Chawnghilh's Blog

Engtik kum vèlah nge Messia a pian?

Posted in Qualitus : Habitus by chawnghilh on December 13, 2009

WELCOME!

Zàwlneite hrilhlàwkna thu a thlen dik theihna tùrin Nausên Isua kha 4 BC-a an lo ngaihchàn theihna chhan riau a awm —a intifèkfawn lehzualten Suria rama KuriniaGovernor a nih laia Census hun chhui kìrin 6 BC ni thei àwm anga sawi pawh a hlawh! Engle khaw le —6 BC leh 4 BC inkâra thil thleng chu a ni ngei mai!

Lal hnam Juda (Genesis 49:8-10)—an râwlthar Daniela leh a thian dang pathumte pawh Babulon saltànnaa hruaiin an awm ve a (Daniela 1:6). Harsatna leh hun khirh tam tak pal tlangin an hming tha hlawm hle. Zàwlnei Jeremia puanlàwk angin ‘kum 70′ chhûng (606-536 BC) saltànnaah hun an hmang a (Jeremia 25:11; 29:10; II Chro 36:21); khatia 534 BC-a Media Lalram a rawn indin tirha an Lal Kura thupèkin (Daniela 9:25 cf Nehemia 7:6) Jerusalem-ah Judate an kìr leh a. Thawh thumin an kìr a—an kìr tum hnihna 457 BC hi “Jerusalem tungding leh sa tha tùra thupèk chhuah (Nehemia 7:6),” kum a ni a; Bible zir chìk mite chuan an chhinchhiah ngun hle. Tehfung pawimawh tak teh tanna kum bi a nih miau avàngin! Chumi kum 457 BC atang chuan “hapta sarih leh hapta sawmrukpahnihah (Daniela 9:25),” Vàn atanga Pathian rawn tirh thlàk —hriakthih dawng tùr MESSIA chanchin sawilàwkin a awm a—chu ngei chu Jerusalem hmunthua Puithiam Sumeona pawhin chàn chhuah a lo tum fan fana kha (Luka 2:25-35) a ni!

Kum 457 BC atanga hapta sarih + hapta sawmrukpahnih chuan eng kum nge a han hawlh phàk tàk ang? Hapta 7 + hapta 62 belhkhàwm chuan hapta 69 a tluk a. Hapta tih awmzia hi pasarih tihna a ni. Chumi kalphung hisâp chuan hapta 69 chu kum 7-a puntìrin —kum 483 lai awh a lo ni a. Kum 457 BC atanga kumpui linglet vawi 483 rawn awm belh tùr chu awlsam zàwka hrethiam tùrin kum zawng zawng 483 atang chuan 457 figure chu minus (–) pawp ila, a paih-chhuah figure rawn ni ta chu kum AD lam chan tùr kum zàt figure a ni mai a ni.

Entîrnân, 483 – 457 = 26 or AD 26.

Julian leh Gregorian Calendar ringawt tehfunga hmang lovin—Bible hunbi tehna dik ber BIBLE CALENDAR kalphung angin hre ve zèl ila—kum AD 26 September leh Juda-te Calendar Anna Mundi 3787 Ethanim thla a inkhuangrual tih hre belh leh ila—kan ram pulpit thuchah ai chuan hmâ kan sàwn hrim hrim mai thei a ni! A Calendar pawh hmuh theih tùrin chhawp hial ila —a hnuaia mi ang hian :

Kum AD 26 bâwr vèlah Nazareth Isua kha a pa Pathian hriakthihna dawng a ni chiang a; tum hnih lai hriakthih a dawn record pawh tàrlan tùr a awm—Jordan luia baptisma a chan zawh veleh leh Hmêl awmze danglamna Tlâng-ah khân, “Hei hi ka fapa duh tak … Ama thu ngai rawh u,” tia nemnghehna àw chunglam atanga rawn chhuak kan hria a. Baptisma chantîr a nih hun lai kha Dr Luka chuan Nazareth Isua kum 30 vèl a nih thu a târlang chiang.

Chuti a nih chuan—kum AD 26 atanga kum 30 kan chhiar lètin AD lama kum 26 bàkah BC lama kum 4 a han ngai tel ta a. A tlângpuia sawi dàn hrim hrimah pawh 4 BC-ah Isua Krista a piang kan lo tih theih nachhan a ni hial. Hei hi Jentail pachal Luka pawhin a hre chiang a; tin, Israel mi Hmangaih Johana, Benjamin hnam Tirhkoh Paula-te pawhin an hre chiang hle a ni. Julian Calendar-a 4 BC leh Juda Calendar-a Anna Mundi 3757 a inrual tih hriat chian a pawi hauh lo bawk.

Juda-ho hian BC leh AD kan tih ang kalphung hian an tiri ve duh lo va; 1 BC leh 1 AD hi thuhmun a ni a; chuvàngin COMMON ERA (CE) an ti a. BC lam chan chu Before Christ ti duh lovin BEFORE COMMON ERA (BCE) an ti a; AD lamchan pawh CE tiin Common Era an ti thung. Adventist-ten ZERO (0 Year) —Mathematical lutuka an chhep hrang ang kher hi chu Kohhran dangte hi chuan an nei ve kher lo a ang bawk!

Paula chuan, “… a hun bì a lo kim khân fa nihna kan hmuh theih nân Dàn hnuaia  awmte chu tlan tùrin Pathianin a Fapa, hmeichhe hrin, Dàn hnuaia lo  piangin a tîr chhuak ta a.”Galatia 4:4, 5

Hmangaih Johana pawhin, “Thu chu tisaah a lo chang a; kan zîngah a rawn inbàwkte (tabernacled) ta,” a ti. — Johana 1:14

Luka hian Nazareth Isua aia thla ruka hrâm Baptistu Johana —a nu Elizabethi leh a pa Zakaria —Puithiam Group 24 awmte zinga a Group 8-na ABIJA PAWL-a mi (Luka 1:5 cf I Chronicles 24:7-18) a nih thu zawng zawng nèn a rawn târlang chipchiar bìk a; tin, Bethlehem-a Lal thar a pian zàn hi vûr sûr leh ruah tlàk loh hun lai, hun thengthaw nuam a la nihzia a lantîr chiang hle, “Tin, chumi ram vèkah chuan beràm vêngtute an awm a, zànah an beràmho an vêng a, phùlah an riahchilh a,” (Luka 2:8) tiin December thla tàwp vèl bâwr a nih lohzia a târlang thiam hle. Hmangaih Johana hian Palestina rama December hun lai leh Juda-te Hanukkah Kùt thlen lai, thlasìk hun a nih thu a hre chiang hle bawk a (cf. Johana 10:22). Nazareth Isua tak pawhin Palestina ram thlasik hrehawmzia a hre chiang tih chu, “Tin, in tlàn bo hun tùr chu thlasikah emaw, Sabbath-ah a lo thlen loh nân tawngtai rawh u,” (Matthaia 24:20) tiin a zirtîrte a chah chiang hle a. Palestina ram thlasik hi pâwnlèra chènga namnùl liam mai mai theih loh—beràmputen phùl hmuna an beràmte an riahchilh theih hun a ni tawh lo hrim hrim a —Mediterranean Type of Climate hre chiangte tân phei chuan RUAH leh VUR SUR a hleihluak zia hi hriat hmaih chi a ni lo. Hna hnuaihnunga inhlawhfa beràmpute chuan October thla chawhnu atang tawh hi chuan ruah leh vûr avàngin an beràmte a huangah an khalh khàwm tawh thìn a. Thâl khaw thiang (a kumleh March vèl)-a hlobet an chawrno hunah an inkhalh chhuak ve leh chauh thìn asin!

INVESTIGATION namai lo tak kan ngaihven belh zèl dâwn nia! Pathian Thuchah kan tàrlan hian JUDA-te ngêng a chhun phàk a ngai a—a ram neitu, an sik leh sâ hai hauh lo leh Messia hnàwltute hian Kristiana inchhâlte sawi leh hril dàn tlângpui atang hi chuan HARH CHHUAH PHAHNA tùr an nei lo hrim hrim a—an thu chhui dàn kalphunga kan chhui ve a ngaih phah ta a ni. Tih tak èmah chuan kan Pathian Thu thiamte pawhin, “December 25 hi Krista pian nî dik tak chu a ni lo,” an ti ngam ve tho a—chhui chian lehzual a phû èm a, a ninawm lo chin tàwk lek lekin kan chhui chiang bek bek zèl dâwn nia!

Thu-khaikhàwmna :  Paula’n ‘a hunbì a lo kim khân,’ a tih chiah pawh hi Daniela hrilhlàwkna ‘hapta sarih leh hapta sawmrukpahnih’ hun lai nangchìnga chàn fuh a ngai tih hriain puithiam Sumeona pawhin a hai lo —’a arsi’ hial pawh khawchhak mifingten a hun lai denchhen hian helhhawlh vei nâna hmangin an zui phah ruak ruak asin! Luka hian thlasik vìk zual lai hun a nih lohzia a tilang chiang a—Kaisara Awgusta pawhin chhiah chawitîr tùra Rome lalram awp chin khawvèl huapa a khualehtuite Chhiarpui a koh hi thlasik hun khirh lai bera a koh duh kan ring tlat dâwn em ni? General Election hun pawh hi sik leh sa khirhkhàn hun laia neih a ni ngai lo! Hun thengthaw nuam lai ber, vote thlàktu tâna chètchhuah a samkhai hun lai, an chuh tlângpui thìn asin!

Christmas Thuchah kan sawi dàn teh fo hi chu JEWISH-ho tân chuan awih ngaihna a awm lo reng a —THUDIK chu kan zawngchhuak hrim hrim ang. CHHUI BELH CHIAN ZEL A NI ANG …

ISUA PIAN han tih vèl hi a THUTHLUNG-HLUI hle; a pian atanga kum 33½-ah Kalvary Tlângah THUTHLUNG THAR a awm chauh va; “thisen chhuak lovin ngaihdamna rèng a awm lo!”

Lèn luhna thlàkhlelhawmte —

Advertisements

5 Responses

Subscribe to comments with RSS.

  1. mesjay said, on December 14, 2009 at 4:31 am

    In veng chu in va Krismas tawh bik ve!
    Isua pian hun hi chu NT en mai pawh hian thlasik vawh zual lai chu a nih loh hmel viau. A kum pawh hi —ni e… Mahse, pastor pakhat sawi, ‘Isua pian champha kan lawm a ni kher lo, a pian kan lawm a ni zawk,’ tih hi a pawm a nuam tho mai —ka ngaihdanin.

  2. hmingtea said, on December 14, 2009 at 8:23 pm

    A mak ka tih ve mai mai chu Alexander-a Isua hmaa mite pian nite hriat a ni si a; tin, Gautam Buddha te Isua pian ni leh thla hriat loh top mai hi mak ka ti ve tlat!

    • chawnghilh said, on December 14, 2009 at 8:29 pm

      Isua Krista (Yahshua Messia) pian thla leh tarik hi a hriat theih teh mai asin! Mahse, a ni dik lova A piancham pha phak hman kan duh tlat zawk avangin thutak hre thar leh turin http://www.chawnghilh.wordpress.com -a Bible tlawhchhana thu ziak kan thlir zui a ngai ta a ni mai!

  3. lalropuia said, on December 15, 2009 at 3:14 am

    Ka hre bik lo?


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: