Chawnghilh's Blog

Biblical Romance from the Book of Ruth #3

Posted in Qualitus : Habitus by chawnghilh on November 23, 2009

 

Juda hmeithai senior hret tawh leh Moab hmeithai junior deuh hret inhrawn zui an ni a. An hmeithaina chhan erawh chu a na dùn ngawih ngawih khawp—an khingpuite sûn ve ve an ni. Inhnèm tlei dùn thei tak ang maw? Chu’lam ai mah chuan an ni tin eibàr kawnga chètchhuah a ngai zui ta vat si—thenawm-khawvêng—anmahni hmêl lo làwm hiam hiamtuten eng thil mah an rawn chhùng lùt hran chuang si lo! Moab atangin, chhel leh huaisen takin, kalpui nei hran chuang lova Bethlehem an rawn thleng dùn thei hrim hrim pawh hi thil namai a ni lo! An chung zàwna vêngtu rinawm a awm tih a hriat hle.

Khatia Bethlehem an rawn thleng ta kha—hmàna an thenrual thate kha chuan Naomi chu an rawn làwm liam liam tih kan hria. A monu Ruthi ve thung hi le? Moab mi a nih hrim chuan, Juda khua leh tuite rilruah chuan Lota leh a fanu pahnihte an rawn lang nghàl rawih ang—Moab hnam hi ‘pa leh fa inpàwlna tenawm (incest)’ atanga hrinchhuah an ni tih an hai si lo!

Bethlehem daia fehchhuak tawh rau rauvah chuan Ruthi fehchhuah vawikhatna aia fehchhuak hlawhtling hi an la awm ngùt lo mai thei a ni. Ruthi Bung 2-na hian ‘a ni khat experience’ a awh khat vek zu nia! Sam 137 tawi tè hian Babulon saltàn kum 70 chhûng hrehawm an tihzia tàrlanna nèn hian han khaikhin chhin leh teh. Ruthi ni khat va feh chhuak chanchin hian lehkha phèk a awh hnem zàwk tlat mai!

 

Kâwl a hnîm, ni a pil dâwn ruai—buhsanghar epha khat lai chu Ruthi chuan a phur hàw ve ta a. A pî Naomi tâna a fùn-hàwnsak, a chhang ei-bàng pawh a phawrh tel nghàl a. A pî chuan, “Vawiinah hian khawi lama buhto nge i zawn? Khawiahnge hna i thawh? A lo hre duh che chu malsàwmin awm rawh se,” a ti a.  Ruthi pawh chuan a va thawhna hmun a sawi a, “Vawiina ka va thawhnapa chu a hming Boaza a ni,” tiin. Boaz tih awmzia hi ‘mi thiltithei, mi ropui’ tihna a ni. Ruthi Bu-ah hian a hming hi vawi 19 lai a lang. Juda pachal —Messia rawn pian chhuahna tùra chi thlahtute zînga mi a ni ve ta. A hming vawi 19 èm èm an lantîr hi thil dik a ni ang em âw? Ruthi a tlanchhuah tawh hnu kha chuan Mahlona ni mai tawh àwm!

Naomi’n Chemosh tih aiah, “YAHWEH, mi nung leh mitthi chunga a khawngaihna bâng chuang ngai lova chuan amah (Boaza) chu malsàwm rawh se,” a ti zui nghàl vat a.  Chu mi neinung tak Ruthi-i’n a va belh fuh tàka chu Elimeleka laichìn a lo ni reng si! Khawngaihna ngah tak Boaza kamchhuak pawh hi Ruthi chuan a pi hnèna hrilh nuam a ti hle, a piin, “Chu mi chu—kan lamhnai—kan laichìn bul a ni asin,” a han tizui leh a. Moab mi Ruthi chuan, “A nih tak chu, ‘Ka hnènah tel reng ang che,’ mi ti nghe nghe asin,” a ti zui ve leh bawk a. Hemi tlaiah zet hi chuan Naomi leh Ruthi chu khiang rah ro tlà ang mai—an khi dùn sêng reng mai!

 

 

Naomi a va thatho thar ta deuh ve—a phùr hle mai! Lungphùr phùra phùr a ni ta hauh lo mai! Naomi chuan a monu chu a’n fuih thatho lehzual a, “Ka fanu, lo danga an hmuh hauh lohna tùr chein a chhiahhlawh nulaho zîngah hlìr chuan kal la, a tha ang,” a’n ti ngawt thùl! A va nihlawh zui tak èm! Boaza khàn a hna thawk tlangvâlho a sawi laiin, Naomi chuan nulaho a sawi ve thung si! Bih chian a ngaih phah—Septuagint-ah leh Old Latin Bible-ah te chuan tlangvâlho ti lovin nulaho tih a lo ni ve tho bawk a. ‘Tlangvâlho tih thumal hi mipa leh hmeichhe sawi kawpna tawngkam hausaa ngaih a lo ni thìn,’ an ti. Buhsanghar (barley) leh Buhpui (wheat) seng zawh thlengin Ruthi chu Boaza lovah buhto a zawng khàwm tluanchhuak ta a. Buhsanghar leh Buhpui seng chhûng hi a lo berah pawh chawlhkâr sarih pumhlùm a ni ngei ngei thìn a—thènthilhlan tùk atanga chhiar tana chawlhkâr pumhlùm zak zak pasarih awh chho a ni ngei ngei thìn (cf Leviticus 23:15). Tin, Boaza lova fehte zîngah Ruthi a hmêltha berin, a taima ber a ang tlat!

Naomi duhawmzia hi English Romantic Poet William Wordsworth (April 7, 1770 – April 23, 1850)-a chuan hlain a lo chawi ve hman bawk a; hetiangin —

A being breathing thoughtful breath,
A traveller ‘twixt life and death;
The reason firm, the temperate will,
Endurance, foresight, strength, and skill;
A perfect woman, nobly planned
To warn, to comfort and command,
And yet a spirit still, and bright
With something of angelic light

 

tiin, Nunna leh thihna ruam kârcheha fehchhuak—hmeichhia azàwnga tha làwtlak, a remruatna zahawm famkim … tiin Naomi nihphung ze mawi tinrêng kha a lo phuah chhuak thiam teh e. A àwm e, a phû a ni! Naomi khàn a fanu hnènah, “Ka fanu, i tâna tha tùr khawsakna ka zawnsak dâwn lo’m che ni? Ka laichìnpa Boaza, a chhiahhlawh nulâte nèna hna i va thawhna kha a awm a ni lo’m ni? Ngai teh, zàninah hian buhsanghar hruiah a zàp fai dâwn a. Chutichuan, inbual la, inthih la, i incheina puan sin la, hruiah chuan zuk kal rawh; amaherawhchu, chawte a eia a in zawh hmâ loh chuan a hnènah inhriattîr hauh suh ang che. Tin, heti hi a ni ang a, a mut hunah chuan—a mutna chu chhinchhiah la; tin, lùt la, a ke hlìm la, mu rawh; tin, ani chuan i tih tùr chu a lo hrilh ang che,” a ti a. Chu tak chu alawm Wordsworth-a’n, ” … nobly planned; to warn, to comfort and command …” a lo tih chu—remruatna fel leh zahawm, a vaukhànna khauh leh thlamuan-thlàk tak te chu kumkhaw sawi a la tling dâwn a ni!

Hei hi HRUIH an tih chu a ni.

Kum 2004 November 27 kha ka la chhinchhiah ve reng—Ruthi chanchin sawiin tuteemaw nèn hun kan hmangho va. Dârkâr 1½ thuak hun ka hmang a. Chuta ka titipuite zînga putar pahnihte chuan ka tawngkam kha an pàw’fuh bawk a niang, kùnin an dìr ta tlet tlet mai a. An ngaithla chhunzawm lawk thei lo nghe nghe a, “Feh chhuak tùr ka hriat tawh azàwngah chuan Ruthi aia incheiparh leh rimtui zàwk hi an awm thei ngùt dâwn em ni?” ka tih kha —an lo ngaithla fuh deuh ni tùr a ni! Naomi te nufa hi nuthlawi chinchâng hre ve thawkhat tàwkah ngai ila, an infuihna pawh hi thil mai mai a ni hauh lo! Naomi hian TORAH-a thu inziak hi a hun taka hman dàn a thiam hle a—abìk takin Jubilee Kum (LALPA Pawm Kum) hman dànah a chiang zual a ni. Tùnlaia ringtute pawh hian Jubilee kalphunga chhandam kan nihzia hi hrethiam ila chu, inhnialna a tlêm khawp ang! Lalpan Tawngtai dàn kalhmang min zirtîrah pawh Jubilee kalphung a la tàwp lohzia chu, “Kan batte hi min ngaidam ang che, keini pawhin kan englo bâte kan ngaihdam tàk ang khân …” tih hi a awmze hre lovin kan lo sawi ve mai mai palh ang e.

Ruthi lahin a pi fuihna thu rèng rèng chu, “I sawi apiang chu ka ti ang e,” a ti hmiah hmiah bawk! Boaza Leilet kha Hollywood leh Bollywood an tih aia a nèp bìkna tùr a awm hauh lo! Buhsanghar an zah fai zàn kha a tarik kan hre chiang chiah thei lo nàin, hriat reng tlàk a ni tlat! Buh seng hun chhûnga an hun hnuhnùng lam chu a ni tawh ngei ang—an zawh zàn pawh a ni mah nà! Thènthilhlan tùk atanga chawlhkâr sarih a ral chhoh chiah hi thla dèt chhoh mêk hun lai a ni ziah bawk a—zàn èng nuam et awt chu a ni dâwn lo hrim hrim!

 

 

Mahse, chhùn èng ni sa tak a pil liam fel tawh a, zàn thlifîm tam zàwka buh zah fai kha a hahdam hret bawk a. Chhùn lamah duhtàwkin sebàwngpa hmui phuar lohte nèn buhphal an lo chîl fè tawh bawk a (Deuteronomy 25:4 cf I Korinth 9:9 & I Timothea 5:18), zàn thlì thàw tam zàwkah hrui chunga buhvui chìl chiam tawh chhèk vùm zozai kha  raw-tlàwn hmâwr kàkin an vàwrh suau suau ang—buh sî leh a kuangte chu thlîin a chhêm lêng ang a. A fai-hùm kha hruia tla khàwm tùr chu a ni. Hei hi Mizo-te chuan LO ZAWH NI kan tih ang vèl a ni ber àwm e.

Buh chhùn vùm bula muhìl ta mai Boaza nungchang hi a mak ve hle. Heti hian han ngaihtuah chhin teh —khawvèla buhte hi ringtute kan ni a, buh seng hun leh Lalpa Isua Krista lo kal hun tùr a innang dâwn a. Buh chhùn vùm kianga mu zâl ve ta mai Boaza chuan Krista leh a mite chawlh-hahdam hun tùr a entîrlàwk ve mai lo’ng maw?  

Ruthi hian Boaza mutna lai chu a lo chhinchhiah ta khiau va. Dìm taka va zuiin, ani a lo kai deuh chhap tawh bawk a—a chatthla vèl ta màw tihin—thla lah a dèt chhoh hun lai chauh a ni si—leilet zâwl duai lah chu a thim ruih mai bawk! A pî sawi ang ngeiin, Boaza ke lam chu a hlìm ta dau dau mai a. Hei hi Khawchhak-chhûngkawnuten an pawmlai pasal muhìl tawhte zahpah taka zànmut huna an va fin ve dàn a ni thìn. An pasalte an zah a; chuvàngin an ke lam atangin an inthawlh chho thìn thung a ni. “Ke hlìm” tih tawngkauchheh hi thu-khuhna (euphemism) tawngkam a ni—zànlaiah chuan thil engemaw tè tè a thleng ta … THUKHAWCHANG sawi tùr an ngah a ni! Hnung thak inhiahsak tawn zàn atân chuan an hmang hman ta lo! A hming mai chuan talith an inzàwn —a hun laia KISS tih ang vèl a ni mai thei! 

Ruthi Bu ziaktu hian boruak dangdai tak a ziak tel zauh thiam hle. Mi namai lo Boaza THIL HLAUH a ziak tel kher a; a zàn muhìl han thangharh thutin, ZANLAI-a a ke lama thil AWM TA chu a tlànchhiat phah ta èm lo kha (Ruthi 3:8). 

Boaza ke bula let ve reng hmeichhe rimtui tak chuan, “I chhiahhlawh Ruthi ka ni,  chutichuan, i chhiahhlawhnu hi i puan mi rawn zàwn rawh, ka laichìn bul (go’el) i ni si a,” a ti ta rawih mai! A pi rawtna a tihlawhtling tan ta mèk a ni. Ruthi hi Moab nuthlawi tawngin a tawng tawh chiah lo! Boaza chhiahhlawhnuah a lo indah ve tawhzia tum hnih lai a sawi chhuak ta! A huaisenna zawng zawng nèna chèt hun hai lo leh bawhpelh mai mai lo lalnu Estheri pawh kha a tunu a ni chiang ta rèng a ni (cf Estheri 7:3, 4).

Sawi nawn a ninawm loh, Boaza zànlai thophang chuan tuemaw a rawn hmusual phùngpuinu deuh nge—Boaza’n thil dang engmah a hlauh loh vei nèn, hemi zàn khera thil a han hmu sual hi chu a kumkhaw sawi a tling ve ngawt ang— “a HLAU” tih tihmal kan hmu tel tlat hi! A hlauh èm èm, a khurh phah hlàwk hlàwkna hiali kha a hmangaih èm èmi a lo ni dâwn ta! Lalpa Isua Krista  rawn pianchhuahna tùra thil khirhkhàn a awm châng rèng rèng khân hmeichhe namai lo tak tak—Juda hmeichhia an ni emaw Jentail hmeichhia an ni emaw HMEICHHE NAMAI LO an rawn zuang chhuak ziah thìn ni te pawhin a lang.

Boaza kha a tawngvai lo! Mahse, a thu chhàkchhuah kha a la inchawhpawlh buai deuh erawh chuan a lang. Nupa tuak thar tùr atân meuh chuan, kum lamah pawh an lo inthlau deuh hlek a ni àwm e. Han inkoh tàk râlah pawh, “Ka fanu …” tiin Boaza’n a ko ziah a. “Yahweh-in malsàwm che rawh se: tlangvâl rethei emaw, hausa emaw i zui loh dànah hian a tìr ai mahin a hnu lamah hian thatna i tilang nasa ta zàwk a,” tih thu hi Ruthiin belhchian dàwl a nih zual zèl dàn a lanna Boaza meuhin Ruthi hmachhawna a rawn sawi chhuah chu a ni ta. Tih tak èmah chuan Moab hmeichhia an lo ngaihdàn chu engemaw ni riau zawng a awm ve thei asin! “I chung a pik e, Moab! In boral ta, aw Chemosh mi, an fapate chu tlànbo atân, an fanute chu salah a pe a,” (Numbers 21:29) tih thu TORAH-a mi an hai hauh si lo! Mahse, Ruthi nungchang leh che-zia hian a hril chiang èm tho mai— “Chutichuan ka fanu, hlau suh aw …” tiin a’n hnèm ve leh tè tè a. Ruthi tân hian a ngaihnawmin a ngaihthatthlàk viau ta ve ang! Mahse, Boaza thu sawi kal zèl hian âr bo a zawng deuh riau! “I sawi ang zèlin i chungah ka ti ang …” tih thu ber mai chuan Ruthi ngènngàwlna a zahpahsak hle dâwn chuan a lang e. Kâwl a èng tak tak meuh si ang em? 

” … kan khuaa mi zawng zawngte hian hmeichhe fel tak i ni tih an hre vek si a. Tin, laichìn inhnai kan ni ngei mai a, AMAHERAWHCHU …” tih thu Boaza’n a sawi kai ta tlat mai! A inzùk leh ta tlat!

“Friday-ah inhmu ngei ngei ang aw, i tân siâr làk pawh ka huam a, tlâng sâng ber vûr bawh vekah pawh nangmâ pual chuan ka lâwn peih hrim hrim ang … Friday-ah chuan ngei ngeiin kan inhmu dâwn nia, RUAH A SUR LOH CHUAN …” tih nèn a inang thawkhat ta viau mai!

Ruthi tân a làwmawm dàn a NEP leh deuh tlat lo maw?  Ruthi bîm bêm tùr chu! Thihnain Mahlona a lo sûn tawh a; hemi zân meuhah hi chuan ‘DAMLAI LUSUN’ an tih fo hi a experience belh leh mêk a va ang ta ve le! Zak chung chung si, a pi Naomi fuihna vauchher takmeuhva sawi chhuak a ni rih chauh bawk si nèn—a va hrilhhai dâwn tak èm!

“Keimah aia hnai zàwk a awm a, Zànin chu awm phawt la …” Boaza’n a la ti ta deuh deuh!

“Keimah aia hnai zàwk,” a tih chu, tu tak ni ang maw? Ruthi angah han inchan chhin ta la, rilru a va bîng duh dâwn ve le! Hmangaih ngawih ngawihten, “Thian angin i awm zui tawh mai ang,” a’n tih ringawt pawh hian—thinlung hi a kehsawm nasa thei teh mai asin!  Mahse, Noami khàn  fing takin he an laichìn hnaivai ber nia Boaza’n a rawn sawi hi a lo thlang duh hauh lo tihna em ni dâwn?

Zànlai a pèl fel tawh, ni chhuahna tùrin dârkâr 3½ emaw àwrh chauh a la ngai, “zànin chu awm phawt la …” han intihhnuhnawh lekfang tàk mai chu—a va rei dâwn tawh lo èm! Ruthi tân a thlaphànthlàk bàkah a hrilhhaithlàk mawlhin a rinawm a; a sawitû tân pawh a mangànthlàk ve tho bawk ang. Mahse, hlautu khàn, “Hlau suh,” tia a’n hnèm ve ta ngial kha le! Khuantèvìk a hnai zual sauh mai thei zu nia!

Ruthi hi a lungngam siai ang em? A rilrù chhûngril tùr chu a inpawlhsawp (mixed emotion)  nasa ve ngawt lo’ng maw?  A rîl invial ngawlh ngawlh tùr leh a pum chhûng han inmùt sa vung vung tùr chu—a lainatawm reuh mang e. Boaza pawh—chuti tho bawk!

“Naktùk zîngah chuan i chungah ani chuan a laichìn tih tùr a tih duh chuan a tha a ni ang a, laichìn pual chu ti ang hmiang …” a la ti ta deuh deuh! Ruthi hian LALPA Pawm Kum (Acceptable Year of the LORD) kalphung chipchiar hi a hre ve tawh tùrah ngai ila—atùkleh khawvârah chuan laichìn hnai zàwka chuan Elimeleka ram chu a tlàn thut teh’chuan le—hemi zàna Boaza leh Ruthi-te’n an lo sepràwtui tawhsà chu a tlawlh hlen thei mai dâwn ta si a le! An pahniha dinhmun tùr hi a la chiang fel thei lo hle mai.

Engemaw chenah an pahniha inkârah hmangaihna zùn zâmin a phuar ve ve hman tawh niin a lang si … William Shakespeare-a tawngkam takin, “Love at first sight,” an tih anga intawng an lo ni ve hman deuh bawk si—boruak hahthlàk halh halh lai takah an khawsa ve mêk si a. An affairs rawn insehmùr tan vèl dàn hi a ngaihnawmin an va lainatawm reuh tak èm! A romantic mah mah àwm e!

“Amaherawhchu, laichìn tih tùr i chunga an tih duh loh chuan …” a han tichho leh chiah ta hian Ruthi tân BEISEINA THAR  a rawn pe leh èm ang chu! Beiseina beidawng-ah an chèng hlen bìk lo’ng chu! Mahse, “Chhûra duh loh Nà-a’n nei nàng e,” tih a ang deuh dâwn!

“Laichìn tih tùr chu Yahweh a nung ang ngei hian …” tih tawngkauchhehah hian NGEI NGEIA CHE ZAWK TUR chu a hriat ta ruak mai! Tih tak èmah chuan, laichìn hnaivai zàwka tawngkam khat èm pawh ngaihthlàk chhin a la ni hlei nèm! A inhuam zàwka invaupùmna chu Ruthi tân chuan a thlamuanthlàk hrim hrim lo thei lo.

“Keiman ka ti ngei ngei ang: zîng thlengin mu reng mai rawh …”  —Ruthi hi a mutthilh theih a rinawm tawh thlàwt lo! Helhhàwlhpuiin a man tawh ngei ang. Laichìn hnaivai bera chinchâng finfiah chian thuai thuai a chàkawm rual rualin—a huphurhawm tho bawk si! Engle khaw le, zîng thleng chuan Ruthi chu Boaza kiangah chuan a zâl chu a ni ve ber e … ‘pàwngsen tlaivàr’ an hmang dùn ni ta berin an lang! A nawm dàn a nuam kim zàn lo! Mahse, kawng bumboh zual an zawh dun hun chhûng hi a rei tawh lo mai thei bawk a ni.

3:14 Tichuan zîng thlengin a ke bulah chuan a mu ta a: tin, tumah la inhmuh chian theih hmâin a tho va. “Hruiah chuan hmeichhia chu a lo kal tih rèng rèng tumahin hre suh se,” a ti rèng a. 15 Tin, a hnènah, “I puan bah kha han la la, dawh rawh,” a ti a; tichuan a dawh a; tin, buhsanghar chu tehkhàwng rukin a teh a, a chhùng a, tin, khuaah a kal ta a.

Inngaihzàwn tantirh lai hian miin thil engemaw tè tè an lo hriat rùk ve hi tute mai pawh hian an hlauthàwng châwk a, “miin hre thawi deuhvin—min han dem’bèl se,” tihna rilru pawh hi han awm deuh thìn mah se; a theih chin chin  zèp then rih hi a nawm hun lai riau a awm ve bawk thìn. Zîng thang thangah chuan buhsanghar tehkhàwng ruk lawih mai chu an pahnih ngeiin, tuma hria tlohvin, an inhlàn ta thung! Hemi tùka Ruthi hawn tùr hi buhto a zawn khàwm a ni ta hauh lo! A dang ta tlat! Zêmpui chunga thuneitû lak atanga a dawn a ni ta liau liau! Boaza’n, “I puan bah kha han là la, dawh rawh,” a ti ta thung. Tunge buh chu Ruthi puan dawha chhùng lùt ta le? I hre chiang thawkhat e. Chawlhkâr sarih liamtaa buhto a va zàwntirh nî khân epha khat a hàwn a; hemi tùkah zet hi chuan epha ruk a hàwn ta! Zîng vàrtianah khua a pan ta nal nal a. Ruthî rilrù-chhûngril hi làwmna leh hlauhthàwnna inpawlh a ni tih i hriatpui ngei a rinawm!

Jennings Dake-a chuan, “Hetiang zozai hi Ruthi hian a phur zo lo vang, Boaza’n a phurhpui ka ring,” a ti! Lo inphurhpui ni ta chiah se, Bethlehem dai cho vèla hei ha leh huiha-a inchhàwn chho han ni ve chiah se, a lunglènthlàk ngawt ang le! Mahse, Naomi leh Ruthi-te inbiakna atang hian Boaza chuan a phurhpui chiah lo chuan a ang. An inchhawm-hàw ta èm lovah i ngai teh ang! Sawi sep an kai lohna tùra thil an la tih-SECRET ve a ngai rih!

Hemi tùk zînga Ruthi buhhùm hàwn zet hi chu a rit tham viau! Chhûngril lam ritphurh leh hlawhtlinna phurrit a phur haw kawp a ni ber mai. A fehchhuah nî hmasa ber leh a fehchhuah zàn hnuhnùng ber hi a chhinchhiahtlàk ngawt mai! Bul tanna dik leh tha—hmâwrbàwkna hriat chàkawm zui tak a tling ta!

Naomi’n a lo zawh hmasak ber chu, “Epha ruk lai maw?” a lo ti hauh lo— “Ka fanu, engnge i an le?” ti tè maiin thu a lo zàwt! Naomi pawh hian in lamah mutmû a lo tuah bìkin a rinawm loh! He zawhna tawi tè chhànna tùr hi Ruthi hian engtin nge a sawi ve dâwn tak le? Zànlai atanga leilung a lan dèt dèt inkâr chhûnga an pahniha thil an ruahman zawng zawng chu Ruthi chuan a pî a hrilh ta keuh keuh va—a pî pawh chuan ‘an laichìn hnaivai bera chu’ a mitthlà thiam ngawtin a rinawm—a rilrù chhûngrìl tè tèa Boaza a lo hual rùk teh rèng nèn! Engtia rei nge thukhawchâng an inhrilh kan hre chiang lo, thlaphàng titih deuh, beisei tituai siin Ruthi hian thu a thlen tih a chiang.

A sawi lan thu chiang langsàr tak erawh chu, “He buhsanghar tehkhàwng ruk hi min pe a, ‘I pi hnènah chuan kutbêngin haw hauh suh ang che,’ min ti a ni,” tih thu nèn! Ruthi hi a lung a hnûr ru a ni tih pawh a pî thusawi atang hian a lang chiang viau, “Ka fanu, eng angin nge thil a lo awm dâwn tih i hriat hmâ loh chuan awm mai rawh …” a tih dàn kamchhuak atang hian Naomi meuh pawh hian a fanu han hnèm dàn èm èm a thiam vak chuang rih lo! Mahse, “Vawiin nìa he thil hi a tih zawh hmâ loh chuan chu pa chu a ngawi mai dâwn si lo va,” tiin, a hnèm ta thung a. Naomi pawh hi a thaw ve halh halh chuan a rinawm. Ruthi hnèna a thusawi kalhmang atang hian achuang aliama rilru tihah lo tùrin a fuih ni ta berin a lang. He mi nî zet hi chuan rilru hah takin, beiseina sâng tak bawk siin Ruthi hi a hàm bawi bawi nilêng ve mai thei a ni —amah Ruthi chauh a ni lo, Naomi leh Boaza te tak pawh le …

Ruthi Bung 4-naah hian Ruthi kamchhuak thu pakhat mah a lang ve tawh hauh lo … Engtin nge THIL AWM DAN TUR zèl chu le?

 

COMING SOON

 — Biblical Romance from the Book of Ruth #4 

 

(Mizo tawng thiamte’n. “VAWIIN NI” tih hi a dik loh thu min hrilh thìn a; mahse, Mizo Bible letlingtute hian ‘vawiin ni,’ tiin Ruthi 3:18-ah hian an lo dah ve teh tlat —Zotawng dika lehlin a nih hunah chuan “VAWIIN-a he thil hi a tih zawh hmâ loh chuan chu pa chu a ngawi mai dâwn si lo va,” an la ti ve mai thei a nia!)

 Biblical Romance From The Book of Ruth-2

Apology —thu ka ziak ve dàn hi tlachawpa ziak pawp pawp mai ka ni si a; han tuaihnùm mawina hun ka nei ve lo va, a phuaina zàwn zèlah a aia mawia dah dàn min rawn  finchhuah ula, ka làwm a belh lehzual hle ang. —Chawnghilh

Misual

Lairil

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: