Chawnghilh's Blog

Thilmak (signs and wonders)!

Posted in Qualitus : Habitus by chawnghilh on December 7, 2009

Tum khat —kum tam liam tawh … Sunday pakhat chawhnu khân ka Computer pindanah thian rualho, MA senior ve tawh tak tak an rawn lùt a. Kim lo riau anmahniah a awm tih ka vei (sensed)! An zînga pakhat chuan thaw halh halh pahin, “Samsona kha chhandam a ni ang em? Mahni inthat mai a ni si a … vawiin Sunday Sikul-ah kan inhnial phah luih luih a, kan Sunday School Superintendent lahin khaikhàwm thiam tawh bîk hek suh…” tiin bul a rawn tan a. A dangte mitmengah pawh riltàm-tuihàlna a lang chiang thawkhatin ka hria.

Kan thupui khi bih chiang ngat ula chuan —Chhinchhiahnate leh Thilmak (signs and wonders) tih in duh ngei chuan ka ring! In chèkngel nge ngèl lo ka teh vena a ni ber e.

“Abela kha chhandam a nih in ring em?” tiin ka zàwt hmasa leh deuh kher a, confidence nei takin, “Ring e,” tiin min chhâng nghàl vat hlawm a; chutah le “… engnge kan la sawi cheu vang? Gideona thu te, Baraka thu te Hebrai 11:32 thu ka recite chhuah hmâ hmâin Thlarau dik tak, Pathian Lehkha Thuziak (Cf. Joh. 16:13) ngei  mai chuan an thinlung a tivâr ta hawk mai! Samsona kha Messia ze khelh làwkna (type) a nih thuah ka pakaipui zawr a; Kalvary-a misual pahnihte kârcheha khenbeha nèn an tinzàwn thiam ta! “Kan sawi puang ve ang,” an ti zui chùl mai! Hallelu Yah, Amen! A tawi nàa, rin phàk bàkin —a sei!

“Solomona pawh hi.. ?” tih zawhna ka pe zui! An ner!

Ka duhthawh leh hret.  “Pu Edenthara mahin Thuhriltute atangin —
Aw Lal Isua tel lo chuan
Khawvèl zawng hi,
Engmah lo mai a lo ni e

a ti ve asin lè!!” tiin!

Thil zir hrep tawh hnua FIAH chuang lo  a awm theih laiin; Thlarauvin hna a thawhnaah tak tak chuan sawi zawh hmâ hmâin an HARH lawi si a nih ber àwm hi!  Hnung thak, hiah phàk lek lek vehkual chiam chiam laia puitu tha neih a, min han dehsak sawr sawr mai hi zàwwwwng a dang zar zu nia! A thakna kiang (bul) hiah chhûng a rei fo thìn hian hun a heh!

“Pathian ngaihsak anna an nei ang a, nimahsela a thiltihtheihna chu an awih lo vang; chùng ang chu hawisan rawh. Chùng ang zînga mite chu inahte lùta sual rit phur hmeichhe à deuhte sala man thìntute kha an ni si, chutiang hmeichhiate chu châkna tinrênga hruai bo, zir fo sia thutak hre phàk ngai lo an ni. Tin, Jannia leh Jambrian Mosia an dodàl ang khân, chùng mite pawh chuan thutak hi an dodàl thìn; rilru chhe tawh, rinna kawngah chuan Pathian duh lohzâwng mi an ni. Nimahsela, chùng aliam chu an ti lo vang, an àtzia mi zawng zawng hnènah a lo lang dâwn si a, Jannia leh Jambria àtzia a lo lang ang khàn.”
II Timothea 3:6-8

tih thu Tirhkoh Paula’n Mosia leh Aarona Thilmak tih (Aigupta Hremna Hripui) dodàltute Jannia leh Jambria chungchâng (Exodus 7-10-a an hming lang èm si lo; thurochhiah atanga a hriat ni ngei tùr) a ziak hi a chìnchhuak tè atanga kan chîk chian chuan Pathian atanga Thilmak tih Dodàlna nèn a inkungkaih ru tlatin a lang. A timathlàwn lovin, “Pathian ngaihsak anna an nei ang a, nimahsela a thiltihtheihna chu an awih lo vang; chùng ang chu hawisan rawh,” tiin Timothea phei chu a fuih thuai mai! Timothea hming awmzia hi Pathian Ngaisângtu tihna a ni a —chu zet chuan Pathian Thilmak tih pawh a ngaisâng tel ngei bawk ang! Paula hian Aigupta Hripui rim nam hi a thai lang châk tel ve hle niin a lang lo maw?

Ngai teh, Mizoram Presbyterian Kohhran 2002 Nilai leh Beihrual Thupui by Revd. Chuauthuama ziak kan thlìrkìr leh chuan—Khatla Vènga a phùnglùng filawr deuhten January 11, 2002 khân MacDonald Hill, Aizâwl-a Campfire an neihah he Lehkhabu hi mei fawhkaiah an lo hmang hmanhmawh a . Mizorama Missionary Day champha lawm dànah chuan a mak dangdai pâwl tak a tling ta hial àwm e! Mahse, mipuiin eng thu nge inziak chiah tih hriat an chak letling ta! Lehkhabu pawhin chhut nawn nghàl vat a hlawh phah leh ta a ni.

Chhiar thiam rau rauvah Lehkhabu chhiar thiam leh chhiar thiam lo hi a awm theih a! Pangpârzu tlàn dùn rau rau —khuai leh maimawm thil siamchhuah (by-product) a inang lo tih hretute kan ni!

Kha Lehkhabu chhûng thua mite thinkhei deuh lai ni àwma langte (tùn tum kan Sermon Thupui kaihhnawih bìkah), —tlêm azâwng lo târlang ve ila :

* Tui, thisena chantîrkum tin June leh October thla inkârah Nile lui hnâr lam Ethiopia rama vûr a lo tui a; chu bàkah lui hnâr lam chhim lam ramah ruah nasa takin a sûr bawk thìn a. Chu chuan Nile lui tui tilianin a kam lei sen a rawn hrùt thla ta thìn a. Nile lui tui hi chutih lai hunah chuan a sen phût thîn a. Niin a chhun laia thlìr phei chuan thisen ang takin a lang thei thîn …. (Nilai Thupui, p. 14)

* Chungù puang Aigupta ramah … chungù hi a tamin a langsàr hle a. Nile lui tui len zawhah chungù a puang chiam thîn a ni … tùnlai thlengin Nile luikam chirhdùp hi chungù leh chaichîmte hian an ngeih èm avàngin an pun phah thìn nia ngai an awm a (Ibid, p. 16)

* Vaihmitè puangthosi hi Nile lui dung vèlah a tam hle thîn a. Nile lui len lai June atanga October thla vèlah hian a tam zual thîn … thosi puang tihbo chanchin pawh a lang chuang lo bawk (Ibid, p. 19)

* Tho puang hmànlai atangin  Aigupta ram hi tho leh rannung te reuh tè tè (insects) mi seh thei  tamna ram a ni thìn … tho chi hrang hrang hi Aigupta ramah hian a tam hle a. Chhim thlîin hmàr lam hawiin a hlawpin a rawn lèn phei thîn a. Hmun tinah an khat fo thîn a. In chhûngah te pawh lùtin mihring tân ninawm tak an ni … (Ibid, pp. 22-23)

* Ran hri lêngmi thiam thenkhat chuan hremna hmasa ber Nile lui tui tihbawlhhlawh atanga parukna, khawihli thleng hian thil inzawmna nei niin an ring a. Nile lui tui tihbawlhhlawh avàng khân sangha tam tak an thi a. Chumi avàng chuan chungùte pawh khawmualah an lo chhuak a. Sangha thi avàng khân ran hri (natna) a lo chhuak a. Chu ran hri chu tho chi hrang hrang kha sangha leh chungù thite atang khân ranah an pu darh a. Aigupta mite ran vulh chuan a tuar ta bìk angin an sawi a. Hei hi thil ni thei tak pawh a ni ang e. Pathian chuan hèng hremna chi hrang hrangte hi a indawt dàn tùr taka rem a thiam ngei ang tih ring ila … Israel-te kha hmun pakhat Gosen biala chèng bìk kha an ni a. Aigupta mite nèn an inchawhpawlh loh avângin ran hri lêng lakah pawh hian an him bîk niin a lang a… (Ibid, p. 26)

Ibid tih khi ibidem —Latin tawnga ‘a bu pângngaia mi tho,’ tihna a ni e. I fin belh leh ta!

Hlui ngâ —khawrh chhuah chin hi kìl rih phawt mai ila —kan chaw-kâ a tuia, lem a nawm viau tâk leh kan la khawrh belh zèl mai dâwn nia!

Aw le! Mipui thinlung hàn dai duk tawha lang chu Revd. Chuauthuama Lehkhabu ziak hian a rawn tiso-phûl ta!! Hâk fê fê leh lem lui hràm an awm; thap tia lem har ti an awm bawk. Engle khaw le, kan kìl hrim hrim hlawm zawng a ang! Hetiang Literature kan nei hi ka làwm thung a; LIBERALISM an ti nge, MODERNISM chi kuitiahna a nihna lam aiin, chumi laka kan lo inthiarfihlìm theihna tùra thàwtlâwkna hmanraw tangkai tak ni zâwkah ka ngai. Tin, mipui mimirina kan chhiar phàk ngai reng reng loh Lehkhabu pawimawh tam tak Zotawng ngeia kan chhiar theih phahna hi a hlû! Sèlna (demerit) lam a awm theih phawt chuan —fakna (merit) a haihchham bìk chuang na’ng! Tih tak èmah chuan Bible meuh pawh hian SUAL chanchin (thihpui loh khawp leh thihpui khawp) inziak a pai hnem teh asin!

Aigupta rama an pathian zawng zawngte chu an ro ka rèlsak ang; YAHWEH ka nih hi.
— Exodus 12:12

* Aigupta rama tuite thisena chantîr : Thilmak (Heb. mowpheth) hi zawng a mak! Finfiah thiam mai chi a ni lo, ‘a ni miau mai maw!’ tih vawng vawng mai chi a ni. Mowpheth hi leilung kalphung ang ni ta lova thil thleng a ni thung— (an effect produced in nature which is opposed to its laws, or such as its powers are inadequate to produce). Exodus 7:17-ah hian, “luia tuite hi ka han vua ang a…” tih a ni a; Exodus 7:19-ah thung chuan, “I tiang keng la….phar rawh…” tih a ni leh thung! A khaikhàwm ta mai rèng a, 7:20-ah chuan, “tiang chu a han lek a … luia tui chu a han vua a,” a ti ta! Châng 19-na hian a huap zau hle mai “…Aigupta ram tui chungah te, an lui chungah te, an lui tê chungah te, an dìl chungah te, an tui tlin khàwmna zawng zawng chungah te chuan… Aigupta ram chhûng zawng zawngah, thing kuangah te leh lung kuangah te chuan thisen a awm vek mai ang,” tih hi!

Lui kam—lei sen a rawn hrùt thlàk avànga Nile lui tui sen phût ringawt a nih tâk loh khi maw! Barne’s Note-ah chuan, “Ni sarih chhûng chiah a ni … hun danga a lui tui rawng a inthlàk hun chhûng chu khi aia rei, ni 20 vèl lai a nia sin,” a ti.

Mak dang rawn thual lehtu chu Aigupta magicians Jannia leh Jambria (II Tim. 3:8)-ten tui thisena an chantîr ve theihna TUI kha! Tui zawng zawng thisena a chan tawh hnua ti thei ve an ni si hi khawilai tui atangin nge thisen an chantîr tàk ve ang le? Ramri pâwn hreta mi em ni dâwn? POWER an nei sâng ve hle tihna pawh a ni thei ang e; mahse, Commentary thenkhatah chuan ti thei ve anga an inchhàlna mai angin an târlang. Thlìrkìr râlah chuan an tiangte pawh rûl (Heb. tannin)-ah an chantîr thei ve miau a—Aarona tiang rûla chang khàn a dawlh ta vek (cf. 7:12) hlawm mai pawh a!

Hetiang thil mak ràpthlàk tak kârah pawh hian Pathian Yahweh khawngaihna, ngilneihna leh zahngaihna kan hmu; 7:24-ah chuan, “Aigupta mi zawng zawngte chuan tui in atân lui kam vêlte chu an lai chiam a; lui tui chu an in thei si lo va,” a ti. Laih chhuah tùr an hmu a ni mai lo maw? “An hmu zo lo vang,” i ti a nih pawhin Aigupta rama mipui khati zozai —ni sarih leh zan sarih chhûng tui in tùr nei lote chunga an nunna kawltu kha Pathian nung Yahweh a ni tih hi!

June thla tàwp lam atanga thla thum awha Nile tuilianin hnàwl a len tel ngùk ngùk thin aleiah Nile lui tui a sen phût thìn ngei e —sanghaten an thih phah îkhâw si lo!  A lui tui lah IN TLÂK a ni reng tho si thîn (Cf. Wycliffe Bible Commentary). Nile lui tui, thisena chantîr a nih hun chhûng Bible-in ni sarih (7:25) a ti fel fai hmak.  ‘Lui hnâr atangin tui fîm a rawn luang zui leh ta,’ tih a inziak lo va; thisen lui kha tuiah a chang kîr leh ta thut a ni mai!

“Mipa lo piang apiang chu luiah in paih ang a, tin, hmeichhia apiang chu in humhim zêl tùr a ni,” tiin Pharaoa-a khân thupèk (edict) a chhuah a nih kha (Exodus 1:22), a sùtlehna kan hmu lo! ‘Lui (Heb. ye`or)’ tia a sawi khi Nile lui sawina bîk a ni. Hebrai nau piang mipa tawhphawt tihlum a, an paihna tùr (tùn lai khawvèl pawha lui sei ber, 4,130 mêl/6,645 Km; YMA No khat lek thisen pawh a ràpthlàk tham! Lui lian, thùk leh sei —khiti zozaia thisena a han fawk tawlh hlurh hlurh mai tùr chu!) Nile lui kha thisenah ngei a chang ve ta thung! He luiah hian alàwm Israel fate Aigupta sal ata hruaichhuaktu Mosia kha a nausen laia lâkchhuah a nih ni! Tih tak èmah chuan he lui hian Israel fate Kanaan ram pan tùr kha a dìpin a dang eih lo (Goshen hmun atanga khawthlang lamah luang miau hek!) Hebrai mipa-fa suatna thupèk khàn Lal Iesua rawn pianna tùrah pawi a khawih pha ta chuang lo kha—kan va nihlawh èm! Tin, Nile lui thisena chantîr leh Kum Sàng Lalrama Bàwkte Kùt hmang lote chungchâng tùr hian inlaichìnna a nei thùk hle (cf. Zakaria 14:18).

Mosia thilmak tih hmasak ber chu Tui, thisena chantìr a ni a—Messia Isua thilmak tih hmasak ber pawh Tui, uain-a chantìr a ni. Mosia tihah chuan thihna, lungngaihna leh tawrhna a thleng a; Messia tihah erawh chuan tlàkchham inchhawmdàwlna leh inphuhrùk hlimlàwmna a thleng thung!

Aigupta ram khu “Gift of the Nile (Nile Thilthlàwn- pek),” tiin Grik Historian Herodotus-a’n kum tina Nile luipui lian thìn denchhen khuan a phuah tih i hre chiang e. Kum 500 BC vèl khân a lo zuk tlawhchhuak tawh a; nipui a rawn thàwk dâwn laia Nile lui a len chiam thin laiin Aigupta mite chuan fakna hla sain, Nile lui pathian Osiris an tih chu an be bûng bûng thìn zu nia!

Nile lui lian chu thisen luang râpthlàk a ni ta! Finis Jennings Dake-a chuan Aigupta mite thil huat leh ngaitheih loh ber chu thisen (the Egyptians abhorred blood…) a nih thu  a ziak! Aigupta hian Khawvèl suahsualna a entîr a; sual tlanna thisen hlu pawh hi Misualpa (Setana) chuan a haw lo thei lo! Kalhlèn beràm no thisen pawh an kawngka biangtawn leh kawngka lu chunga tàt ngam chi an ni lo! Thisena chantîr a nih lai khân an pathian Orisis-a thiltihtheihna khawiahnge a awm?

Aigupta rama an pathian zawng zawngte chu an ro ka rèlsak ang; YAHWEH ka nih hi.
— Exodus 12:12

* Chungu puang : June-October inkâra Nile lui lian, a kuang a luan liam zawh apianga ninawm leh ngaimawh awm khawpin chungu a puang zui kum tin ta ziah em ni le? Sakei, savawm, keite-tea a lo hrem lo hi Pathian zahngaihna a lo ni! Chùngte chuan an seh hlum zawih zawih mai ang a; an hriatchhuah tùr hre hman lovin! Hripui pakhatna leh pahnihna hi Nile lui dung suartluan a ni a. A lui kam, leitha dum hlup mai thlaiin a ngeih èm èmte khu pathian biakin an be hial a, chu leitha dum chu Chemi an ti a; Aigupta-in a hmasâng hming a putna chhan a ni hial nghe nghe (Barne’s Notes).

“Chungu (Uchang) bùk tum ang mai!” an tih hi i hre fo tawh awm e; lehlamah han chhep fel teh mah se, lehlam siam that hlànin an lo sawt chhuak hman sup sup thìn ni àwmin an sawi! Aigupta ram sup sup tùr chu le! Chungu—rannung chimawm lo tak, hmangin a hrem ta! A sa ei ngai lote tân chuan an tenawm khawp ang! Lui dung maiah chèng ta hek lo! Chhuar tin, in kil chàwmpangkâr zawng zawngah an thaw hlui hlui a, an inbawh thuah lui lui a, an sawt mur mur a. An hràm sup sup a. A ràpte tân a ninawm ngawt ang le! Thu Puan 16:13-ah phei phei chuan chungu pathum lek pawh ninawm tham an tling a ni lo’m ni? Hla siamtu phei chuan —

Chungùte a tîr bawk a, chùng chuan anmahni a tiboral ta a (Sàm 78:45b) tiin leh
An ram chu chunguin a khat ta a, An lalte pindanah lam pawh (Sàm 105:30)
ti tea phuah hnan hial a lo ni ta! Lal Davida hian Aigupta rama hremna kha a pawm chiang a—a sawi dal dazàt lo hle!

Chungu hi han thlîr chiang ila; an awmna dìl leh a kam hnaivai bàk hi an pèl lo va. Inah a lùt zen zen lo! Chumi vèlah chuan an inchhek hlim ve a; an hràm ve duai duai a. Khaw hawi zîm, mahni phàk tàwka vawk lal lèn ve ngalh ngalhte nèn angkhat chauh an ni. Zo-hnahthlàk, Pàwl (Denominations) hrang hranga intihlimsâng tam tak te dinhmun nèn a inzùl khawp! Mahni Pâwl tukverh atang theuhva hawi chhuah leh Thutak thil zir belh hi kan mamawh ta! Self-style-a Laodikei Kohhran vek kan ang ta! Mahni Pâwl Thurin ngau ngau chuan kan inchàwm puar hrisèl zo ta lo ve!

Nia le, Lui kamah mai chuan tam pawh ni se, a la ziaawm e. Mutbu, chhang hmehna thlèng, thuk chhûng zawng zawngah chungù an inbilh heng hung si! Aigupta mite khawsak chenvawn zia leh an intuai hnùm thianghlimzia hriatpuitu tân chuan chungùte chu rûntu tenawm an chang ta! Lalber pindan thianghlim hlirh hlerh tak pawh khàr phui zawh a ni si lo! Chungu lû (head of frog) nei pathian hi Aigupta mite pathiannu Heka/Heqa an tih a ni miau mai le! Heka chu thilsiam lama thuneihna (creative power) neia an ngaih leh an zahpah èm èm a ni. An that thiang si lo! Tùn tumah zet zawng, an nin leh an tenah Heka chu a chang ta! Aigupta mite pathiannu leh an dawithiamte indona a thleng zui ta—Jannia leh Jambria-ten chungù an tipung thei ve e; mahse, an hnawt kiang thei ta lo!

Chungù an thi ta nghèk nghùk mai! A uih, a rimchhia—an chhèk vûm ta hnêr hnùr (cf. 8:13,14)! Chungu (Heka) chu Aigupta mite tân thil tenawmah a chang zo ta—tùnlai Aigupta hi 997,739 Sq. Km laia zau a ni a—hmâsâng Aigupta nèn la intiat tak maw, a ram pum boruak uihin a han tuam chhuak tak tak tùr chu! Heka biaa inpumpèk èm èm thìn Aigupta mipuite tihrehawmtu kha eng dang ni lovin, an pathiannu Heka ngei hi (hemi tumah hi chuan) a ni ta!

Chungu hi dìl tui tling leh hmun hnâwng, hmun dàm duk atangin an piang pung deuh ber a; Bung 8:3 i chhiar hian, ‘Luipui damkawr,’ ti ila—Nile lui tui atanga an rawn pung ta chiam hi a mak dangdaina a ni tih i hre mai ang!

Aigupta rama an pathian zawng
zawngte chu an ro ka rèlsak ang; YAHWEH ka nih hi.

— Exodus 12:12

* Vaihmitè puang : King James Version-ah hian lice (hrik) tiin a inziak a; mosquito-gnats (vaihmitè) a ni mah na le tiin Finis Jennings Dake-a chuan a bel a. Mizo Bible-ah thosi tih a ni. Kinnim (lice, hrik) tiin Josephus-a te, Talmud ziaktu Bochart, Pool-a te chuan an ngai. Aigupta  mite tawngin khennems an ti a; chu chu thosi tihna a nih thu Speaker’s Commentary, vol. i, p. 490-naah tàrlan a ni. He hremna hripui hi puanzàr làwk awm hran lova thleng a ni.

Mihring chungah leh sa chungah chuan thosi chu a awm ta mur mur a; Aigupta ram chhûng zawng zawnga leia vaivut zawng zawng chu thosiah a chang zo ta vek a (8:17b). Jannia leh Jambria-ten thosi an tipung ve thei ta hauh lo (cf. 8:18). Dawithiamte hian an theih bàk thil Pathian kutzungtanga tih a nih ngei an ring a; mahse, Pathian an tih hi elohim a ni a; Pathian Nung Yahweh a nih chiah an hre fak chuang lo! An dawivaih anga ti vein a hma lama thilmak tiha awm tawh te kha an lo ngai niin a lang!

Thosi tamna hi a nuam mawh. Ran takngial pawh hian an buai phah a ni. Galili Tuipui kamah khuan ka pa a riak tawh a —thosi an tam  thu a rawn hawn vî chum chum mai! “Nazareth Isua pawh kha an seh nasa ve ngei ang,” tia zèldinin —a lainat tlaikhawhnu hle!

Kan awmna Zoram (Tropical)-a thosi hi pung ni ta chiah se; an va inthlahchhàwng nasa dâwn tak èm! Kan awmna a tuidùlin a hnâwng tawp si! Ram ro Aiguptaa thosi puang hi tihrèm leh thu a inziak lo va; chu lam chu buaipui hah a tûl ber lo. Thosi (Theobaldia anulata) hi chi hrang (species) 2,500 vèl zet a awm a —yellow fever, malaria, filariasis leh dengue natnate thehdarhtu an ni. Thosi hi chi thum—Anopheles, Culex leh Aedes, hlàwm lian pui puia then theih an ni. Khaw vàwtah chuan thla engemaw zât chhûngin an puitling hman tàwk a; dàn narànin ni 10 chhûngin an puitling hman—an dam chhûng a rei lo.

Aigupta rama an pathian zawng
zawngte chu an ro ka rèlsak ang; YAHWEH ka nih hi.

— Exodus 12:12

* Tho puang & tihrèm vek : Ngaizam pawtawk thiam deuhte chuan tho puang ta chiam hi chungu thi uih rawn bâwmtu mai mai kha maw le an han ti thla zen ngawt a! Chungu thih chiam zawh chiaha tho tihpun a ni zui vat si lo hi chhùt chian a manhla! Gosen hmuna tho a han awm ve ta hauh lo mai te kha a mak danglam viau! Bung 8:31 hi chhiar liam mai mai phal chi a ni lo;  “Pharaoa hnèn ata leh, a chhiahhlawhte hnèn ata leh, a mite hnèn ata tho tam pui chu a tikiang ta a; pakhat mah a awm ta lo va,” tih thua, ‘pakhat mah a awm ta lo va,’ tih tak mai hi a mak leh ta riau zàwk awm e! Septuagint Bible letlingtute, (Aigupta ram ngeia chèngte) meuh pawhin thophurh (dog fly) niin an ngai a. A seh a nâ hlawr bîk a; a bìkin mitvuna a seh chu tawrh a har—Aigupta rama mit na hri a tam zual nachhanah an ngaih phah.

The Pulpit Commentary-ah phei chuan sephùng niin a sawi ve thung. Sephùng pianziaa duan an pathian, Chepra an tih hi Ni pathian RA tâna thianghlimah Aigupta miten an ngai a. Tho tam tak chuan ram chu a tichhe chiam a (8:24) tih thu pawh hi sephùngin Aigupta ram leilung leh thlai a nawr chhe taah an bel ve zu nia!

An zîngah tho tam tak a tîr a, chùng chuan anmahni a ei zo va; Chungùte a tîr bawk a, chùng chuan anmahni a tiboral ta a. (Sàm 78:45).

6157 `arob (aw-robe’); from OT: 6148; a mosquito (from its swarming):
KJV – divers sorts of flies, swarm.

Nia le! Hetiang hian i khaikhàwm teh ang le! Vaihmite, Tho, Thophurh, Sephùng pawh lo ni ta teh rèng se—insect an tih hnuaia mi vekah ngai ila. DDT, Goodknight, Samurai, Insecticide rèng rèng hman a ni lo! Hetiang rannung (insect)-te pathian hming Aigupta miten an vuah hi i hre tawh ngai em? Chùng insect pathian chu a mualpho a nih lehpek hi! Mipuite leh ranvulhte bawhbuaitu rannung lakah a mualpho let dèr a ni! Chu an rannung, tho pathian chu Beelzebub an ti! Tho vêng zo lo pathianah a chang ta! (Beelzebul hre chiang tùrin Matthaia 12:24,26 bih belh a manhla) Aigupta mite pawh hian pathian biakna an nei ve thîn—chùng hmunte chu an vawng fai èm èm a; mahse, tho pathian hian tho vêng sêng ta hek lo le!  Thovin a bawm khahna hmun chu hmun fai leh thianghlim a ni thei ta tlat lo!

He Hremna Palina atang hian Aigupta mite leh Israel mite thliar hran an lo ni tan ta!! Hemi atang hian Pathianin a hmangaihte a hliahkhuh ta bìk a ni!

Aigupta rama an pathian zawng
zawngte chu an ro ka rèlsak ang; YAHWEH ka nih hi.

— Exodus 12:12

Hremna pakhatna leh pahnihna kha thlìrkìr lehin—Nile luipui atanga rawn chhuak a ni a. I hriat angin Aigupta mite Tui-pathian chu Sebek a ni a; tui thisena chang ta mai leh lui tui atanga chungu rawn puang ta vak mai kha Sebek chuan a thunun phàk lohzia a lang chiang hle a ni. Tin, Nile chuanchunga an biak pathian; pathian dangte siamtu, mihring leh tuite siamtua Aigupta miten an ngaih Khnum pawhin a thiltihtheihna a hmang thei lo tih a lang chiang ta.

Hremna pathumna leh palina kan thlìrkìrin—khawmual vutdùr atangin thosi leh tho an rawn puang ta vak mai si a. Aigupta ram chuanhnuai pathian leh van-pathian (sky-god) nih fàwmkèmtu Horus an tih chu a thangtlâwm leh hle tih kan hriatpui bawk. Tin, vàn-pathiannu Hathor pawh eng ruai a ni ta lo!

Aigupta rama an pathian zawng
zawngte chu an ro ka rèlsak ang; YAHWEH ka nih hi.

— Exodus 12:12

* Ran hri lêng : Aigupta mite vàn-pathiannu kha Hathor a ni tih i hria—a hnuah chuan bàwngpui pathiannu (cow goddess) a ni zui an ti. Ran hri lêng a vêng zo meuh em? A va tlâwm chiang deuh ve?

Lui leh lui sa, khawmual leh rannung sîkhâw leh chimawm, ranvulh chi tin te … hripuiin a rawn tuam chho mek zêl! Tun tum zet chu bàwngchal an àwn ruah ruah a, meng tàl rulh rulh—lei seh, chilthli far hnàng zuihin an tlu khùr chur chur ta mai le! Ngaihtuah chiang rawh … bàwngchal hi an pathian Apis a nia sin! Sebàwngno thaukhawha lîm per per rual an thi ta chum chum mai bawk, chùng chu an pathian Mnevis an tih a ni asin! Hèng pathiante hi Israel fate pawh khàn an lo biakpui ve thìn a ni ngei ang—Kalhlèn hmasa ber atanga thla thum a vei lehin, Sinai Tlâng bulthutah Aaron-a hovin an lo be leh hmanhmawh tawh zu nia! Aigupta ram atang khân tisaa hruai chhuah mah ni se, Aigupta-na kha an thinlung chhûngril lamah erawh chuan an la pai nghet hle tih a lang chiang! Aigupta mite pathian rèng rèng chu an lu ramsa, rannung engemaw ber a ni thìn! Hetiang hian târlang ta mai ila—

Ptah (Apis) hi Memphis pathian, bàwngpa anga siam a ni. Amon, Thebes pathian, bàwngpui anga siam a ni. Mut, Amona nupui hi mulukawlh anga siam a ni. Horus, vàn pathian hi mute (falcon) anga siam a ni. Ra, ni pathian hi mu-ârla (hawk) anga siam a ni. Ser (Setana) Aigupta ram chhaklam pathian chu awle (alligator) anga siam a ni. Osiris, mitthite pathian chu kèl anga siam a ni a; Isis, Osiris-a nupui chu bàwngpui anga siam a ni. Thoth, finna pathian chu ngau (ape) anga siam a ni. Heka, pathiannu chu chungù anga siam a ni. Nechebt, chhimlam pathiannu chu rùlpui (serpent) anga siam a ni. Nile luipui hi serh thianghlim (sacred) a niin an ngai a. Bast, pathiannu chu zawhte anga siam a ni. Pathian tam tak an nei; Pharaoa-te pawh kha pathian, Ni pathian Ra-a fapaa ngaih an ni.

Eye of Horus (Horus-a Mit) an tih Osiris-a leh Isis-i te fapa niin an sawi a. Hospital-a Allopathic Doctor i ràwnin, prescription pad/slip tlar hmasaah Rx an ziak lo thei lo; chumi awmzia chu Horus-a (Aigupta mite Damna pathian) Mit kha an la chhawm ve zèl tih hria ang che.

Exodus 8:25-29 hi ngun lehzuala kan bihin, “Pharao-a naktùk” tih leh “Pathianin naktûk”” a tih kan khaikhinin Pharaoa rinawm lohna rawn inlâr chhuah zen laia Pathian rinawmna rawn lang kan hmu thung thîn! Chu mai a la ni lo, Pharaoa hian a chanvein thil a phal ve e—a kimchangin a remti ngai lo, tih hi! Rana inthawitîr a phalsak nain, Mosia a invèngthàwng. Ran rèng rèng Aigupta mite pathian ni deuh vek hèk (8:26 en chiang teh)! Mahse, ran thi khati zozai kha, mulukawlh, sihal leh chinghniaten an han ei tùr te kha suangtuah chiang la—an pathiante vek an ni si maw!

* Khawihli durh leu : He hremna hi Hremna pathumna anga thàwtlàwkna awm lova lèntîr a ni ve leh! Pathian hian a tih dàn kaida a thlàk ve zauh thìn! Thil mak ti ve thei ta lo va, a vei na ta hlei hlei leh zuau hmelchhe zualkai bìk te kha an dawithiamte an ni! He hremna-hripui atang hian dawivaihthiamte an râlbâng hlen ta hmak nghe nghe asin! Meivàp, vut (inting)—ui-hùm emaw vèl lek, khati tak maia Aigupta ram tuam chhuak hial khawpa nghawng nei thui kha mak lo ti dâwn mah ila—a mak BON TAWP!

Meivàp/inting an va thàmna hi rawhtuina mei (furnace) a ni a; hripui laka vênghimtu pathiana an neih Typhon-a thawi lungawi nân leh hripui a ben per (tlawlhtîr) theih nâna a nung chunga mihring an va thawi/hàlralna hmun a nih thu Finis Jennings Dake chuan a târlang. A va sàwt si lo èm!

He hremna atang hian Pharaoa’n mite thu sawi a ngaihthlàk duh loh thu kan hmuh laiin, Pathian Yahweh erawh chuan a mite dìlna leh ngenna a ùksàk thìn a; a Fapa pawh Sawipuitu (Advocate) rinawm a ni tih kan dap zau thei.

Aigupta rama an pathian zawng
zawngte chu an ro ka rèlsak ang; YAHWEH ka nih hi.

— Exodus 12:12

* Rialpui vàn-àwn : Hremna-hripui kârah Exodus 9:14,15 kan chhiarin Yahweh zahngaihna lian tak hi hmuh hmaih chi a ni lo! Châng 19-naah pawh, duhsakna a la lantîr thulh chuang lo! He rial sùr chiam hun hi barley seng hun tèp, Abib (Nisan) thla chho lai vèl a ni tih a chiang —Gosen an tih, Rameses an tih bawkah chuan rial a tla ve eih lo. Israel naupangte làwm tùr tham lek takngial pawh a tla lo!

Rial tla hian agriculture lam thil a dêng chhe nasa hle, barley (buhsanghar) seng theih lek lek tawha eng pup tawhte chu a dêng chhe vek a; wheat leh vaibuhtun a dêng chhe lo—“an la to hman loh vàngin” tiin Mizo Bible-ah kan nei. Mahse, hei hi a lehlin dàn a dik lo. A dik dàn tùr zàwk chu, “But the wheat and the rie were not smitten: for they were not grown up,” tih a ni zàwk a, “an la than puitlin loh avàngin,” tih a inhmeh zàwk.  ETZ HAYIM (Torah & Commentary)-ah chuan, “but the wheat and the emmer were not hurt, for they ripen late,” tih a ni; “an hmin hun a  tlai deuh vang,” a ni zàwk e. He rial tlàk atanga a kum leh, Abib thla rawn inkheh chhuak kha Saltângte chhuah hun tùr chu a ni tih a chiang ta! Chumi hun chu Josefa leh a chhûngte Aigupta rama an chènho tantirh atanga kum 400-na champhaphàk a nih thu hian lung a tilêng zual thìn.

Ruah chu sawi loh, rial phei phei chu Aigupta ramah hian a tla mawh teh asin! Cairo chhehvèlah khuan kum khatah ruah inchi 2 emaw a far ve fep a; Cairo chhim lamah phei khu chuan kum engemaw chhûng lai far khat èm pawh a far ngai loh châng a awm! He rial, thlipui leh mei hnûk tel kher kher hi zawng—a mak lulai èm lahtak a ni!

Rial rùm vung vung, khawpui ri fawk fàwn kal ruih ruih nèn—khaw’nge an vàn pathiannu Hathor-i leh vàn-pathian Horus-a thiltihtheihnate chu le? Thlipui pathian Seth-a khawiahnge a awm tàk bawk le? Hremna liam tawh zozaiah te khân Pharaoa’n Yahweh aw (voice of Yahweh) a hre mawh èm mai a—tùn tum atang meuh hi chuan a hre pawlawh mai mai dâwn ta lo!!

He hremna-hripui hi lei leh vàn indona ni berin Aigupta mite tàn chuan a ngaihtheih ang! Vàn lam thiltihtheihna tluchhe miau hek, thlai tharchhuah lama malsàwmna petu Osiris-a leh Isis-i te lahin an thlai leh thlaithar malsàwmna hualhim zo ta bawk si lo nèn! Tui-pathian Sebek-a lahin ruah tibâng thei hek suh! Lu a va han hai duh dâwn tak èm!

Aigupta rama an pathian zawng
zawngte chu an ro ka rèlsak ang; YAHWEH ka nih hi.

— Exodus 12:12

* Khaukhuap an puang : He hremna-hripui lentîr a nih dâwn hian thil chhinchhiahtlàk tak Yahweh-in Mosia a pe. “… i fa leh i fa fate benga Aigupta ram chunga thil ka tihzia leh, an zînga ka chhinchhiahnate ka tihzia hi i hrilh theihna tùrin … (Exodus 10:2)” tiin, thawnthu zuihral atân mai ni lo—inhrilh chhàwn zèl tùr atân a lo ruat a ni. A ti ta ngei a ni tih a chianna pawh Sam 78, 105 leh 106-ah te hlain an lo chawi nung chhawm a; hla rèng rèng chu hriat a tlovin a nghet a, thinlung chhûngril a zen thùk bìk bawk—hèng hripui hmâwrbàwkna chu Kalvary Tlâng a nihzia pawh chhui thiam tùra Thlarau Thianghlim pàwlna fing dawng diam tawh i ni e!

Rial, mei leh thlipui tihchhiat bàk kha—khaukhuap rual chuan an rawn màm fai leh ta puk mai! An tàmpui mitthi Mautàm ang a ni ve mai! Khaukhuap rual, dârkâr ½ tuanna ram hringtha pawh ni se; thlalèr ramro a chang thut mai zèl! Khati zozaia tam khaukhuap, pakhatmah hmaih lova Tuipui Sen, Pharaoa sipaite lemtu tùra khawthlang thliin a lèn lùt hmasa ta vek te kha a mak thlâwt zu nia! Anmahniin thlàwk thui thei mawlh hek lo, thliin a lènbo hi thil awihawm a tling. Khaukhuap chu insect zînga mi a nih i hai lo, insect pathian Aigupta mite hriat kha tunge? Dawl aia zawrin Beelzebul chu a tlâwm ta a nih hi! Milem-biakna sakhua rèng rèngah Tui, Mei, Lei leh Boruak te hi an thil biak hmachhuan lian tak te (objects of worship) a ni fo. Riala hremna hian chûng thil zawng zawngte chu a rawn hneh kim!

* Khaw-thim chhah : Hnial bawplawk hoten, “Àwkin ni a lem (solar eclipse),” an ti thla zen! Ni àwk lem rei zâwng hi ni thum chen chen a ni ngai lo. (Dàrkâr thum èm pawh àwkin ni a lem ngai bawk hek lo). “The sun was in eclipse [Àwkin ni a lem – Luke 23:44,” tiin Kalhlèn Ni—Isua an khenbeh nîa khaw thim kha The New English Bible -New Testament chuan zuk ziak teh ngawt bawk a. Thla bial laiin Àwkin nî a lem ngai lo tih hriat a manhla.)

Aigupta khaw thim hun lai khân zànah thla leh arsi pawh a lang eih lo tih a hriat mai! Ram khat rau rauvah pawh Gosen zawng a special leh ta bîk zak! Hei hi eng dang vàng mah ni lovin—Aigupta mite pathian ropui ber Ra, Ni-pathian chu lei leh vàn leh a chhûnga thil zawng zawng siamtu Elohim (Yahweh + Yahshua) chuan A hneh chiang a ni tihna a ni e. Aigupta lal Pharaoa ngei ngeite pawh kha Ni-fa niin an lo ngai thîn! Hèng hremna pakua laite hi “ZÀNAH (layil, lool,” ti te maiin Mosia chuan thumal pakhat, hausa takin a hlîng khàwm thiam!

Ngai teh, Aigupta, Babulon etc.,-te an tlâwm tawh. Rome leh a zungzâm pawh a tlâwm leh tèp ta  Hmàna Aigupta ziarâng aia hleihluak khân khawvèl pum pui hi singsak fel a ni thung tawh ang. Thu Puan 8:7-9:20 inkâr thu hi lo bih chiang ang che.

Lei leh vâna thuneihna zawng zawng a hnena pêka awm tawh Isua Krista leh chu thuneihna  Petu Yahweh chu fak leh chawimawiin awm mawlh rawh se. Thlipui leh tuifàwn pawhin A thu an awiha kha tunge? Thli tel lovin football a pump puar theih loh avàngin thli (boruak) tel lovin a khelh theih bawk hek loh tih hriat sa! Motor-tire a kehin emaw a thèp emaw-in—motor a tlàn thei hek lo! Thli tha (wind power) hrethiam rual kan ni. Tuikhuah (dam) atanga tui inkhawh chhuakin power a generate-na khawvèlah kan chèng ve ta! Ram changkàngte chuan tui atangin power an siam chhuak ta! Ram hnufuala chèngte pawhin tui thachakna hman tangkai kan mamawh ve tho!

Galili Tuipui-a Nazareth Isuan thlipui leh tuifàwn a lo hauh reh mai dàn kha ngaihtuah chìk teh. Power hrawmhrâw ber bera tùnlai khawvèlin a ngaihte chunga Thuneitu kha—i Lal leh Chhandamtu YAHSHUA MESSIA, Pathian Nung Fapa a ni!  Amen.

WELCOME!

Len luhna thlàkhlelhawm with great infatuation —
Advertisements

18 Responses

Subscribe to comments with RSS.

  1. hmingtea said, on December 7, 2009 at 9:13 pm

    I va’n hre ve le! Mizoram-ah hawng la, Revival Team siam la. Han sermon tak tak la —mipuiin an zui hul hul mai ang che. I hmin tam viau chuan vawksa zuarhoin an ngaithei lo leh che a ni vel ang a. Synod lai laiin an do leh si che emaw a ni ang a, te ka ti vel ta mai mai a. I hre ril e, a tak i pawh lohna pawh i thlen lohna chauhin a dang che niin ka hria.

  2. lalropuia said, on December 8, 2009 at 2:14 am

    Ka chhiar chhuak hman rih lo; mahse i lo tih theih ve zek hi, Goliatha chu chhandam a nih ka van ring chiah lo.

    • chawnghilh said, on December 8, 2009 at 2:43 am

      Goliath chu chhandam a nih loh hmel khawp reng a ni. Kan topic-ah hian Goliath pawh a lang lovin ka hria. SAMSON-a chungchang kan sawi zawk a, Hebrai 11 hi ‘Hall of Faith (Rinnaa Fak Hlawhte)’ tia sawi thin a ni a; chung zingah chuan SAMSONA a tel ve chiang a (11:32) —Goliath erawh chu ‘Hall of Faith’-ah a tel pha lo niin kan hria! I ring dik e.

  3. Zaia said, on December 8, 2009 at 9:21 am

    A ngaihnawm khawp mai. Ka chhiar chhuak dap, uluk takin. Kan Pathian hi engkim chunga thuneitu a ni tih a chiang lehzual e. Ka hriat belh hnem leh ta khawp mai.

    • chawnghilh said, on December 8, 2009 at 12:35 pm

      I rawn ‘feed-back’ hi ngaihnawm ka ti fe zawk —

      Hebrai 4:12 —Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thling phel hrang khawp hialin a chhun thei a,thinlunga ngaihtuah leh tumte hi a hre nghal thei a ni.

      A thlawnin Pathian Thu hi a kir let mai mai ngai lo zel chu a la nih hi! I rawn tichiang e.

  4. lalropuia said, on December 8, 2009 at 9:56 am

    Nia ka lo ziak sual palh a ni e, Samsona ka tihnaah min lo ngaihsak dawn nia.

    • chawnghilh said, on December 8, 2009 at 12:31 pm

      SAMSON-a chu chhandam a nih i ring lo a nih chuan —a hnuaia Bible chang tarlan hi chhiar ve ta la maw le —

      Hebrai 11:32 Tin, engnge ka la sawi cheu vang? Gideona thu te, Baraka thu te, Samsona thu te, Jephthaa thu te leh Davida thu te, Samuela thu te, zawlneiho thute hril ila, hunin mi daih dawn si lo va …

      Hall of Faith-ah Samsona a tel ve tih hre lo, Sunday School Superintendent hialte an awm ve tho bawk a; chuvanga SAMSON-a chanchin ngaihven chiang duh hi mi engemaw zat lai an awm phah alawm! You find a relevant answer from Hebrew 11:32. Thanks, Thomas!

      Mahse, sakhua hi a inang lo thei ve a, Judaism tan chuan New Testament chu rin loh theih tak a ni ve ang; thian rualho ka sawipuite erawh kha chu Protestant Church an ni a. Hebrai 11:32 an chhiarin an DISCERN thiam khawp hlawm e.

  5. Thara said, on December 8, 2009 at 5:37 pm

    Mahni inthat chhandam an ni lo ang tih chiang taka ziak a awm hlei nem!Thih dan a inang lo a,a then cancer, a then khawsik, a then accident! Chhandam hi thih chhanah a innghat lo an ti! Mahni inthat pawh thih chhan chi 1 a ni ve mai a!

    • chawnghilh said, on December 8, 2009 at 6:17 pm

      Samsona khan a dika dawkin suicide a commit hauh lo. A chak em em laia a tihhlum aia tam Philistine-ho kha a mitte tihdel a niha —a samte a bialnu-sakeiin a cheh chhumsak hnuah Pathian hnena a dil leh angin, Pathianin a dinthar leh a —tam zawkin hmelmate a thihchilh ta thung a nih kha. Suicide squad kan hriat hmasak pawl chu a ni mah na! Chutiang bawkin, Krista Isua pawh khan a dam laia a hneh theihte aia tam kha a thih hnua a thawhleh hnu hian a hneh tam ta zawk daih bawk a ni! Are you one of them Jesus saved?

  6. VaiVa said, on December 8, 2009 at 5:57 pm

    E… van ram kai leh kai loh tur lamah chuan sawipui ngaihna che ka hre lo. Amaherawhchu, i thil rawn chhawpchhuahte erawh kan tawng hi a lo rem khawm mawi theih hle mai tih min hriat nawntir awn awn mai!

  7. hmingtea said, on December 8, 2009 at 8:20 pm

    Samsona khuaah nimin leh a piah khan ka kal —kan awmna khaw piah chiah a ni.

  8. hmingtea said, on December 8, 2009 at 8:24 pm

    Samsona te khua hi tunah chuan khawpui lian ve tak —lawngchawlhna hmun nei khua a ni ve tawh. An bazar bul, sa dawrah chuan bawng-chekte pawh kan lei trhin. Mi chak khua a nih vang nge an sachekte pawh a chak bikin ka hria. Tin, rawtuai tin te leh tuai-thurte pawh an zuar ve trhin.

  9. wine cold said, on December 9, 2009 at 1:52 am

    Chu chu eng khua maw? Israel-a awmho lah hi…kan Mizopui-te hi i rawn ti leh ngawt thrin a.. UI RE IN NIH KHA!!! MANI HNAM PHATSAN HOOOOOOOO! JAK PAWH JAK LO MAW!

    • chawnghilh said, on December 9, 2009 at 2:16 am

      Wayne Cole Berlin’s Calling by Joe Ngurdawla (2nd Edition) ka lo kawl reng mai! Ka chhiar chiah lo nain —White House leh Washington DC vel ni awmin a thawnthu bul a intan ve. Mahse, Office hming hi chu a dik-hlel hret —Mizo thawnthu phuahah chuan an phuahna kar a hlat ve berna thawnthu a nih hmel —Tripura, Lucknow, France, Burma tih vel chu a hnaivai hret ang chu maw le!

  10. tetea7 said, on December 9, 2009 at 6:14 pm

    Hotupa, MAHNI INTHAT-te hi Chhandam (Saved) an nih i ring em? I thu leh hla ka lo nghak e.

    • chawnghilh said, on December 9, 2009 at 6:44 pm

      Mahnia inthat ka hriat chu Judas Iskariot a ni —’piang lo law law se a tan a tha zawk tur,” ti khan Isuan a comment hlak! Judas kha chhandamna kimchang chu a chang lo khawp ang! Samsona kha mahni inthat a ni lo! A hmelmate beiin a thihchilh a ni zawk e. Chhandamna hi chhawng thum —saved, being saved leh to be saved a ni a. A tluanchhuak a ngai! Saved ni tawh, kawnglaka ralthum leh ta a awm thin bawk. Entirna chiang tak chu, Joshua leh Kaleba-te kha an ni! Hebrai Lehkhathawn-ah pawh CAUTION namai lo ber chu rin lohna avanga ram luah lo te kha analogy atan a hmang nasa hle.

  11. Jaspi said, on December 13, 2009 at 11:58 pm

    E, Manhla hle mai a. Minutes 40 chhung ngawt ka’n chhiar chu. Ka chhiar uluk vang nge ni dawn, ka chhiar rei zek a. Hawrawp sual nge, ka hriat loh vang zawk nge ni dawn ni —a chung lamah khian Iesua tih a awm a, Isua ni awm tak ka ti a. Ka chhiar chipchiarin, hlawkpui tum ranin ka bih bawk a, ka hlawkpui takzet mai. Knowledge i ngahzia a lang chiang hlein ka hre bawk. Sources fel fai tak a i tarlang khian, chhiar a tinuam lehzual (rilru a dam bik). Kan Pathian thiltihtheih dan, engkim chunga roreltu leh thuneitu a nihzia a phawkchhuak nalh hle. Tin, ka hmuhchhuah leh ka hlawkpui zinga pakhat chu, Pathian hian hringfate hi han hrem thin mah se, a zahngaihna leh hmangaihna hian second 1 pawh a kalsan ngai chuang tlat lo hian, “hmangaih Pathian” a nihzia a tilang hlein ka hre bawk. Thanksssss!


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: