Chawnghilh's Blog

Thanksgiving Dinner Remembered

Posted in Qualitus : Habitus by chawnghilh on November 26, 2009

 

 

Venice Beach, Los Angeles hi lèn khàwthawn nân chuan nuam ve angreng tak a ni. Pacific Ocean kamah thìrsakawr (bike) hawh chawpa tlàn kual chiam theih a ni a. Tuifinriat atanga thlifîm rawn thaw hawk hawk chuan nunkhua a tinuam ve hranpà hle. Venice kawtthlèr hi i ngaih ngawt aiin an chhangchhe mai thei a ni—kawng kamah kutthemthiam painter/artist-ten milem mawi tak tak an lo paint ang, thlìr vawng vawng tham a awm laiin, an kutchhuak thenkhat erawh chuan mit a titlai hran chuang vak lo. Thiam dàn inchen vek hek lo le!

A thente chuan naupang làwm virmep an lo zuar ang. Chi-thlum leh lapaw-chini thlengin an lo zuar buai ve hle bawk ang. USA a nihna a lang tak tak chuang lo! Eizawn dàn leh sum làkluh dàn hi chi hrang hrang a lo awm a ni ber mai. A thente chuan puarpàwlêng/bubbles tichhuak chem chem thei naupang-inkhualtelemna thil an lo zuar ve thung ang a, naupang veivàkte awh atân an lo chhêm thlàwk chum chum ang. Hmun thenkhatah phênglàwng an lo zuar ang a, thiam tak takin an lo tum hlerh hlerh ang a—Zâwngte phênglàwng tum thawnthu, naupan laia kan hriat thin pawh kha hriatchhuah nawn leh awl rum rum tak a ni—vahmìm mei bùl ta thawt nèn khân!

Thenkhat ve thung chuan rimawi eng eng emaw an lo hûng chhuak ang a, thiam tàwkin an play ang. Music a reh deuh ta vang vang a nih chuan —bucket chawiin, a kiang vèla music ngaithla phaho hnènah sum a lo khawn khàwm mêk a ni tih hriat mai tùr. A thente chuan roller-skating bei pahin lead-guitar an zût tè vawng vawng bawk ang. A remchàn dàn angin kutdawh dàn a dangdai a ni ber mai!

Thanksgiving hi Native-American-te hun pawimawh a ni thìn—November chawlhkâr tàwp bera Ningani hi Thanksgiving Day-a hman a ni ta a; tùn hmâte kha chuan October thlaah an hmang thìn. Hetih hun thengthàw hi an buh seng khàwm hun a nih tawh avàngin Pathian hnèna làwmthu sawina atâna an lo hman thìn, an Turkey vulhte pawh ruai atâna an lo buatsaih hun a ni thìn. Thanksgiving Day dawt chiah Zirtàwpni hi Black Friday tiin an vuah bawk.

Advertisements

11 Responses

Subscribe to comments with RSS.

  1. Kima said, on November 27, 2009 at 4:22 pm

    Haha. Nangmah maw thlalak hmasa bera mi khi? 🙂

    • chawnghilh said, on November 27, 2009 at 5:10 pm

      Ka vahpa Cory-a (17) a nih khi —a uang thiam ve asin! Movie kan lo hmang pek a, chuta tanga capture chhawn leh a nih avangin a picture hi a quality lo khawp mai! Ngaidams! 😳

  2. triplestar said, on December 1, 2009 at 3:22 pm

    Chawnghilh, vah hi hmeichhia leh mipa inkara relationship sawina ni turah ka lo ngai a, a lo ni lem lo tihna em ni, entirnan kei hi ka ni (ka pa farnu) vahpa ka ni a, chutiang turah chuan ka lo ngaih laiin nang chuan ‘ka vahpa a nih khi’ i ti mai si a, min lo hrilhfiah chiang teh, nang lah chu mipa ni turah ka ngai si che a, nge hmeichhia i lo ni reng zawk.

    • chawnghilh said, on December 1, 2009 at 4:17 pm

      Ka hre chiang bik lo —chiang zawkin, “Ka farnu-i fapa,” a ni mai! Ka risk ve zauh zauh!

  3. triplestar said, on December 3, 2009 at 10:57 am

    Farnu-i fate chuan min pu thin si a, chuvang chuan kan tupa tur an ni dawn lawm ni ka ti deuh.

  4. Kima said, on December 4, 2009 at 10:48 pm

    Hmmmm… nephew chu tupa (grandkid)-ah kan chhuah der tihna em ni? Ka bo telh telh mai 😦

  5. triplestar said, on December 8, 2009 at 12:30 pm

    Mizote hian inlaichinna sawi dan kan nei nual, chungte chu —

    Unau – u leh nau
    Nufa – nu leh a fapa (mipa-ah lo ngai mai ila)
    Pafa – pa leh a fapa
    pitu – pi leh a tupa
    putu – pu leh a tupa
    Nivah – Ni leh a vahpa

    Heta trang hian in ngaihdan lo siam ve mai teh u 😉

  6. triplestar said, on December 8, 2009 at 12:36 pm

    Sapho nen hian kan inlaichinna sawi dan a inang vek lem lo, ka farnu fate chuan min ‘pu’ a; mahse, ka grandchild/grandkid-te chu an ni chuang si lo alawm. Ka nu nutapa chu ‘ka pu’ ka ti a; mahse, ka grandfather a ni chuang lo.

    • chawnghilh said, on December 8, 2009 at 9:41 pm

      I better call them by their names respectively —if I do not forget their names! 😳


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: