Chawnghilh's Blog

Interval awm lo Film ka en!

Posted in Qualitus : Habitus by chawnghilh on November 29, 2009

 

Chhiar duh suh, a ngaihnawm lo lutuk !

INTERVAL tih thupui ngaihnawm deuh mai chhiar tùr a awm! Bengvàrthlàk  leh ngaihnawm deuh a ni! INTERVAL an tih lo pawha INTERMISSION an tihna Cinema Hall engemaw zàt laiah movie ka en ve tawh! (Etymology: Middle English intermyssyown, from Latin intermission-, intermissio, from intermittere — Date: 15th century — 1 : the act of intermitting : the state of being intermitted 2 : an interval between the parts of an entertainment (as the acts of a play).

Hollywood leh a chhehvèla ka kalin Kodak Theater an tihin ka mit a la hle, ka bèl lùt chawt rèng a—Kodak product roll film hi ka lo tleipui ve viau tawh vàng pawh a ni mai thei! Tin, Walk of Fame-ah chuan Thomas Alva Edison puala STAR ka’n hmu chiah chu ka thutchilh rap a, thlâ ka làkpui—a chhan leh vàng a awm chiang khawp mai! Edisona thiamna leh finna tel lovin Movie hi an siam thei lo tih ka hre ru ve tlat! Chu lam ai chuan râwlthar laia Outdoor Movie kan en thìn dàn sawi kai ka chàk zàwk tlat!

Kum 1960s vèla Lushai Hills District of Assam hnuaia Project Department an tih thin khàn Documentary Films min chhuahsak châng a awm ve thìn—thim thet thet atangin mualah kan inhàwr khàwm ve a. Kan ding thuap mai a; kopanga thutna chang an nihlawh a ni mai bawk. Atùkleha titi a titam thei khawp mai! Film ropui tak tak chu an ni hran lèm lo. Sàp film ka hmuh hmasak pâwl chu NASA-ho film, Astronaut John Glenn-a’n 1962-a khawvèl vawi thum lai Friendship 7-a a hèlna film kha a ni a.

 

 

A hun lai 1962 kha chuan làr vet vet tak a ni. A chunga thlalàk, Glenn-a chuanna rocket ngei mai Friendship 7 kha an dah thatnaah ka va hmu ve a—nihlawh ka inti viau, a thla pawh ka la hial a nih hi. Tin, kum 1969 July khân Neil Armstrong, Buzz Aldrin-a te thla leilung Sea of Tranquility hmun an rap lai film pawh black and white-in ka hmu ve hman a; chu erawh chu Project lam chhuah ni lovin, Science Promotion Officer Pu Lalawia’n Lunglei-a a rawn chhuah a ni thung. Nawalh-fung leh cigarette sahàr hmangin rocket inkahchhuah dàn principle (Newton’s third law of motion) pawh min entîr thlap a—ninhlei nân tak kan hmang zui ta si a. Apollo XI hnu hret kha chuan ‘The Horse Head’ match-box fung zozaite kha kan tihek thei hle. Apollo XI-te chuanna Module Columbia leh flotation balloons pawh heta hi a thla ka làk ngei rawn tàrlan a ni e —

 

 

Zodin Hall-ah Film tha en kan duh ve châng a awm; a rush thei mep mep bawk si! Zodin Hall Ticket Counter-a thawk F. Hrângmuana leh cowboy-lukhum ngaina tak Pu Chhînga te kha biakthat an ngai fo. An mi duhsakna kha tùnlaia Minister-te GREEN INK CHIT aiin a hlu zàwk hial elo maw chu? Thih tha takmeuha Cinema kha en a ngaih lai a ni. ‘Uncle Tom’s Cabin’ a chhuah lai phei kha chuan kawngpuiah mi an inhàwr khàwm tam lutuk a, sipai truck-in Mizo nula a chìl hlum phah hial a nih kha—a lo rei ve leh ta!

Ticket kha cut mai mai theih a ni ngai si lo. Queue-a din a ni ngai bawk si lo. Hmeichhe cut-na lam lah a rak èm èm tho si! Black-marketeers lak atangin to tak takin kan lei chhàwng a. Thutna pawh a tlar hmasa berah te kan en châng a awm fo mai—en hnaih lutuk châng phei chuan Cowboy sakawr tlàn khu lutuk avàng khân kan hritlâng hàw bùr thìn nghe nghe 🙄 ! Vanvàdàk deuhthàwa en a lo ngai a—ring leh dàrphêng, koki zawng zawng hi a kham thei hle thìn a ni. 

Pu B S Miller-a’n Mizoramah chuan Home Entertainment kha a tan chhuak hmasa ber niin ka hria a, chumi hma lamah te kha chuan a khât tàwka film en vete kha a lo nuam fû thìn. Lèn-khawthawnna Park kan nei bawk si lo! Cinema en hràt nih erawh kha chu a thang mawi èm èm hran vak lo. School uniform nèn ngata ente kha chu ‘sikul tlànbo’ ni ngei tùra ngaih an ni bawk. Chuvàngin, College rap chinte tàn advantage kha a inhawng zau hret thìn a nih kha. ‘Chhailai D’ nèn ngeia han en dun vete kha thil EXCITING tak a lo ni a—en paha chip rep rep tùr channa-ro leh bujia, babutea-hnapkhir-te kha ah luh ngei ngei chi a ni! Interval (intermission) hun laia ceiling a rawn èng ta ut mai thìn kha —Balcony leh First Class-a thute tân chuan thil zahthlàk vak a ni hran lo. Second class tlar hma lam leh Third Class-a thut chuan—hawi chhuah ngam a har hle thung. Ka tawng ve zauh zauh!

Reel a chah châng a awm fo thìn a; reel an han zawm chawp leh lailàwk bawk thìn! Tluan zaih loh châng a tam thei fû. Screen-ah phe kal ut utin image a rawn lan châng lah a tam! Hall manner hre lo pâwl an lo khèk bengchhengin, châng an lo tum vèl bawk ang. Usher-ten an flashlight-in an va èn (focus) ang a—chutiang avànga zahngai hret pawh an awm ve nual. Theater chhuat hi chu badam-kâwr ruak hian a khat zeih zuih mai thìn a ni ber. A chhûng a lum thei bawk a, ceiling fan a vir vuat vuat reng bawk a. Thlànsa phûlkaiin Cinema kha kan en thìn a ni ber e. Zunram thiar dâwn pawhin Hall khàn ZUN IN leh EK IN a nei ngai lo va; khawi’maw lai kàwmkâr pan chawn chawn a ngai thìn.

Tlangvâl pakhat pawhin a bialnu a enpui ve a. Black-in ticket number indawt chiah an rawn hùm lùt ve ve a. Tlai tàwkah an lùt khanglâng, Film trailer (Coming Soon) an lo chhuah ri rum rum hman tawh a. Screen en paha kàl hi thimthamah chuan zei loh theih deuh mai a nia—aisle lah kha a lo chhukzâl thla euh euh thìn bawk si, step landing hniam zàwk a lo awm palha inbilh palh nàwk pawh awl tak a ni! Lùt hmasaten thimthamah pawh min lo hmu fiah thei tawh a, lùt hnuhnùngin flashlight hmet èng kan han zui thlawk thlawk ta thìn kha chu … tlùk hlauvin kan phar ang dû dû a. Min lo hmu chiangtu tân chuan nuihzatthlàk tak kan lo tling tawh thìn.

Khatia, nula leh tlangvâl rawn lùt pawh khàn engmah hmu chiang thei tawh hek lo—miten an hmu thei a ni tih hre hek suh, an han in-KISS ve vèl! Usher lah khàn an ticket number indawt chu thlìrsakin, tlar hmasa ber sîr kil ber ve ve number a lo ni palh si—a va han tihchi loh mai mai! Tlar hmasa bera thutna an dawh-belh-chawp sîr veilam berah tlangvâl, dinglam sir ber bang bulah a bialnu—tlangvâl lah khàn chana-ro a ak vek bawk si! An han inthlèk ngial thìn, thimthamah an inhmu zo tawh bawk si lo, film lah a chhuak muah muah tawh si!

Galaxy Hall-ah khân film a chhuak tha thei riau a—a building kha a ràwp lam tawh deuh si—lung chu a muang zàn lo deuh thìn. Kha Hall-ah khân Balcony mai bàkah BOX an tih hi a awm hranpà leh a. Mi pahnih chiah leng hi a ni a—a thei fate chuan BOX-ah an chhai-lai-dî hruaiin an en châwk thìn. Box atanga rawn chhuakte kha an hriat hràn ve theih khawp mai! A mipa zàwk hmui leh biang vèl sen deuha an rawn chhuah châng a tam ve mai!

 

Drive-in Theater chanchin ka ziak hman lo; mahse, i hriat loh ka duh si lo. Hei hi click keuh mai teh! I car-a i chhas i phurh  nèn in va tlàn lut heu mai ang a; i car atangin CINEMA in thlìr dùn veuh veuh mai dâwn a ni! Kan Mizoram-ah chuan kan la nei lawk lo vang. Sports Stadium sakna tùr hmunah kan la inhnial buai vèl mai mai a nih rih hi 😥 !

Ka râwlthar laiin Lunglei-Lunglàwn Assam Rifles Cinema Hall-ah Vai Tarzan-a film ka en tawh a; tin, Lunglei-ah sâwn 1978 khân RTP Hall, Kikàwn-ah vai-film ka en ve hrim hrim bawk. Eng film ber nge chu ka hre chiang tawh lo! An sawi dàn phei chuan RTP Hall-ah Elvis-a film “That’s the Way It Is,” an chhuah ve—a entute chuan Khel Khel Mein an lo en zo-hlìm vèl hlàwt bawk a, ” ‘Elvis-a hian Rashi Kapoor-a style a la lutuk a, ka en ning,’ an ti e,” an ti!

Zodin Hall, J L Cinema Hall, Assam Rifles Cinema, Sulu Theater-Bàwngkàwn, Pushpak Theater-Thuampui leh Galaxy Hall-Tuikual ‘B’ Mual-ah film ka en kim vek tawh. Lunglei-ah pawh RTP Hall-ah 1978 tàwp lam khân ka en ve. Sèrchhìp-ah pawh khian Lunglei lam kawtchhuah NH 54 kawngpui thlangah Hall tè tham tèah eng film emaw ni ka en tawh. Sulu Theater, Bàwngkàwn-ah Khel Khel Mein leh Enter The Dragon ka en. Zodin Hall-ah film engemaw zàt lai thiante ho nèn kan en ve châng a tam mai! Galaxy Hall-ah pawh ABBA the Movie, Where are you, Mother? Saturday Night Fever, That’s The Way It Is, etc., te leh a dangte ka en ve. Thuampui Vênga Pushpak Cinema Hall-ah vai film, a hming ka hriatchhuah zawh tawh loh ka en bawk. Champhai-Kahrawt-ah tuallaia zàna Agriculture Department-in Documentary film an chhuah ka thlîr nual tawh a. Kolasib, Lawngtlai leh Saiha-ah film ka la en lovin ka hria. Mizoram-a khawpui rim nam tawh rèng rèngah chuan engemaw tal chu ka en ve hrim hrim tawh a nih ber chu!

A hnuaia Theater hi Montgomery Royal Theaters a ni a —a ropui hran lo khawp mai. Regular ve maiah pawh a regular ve mai mai a ni e. Ngun takin a thla ka rawn làk hi bih chiang phawt la—thil engemaw tè tè hrilh duh che ka nei a nia!

 

Film chi ruk emaw vèl lai a chhuak a nih hi—en chiang ngial teh. 2012 PG 13 tih inziak i hmu em? The Twilight Saga tih te … film hming chi hrang hrang i hmu phei nual ang chu —hèng film-te hi a chhuak rual vek! Zodin Hall-ah film chi ruk a rualin an chhuah ve thei em?

 

 

Ticket Counter khi a fai tha hle. Ticket la tùr an inhàwr buai ngai lo hle. A khawi lai mai pawh khi chil pikna a ni lo —chinai intàt a awm bawk hek lo vang. A fai thianghlim vek. Ek In/Zun In-ah pawh tho pakhat mah hmuh tùr a awm lo. Hmeichhe inthiarna leh Mipa inthiarna a hranpà vekin—hmun inhlat èm èm si lo, inhnaih takah ni si lovin a awm hrang thlap a. Mipui mimir punkhàwmna hmun a nih tawh avàngin zunram inthiarna hmun pawh hi plan fel tak neia a inhlat hreta siam a ni. A chhan leh vàng chu suangtuah zui ve tawh mai rawh.

Royal Theaters-ah hian Theater paruk lai a awm ve si a, i luhna bìk tùr Theater Number kha i ticket-ah a inziak kalh ang. Inziak ngawt mah se, a khawi lai berah nge i luhna Theater awmna luhkâ a awm tih i hriat si loh chuan zawh tùr remchâng, anmahnî mi-chhàwr a lo awm mai ang. Hneh leh tlin takin a hruai thei zèl ang che.

Hall thim tak chhûngah i indap buai dû dû a ngai lo. I kalna tùr kawng hmu chiang thei tùrin  aisle sîr tawn ve veah—rah chhiat theih hauh si lohvin red light a lo èng thla tiar ang a—i kalna tùr a hriat theih vek ang. I kal paha vawnchhan tùr (railing) kha i kalna sîrtuakah a lo awm vek bawk ang; seat i va luhna tùr zàwnah erawh chuan railing a awm lo thla zauh zauh ang. Chùng red-light te reuh tè tè chu Hall-a thil chhuah a nih chhûng (hours) chuan a èng reng ang—èng awmdàn azìrin a chhuat er deuh lai, zâwl leh chhuk deuh lai pawh i mitin a hmu chiang thei vek tawh ang. Chutiang system chu siam a har hauh lo! Mizoram-ah khân siam ve ta chiah sela chu—thim tak hnuaia Third Class pan vang vang tùra thui tak phar thlàk dû dû leh eu ual ual kha a ngai hauh lo vang le! Tin, seat number a awm hran tawh chuang lo va, i duhthusàmna ber hmunah i duh ang thâlin i thu thei mai tawh a ni. Bo buaina tham a awm lo.

Screen len leh sei zâwng chu Theater athu a ni mai a; specific taka han sawi kher chi a ni hran lo ve. Sound system chu a chhe lo. Film a chhuah kal laia sound tel loh châng a awm ve lo. Mizoram-ah kha chuan sound tel lova a inhlùm kal zuah zuah khân, sàptawng thiam pâwlin ring tàwkin, “Sound Please,” an tih tuar tuar thìn kha—khatiang taka Hall chhûnga sàptawng hmang thiam pâwlah i tang ve tawh thìn em? A hmang tàwk kha chu kan hmai lo khawp khân ka hre thìn. PLEASE hmang rau rauvah—a hmang polite lo pâwl tak an ni mai àwm e.

Kan film en thinah khân U leh U/A, leh A a inziah tel thin kha in la chhinchhiah ve reng thin ka ring —Central Board of Film Certification  tih kha black and white-in, mùr chur churin film chhuah tirhin a  rawn lang ziah thìn a nih kha —U for Unrestricted Public Exhibition (Chhûngkuaa en tlàka ngaih), U/A for Unrestricted Public Exhibition – nu leh pa telin naupang kum 12 hnuai lamte chuan an en ve thei —chèt dàn a ràwvà lutuk lèm lo. A for Adult, kum 18 chunglam tâna en tùr chauh —a ràwvà viau, tawngkam pawh a chaltlaiin, hmeichhiat-mipat lam leh hlauhawm scene-ah pawh a turû fu tawh … in la hre reng thìn ang chu! Tin, miin an en mai mai ngai loh, en bìk tùra ruat chauh Doctor-ten an en tùr bìk film a awm hranpà a, chu chu S tih a ni, S for Specialised Audience! A chungah khian PG 13 tih i hmu ngei ngei ang —naupanghovin hetiang hi an melh ve reng thìn. Kum 13 hnuai lamte chuan nu leh pa kaihhruainain an en thiang ve tihna a ni a; PG awmzia hi Parental Guidance tihna a ni. 13 a lo lan tel hian “kum 13 hnuai lam tân,” tihna a ni bawk.

Film thlîrin dârkâr 2½ zet—INTERVAL/Intermission awm lovin ka en ve thung. 2012 an tih a ni. He film ka en chhan hi a awm hranpà ve tlat! Kum AD 2012 hi Khawvèl Tàwp Hun Tùr ni àwma ngai pâwl an awm nual a —SECRET RAPTURE THEORY-a film an siam emaw ka tih vàng a nia! A lo ni îkhâw si lo! 

 

 

Ronald Weinland-a Hrilhlàwkna anga film hi siam a ni emaw ka tih vàng pawh a ni pakhat! Ronald hian 2012 sawi ve chhen a ni a; a intipamhmai khawp mai! Zàwlnei Der hi an tam ta riau! Mi Thianghlim Làwr tia mi thenkhatin an sawi ve tàk fo pawh hi zir bing tak tak râlah chuan kum zabi 16-na atanga an lo phuah chhuah mai a ni a, Jesuit Catholic Mithiam Joseph Ribera bul tan a lo ni lekfang a. Joseph Ribera chu Bellarmine leh Alcasar-a Cardinal ni tawh thìn a ni.

Tichuan, AD 1825 vèl khân, Samuel R. Maitland, Archibishop of Canterbury-a an Librarian khàn SECRET RAPTURE leh ANTICHRIST chungchâng a rawn pawm zui ve ta bawk a. AD 1830 khân Scotland nula kum 17 mi, Margaret McDonald-i’n chhâwng hniha Isua a rawn kal tùr thu a lo mang ve bawk a (Eric Smith—Roots of the Secret Raptiure, The Bible Advocate, January 1978, p. 16). J. N. Darby, Plymouth Brethren dintu khân a rawn pawm ve leh ta a.

Roman Catholic mimal pakhat atanga bul rawn intanin, Protestant-ah a rawn kàng kai ta a. Zau lehzuala he chanchin hi theh darh a nih theih nân C. I. Scofield-a’n Scofield Reference Bible hmangin tan a la chhunzawm ta bawk a ni (Rick Everett —The Rapture … What Christians Should Know About It! (Bible Advocate, December, 1976, pp. 11, 12).

Date Setters rèng rèngte hian an tisual zar zar vek — “Lalpa, tùnah em ni Israel-te hnènah ram i pèk leh dâwn?” tia ni bituk beiseia zawhna kha TT 1:6, 7-ah khân a lang nghàl pang a —Zirtîrte kamchhuak a ni hial nghe nghe. Mahse, a hun leh nî chungchâng chu Pa Yahweh chauhvin a hriat thu Tholeh Isua Krista khàn a hrilh chiang zui ta a ni!

 

DATE SETTERS-hote i hmêlhriat nual teh ang —

Tichonius an tih kha ni bituk hmasa bertu a ni thei àwm e, “Messia chu AD 381-ah a lo kal dâwn,” tih a puang a. Daniela 7:25; 12:7; Thu Puan 12:14 thua, “hun leh hunte leh hun chanve,” tih thu kha “kum 100, 200, 50” angah a bel a; a vaia belhkhàwmin kum 350 rawn tling tùr chu Isua thih kuma a ngaih AD 31 atang khân kum 350 a chhùt chho tawp mai a —kum AD 381 kha Isua lokìr leh hun tùrah a ngai nghet mai kha a ni a. A tlawlh!

Hippolytus-a leh Kristian mi thenkhatte pawh khàn AD 500-a Isua a rawn kìr ringin KUM BI an lo tùk hial a; khatia AD 1000 a rawn kai chhoh pawh khân khawthlang lam ramte chuan tàwpna hun an lo beisei hman hle tawh a ni. An ngaihdànah chuan Isua pian hun lai kha AD 1 hma lam deuh a nih avàngin AD 1000 kha a lo kal lehna hun tùrah an lo tinzàwn a, AD 1005 kha an tinzàwn bìk hle a. Mahse, a tlawlh!

Puithiam Joachim of Flora an tih pawh khàn ‘ni khat tlukpui kum khat’ tih changchawiin AD 1260 kha Isua lo kal lehna kum atân a lo tùk tawh bawk a. A tlawlh!

Martin Luthera thianpa chuan AD 1533 kha Isua lokal hun atân a lo tuk ngawt pèk a; Luthera chuan a thianpa chu a kutzungchal vilìk khumin, “Hetiang hian ti ngawt teh suh, ti lul suh. Kum sàng tam fê pawh a la ni mai thei asin!” a tih khum nghèng!

Sir Isaac Newton-a kha englai pawha Scientist ropui bera ngaih a ni. A lehkhabu khalh ngun ber thìnte erawh chu science lam a ni vek lem lo, Daniela Lehkhabu leh Thu Puan Bu hi a ching ngun thei hle thìn. Thil tam tak, tha tak tak a ziak teuh va, thil àtthlàk fê fê pawh a ziak ve bawk. A thil ziak àtthlàk ber chu ‘AD 1715-ah khawvèl a tàwp dâwn,’ a tih kha a ni. A tlawlh!

Bengel-a, kum zabi khat awh chhûng laia Kristian ropui filàwr taka an lo sawi thìna khàn kum AD 1836 kha Isua lokal hun tùr atân a lo tuk ve ngawt bawk. A tlawlh!

Joseph Wolfe-a khàn, 1847 kha Isua lo kal hun tùr tiin a puang a; “Kum 1847-ah lo kal ta lo se, engtin nge i tih ang?” tiin mi thenkhatin an zàwt a. Wolfe-a chuan, “Ka dik lo a ni, ka ti mai ang,” tiin a chhâng. A ti ta ngei lahtàk a!

Joanna Southcott-a chuan, “1884-ah Isua a lo kal dâwn,” a ti thung. A tlawlh! 

Europe ram—hripuiin a tuam chhah lai (AD 1348-1352) khân, an zàwlnei tlângaute’n, “Kum sàwm lo la awm tùr chhûng khungah Krista a lo kal dâwn,” an lo ti ve chiam tawh bawk. A tlawlh!

Kum zabi 14-na hun laia Reformer làr tak John Wycliff-a pawh khàn Roman Catholic-ho kha Daniela inlàrnaa “titiautu tenawm, a din lohna hmuna ding,” fel diam tawhah a keuh thlap a, khawvèl kha tàwp chawpchilh mai tùrah a ngai. A puh dik a nih pawhin—tàwpna hun chungchângah chuan a tidik bìk lo a ni ber e.

Kum AD 1860-a Leeds khuaa àrpuiin a sàn chhuah artuiah “Krista a lo kal e,” tih inziak a awm tlat mai a, mipuiin sakhua an ngaihven phah hle a; mahse, ziak sà —âr mawngkuaa an hnawh luh chawp ni àwma sawi leh hnuhnawh a ni.

John Wesley, Methodist Leader khàn tàwpna hun atân 1836 a keuh a, Baptist Church hote erawh chuan 1830 leh 1847-ah Krista a lo kal an ring thung a nih kha —an ring dik lo ve ve!

Jehovah’s Witness hotu Charles Taze Russell-a pawh khàn, “Kum 1874-ah Krista a rawn kal diam tawh a, hmuh theih ngeia ro a rèl hun tùr chu 1914,” tiin thu a lo cheh hman—a thleng dik lo a ni ngei ang! A hnu rawn dàwltu Judge Rutherford-a khàn 1925 kuma Thuthlung Hlui mithianghlim zawng zawng thawh lehna thleng tùrin a hrilhlàwk ve bawk. Kristian tam tak te chuan 1919 kha tàwpna huna an lo beisei a ni —a tlawlh!

Joseph Smith, Mormonism dintu pawhin, “February 14, 1891-ah Isua a rawn kal ang,” a ti ngawt a, beidawnnain a zui!

Herbert W. Armstrong-a pawhin Petra hmuna 1972-a insaseng bo tùrin thu a puang hluai a, 1975 favàng chhova Krista Lokal Vawihniha thleng mai tùrin a puang a —a tlawlh chiang hle!

Edgar C. Whisenant-a pawhin “88 Reasons Why the Rapture Will be in 1988”point 88 lai ziakin—copy 2,000,000 thuak, chhang lum ang maiin, a hralh chhuak. A sum làkluh a  hlàwk tham hle. Mahse, awmze nei lovin a tlawlh!

Georgia khuaa Lehkhabu làr tak pakhat an tihchhuah chu October 8, 1992 ni vànlaizâwl a pelh hret 2:55 PM-ah rapture thleng tùrin a inziak —a tlawlh chiang hle!

Class Epp-a, Mennonite Brethren-ho hruaitu làr tak khàn March 8, 1889 kha Krista lo kal hun tùrah a puang —a tlawlh!

Ziak belh tùr ka va la ngah tak èm! Mahse, ziaktu lam peihna aiin chhiartute lam ngaihpawimawh rih zàwk tùr! Kan la ziak chhunzawm thei tho ang chu! Date-setters -ho i hriat duh chuan, click keuh mai teh!  

Khaih khaih khaih … “2012 Movie” an tih huai huai chu ka en tluan chhuak zak e. Dârkâr 2½ lai thlìr a ngai, a kârlàkah INTERVAL a awm lo! Science fiction mai mai a lo ni a —Camera trick kan tih thin, virtual effects leh images vèl chu Columbia Pictures-hovin an tawk namai lo khawp mai! Sumdàwnna thil a ni bawk a, mihring bitna ber China ramah, an làwmah a tla fuh a ni ang—tùnlaia an rama Movie an chhuahah a ber a kai phain pakhatna a la hauh char char e. Tin, USA-a he film hi chhuah tan a nih atanga ni 10 chhûng leka tangka làkluh hi a tam tham hman viau tawh! Film siamtute à mawlh hek lo—India vai-tawng nèn ngat film bul lam scene hi a rawn intan a; China rama himna dapin a thawnthu a kal zui ta bawk a—thlîrtu mipui an tamna tùr lam film siamtute hian an melh làwk hle chuan a lang. Kan hriat tur mai mai atan —Tuilet hun a liam fel tawh a, Krista lo kal leh hunah erawh chuan, “tui ni lovin —MEI ALH” a ni thung dâwn —2012 Movie-ah tui a lian ngheng mai!

 
 
Nimahsela, Lalpa nî chu rùkru angin a lo thleng ngei ang, chu mi nîah chuan vànte chu nasa taka rìin a boral ang a, thil bulte chu meia èmralin a awm tawh ang a, lei leh a chhûnga hna thawh awmte hi a kàng ral ang.II Petera 3:10

 

Advertisements

2 Responses

Subscribe to comments with RSS.

  1. James Jones said, on November 30, 2009 at 8:24 pm

    The following SUMMARIES OF OVER 1400 JEHOVAH’S WITNESSES CRIMINAL and CIVIL COURT CASES will provide the BEST and MOST ACCURATE info about Jehovah’s Witnesses, their beliefs, and how they ACTUALLY practice such day to day.

    The following website summarizes 900 court cases and lawsuits affecting children of Jehovah’s Witness Parents, including 400 cases where the JW Parents refused to consent to life-saving blood transfusions for their dying children, as well as nearly 400 CRIMINAL cases — most involving MURDERS:

    DIVORCE, BLOOD TRANSFUSIONS, AND OTHER LEGAL ISSUES AFFECTING CHILDREN OF JEHOVAH’S WITNESSES

    jwdivorces.bravehost.com

    The following website summarizes over 500 lawsuits filed by Jehovah’s Witnesses against their Employers, incidents involving problem JW Employees, and other secret JW “history” court cases:

    EMPLOYMENT ISSUES UNIQUE TO JEHOVAH’S WITNESS EMPLOYEES

    jwemployees.bravehost.com

  2. triplestar said, on December 1, 2009 at 3:15 pm

    Ngaihnawm thin hle mai, hman lai kan hriat ve phak loh chanchinte kan hriat phah a, hma kan sawn tawhzia a hriat theih e.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: