Chawnghilh's Blog

Mihausa leh Lazara — Part I, II and III

Posted in Qualitus : Habitus by chawnghilh on December 6, 2009

I chhiar chhuak peih ngang lo a nih pawhin —chhiar atân chhawp chhuah a ni hrim hrim e.

Part I  (Hei hi mi tam tak te pawm dàn)

Kan thu ngaihthlâk hi mi pahnih inang lo tak thih thu a ni. Pakhat zâwk chu kutdawh rethei—rethei satliah pawh ni lo, pân bawm khah lûk a ni a. A hmutu apiang tân mi tenawm, tù lainat mah hlawh lo a ni. Mihring chuan hnaih pawh an hnaih ngai lo a ni ang. A hnaihtu awmchhun chu uicho an ni a, a pânte an liahsak thîn. Chûng lakah pawh chuan a in- vêng thei lo va, a hnawt thei lo. He kutdawh hi a ril a tâm a, sin leh hâk tûr a nei lo va. Mi hausa ei bângnawi an paih tûr te chângin a kawngkhâr bulah an muttîr thîn. A kawngkhâr tih hi Bible lehlinna thar berahte chuan ‘gate’ tih vek a ni a, in hungna kawngkhâr ni awm tak a ni.

Mi pakhat dang chu mi hausa hi a ni a. Ni tin silhfên man to chiin a inchei a. Ei leh in tui tin rêng nên nawmsip a bâwl thung a. Inanna lai an nei lo. An chanchin hi kan sawi ve ve dâwn a. Sawi uar thiam tâwk ka chak êm êm chu —vântirhkohten kutdawh rawng an bâwl ta, tih hi a ni.

Hêng mite pahnih hian inan lohna kawng thum an nei tih hi lo chhinchhiah ila—

(1)     An dam laiin an inang lo: Pakhat a rethei tâwpkhâwk a, pakhat a hausa tawntâw thung.
(2)     An thih pawhin an inang lo: Pakhat chu vân- tirhkohten an hruai a, pakhat chu an phûm.
(3)    An thih hnua an kalna a inang lo: Pakhat chu Abrahama ângchhûng-ah a châwl a, pakhat hremhmunah a kal ta.

He thu atang hian ngaihtuah chhuak thei ila ka tih chu —Pathian ringtute nihlawhzia, an chanvo a ropuizia hi a ni a. Chuvângin, “Vântirhkohten kutdawh rawng an bâwl,” tih hi thupuiah ka han hmang a ni. Kutdawh hi a retheih hrim hrim vânga vântirhkohten an hruai tâk a ni lo va; a rinna avângin khawngaihna a dawng a, chhandamin a awm a ni. Mi hausa pawh hi a hausak vâng ringawta hrem tûr a ni lo va, Pathian a ngaihsak loh avângin hremhmunah a kal ta a ni.

Kutdawh a Thi
Kan chângthlan chuan —“Kutdawh chu a thi a, vântirhkohten an kalpui a, Abrahama ângchhûngah an dah a,” tiin a sawi. He chângah tho hian, “Mi hausa pawh chu a thi a, phûmin a awm ta a,” a ti.

Châng pakhatah hetiang hian a sawi a ni a. Chu- vângin, kutdawh hi a thi a, an phûm lo niin a lang. An lo phûm reng a nih pawhin tuin nge a ruang hlâwm? Engtin nge an sâwngbâwla —an vui? Hriat tûr a awm lo. A chungah mihring thil tih a lang lo a ni. Pathian thu chuan vântirhkohten an kalpui tih leh Abrahama ângchhûngah an dah tih a sawi a. Hei hi thu chiangkuang awm chhun a ni a. Thu chiang awm chhun hi a lung- awithlâk a ni.

Aizâwlah chuan sorkârin Riangvaite Thlânmual an nei a. Chin hriat loh, tumahin ka laina an tih loh pawh thi sela —phûmna tûr a ni. Tin, mi chanhaite tuamhlâwma chawimawitu —mi tha tak te, Kohhran te, Tlâwmngai Pâwl emaw te an awm leh mai thîn. Kutdawh Lazara erawh hi chu khawvêlah hian tuamhlâwmtu an awm lo a ni ang. Kuangah an zalh lo vang a, puanin an khuh lo vang. Pangpâr pawhin an thlah lo vang. Tuman ui thu an sawi a rinawm loh. Tahtu pawh an awm lo vang. Uicho chauh lo chuan an hnaih ngai lo. Khawvêl chuan he mi rethei hi a dam laia pêk tûr a nei lo va, a thih hnua chawimawina tûr pawh a nei lo.


Mahse, he kutdawh hian Mosia leh zàwlneite thusawi a lo ngaithla ve tawh thîn a, Anni chuan Lalram lo thleng tûr, Messia ram thu an puang thîn a ni. An thusawi chu a lo thlen hunah a pân a dam ang. Lal ruai kîlin Abrahama te, Isaka te, Jakoba te kiangah a la thu ve ang. Puan mawi tak a sin hunte a la awm ve ang. Beiseinain Lalram a lo thlîr thîn a ni. Mahsela, leilunga mihring heti zozai zîngah he mirethei, Pathian ram nghâktu hian laina a lo nei hauh lo mai a. Tuma vei loh, tuma ngaihsak loh leh tah lohvin a thi ta.

Chu chu vân mite chuan an lo hre kiau mai a, an chêt a hun tih an hria. Khaw-tlai miah lovin vântirhkoh rual an rawn thawk a —a rawng an bâwl ta. An kalpui a, vân boruak zau takah khian an hruai a. Mitthi ruang an hlâwm chu a ni ngei si a, an hruai chhoh chu mi nung a ni tlat mai. Mizo chu ni sela —

Ka ropuina tûr leh ka himna hmun,
Râl hlauhawm leh titna awm lo chu,


a tih ngei tûr Abrahama ângchhûngah an dah ta! A pang a dam ang a, a riltâmin a saruak tawh lo vang.

Hetah hian Isua ringtute thlamuanna thurûk a awm. Thihna hi kan la tâwk theuh dâwn. Ringtuin thihna lui a kân dâwn lai takin amah vênga hruaikaitu tûr vân mite an lo kal ang a —an khawtlai lo vang. Hei hi vântirhkohte ‘duty’ a ni. “Anni zawng zawng chu rawngbâwlna thlarau te, chhandamna rochungtu tûrte tân rawng bâwl tûra tirh chhuah an ni lo vem ni?” (Hebrai 1:14). Kutdawh rethei, chhandamna rochungtu tûr a thi a, angel rualin a rawng an bâwl ta. Ringtu thih nî chuan mitthi kan vui ang a, vân miten mi nung an hruai ve thung ang.

Thih hi nun tâwpna emaw kan tih kan hlau thîn. Ringtu erawh chuan Chatuanin kan nung dâwn tih kan hria. Taksa thihna hi chu ringtute chunga thil lo thleng thîn (incident) pakhat ve mai a ni. Kutdawh pawh hi mi hausa gate-ah mî lung ten leh hmuhsit hlawhin, nat leh riltâm tuarin, thlaphâng rêng rêngin a awm a. Ni khat chu a chungah thil engemaw tak a lo thleng ta! A lu a hai deuh a ni mai thei; a mit deuh sulh pawh a ni mai thei —a thi chu a lo ni dêr a! A han harh leh chuan vân sâng lamah khian angel-in an lo hruai chho delh delh mai a ni. Mi hausa gate kha a kalsan tawh. Gate dang a han thlen leh chuan hmun thar a thleng ta, chu hmun chu, “Vân hmun ropui, hmangaih ram …. Mi thianghlimte in,” chu a ni!


Mi-hausa a Thi ve

Hausak vânga dam rei theih ni sela, he mihausa hi a thi kher lo vang. Kan chângthlan chuan, “Mi hausa pawh chu a thi a, phûmin a awm a,” a ti. A thlân an lai ngunthlûk hlein a rinawm. A kuang pawh an siam uluk hle ang a, a khuhna pawh a mawiin a rinawm. Thu ropui tak tak sawiin an fak ngei ang a. Pangpâra thlahtu te, tahtu te, thlân thlenga zuitute pawh an tam ang. Mahse, a chanchin kan hriat zui leh chu, ‘hremhmunah na tuarin a tâl vêl,’ tih a ni.


A han vanvadàk a —hla taka Abrahama, a ângchhûnga Lazara awm nên a han hmu a. “Ka pa Abraham, mi khawngaih la, Lalzara kha han tîr rawh; a kut hmâwr tuiah chiah sela, ka lei tihdaihna tûrin, he meialhah hian ka na êm a ni,” a ti a. Abrahama, a dam laia a ngaihsak duh ngai loh kha, “Ka pa,” tiin a ko ta! Mahse, a tlai lutuk. A hmuhna pawh hremhmun atangin a ni a, a hla lutuk tawh!

Miin hmuh awla a awm laiin Lalpa chu en duh lo sela a pawi tûrzia a lang. Lal Isua rin theihna remchâng tam tak nei —sâwmna tam tak dawng, ring duh si lo chuan hremhmun atangin an la au ang a, a sâwt tawh si lo vang. Hremhmun leh vân a inpawh theih loh. Thih hnua infakmawi chawpte hi a sâwt lo. Kuang tha takah inzalh ila, satin puannêmin khuh ila, lace phiar mawiin chei ila, kuang chungah kraws lian tâwk bel ila, R.I.P. (Thlamuang takin chàwl rawh le) tih târ ila, a sâwt tawh lo. Hremhmunah thlamuangin a chawlh theih loh. Tûna Isua en duh lo, nuihza siam nâna hmang mai mai te hian hla tak atangin an la au vang.

Pân bawm khah Lazara kha chuan hla tak atangin a au lo. Abrahama ângchhûngah a awm zâwk a ni. Abrahama hi leiah pawh mi hausa —Israel hnam thlahtu, rinnaa an Pa a ni. Mihausain Pathian a hmangaih theih tih a hriat. Ani pawh hian leia pânchhe bawm khah Lazara chu ten lovin —a ângchhûngah a lo pawm a ni. Mi hausa te, mi rethei te, mi hrisêl leh mi bawrhsâwm te, Isua hming ringtu apiang Lalramah chuan chhûng- khat an ni ang a. Abrahama te, Isaka te, Jakoba te nên hlui khatah kîlin an eiho ang a, inten leh inthinhrik a awm lo vang. “Chatuan in nuam ropui taka lêngte zawng chhûngkhat an ni.” Kan Lalpain Pathian rama a thara in tûr kha kan chanpui ve ang.

Mihring hian ropui kan châk khawp a, thih nî thlengin a mawi leh ropui zâwnga insawi tâlh kan tum thîn. Thih nîa tahtu tam te, pangpâra thlahtu ngah te, puana khuhtu tam te, râltu leh lênpuitu tam te, thlân thlenga zuitu mipui ngah dânah te ropuina kan zawng zêl a. Mahse, hêng zawng zawng hi ropuina lem, ral leh mai tûr vek a ni. Thih ropui dân hi awm sela kan hre duh theuh ang, chu tak chu sawi ka tum chu a ni a.

Thih ropui dân chu Lal Isua ringa —a hming lam chung zêla thih a ni. Mi rethei, pânchhe bawm khah pawh ropui taka thih theih dân a ni. Isua ringa thihna lui kân apiang vântirhkohten an hruai kai ang. “Ka dai ngam lo thihna luipui lian chu,” ti thînte khân, “Kohhranho zînga awm tûrin, Thihna hlau lo tûrin,” tih zâwk hi kan induhsakna a ni e. Thihna lui kam he lampang, tapa kan inthlahna hmunah hian engzât nge lo pung khâwm? Hei hi ropuina tak a ni lo. Râl-lehlama lo hmuaktu an pawimawh zâwk. Kutdawh Lazara’n vuitu a nei lo va; mahse, angel-ten an hruai ta. Hmuh awla a awm lai hian Lalpa chu zawng ula, en rawh u.

Lalpan malsawm rawh se. Amen.


Part II : (Zir ril zàwkte Pathian Thu)

He thu lâr tak mai hi Kohhran Pâwl (Denominations) hrang hrangte pawm leh ngaihdân a inang lo hle a. Thu ngialngan nge a nih a, Tehkhin thu le?

Lal Isua hian a zirtîrnaah TEHKHIN THU tam tak a sawi thîn a. Abîk takin MI HAUSA LEH LAZARA chungthu pawh hi tehkhin thu pahnih SUM ENKAWLTU RINAWM LO leh BAWI LEH A PU tehkhinna thute hian an kârcheh pang a —ngaihdân a siam theih hle tawh awm e.

Sum enkawltu rinawm lo, bântlâk chu Juda-ho dinhmun a ni ang hian Mi-hausa leh Lazara thu pawh hian entîr a nei ang tih a hriat theih a ni.

Mi-hausa leh Lazara thu hi a tak tak anga ngaitute chuan thih veleha ringtute chu vân rama kai tûrin leh ringlotute thlarau erawh chu hremhmuna kal nghâl mai tûr dinhmunah an dah phah ta a!

Nimahsela, he thu hi kan chhût chian a pawimawh! Kha thu ziakah khân vân ram kaina tûra felna lam thu, rinna ngêlnghet neia sawi tûrin Lazara chanchinah khân zir tûr engmah a awm hran si lo. Pânchhe vei leh retheih hrim hrim vânga Pathian lâwmzâwng nihna a ni hauh si lo! Tin, mi-hausa pawh kha nuamsa leh a puan senduk sin avânga hremhmuna kal mai tûr a ni thei dâwn bîk bawk si lo.

*     Eng hi nge Pathian chhandamna remruat?
*     Engtikah nge ringtuten an lâwmman an dawn dâwn?
*     Thih velehah nge lâwmman dawng tûr kan nih a, Lal Iesua lo kal leh hunah?
*     Misualte chu an thih velehah nge, Kum 1,000 rorêl zawhah hrema an awm dâwn?

Bible thu keuvin khîng zawhna zozaite khi chhân han tum phawt teh le.

Tin, ringtute lâwmman hmuh hun tûr chu Iesua Messia lokal leh hunah a nihzia hre chiang tûrin II Timothea 4:1; Matthaia 16:27; Thu Puan 22:12 chhiar ang che.

Tin, mi fel lote hremna chungchâng atân Thu Puan 20:11-15 thu chhiar bawk la. Hêng i chhiar hnu hian Mi-hausa leh Lazara thu hi tehkhin thu a nih i hre chiang ngei ang.

‘Mi-hausa dinhmun,’ chu engnge ni ang?
He mi-hausa hian Israel (Juda-ho) hnam dinhmun a entîr chiang hle. Hmâsâng eng tik hun lai emaw atang khân Pathian vohbîk an lo ni thîn a; malsâwmna tam tak pawh an dawng. Tirhkoh Paula pawhin an tûnhma dinhmun duhawmzia Rom 9:4, 5-ah a târlang.

“Israel mi an ni si a; fa nihna te, ropuina te, thuthlung zawng zawng te, Dân pêkna te, Pathian rawng bâwlna te, thutiam zawng zawngte an ta a ni a; pute (fathers) chu an ta a ni bawk a, tisa lam thu-ah Messia chu anmahni zîng ata lo chhuak a ni bawk a; ani (Messia) chu thil zawng zawng chunga awm, Chatuana faktlâk Pathian a ni. Amen,”

tih thu hian a chei hlawm hle!

Tichuan, an hnam dinhmun chu an mi-hausate inthuamna ropui puansenduk leh puan zaisîn inbel thei dinhmunah an ding a ni.

Lazara hian engnge a entîr thung?
Hmân lai chuan Juda-te chuan Jentail hnamte chu uicho ang lekah an ngai thîn. Entîr nân, Marka 7:26-28 kan chhiarin Grik (Jentail) hmeichhe chungchângah, ‘chhang nawi,’ tih leh ‘ui,’ tih tawngkam hman a nih tawh ang khân —Lazara chungthu sawinaah pawh hian tawngkam chhiava tak tak hman a ni leh a ni.

Israel-ten malsâwmna an dawn chhûng zawng khân Jentail-te chu pâwn lam mi an/kan ni. Paula ngeiin Jentail dinhmun hlui leh Messia min tlanna azâra dinhmun thar kan chan ve tawh thu min hrilh a (Cf. Ephesi 2:11,12). Lazara hian chan tha a lo chan ve hi Jentail dinhmun thar entîrna a ni. A dam laia a retheihna kha —Israel-te tluk pha lo leh Zâwlneite pawh nei ve lo; chhandamna leh vohbîkna pawh chang pha ve lo kan lo nih tawh thinna entîrna a lo ni!

‘Abrahama ângchhûng,’ chu engnge ni?
‘Abrahama Ângchhûng,’ hi vân ram tihna a ni ngawt lo! Israel mite chuan Abrahama Thlah nihna an chhuang tih kan hria (Cf. Joh 8:33), —an induhphahin Abrahama ângchhûnga awm ngawih ngawihin an inhre thîn.

Mi hausa thi ta kha Abrahama Ângchhûng hlawh lovin Lazara (Jentail) zâwk khân Abrahama ângchhûng a chang ta tlat mai si a! Chu chu Messia tlanna azâra CHANCHIN THA an hrilhin —Jentail-te lam a hawi ta a nih zâwk kha! Jentail-te nihlawhna a thleng. Pathian sum enkawltu rinawm lo Israel-ho te kha Apostol-ten Chanchin Tha an hrilh chiam pawhin an awih duh lo tlat a, Jentail-te lam hawiin thu an puang zui ta thung a nih kha!

Jentail-te chu Messia ta, Abrahama thlahte kan nih tâk zâwkna thu pawh Galatia 3:27-29; Ephesi 2:1, 12,13-ah te hmuh theihin a awm.

‘Mi-hausa thihna,’ chuan engnge a kawh?
Abrahama thlah, tisa lam dinhmun maia induh tâwkna chu chaw tak a tling zo lo. Iesua tisa put lai nî khân Abrahama thlah nih ngawt vânga inchhuan loh tûr thu leh rahchhuah lo chu kih thlûk mai tûr an nihzia Matthaia 3:9, 10 thu-ah kan hmu.

Rome mite hnêna Paula’n Lehkha a thawnah khân Olive zâr thenkhatte sahthlâk an nih thu a sawi a (Cf. Rom 11:17). Jerusalem chungpikna leh an in ruaka hnutchhiah an nih tûr thu Lalpan a hrilhlâwk bawk a (Cf. Matthaia 23:37, 38); chu thil chu AD 70-ah khân a thleng tan a nih kha le!

Mi-hausa hremna ‘Mei’ chu engnge ni?
Deuteronomy 4:20 thu-ah chuan Aigupta rama Israel-te tawrhna kha thîr rawhtuina (meipui – furnace) a ti kha a ni a. Chutiangin, AD 70 atanga Israel-te tiau darhna —vawiin thlenga an tawrhna hi Aigupta rama an tawrh aia nasa, “He meiah hian ka na êm a ni,” an ti ta a nih ber khu! Tih tak êmah chuan Titus-a suat zât te, Hitlera’n maktaduai ruk lai a suatte kha na tham tak zawng a ni! Sawi mai aiin a tuartu tân a nâ!

‘Leikak nasa tak,’ hi engnge a awmzia?
Tisa mi Israel-te leh Thlarau lam Abrahama thlah Jentail-te inkârdanna leikak chu Lal Iesua Messia hi a ni ngei a ni. Paula chuan Iesua Messia khenbeh rawng bâwlna thu chu Juda-te tân TLUKNA tia a sawi laiin; Kohva awm Jentailte (Juda mite pawh) tân chuan Pathian thiltihtheihna leh finna a nih thu I Korinth 1:23,24 thu-ah a sawi.

‘Tute nge Mi-hausa unau Pangate,’ chu?
1. Sadukai 2. Heroda Pâwl (Herodians) 3. Pharisai 4. Essenes (Ezins)-ho leh 5. Therapeutae (Damna ûmtu) an tih te an ni.

Tisa Juda, Abrahama thlah inti, Pathian Thupêk aia mihring thupêk la vawng (uar) te, an thinlung serhtan si loh dinhmun chu Mihausa hian a entîr. Lazara erawh chu Jentail, Chanchin Tha fa, Jentail-te famkimna (Messia lokal lehna) a thlen hmâ chuan Israel-te chungah chawlawlna a thleng a ni (Rom. 11:25).

Chawlawl Juda, Messia Iesua ring duh rih lotute aia Messia ringtu Jentail-te kan nihlawhna he lai thu hian min zirtîr a tum tak zâwka chu a ni e. Thih veleha vân ram kai leh thih veleha hremhmuna kalna lam chanchin hi Nazareth Iesuan he lai thu atanga min zirtîr a tum lo.

Nikin Nia Kaihthawh lehna-ah chhiar tel i ni ve zâwk dâwn em? Lalpan a lâwmman —mi felte tâna a rawn ken chu Chawimawina Ropui dawn hun atâna i hmabâk thil hlû a ni ve dâwn zâwk em?

Lalpan a thutak malsâwm rawh se, Amen.

Part III (Part II belhchhahna ang a ni ber e)

Part I & II ziaktu ten an âwn lam lam chu an ziak kim vek tawh alâwm le…. eng fakau nge kei tehlulin nge Chawnghilh (Theologian ni hauh lo hian) a rawn khawrh chhuah belh ve tawh ang le aw?

Rev. Saiaithanga’n ISUA TEHKHIN THUTE (The Parables of Jesus by Wilfred Scopes) a lehlinah kha chuan MI HAUSA LEH LAZARA hi a tel chiang a, kum AD 1967 leh 1988 khân The Mizo Theological Literature Committee-ten an chhuah a nih tawh kha!

Engle khaw le! “Mi-Hausa leh Lazara” thu hian ringtute inhnialna a chawkchhuak nasa ngawt mai! Thih veleha vân ram/meidîl pan nghâl Thurin hi lo Pathian Thu phian ni se —Pathian rorêlna inhleihzia a lang chiang ngawt ang chu! Kaina chu mi pakhat thah thubuaia Meidîl-a awm rei ber record-holder a ni ang a; Adolf Hitler-a thung chuan hmânni lawk khân Juda makta- duai ruk emaw lai a suat a… meidîl-a Kaina aia rei lo zâwk fê a han awm leh tûr si chu! Kaina leh Hitler-a te Hremhmuna inngeih lo taka an awm dun dân tûr thawnthu tlabal tak ziak thiam Upa zêldinna nei thui fê fê in Kohhranin a nei leh vat mai lo’ng maw? I hrethiam mai em?

“Luka 16:19-31,” inkâr thu hi  hriatthiam a tha viau mai. Ringtu leh Ringlotute —Chatuan Nunna nei ve ve tûra Isuan min zirtîrna a ni lo tihah hian lo chiang thar ang che! Amen.

Johana 3:16-ah khân Isuan, “Amah (Isua) chu tupawh a ring apiang an boral lohva, chatuana nunna an neih zàwk nân….” a tih lawm lawm atang pawh hian ring lotute Boralna leh ringtute chauhvin Chatuana Nunna an neih bîk tûr thu a lang chiang si! Kan Zoram dung leh vânga Pathian Thu Thianghlim châng hman lâr ber hrethiam chiang lova liam tawh leh hrethiam chiang chuang lova puithiam hna chelh mêk —mitthi vui liam ve chhên kan va ngah tawh âwm êm? “An hriat loh lai nite ka haider ang,” titu kan Pathian chuan a zahngaihna thla han zâr nawn leh teh rih se!

A ni lova ‘thlamuan’ leh ‘inthlamuan’ hi a sâwt lo hle a ni!! Ngaihthatna hi a tàwk lo! Saw lama pa pakhat thi tûr chu a tuten an tah laih laih a, “Ka pu, i thla a muang chiah em?” tiin an zâwt! Thihsuala tâl mêkin a thih-khum atang chuan thei leh thei lovin, “A khawi lam lamah pawh kal dâwn ila… ka thla a muang e…” zuk ti a!! Lal Isuan min hnutchhiah Thlamuanna ni si lovah hian kan thla hi kan lo timuang phian ang tih hi a hlauhawm ta viau mai!

“Mi-hausa leh Lazara-ah hian a khawi zâwk nge KUTDAWH?” tiin Sabbath School-ah zawhna ka siam thut a; intihre takin, “Lazara zâwk kha maw le!” tiin zirlai zînga pakhatin mi rawn chhâng a —chu chu i thlâwp ve em? Mi-hausa leh Lazara chanchin i zir chian poh leh ‘kutdawh pahnih chanchin,’ a nih thu i hre chiang zui ang. Part I — Upa Lalthankima ziak ngaihnawm takah pawh hian Lazara hi kutdawh zâwkin a hmu deuh emaw ni chu âw?

Sawi than dân awm tawhsa atang hian hniak thar nei tûra pên chhuah hi a harsa duh viau! Chu chu kan Ram Kohhran thanmawhbâwk pawh a ni.

Amaherawhchu, tûn tumah hian rin lehzualna (faith to faith)-a hmâ kan sâwnna tûr dap belh hrâm ila.

‘Mi-hausa’ hi Latin Vulgate (Rom-ho Bible)-ah chuan ‘dives’ tih a ni a; Dives chu mi-hausa hming emaw ti hial an awm zui nawk —chu êm zawng a ni si lo! Kutziak Bible hlui takah chuan Mi-hausa hming chu ‘Neues,’ tia inziak an hmu. A thenin, ‘Nimeusis alâwm,’ ti tâwk an awm bawk. Mi-hausa, puan senduk leh puan zaisîna inthuam a nihna hian Puithiam Lalber thuam dungthûla inthuam a ni thei ang em? A nih loh vêk pawhin puan senduk fual hian Sorkâr lama a thuneihna entîrin; puanzaisîn hian nawmchen —huau huau lam thuam a entîr ang emaw?

Tûna he thu ziak chhiartute pawh hi Pathian Dân leh Thupêkah in chiang (well-versed) a; in rilru inhawn laia in lo khaikhin atân he thu hi rawlh hrâm ila —

“Ni ruk chhûngin i thawk tûr a ni a, i hna zawng zawng chu i thawk tûr a ni: a ni sarih nî erawh chu YAHWEH i Pathian tân sabbath a ni e…”
— Exodus 20:9,10

He Mi-hausa hian Exodus 20:9&c a ngaih-thutak lohzia leh kawng hniha a bawhchhiat dân hi i hre fiah thiam ta mai em?
He tehkhin thu Luka 16:19-ah hian mi-hausa chu, “Ni tin nuamsa takin a awm thîn,” tia ziak a ni hi i chhiar ve ngei e. Tawng-bul lamah chuan khi ngawt ai khian an la chêk thûk zâwk nghe nghe —“… and fared sumptuously every day (KJV); lived in luxury every day (NIV),” tih a ni. He mi-hausa hian Pathian Thupêk Sawm kha a mamawh loh riauna khawpin a tlei tâwk a ni tawh ber e.

Ni ruk chhûngin ama hna pawh a thawk tawh lo va; Sabbath  pawh a serh chuang tawh bawk hek lo. Ruai changkâng a theh hiau hiau ni tin a ni. Kum khat chhûngin LALPAN Kûtpui pathum a nei a; he mi-hausa erawh hi chuan ni tin kût ruai a theh thung! Tûnlai mi thawlêng thenkhatte angin ni zawng zawng hi a hmang inang thûm a nih ve ber chu! Thupêk Sawma a palina bawhchhetu ve tho a lo ni e! Mi-hausa zawmthâw leh nawmchenna ngawta khat liam a ni! Nazareth Isua khawvêl lên lai nite pawh khân Judaten sabbath an serh nâin, Pathian duh dânin an serh tawh chuang lo —an Misnah leh Talmud Dân tlawhchhan zâwka sabbath an serh dân kherkhiap êm êm thînte kha kan la zir chiang dâwn nia!! “Theipui rah ro aia rit Sabbath niah ken loh tûr,” tih thute hi Kohhran Upa tam tak te hian Pathian Lehkhabu Thianghlima inziak emaw ti tâwk zuk la awm cheu va! Misnah Bu leh Talmud Bu 2-te chinchâng hre lo lutuk te ngaihdân ni âwm lek rêng a ni! He Mi-hausa dungthûl hi an va la tam tak êm!

Chaw leh sa, in tûr tin rêng tuihnai-a ni tin ruai han theh theih hem hem reng mai chu leh! Malsàwmna zawng a dawng tehmeuh mai le! Ruai-bângnawi chângin kutdawh hmasa zâwk Lazara a awm ve tih i hria e! Khatih hun lai khân chemte, thìrkut leh thìrfiana ei mawihnai thlip thlep an la ni bîk lo va —keini Zopâ thîrkut leh thîrfian (kutbâwr) ang ngei hian an ei ve mai thîn. Eina zungtang berh deuh lai chu keini hi chuan kan han fâwp fai zung zung mai a; mahse, khatih hun lai kha chuan chhangthem (bread-hunks, crumbs)-ah an tât/hru fai niap niap a; an han pen per nalh mai a. Piah lawkah ngiau leh bauhten an lo inchuh zui ve tawh mai thîn! Chutiang kârah chuan Lazara pawh a tel ve a nih ber chu! Aigupta atanga Israel saltâng an chhuah hnuah Juda-te siperah Jentail-te chuan Pathian chhûngkaw member nihna kan chang ve pheuh pheuh chauh thîn tih pawh i hai lo!

He Mi-hausa hian a chân loh khânah misual nih a hlawh thei tlat thung! Tih tak êmah chuan —Engnge Mi-hausa suahsualna ber chu? A in hungna sekawt-rawlh bula mû Lazara chu theh chhuak bo tûrin thupêk khauh a pe em ni? A dawhkân atanga chhang-nawi tla chu Lazara ei atân a la phal lo cheu em ni? Lazara chu a chhir chhuak hial em ni le? Lazara chungah hian a râwng lulai êm em ni? Lazara hi chuan a dam laiin Mi-hausa hi a lo hre chiang hle a; Mi-hausa thung erawh hi chuan a dam laiin Lazara hi a hre lo chu ni lovin —a lo ngaihthah lu-lam deuh zawng a ni. Lazara a thi ta. He thu hi a-ngial a-ngana chelek fo tûr ni ta tak tak se —‘vaivut chu vaivuta an kîr (Gen.2:7; 3:19; Thuhriltu 12;7)’ lo ve ve ta si hi a mak-sakhai viau dâwn ta!

Mi-hausa a thih chuan an phûm a; mitthi-khua (Grik –hades)-ah chuan na tuarin a awm a. Hades (he-dis) hi thlân sawina a ni; kawh-nei (figurative)-a ziak a nih hi man thiam a ngai. Hades hi mitthi tupawh —mi tha emaw misual emaw pawh ni se, an awmna a ni. He hades hi Lazara hian a kal-kahlèn thei bîk lo —he thu hi a tak tak (literal) ni se chuan!

Thihna hi Lal Isua leh Zâwlnei Daniela te chuan, ‘muhil,’ tiin an sawi. He lai thu-ah hian hmasânga thi tawh Abrahama leh Mi-hausa hi an inbe chiam mai a. Tak tak (literal) ni se, an thih chuan muhil an ni ang a; engmah an sawi thei lo vang.
Mi-hausa a han thih ve meuh chuan Lazara (a hriat that duh loh thin kha) a mamawh ta ruai ruai mai le! Tin, he Mi-hausa hian Mosia leh Zâwlneite Thuziak a ngaihthah thîn bawk a. A chhuan tawlawl ber thin erawh kha chu tisa lam thila Abrahama chhui thleng phâk tâwk chin lekfang a ni tih a lang chiang. Hmân lai Juda-te khân Jentail-te chu ‘ramdang mi, uicho,’ min ti lekfang rêng a ni. Min hre map lo chu an ni bîk lo!

A sualna kha a thuam inbelah ni lovin, a ruai ropui mi dang tâna a thehsakah ni hek lovin … retheite a ngaihthah leh mahni nawmsak a bâwlna zâwnah a nihzia hmu thiam ang che.

Mak i tih tûr a awm! Isuan tehkhin thu a leklàm uar hle a. Tehkhin thu dangah hminghmerh a neihtîr ngai lo. Lazara leh Abrahama te chiah hi hminghmerh a neihtîr awmchhun chu zuk ni a!

Lazara hming awmzia ringawt pawh hian zir chian tûr leh zir zau belh tûr a pai hnem hle. Engati nge Hebrai-ho koh dân anga Eleazar tia Isuan a lo phuah mai loh? Engati nge Lazara ti kher khera a lo phuah le? A enga ve ve pawh chu lo ni se —Lazara tih leh Eleazara tih awmzia chu, “Pathianin a tanpui emaw Pathianin mi tanpui,” tihna a ni! A/Min tanpui ngei hlawm rêng e. Lazara tih hming hi mi retheite zîngah an phuah lâr hle thîn rêng a ni. He tehkhin thu-ah ngei pawh hian tanpuina a dawng nasa khawp mai. Kutdawh akâra Malaria PV/HIV benvawn vei  pawh ni lo —Joba ang maia Pathian dem chuang hauh lova pânchhe bawm khah lûk a ni. Tenawm tak —a pân pûnso liak thîn uicho (sa thiang lo) hnawt sawn thei lo khawpa tuanfûm chhiava a ni! He kutdawh —a hming Lazara  han tih ngawt pawha Jentail hming (Lazarus – a Latinized name) pu hliah hliah hian Jentail-te ai a lo awhzia hi man thiam thut tawh mai rawh le. A zir a manhla hle mai! Lazara hian phunnawi lovin Mi-hausa kawngkhâr bul a bêl ni tin chawt thîn. Nghah chhuah neih tumin a châng chawt thîn a. A chân chhuah tumah a chiang a ni. Lal Isua kha amâ mi Juda-te hnênah a lo kal phawt a; an hnâwl miau ahnu —Jentail-ten kan nghâk chhuak ve ta miau asin le!!

Messia Iesua Chanchin Tha zârah Jentail-ten chan tha kan chan mêk hi tûna ringlo-Judate chawlawl mêk laia an tuihâl kutdawh ve mêkna nèn mitthla-dîng thiam tûra ngaih i ni ta! Hei daih zâwk hi a lo ni!! Jentail-te tihênna Chanchin Tha; Juda-te thîktîrna thu mawlh mai hi! Amen.

Tichuan, kan hlâwk belh leh ta hret. Hallelu Yah, Amen.

Thudik hliahtu, zirtîrna hnawkhnai tam tak te chu i chhinchhiah chiang zui leh ang u. Chûng zirtîrna dik lova min rawn bum nawn loh nân! Mahni kih hnawk thenfai nawn leh hi hna hautak a tling tih hretu ni kar hlawm ila!

Thih veleha Vânram kai leh Hremhmun kal inzirtîrna Juda Rabbi-te hial pawhin an lo zirtîr thin leh tûn laia Kohhran Hruaituten an zirtîr zui ve mêk bawk hi hlih kian fel a ngai hle. Lal Isua en chianga zirtîrna dik vawng nghetin —chu chu i puang chhuak chhunzawm zêl ang u. Juda Rabbi-te ai khân Thlarau Thianghlimin min kaihhruai tâk zâwk avângin Messia Chanchin Thaah chuan kan dai thûk zâwk tawh si a! Hallelu Yah, Amen.

Mi fel thi an awmin Juda-te chuan hnemna kawng thum— “Eden Huanah an kal ang; Ropuina Lalthutthlêng hnuaiah an kal ang, tih leh Abrahama ângchhûngah an kal ang,” ti tein an inthlamuan thîn. Chutiang dungthûl chuan Mizo inti-Christian zîngah hian, “Mi-hausa gate kha a kalsan tawh. Gate dang a han thlen leh chuan hmun thar a thleng ta, chu hmun chu, “Vân hmun ropui, hmangaih ram … Mi thianghlimte in,” chu a ni!” tiin an inthlamuan châwk! Tirhkoh Paula erawh kha chuan, “Hêng thu hian inthlamuan tawn rawh u,” tiin I Thessalonika 4:13-18 inkâr thu-ah Lal Isua lokal leh huna ringtu muhîl tawh te tâna thawhlehna awm ngei tûr leh nungdama nghâkchhuaktute pawh tihdanglama an awm zui vat ve tûr thu a sawi zâwk si a!

Lazara hian ‘a belh hmasak Mi-hausa,’ aia hausa zâwk a bêl fuh nawn leh ta! Tih tak êmah chuan tisa lamah pawh Abrahama hausak tawntâw zia hretu i nih a rinawm e. Hausak hi sual a ni lo. Thlarau lama Abrahama hausakna bêltu chu Lalzara a ni tih pawh hai phal suh. Jentail-ten Rinna kan dawn ve hma pawh khân Lazara ang hian Juda-te Pathian avânga dam-khawchhuak kan nihzia a lang —hrechhuak tlai mah ila!! Chu chu Nazareth Isua pawhin tehkhin thuin a târlang thiam hle, “Mi-hausa dawhkâna ei nawi tla chu ei a duh a,” tiin a thiat lût chiang hle rêng a ni. Juda-te dawn ang malsâwmna lian hlawp pui pui kha zawng kan lo beisei phâk ngang loh thin thu Isua hian a sawi lang chiang thiam hle mai!

Luka 16:19-31 hi Tehkhin thu ni lo va; angial angan ni ta ngat se zawng —ringtute hi ringlotute aia dam rei lo zâwk tûr kan han ni ziah tûr te hi!! Thupêk Tiam nei hmasa ber Thupêk Sawma a pangana, “Nu leh pa chawimawi,” pawhin kawngro a su lo phawt dâwn a ni si a (Cf. Ephesi 6:1-3)!! Pathian Thu hi kan dam lai hun chhûng ngawtah pawh hian dâwtah a chang fo dâwn tihna em ni dâwn le?

‘Lazara thih leh Mi-hausa thih,’ tehkhin thu hian Juda nihphung inlet leh Jentail nihphung inlet a entîr. Chanchin Tha zârah Zângkhua a bungbu ta! Chanchin Tha kawltu ni ve ta lo chu hrem chunga rorêlsak tûra khêkin a awm ta! Hremna hmun atang chuan a han dâk chhuak a —a lo chhuan leh chapopui thin Abrahama chu a hmu ve ngei mai. Abrahama hmuh hrim hrim chu nuam tak pawh a ni ang; mahse, a hmuh  dân hi han chîk chiang teh. A kiangah a hmu ta hauh lo. “Hla takah Abrahama,” tih a ni ta tlat! Chu mai a la ni lo, “a ângchhûnga Lazara,” pawh a hmu tel! Hmân deuh lawka a dawhkân —thil tuihnaia inchhawp khat tlat thîn atanga a bih thlâka a hmuh thin Lazara tiam tuam thîn kha … a mi ngaihsàn leh chhuanvàwr Abrahama ângchhûngah a hmu ta thung si!

‘Kawngka Zîm,’ tehkhin thu hmân deuhva Iesuan a sawi kha he Mi-hausa dinhmun danglam ta si hian a hrethiam uar uar mah na le, “Abrahama te, Isaaka te, Jakoba te, zâwlnei zawng zawngte chu Pathian Lalram chhûnga awm in hmuh a, nangni pâwna hnawhchhuah in nih in inhriat hunah… (Luka 13:28)” tih thu mawlh hi! ‘Mi-hausa na tuar’ hian a tem tan chu a ni ta reng mai! Thîk tham a tling ta takmeuh!

‘Abrahama ângchhûng/Abrahama Malchung,’ tih idiom hi paradise sawi nâna Juda-ten an lo hman thin a ni [The Talmud, Kiddushim 72a; in Soncino ed.,p. 369]. Chu chu Ruai kîlna hmun ni ngei tûra ngaih, ruai buatsaihtû âwm nghênga ruai kìlna hun thlîrna mitthlaa ziak ni pawhin a lang.

Hebrai 11:13-ah chuan, ‘rinna neia thi tawh te,’ hming list engemaw zât lai târlan zîngah Enoka leh Abrahama te meuh pawh an tel ve ngei kha! Hebrai 11:10-ah chuan Abrahama chuan Khua lungphûmte nei mi, Pathian rêlbâwl leh siam ‘a nghah mêk thu,’ kan hmu. Hebrai 11:19-ah ‘thawhlehna a beisei thu,’ kan hmu bawk. Hebrai 11:39-ah phei chuan, Fak hlawha thi tawhten, thil tiam “Chatuana Nunna, (Cf. Tita 1:2)” chu zakhamnain dawng tawh mah se, a taka an la neih rih bîk loh thu kan hmu a… Part I ziaktu te, Chawnghilh te, nangni te, Upa Lalthankima te, Pu K. Kâwla pa (Dr. Lalthanliana-te, TMEF Evan. Rohmingliana tel lova anni chu tihfamkima an awm loh nân, Pathianin keimahni kawng thuah thil engemaw tha lehzual a buatsaih tawh avângin… (Cf. Hebrai 11:39&40)” tih thu hi man fuh thiam thei kan nih a rinawm ta e.

Mi-hausa Gate kianga mu ni tin thîn Lazara khân ring takin kutdawh au râwl a chhuah ve thîn em? Teh nâ’ng!!Chîk teh, Mi-hausa sahâl taa hian Abrahama leh a ângchhûnga Lazara a mamawh dûn ta hle mai le! A au ruai mai! An kâr a hla bawk a —au rin a ngai hle ang le.

“Na tak tuar rêng rêngin a awm a, ” tih thu Grik tawnga basanoi (vb. basa-nizõ) hi mei alhin a hliauna na tlawk tlawk sawina a ni lo hi a mak lawi! Tawrhna dang, natna (disease) laka mi a tawrhna a ni daih! I rilru mitthlâin han thlîr chiang la, meiin a hliau hle nain —ui beng khawnsak, a ke bai vâw vâw daih iangin, Mi-hausa lei hi tihdaih a ngai daih thung!

Tin, i hriat chian ngei ngei tûr chu —hades (mitthi-khua)-ah mei leh kâta inrawhna a thleng ngai lo; mei leh kâta kàng, rawh ralna ni zâwk thîn chu Gehenna (Geenna) a ni thung. “Grik tawng rawlh zen a ngai lo,” tiho pawhin lo ngaithei hràm se! He laiah hian Mi-hausa hi hades-a awm a ni!

“Mitthi erawh chuan engmah an hre lo va, lâwmman an nei tawh hek lo; …a thawin a chhuahsan a, ani chu leilungah a kîr leh a; chumi ni ngei chuan a ngaihtuahnate chu a bo nghâl a ni,” (Cf. Thuhriltu 9:5; Sâm 146:4).

A tak tak (literal) leh khaikhinna (parable) an nih leh nih loh hi hriat chian hmasak a tûl hmasa fo thîn! Chumi atân chuan i rintlâk e. ‘Abrahama ângchhûng,’-ah chuan Lazara bâk —mi dang rêng rêng a hmu chuang na nge?

Mi-hausa hian, “Ka pa, Abrahama, mi khawngaih la…” a ti ta lawm lawm mai! Khawngaihna thla zâr ngai lo khân khawngaih a dîl thar hnuhnawh ve ta! Tlawnna aw mawi, ‘Ka pa,’ tiin vawi thum ngawt a chhâk chhuak! He Mi-hausa hian tute emaw a entîr ve tho, chûngho chuan, “Lalpa, Lalpa,” an ti ve mêkin, an la tihchhunzawm ang! Hnialna ânka la dawng tûr theuh theuh!

Abrahama lah hian a chhâwn mawi ngei e; polite takin, “Ka fapa,” a ti ve tho! Abrahama fate zawng zawng chhandam an ni vek kher bîk si lo! Hawihhâwm tak sia inhnâwl liamna hi nakin lawkah a la awm tûr zia a hril lâwk hle.

He tehkhinthu hi a-ngial a-ngan emaw titute hian a tlângpui thuin, “Doctrine of Immortal, Disembodied Souls,” an tih hi an hril uar a; chu chu, “Thih hnua Thlarau thi thei lo, Taksa atanga Thlarau dah hrang,”-ho —an inhre chiang êm ang chu maw? Ruang chu thlânah, thlarau erawh chu taksa ruangâm pu zui tawh lova sawitute an ni… mahse, Mi-hausa hian thlîrna mit; lei sahâl tihdaih ngai; auna kâ a la neih cheu si hi! Lazara pawhin kutzungtang a neih thu Mi-hausa —tuisik far khat la mamawh cheuva hian a puansak! Chuti a nih chuan, thih veleha mahni taksa bung hrang hrang kimtlangin, an lâwmman dawn tûr ang ang chu dawng tûrin an la sawi thei cheu ang em le?

“He meialhah hian ka na êm êm a ni,” tih thu hi literal ni sela chuan, thih veleha thleng nghâl tûr ni lovin —mithmuha Lal Isua lo kal leh hnua he lei ngeia Kum 1,000 Ro a rêl hnua thleng tûr a ni zâwk e (Cf. Matt. 5:22).

“Lei kak nasa tak,” hi dawhzawm theih rual loh, dawhzawm tûr pawh ni lo —mi tha leh mi sual, thih veleha an lâwmman dawn tûr insiam peih fel diam (lâwmman dawn hun erawh chu ni lovin) —tawh chêt leh theih rual tawh loh chu a ni! A thih laia sual chu boral hlennaah, Bible-in, “Thih Hnihna,” a tihah a kal ang; tin, a thih laia Messia Chanchin Tha dik Thuhretu (Witness) chu, “Chatuan Nunna,” —kumkhaw tlaitluana ârsite anga kan ênna tûrah a ni tawh dâwn si a!

Vân ram leh Mei Dîl tawngkâa inbiakpawh zuah zuahna lam he thu  hian min zirtîr a tum hek lo! A inbiate hi thlîr chianin an thi (muhil) si lo em ni? Literal takin thi ni sela, an inbe lêk lo vang le!! Chuvângin, entîr nei riau tehkhinthu a nih a lang chiang tâwk.

Tûnlai chhanah Thuthlung Hlui Bu hnâwl riau an awm —chu Bu chu Mosia leh Zâwlneite Lehkhabu a ni a. Nazareth Isua khawvêl lên lai nite khân an Thurin inziakna awmchhun a ni miau si! Tlai fê hnuah Thuthlung Thar Bu hi  AD 70 hma lam hret, AD 90 chhova ziak chhunzawm chauh a ni tih pawh i hria e!

“Mosia leh Zâwlneite hi an lo pawimawh hle a ni,” tih he tehkhinthu atang hian phawk fuh thiam mawlh bawk ang che. Zâwlnei Isaia pawhin, “Dân Thu leh Hriattîrna Thu chu ràwn tùr a ni,” Chumi thu ang zêla an sawi loh chuan an tân khua rêng rêng a vâr thuai dâwn lo… (Isaia 8:20),” a ti bawl mai.

Mi-hausa hi a che chhe laklawh tawh a; a dam hun laiin a lo inpuahchah hman tawh si lo va, a thih hnu chuan siam that theih ni nawn tawh hek suh —hnâwl a ni fihlîm tawh a ni. Engkim a chân fel ta! Bih chiang la, he Mi-hausa hi kutdawh hlawhchham, amâ tâna sâwt tawh lo; mi dang tâna khawngaihna zir thar tha leh a ni ta thung! A pianpui, a pâ ina mi panga (a chhûngte leh laichînte tân erawh chuan a dîl kêp hran lo!)-te tân Lazara rawng bâwlna a mamawh ngawih ngawih thu a chhâkchhuak zui hràm a. A kar leh ngiat apiang Abrahama hian a ùksàkpui nain; a hnâwlsak zèl kârah, “Mosia leh Zâwlneite an nei alâwm; chu mite thu chu ngai rawh se,” a tih hun lai hian Jentail-te chu tâl ho satliah mai mai kan la ni tih pawh i hre chiang e! Mi-hausa pianpui mi pangate chu Pharisai, Sadukai, Herodians, Essenes leh Therapeutae te an nih thu an hun lai history bih kîrin i hai thei mawlh ta si lo!

Mi-hausa hian a unaute bo khawro zia hi a chiang hle. An tân thahnem a ngaih sak hle mai! A unaute sim theihna kawng awmchhun tûr chu Mitthi Tholeh a ngiatsak ta hial a ni. Abrahama hian an rilru hi a lo chiansak hle, “Mosia leh zâwlneite thu an ngaih loh chuan, mitthi zînga mi tho leh mah sela an awih chuang lo vang,” a ti hmak mai!! Aesop-a thawnthuah pawh Berâm vêngtu rinawm lo, inhlawhfa chuan dâwtin, “Min pui r’u, Chinghnia…” tiin a au vêl chiam chiam thîn. Puitu an lo kalin engmah a lo ni thîn si lo! Ni khat zet zawng, puih a ngai ta tak tak a —a han au leh chiam pawhin, puitu an lo kal ta lo!! tih thu in chhiar ang deuh kha a ni ve ber awm e.

Mi-hausain a ngenna hnuhnûng ber hi chhinchhiah ngun teh, “….Mitthi zînga mi meuh an hnênah kal zâwk sela an sim ang,”  tih thu hi Mosia leh Zâwlneite thu aiin a’n dah lian ve leh hrâm a nih pek hi! Khatih hun laia Juda chhûngkaw hel zia, luhlul tukkhum pâwnzia sawinaah a pakai chho ta miau mai le!

A hnu rei lo têah Bethani khuaa Lazara tak tak, Marthi-te nuta kha a’n thi ta ngei a; Isuan a’n kai tho ta chê’ng a (Cf. Joh. 11:38-44). Mi-hausa pianpui, an ngawhngawl ngai ngaia la ngiaungerh an awm zui tho mai! Chu mai a la ni lo, Lazara kha tihhlum an la duh nawn cheu a nih kha (Cf. Joh. 12:9-11). An va kaw lo tak êm!

Chu mai a la ni lo —Amah Lal Iesua Messia ngei kha thihna thlàn thim ata kaihthawhin a awm a. Khàng hun laia Juda mi tam zàwkte khàn A thu sawi, thu hril leh rawng bàwlna kha a awi duh chuang si lo! Khatih lai huna Juda mite nun pawlawhzia chin felna thu —tehkhin thua sawifiahna a ni tih hi hrethiam chiang ila.

Thih veleha vân ram kai bîk chuang lo ISUA KRISTA (YAHSHUA MESSIA) hi kan chhandamna bul ber chu a ni, amah ngeiin a thih hun dârkâr atanga dârkâr 82-na vêl, Thênthilhlan Tûk khân, “… tûn thleng pawhin Pa hnênah ka la lâwn chho lo a ni…” a tih chian hle kha (Cf. Joh. 20:17). He thu sawitu hi i Lal leh Chhandamtu a ni ve em?

He Thênthilhlan Tûk atanga ni 50-na Pentecost Ni khân Petera pawhin, “… Chi thlahtu Davida thu hi hlau lovin in hnênah ka sawi thei e; ani zawng a thi a, phûm pawh an phûm tawh alâwm, a thlân pawh tûn thlengin kan hnênah a la awm reng a… Davida zawng vânah a lâwn chho lo a ni… (TT 2:29 & 34)” a ti miau mai! Kross hma lama thi tawh, kross hnu lamah pawh vâna la lâwn chho lo Lal Davida a awm chian êm êm laiin kan ram puithiamten mitthite vâna an han thawn kai nghâl vat hi chu a zahthlâk!! Thih veleha Vânram/Meidîl kai thu hi Iesua leh a zirtîr Apostol-ten min zirtîr lo.

Thih veleha thil chiangsa erawh chu kan lâwmman dawn tûr a ni zâwk a; hnukchah lai chiah hun chu a dawn hun tihna ni si lovin! Mi fel thite leh mi sual thite lâwmman dâwn tûr kârchehah chuan kaltlang theih tawh loh leikak thûk a awm chiang ta! Thih hnua din thar lehna tûr leh indîl puina purgatory a awm loh chian êm avângin dam laia insingsak fel a ngai a ni!

Mitthi chungchânga chiang-nial lo puithiamten —Thawhlehna, ringtute nghahfâk leh beisei hi eng tinnge min hrilhfiah theih teh lul ang? Kan ram Christian-te hi kan inbih chian a va ngai êm?

Kan ti ta mêk mêk bawk a; Victor Paul-a Lehkhabu, “Are the Dead Alive Now?” phêk 89-naah, ‘Is there Death After Life?’ tih thupui a ziakna bîkah chuan manuscripts hlui chi hnih, ‘Pezae Caulabrigienfis,’ leh ‘Koridethian Caisarean,’-ah Luka 16:19-a, “Eipen de kai hereran parabolen,” tia Grik tawnga a lo inziah kiau thu a târlang tlat mai —chumi awmzia chu, “And he said also another parable, —Tin, tehkhin thu dang a sawi bawk a,” tihna a nih tlat hi le! He thuziak hi i hlâwkpui phâk em?

Lalpan a thu malsawm rawh se.

WELCOME!

Len luhna thlàkhlelhawm with great infatuation —
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: