tak an lo awm khàwm ta a; tin, an hnènah thu a hril ta a. 2:3 Tin, zeng pakhat, mi palîina zàwn, a hnènah an rawn hruai a. 2:4 Tin, mipui avànga a kiang hnaia an lo kal theih loh avàngin a awmna in chung chu an thiat ta a; tin, an reh-pawh zawhin a àwngphah chu a chunga mi zeng mu chawp chuan an zuk thlàk a. 2:5 Tichuan, Isuan an rinzia chu a lo hmuhin —zeng hnènah chuan, “Ka fa, i sualte ngaihdam a ni tawh e,” a ti a. 2:6 Tin, lehkhaziaktu thenkhatte chu chutah chuan an thû a, 2: 7 “He mi hian engatinge hetiang thu a sawi nì? Pathian a sawichhia a nih hi—mi pakhat—Pathian chauh lo chuan—tuinnge sualte ngaidam thei nì?” tiin an thinlungin an ngaihtuah a. 2:8 Tin, Isuan an rilruin chutiangin an ngaihtuah tih a rilrùin a lo hre ta nghàl a, an hnènah, “Chùng thu chu engatinge in thinlunga in ngaihtuah nì? 2:9 Zeng hnènah hian, ‘I sualte ngaihdam a ni tawh,’ tih leh, ‘I àwngphah là la, kein kal tawh rawh,’ tih hi a engnge sawi awl zàwk? 2:10 Engpawh ni sela, khawvèlah Mihring Fapain sual ngaihdam theihna a nei tih in hriat nân,’ “(zeng hnènah chuan) 2:11 “Tho la, i àwngphah là la, i inah kal rawh, ka ti a che,” a ti a. 2:12 Tichuan, ani chu a tho va, a àwngphah chu a la ta nghàl a, an zàa mithmuhin a kal chhuak ta a; chutichuan, an zàin mak an ti hle a, “Hetiang rèng rèng hi kan la hmu ngai lo,” tiin Pathian an fak ta a.
 
Marka  2:1 thu intan dàn hi—a hmâ lamah thuhmatheh a awm nasa fê tawh a ni tih a lang chiang nghàl hle mai! Bung 2-na a ni tawh rèng alàwm! 
 
Ni engemaw zàt lai hnuah …” tih thu atang pang hian Marka Bung 1-na lamah Isuan thil tam tak a ti hman tawh tih pawh a lang chiang khawp a, Kapernaum khua ngei pawh hi a rawn tlawh thleng tawh tih a hriat theih — “Kapernaum khuaa a lo luh lehin” tih  thuin a intan nghàl a. He khuaa lùt hman mai lo hian Isua kha a tùl thei hle a ni tih a chiang—ni engemaw zàt lai Kapernaum khuaa lùt thei lovin a khawsa hial a ni. Phâr—Mosia dàna khawih thiang lote pawh khawihin a tidam mai a (cf. Marka 1:41); Bung 1:45 thu atang phei hi chuan Isuan fianrialna hun a chang thlàwt lo tih a chiang lehzual, “… chutichuan, Isua chu a langin khuaah a lùt thei ta lo va, thlalèr hmunahte a awm ta zàwk a; tin, hmun tin ata a hnènah an lo kal thìn a.” Mi bawrhsâwmten ISUA hi englai pawhin kan mamawh reng a ni!
 
Thu ziak-mite hian ziak dàn style hrang hrang hi an nei fir fer a. Marka ziak ai hian Matthaia ziak hi a tawi zàwk a; a kimchang lo hret zàwk bawk. “Tin, ngai teh, zeng pakhat khuma mu chungin a hnènah an rawn zàwn a. Tin, Isuan an rinzia a hmuhin, zeng hnènah chuan, “Ka fa, thlamuang takin awm rawh; i sualte ngaihdam a ni tawh,” a ti a (Matthaia 9:2) —tih chin chauh a ziak a. In a tàwt èm èmzia a ziak tel lo va; zeng zàwntu zàt leh Isua hnèn an thlenpui hràm hràm dàn a ziak chiah chiah bawk hek lo!
 
Luka hi dàktawr a lo ni bawk a, damna lam rawngbàwlna chanchin chu Matthaia (chhiahkhawn thìn) ai chuan a ziak chipchiar daih mai — “Tin, ngai teh, khum chawpin zeng pakhat an rawn zàwn a; a hmâa dah tùrin zàwn luh an tum a. Tin, mipui avàng chuan zàwn luhna rèng an hmu lo va, in chungah an lâwn chho va, in chung atangin, a lai takah, Isuâ hmâah, a khum chawpin an puh thlàktîr a. Tin, an rinzia chu a lo hmuhin, a hnènah chuan, “Mihring, i sualte ngaihdam a ni tawh e,” a ti a (Luka 5:18-20) tih thu kan hmu ve leh thung a ni. Luka ziak atang chauh hian in chhûnga mipuiten Isua chu an awm hual a ni tih erawh chu a chiang ta khawp mai!
 
 
כְּפַר נַחוּם‎ ::: Kaper (Kfar) awmzia hi khua tihna a ni a, Naum hi Nahuma tihna a ni—Nahuma Khua כְּפַר נַחוּם‎ tihna a nih ber chu! He khuaah hian Petera te chhûngkua pawh an chèng thìn a —signs and wonders pawh Isuan a tihnem hle—khaw dangte ai mahin thilmak a tihhnemna a ni hial ang. A khuaa chèng mipuite khàn thilmak hmuh kher an duh zèl vàng em ni dâwn le?
 
 
INDOOR MINISTRY : “Inah chuan a awm,” tih thuthang lêng vèl ta chiam atang hian Isua kha inah a awm tih mipui nâwlpuiin an ngaihven satliah mai pawh ni lovin—an panchilh nasa hle a ni. An khaw society pawh close knit ve tak an nih duh hmèl khawp mai! He in chanchin kan belh chian mêk hi a dung lam leh vàng lam zau zâwng kan hre chiang chiah thei lo; mahse, an hun lai azir zèlin patung in ni ve ta fam chuan a dung leh a vàng pângngai ve tak pawh a nei ve ngei ang! An in sak dàn pawh dì leh dàp a ni ngai lo tih erawh chu kan hriat hmasak a tha e! A tlângpuithuin in chhâwng an sa ngai lo, liang leh khanchhuk pawh thing-zângkhai deuh an hmang mai a. Chirh-ban nèna zùt phui thlap a ni thìn. Pâwn lam atangin in chung zâwl làwn chhohna kailàwn hi bang hrûlah an siam tel ngei thìn a. In chung zâwlah chuan hlèt —kaw tereuhtè an tiàwng ve bawk thìn. Tin, Pathian hian a mite himna hi a ngaihtuahpui èm avàngin, in sak dàn design leh in chung zâwl atanga chètsual-palh thilthua an tlàk loh nân ‘tlàk dàl’-a hung thlap tùr a nihzia thlengin a hrilh chiang hle thìn a ni. In thar in sak chuan chuta mi an tlàka in in chu thisen chhuahna in a nih loh nân in in chung in hung tùr a ni.”Deuteronomy 22:8.
 
He in hi tu in tak chu ni ang maw? Petera chènna inah a ngaih theih deuh mah nà! Mahse, rinthuin kal thui lo ila—Isua rawn thlenna in a ni tih-ah chiang ila. In dang awm ve zozaiah a thleng lo a ni ve mai! Aizawl khua ni ta se, tu in tak chu ni ang maw? 

 

HOUSE FULL —ENTIRELY CONGESTED : Luh belh theihna tùr ‘hmun àwl’ a awm tawh lo! A lùt hnuhnùngho—vêng thlèr lehlama intikâwlhrâwng deuhte phei chu—phingphihlìp ang tâwt tâwtin—saisîr zâwngin an inhnawh lùt tawh ni berin a lang! Pum lam insawisèl kàwpuar leh kaw-khawh deuhte tân phei chuan inthlahrunawm tak a ni, chhuah leh mai maina chi a ni tawh si lo. Mi hrisèl tak tak inhmu khàwm an ni bawk si lo! “Kawngka bulah pawh awmna rêng awm lo khawp hialin mi tam tak an lo awm khàwm ta a …” tih thu Marka hian a ziak a. Chùngho hnènah chuan Isuan thu a hril ta a ni!  Natna nei tam tak te chanchin hi Marka hian a rawn thlùr ta hauh lo mai! FREE CLINIC chanchin ngaihnawm èm èmte zînga mi a tling hlen ta! Thleng hnuhnùng, in chhûnga thutna hmun chang ve lo tân pawh DAMNA chang hmasa a nih theih hle a ni!

A sik leh sâ (season) hi nipui thaw-chho tan a nih tawh teh chuan—a lum ve halh halh hle ang le. Tin, Palestina rama khatih hun laia an in sak dàn lah khàn tukverh a nei ngai vak si lo—a ùp ve hrim hrim khawp ang. In chhàwng sa theite chuan tukverh chu an hawng ve ngei tih erawh Eutuka atangin kan hre chiang thei a; mahse, Eutuka tlàkna khua kha Kapernaum a ni lo tih erawh chu chiang tlâng ila.  Mizote hriatthiam tùr ang zâwng phei chuan, vawih uih châm rei chi chu a ni chiang khawp ang!

Entîrnân —Lawngtlai thlang lam daih Bûngtlâng South-ah sâwn HOUSE CHURCH anga inkhàwmho hi an awm ve a. Private In-ah chuan mi hi an tàwt rang khawp a. Thusawitu leh Meeting Chairman-te pawh—mipui engemaw zàt lai nèn chuan—an inhnawh mùk (an inèkbeng) thei khawp mai a. Tumkhat, an inkhàwm chu an tàwt zual riau a—mahse, boruak dangin a tlàkbuak ta thut a. In chhûng chu boruak rimchhe takin a khat ta tlat mai! Meeting Chairman ber mai chuan a kianga thu ve Sermon sawitu tùr chu hminghmerh meuhva kovin, “I vawih a ni maw?” a’n ti phawng mai chu—hnâr lo hup fir fer an lo ni hlawm tawh bawk a—an hlim tlâng khawp asin le! An insûm zo lo ta deuh vek a. Tah lam a lang lo khawp mai!

GOOD TEAMING : Thil tum thuhmuna rinawm taka thawhho tluanchhuah zak theih hi thil harsa tak a ni àwm e. Pâwl tam tak rawn dingchhuak hluai—ropui taka che tlâng thei—kehsàwmna neuh neuh avànga thawkho zui leh ta lo hi an tam èm èm a ni. Sawm-leh-Pahnihte zîngah pawh khân Iskariot Judas ber mai kha!

Team member zînga thiam lo chawrchê bìk an awmin, goal score tùr chance tha tam tak a MISS theih!

Marka hi Paula nèna GOOD TEAMING nei tluanchhuak ta chiah lo—Paula pawhin rawngbàwlpui atâna a duh zui tàk vak loh kha a ni a. Marka hian thui fê Tirhkoh Paula kha a zui hnuin (TT 12:25) kawnglakah a lung a lêng (home-sick) thar thut pek a. Tih tak èmah chuan Zion Tlânga Marka Nu Pindan Chungnung nei tham khawpa mi-chhumchhia an ni bìk si lo! Hàwnkìr a duh ta thut mai kha—Paula lah hi mi paukhauh, tih tawh vèk vèk hlenchhuah duh zèl mai mi! An inkâr a chhe thui hman thuak a ni (cf TT 15:37, 38 “Tin, Barnaba’n Johana (Marka an tih chu) an hnènah hruai a tum a, Paula erawh chuan ani chu an hnèna hruai tha a ti lo, Pamphulia ramah anmahni a kìrsan a, hna thawhnaa an hnèna a kal ve tàk loh avàng khân.”). Mahse, tlaikhawhnuah Paula pawh hian Marka hi a reconciled ve leh tho va. II Timothea 4:11-ah chuan Paula’n, “Luka chauh ka hnènah a awm ta a. Marka kha sâwm la, han hruai ve rawh, ani chu rawngbàwl lamah ka tân a tangkai si a …” tiin, Paula a inphahhnuai thiamna khàn Marka hnuk a tiulh ve hle emaw a hmingpui hnuk a tiulh tih a hre chiang ve ta a ni mah nà!

Chùng thil zozaite atang chuan Marka hian GOOD TEAMING hlutzia hi a hrechhuak ve lehzual ta riau pawh a ni ang e —Marka 2:3-ah hian, “Zeng pakhat, mi palîina zàwn, A (Isua) hnènah an rawn hruai a,” tiin a ziak bìk ta kher a ni.

Zeng a mut hlàwm tawpna hlàng kha—sîr kil (hmâwr pali) nei a ni ngei dâwn. A mutbù hi la mawih hman lo a ni ngei ang —zawn sawntu nei lo chuan zun leh èk pawh a mutbùah a cheh palh nual ve mah nà! Chu lam chu dahtha ta ila —ZENG tawngkam hi vawikhat mah ziah làn a ni lo va. ISUA hnèn a thlen duh èm èm thu pawh pakhat mah a lang lo. Ziak dum phènah engemaw ti tak zâwng hian a lo sawi chiam a nih chuan thu dang—mahse, literature rèng rèngah chuan a ziak dum chin atang chauh hian TEHKHAWNG kan siam tùr a ni tlat a ni! Chu chu Isua pawhin huaisen leh CONFI taka a tihdàn, “Tih ziak a ni,” tia tanchhan siam nghet tlat kha a ni! Chu chu kan hriat reng a pawimawh!

“A hnènah an rawn hruai,” tih hi ‘A hnèna rawn hruai tum’ an ni tih a chiang! In chhûng a lo khat hman vek tawh a. Kawngkâa luh ngaihnalàm a awm tawh lo. Tui hàl èm èmte tâna tuisik a no nèna han inpèk ngaihna a awm tawh chuang lo. A chhûnga awmte pawhin polite an chhuah tawh lo va; tlàwmngai fâl han chhuak then tùr an inhmu zo ngang tawh lo bawk. Chhuak bìk nih phei chu an tum lo khawp ang le —damna chang hmasa nih tum ràn vek an ni ang em âw? A chhûnga inbeng lùt hman tawhte hian kawng ken an tum lo hle, “…mipui avànga a kiang hnaia an lo kal theih loh avàngin …” tih thu Marka hian a ziak ta hial!

A WISE, QUICK AGENDA AND AN IMMEDIATE FOLLOW-UP : An che muang dawlh dawlh lo hle! Engtia hla nge an rawn zàwn tawh kan hre chiang thei lo. Mahse, inhnial buai lovin, thlenpui an tumna lamah char char an rawn zàwn a. Mimal ngaihdàn an dah lalber lo thiam vek a ang. In chhûnga mipui chhuak duh tawh ting si lote avàngin RAWTNA THAR chu zeng zàwntu mi palite hian lungrual takin an rawt thar lehnghàl tih a hriat hle! Tlachawp thila hruaitu inlungrual tha an va tling tak èm! Zàwntute hi mahnî tàwka inti-Dictator an ni lo! Thu leh hla aiin ACTION a ngah char char zàwk! A tha ber thila lungrual taka ti duh vek an ni. An tihtùr an hlènchhuah hmaa inphatsan mai mai lo mi an ni.

Thil-tum (intention/objective) ringawt sèp-rawtuiin an hun an hmang hèk chiam chiam lo khawp mai! Kawngka tàwt phui tak bulah khân Agenda tlachawp an nei nghàl vat a. Ràwtna tharlâm tak hi an sawi rual thap a rinawm loh! A tuemaw ber khàn, “In chung lamah chho phawt ila …” a ti mai thei a ni. Chu chu a dangte khàn îhê lovin an zàwm tih a chiang. Tin, a zàwntute hi mikhual an ni lo—an ram kalphung leh in sak dàn hre chiang an ni. Khawiah nge kailàwn a awm tih pawh—zawh chawp vèl chiam ngai lova—hre chiang vek an ni. An thil tih tùrah hian VISION thui tak an nei hlawm vek a ang hle! Yahshua (Isua) hnèna HRUAI THLEN NGEI NGEI kha … an tum ber chu a ni!

” … a awmna in chung chu an thiat ta a; tin, an reh-pawh zawhin a àwngphah chu a chunga mi zeng mu chawp chuan an zuk thlàk a …” —ACTION ACTION, PRACTICAL PRACTICAL … “Science chu a tiha tih a ni,” tih thuin min rawn chìm hun a thleng ve thìn—in chunga zàwn chhoh, àwng rehpawh, hruizên hmanga hlàng thlàk thlàk … a kawnghmang an hre hle hian ka hre ngawih ngawih! Disaster Management lamah pawh tel ve ta se, an nèpin ka ring hauh lo. Hruizên an lo inringlàwk pawh hi hmangchâng an hre kim ka ti lo thei lo! Kei, mi mâwlmang tak  hianMarka Bung 2 thu tlêm tè hi ka chhiarin, tuihnih belh hi ka tihmàkmawhah ka ngai ve tlat a ni! Ka tui-hnih ve kher avànga ropui lehzual ta viau ni lovin, Chanchin Tha ziaktute thuziak hi rintlàk an nih èm avàng zàwk leh THU NUNG min hnutchhiah hian min TUR VE TLAT tàk vànga ziak ve ka ni ta a ni! His Truth is marching on!

THEIR FAITH : Mi palite RINNA kha Isuan a fak ta daih mai hi—i chhinchhiah chiang ngai em? “Tichuan, an rinzia chu a lo hmuhin …” tih a ni daih mai! Zeng, tihdama awm hi a vànnei thlàwt a ni—amà rinnaa damna chang a ni hauh lo. A zàwntu, mi palite RINNA avàng liau liauva nihlawh ve chauh a ni zàwk!

Zàwntu mi palîte RINNA avànga tihdam a nih tàkzia hi Matthaia, Marka leh Luka-te hian an ziak kim hlawm vek. Thahnemngaihna dik tak, tuten emaw lungrual taka an neih azârah—ningkhàwng hre lo—tuten emaw NIHLAWHNA leh MALSAWMNA hi an dawng ve thei a ni tih hi a lang chiang thei ta riau a ni. Engtin nge hmâ kan làk zui ve dâwn le?

SIN IS THE SOURCE OF DISEASES : “Ka fa, I sualte ngaihdam a ni tawh e,” tih thu hi zeng a dam viahna tùra Isua tawngkam ril tak a ni. Sual inngaihdamsakna ber mai hi Thiamchantîrna chu a ni, thiamchantîrna hi Judicial word a ni bìk kher a—Dàwrpui-a thil zawrh indawn tlàwm siakna (bonus/bargain) tawngkam mai mai a ni hauh lo! Sual ngaidam theitu Isua hi khawvèlin a mamawh!

Mi naràn tei raw-lai huai huai hi “Ka fa,” tiin i sawi mai mai a rinawm loh! Zeng chawrchê tak hian “KA FA” titu a han hmu leh, ‘Ka fa (Child),’ titû lak atanga DAMNA a chang ta hi chu (chhûngkhatah pawh, mahni fa-hrin naupang chumchiap innocent ang chiahin a treat ta)—khawvèl la awm leh tùrah kimchang zàwkin ringtuten kan la hriatpui khawp ang! Tihdamna thilpêk changtute hian an hnèna dam lo rawn kalte hi ‘Ka fa (τέκνον) teknon —mipa leh hmeichhia thliar chuang lova ‘Naupang (Child)’ ,’ tiin, an sual an lo ngaidam ve thei hlawm em? ISUA (Yahshua) hi chu a danglam a ni! I tân leh kan tân a inhuam reng. Amah pantu pan dàn azìr a ni mai!

Luh dâwn khân tuman an kian phal tawh si  lo—a zàwntuten in chung zâwl remchâng lai chhun-pawpin an han che ta tak tak mai chu—in chhûng lam atanga inkhàp theih chi mai mai ni tawh hek suh, thlìr chhoh ngam a ni tawh si lo! Mit chu mîm duh tak a ni tawh ringawt! Kan Lalpa meuh pawh a kùnchàl tawhin a rinawm! Tihdamna changtu chuan a àwngphah chu sùk hmanhmawh vat chi a ni tih a hre ve khawp ang! Awngphah khaiin, luh dâwn lama amah kian duh lotute thlîr zui vawng vawng tùrin a chhuak ta—chhuah lamah chuan kalna tùr an kian ta sang sang mai. In chunga lâwnte pawhin hruizên chiah an chang ta! Tihdamna changtu hian a zàwn thlengtute hnèna làwmthu thlen nachâng a hre lo a nih pawhin—a zàwn thlengtute hi an vuivai a rinawm loh! Chu chu ringtute awmdàn mawi a ni!

Damna chang an hmuh khân Isua khàn fak leh chawimawi a hlawh lo—tunge a nih an hre chiang lo. Fak hlawhtu chu Pa Pathian vàna awm Yahweh a ni ziah thìn. Hèng thil hnuah hian Pa Pathianin a rawn tirh MESSIA a nih thu mi tlêmtè ten an hre zui ve ta a. Zion Tlânga a taka Isuan rawng a bàwl lai khân Tharhmasa (firstfruits) Israel fate kha hnam tin atanga 12,000 theuh chhinchhiah a nih diam tawh kha—hnam 12 laiah chuan 144,000 SEALED an nih hman thu chiang takin kan hre thei (Thu Puan 7 & 14).

 

————————————————————————————————————————————————————————————————————————————————————————————————-

Sik leh sâ a inthlàk a, zàn a reiin ni a tawi ta a—mut ka la kham lo zui! He TOPIC hi upload loh aiin ka rawn ti hràm a ni e. He thuziak hi Zaia Pa (Kolasib)  puala ka ziak liau liau a ni e. Zaia’n a pa hi ‘Pathian thu titi lama tui tak’ a nih thu a rawn sawi zauh va — chu chuan ziak lamah mi tiphùr thar lehzual a, hei hi ni tumtawi nân ka rawn târlang ve thei hràm a ni e. Theologian ka ni lo va, kil dang atanga thlir venaah a chhiartuten in lo ngai ve mai dâwn nia!
Advertisements

3 Responses

Subscribe to comments with RSS.

  1. Zaia said, on November 20, 2009 at 11:57 am

    Thanks Chawnghilh. Heng thute hi ka print chhuak zel a, ka pa chu ka lo pe zel e. A lawm ngei mai. Ka pa hi Pathian thu sawi nuam ti, a titi ka hriat hnem ber pawh Pathian thu leh sol-fa chungchang a ni a, a puala i ziah a nih thute nen lam hian ka lo hmuhtir ang e. Ka lawm e.

  2. chawnghilh said, on November 20, 2009 at 1:15 pm

    Pafaa hèng thu thehdarhtu in han ni ta mai chu —ka beisei phàk bàk Lalpa remruat a ni ang e. Tlachawpa thu ziak hi a phuai duh tih erawh chu min hriatthiampui dâwn nia! Chhiartu pawh hi ka neih ka inbeisei bàr ngai chuang lo va; zànkhat mitchhìn thut pawha thudah neih ve hrim hrim atân tia ka rilrùk an ni vek zàwk asin!

    LAIRIL-ah ka lùt ni tin a nia aw! I chhawp ngaihnawmin, bengvàrthlàk tak an tling. Lehkhabu siam ngei rilrùk awm rèng i lo ni e. Keep on writing!

  3. bhruaitea said, on November 22, 2009 at 3:40 am

    A ngaihnawm hle mai, hriatna a tipung leh sawt a, a lawmawm thrin e.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: