Chawnghilh's Blog

My favorite place —CALICO

Posted in Qualitus : Habitus by chawnghilh on November 26, 2009

 

 

 

 

 

A chunga BIAK IN emaw i tih tùr hi American Elementary School, tùnhmaa an lo sak dàn ang char char a ni daih thung—a chhûngah hian banga bet chalkboard, duster leh chalk a lo awm ang a. Pindan chhûng tihlum nân meilum thuk a inchhawp tel ngei ngei bawk ang a. Zirlai naupangte thutna chair leh lehkhabu dahna bâwm/dawhkàn ni nghàl a inhùng vek bawk thìn. Zirtîrtu pakhatin hneh takin zirlai 12 emaw vèl an enkawl ber. Thiamthei tak pakhat chher chhuah aiin, thiam tak leh intluk tlâng taka mi puitlinga chherchhuah kim vek hi an thupui a ni. Lehkhabua mi chauh an inzirtîr ber a ni hran lo va; ni tin nunkawnga thil pawimawh chi tin an inzirtîr ngei ngei zàwk thìn. 

CALICO hmun hian ka lung hi a tilêng bâng thei lo. Cowboys-ho kianga awm hi a nuam a. An boruak hi a pik ve chèt chùt lo va. An kalphung ngai rengin, an hmànlai khawsak ang lantîr pah chung zèlin khawvèl hun inher thar danglam mêkah an chèng thiam tho va. NASA hmalàkna chanchin sawipui pawhin—an sawi thei ve vek tho. Bill Gates-a chanchin pawh an hai chuang bik hauh lo. An chènna hmun pawh fai thianghlim tak—tlawhtute pawhin an tlawh chhunzawm chàkawm tùrin an vawng fîmkhur a ni.

A lan dàn mai chuan HMANLAI KHAW HLUI ni àwm tak a ni—mahse, a khawi’maw laiah khian tùnlai thlapin ei leh in, zunram inthiarna hmun TUNLAI STANDARD thlapin a lo awm kim ve vek tih hriat a pawimawh hle.

Reièk khaw kianga kan Mizo Typical Village pawh chènchilh meuh leh a nihphung dik tak ang tùra enkawl kan la tlin rih lo a nih pawhin—typical village hung chhûngah ngei khân zunram inthiarna chi kim (mipa pual leh hmeichhe pual a hranpa) thianghlim taka vawn lai han awm ve tawh sela, tlawhtute tân a va remchâng lehzual dâwn èm!

Cowboy han tih hrim hrim hi Mizo intichangkàng chinte leh sakhaw lama min kaihruaitute khàn an mil lo hle hian a lang a. Shepherd-boy David ngaisâng thei tân chuan Cowboys pawh ngaihsàn ve mai àwm! NLUP-ah pawh VAWK VULH (Piggery) kan sawi mawi tho va, vawk in kianga kalte tâna hmun rimche tak kan siam belh hlein a lang tho si.

Engpawh nise, Cowboy-ho chènna hmun tak takah ka kal peih a, Cowboy-ho khawsak dàn pawh Aizâwl mipui intichangkàng viauten kan la phàk loh cheuzia hi hmu chiang ve hlein ka inhria. Pastor-te phei chuan Cowboy sawichhe zâwngin thu sawi tawh rèng rèng lo se—tute thawnthu phuahchawp, film-a an chang kan lo hmuh dàn nèn chuan inang lo tak a ni. An khawsakna tuallai fai hnùm ziate hi lo thlîr chiang ve mai mai teh u.

Cowboy-ho hi sakawr chung chuan lamah chuan an nèp lo khawp mai—vangvat, a duh hun tè chauhva amaha a tla thlà tap ang hi an ang berin ka hria. Mahse, an chuanna sakawrte hi duhthâla SAWI-ZAL (tamed) an ni vek thìn. Sawizàl loh sakawr chunga chuan chu thil namai lo tak, hlauhawm tham tak a ni.

Tirhkohte Thiltih 4:25-a “Jentailte engati nge an thinur kha?” tih thua THINUR tih thumal pawh hi sakawr sawi-zàl loh thinrim luhlul ngêng hel tlat an sawina bruo βρύω tih thumal atanga chhawm a ni teh khiah asin!

Pastor pakhatin Cowboy-ho hnènah Chanchin Tha a va hrilh ve dâwn ngawt a. Cheroot pet kawh, pai fual tak tak, chaps leh saddle nèna lo intam iah uaihho chuan—an lukhumparh kùn taka khumin—an lo bengkhawn lo hle. Mahse, thil hi a chèng tè tè, a kaida hi a lo awm ve zèl a! “Tuma la chuan ngai lohna sabengtunga chuang thei MI DANGLAM tak chanchin”-in bul a tan ta—Cowboy-ho tâna thubenglùt tak mai a lo ni ta si!

Tluk loh ena an en mihringa chanchin chu hriat an chàk belh ta tlat mai a. A thu inchhawp chho hret hretin Chanchin Tha an sawi kaiho ta zèl a … a tàwp lamah phei chuan ISUA KRISTA Chanchin Tha chuan Cowboy thinlung sak tak tak te chu a hneh thei ta tlat asin le …

America rama FIRE DEPARTMENT-hovin kàngmei an thelhna Cart hman thin pawh anniho hian an la kawl tha thlap a —rawn tàrlan tel a ni e.

Chawnghilh’s Blog i lo thlir ve thin avàngin ka làwm e.

 

 

 

 

Advertisements

3 Responses

Subscribe to comments with RSS.

  1. Kima said, on November 27, 2009 at 4:25 pm

    Nicholas Cage-a channa, “NEXT” tih settings a va’n ang ve… A ni hial lo maw? Kha an um vak lai scene-a an manna kha.

  2. Irene said, on November 28, 2009 at 9:43 am

    Pic chu mawi hlawm lutuk…kal ve chakawm hle mai a.

  3. triplestar said, on December 1, 2009 at 3:28 pm

    Va mawi hlawm ve, ka kal ve chakna chi…


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: