Chawnghilh's Blog

Khawchhak Mifing 3 nge 12?

Posted in Qualitus : Habitus by chawnghilh on December 15, 2009

WELCOME!

Khawchhak mi fingte kha sàptawngin ‘MAGI (mei-zai) an ti a; a pian zàna ran-thlêng rawn thleng an ni ve lo! Matthaia hian khawchhak mifingte chanchin hi a lo record ve thung a. Herod the Great (37BC-4BC)-a hun lai a nih thu a ziak a. Lehkhabu atanga inchhiar harh an ni hran lo; chunglam Arsi chhuiin Judate Lal chibai bùk (worship) tùrin (a birthday làwm tùr ni lovin), an rawn pèn chhuak a ni zâwk bawk. Hêng mite hian Mika 5 an chhiar lo tih a lang. Heroda pawhin a lo chhiar hran bîk lo tih a hriat! Puithiam lalte leh Lehkhaziaktute erawh chuan an lo chhiar ngei e—an hre vei zawl. Ka kua nàzawngte hriatna dik nazawng pawh hi ngaihtuah uluk a lo ngai fû mai!

Lal Heroda tawngkam atang hian nausên buchip a ngaihven lo; naute hrâm (Grik : paidion [nausên ‘brephos’ ni lovin]) chanchin leh a awmna a ngaihven tawh zâwk tih man chiang ang che (Matthaia 2:8). Lal thar chu chibai verther hlan a duh a ni (Cf. Thu Puan 12:1-5)!

Tin, thilmak ropui tak vànah a lo lang ta a; hmeichhia nîa inthuam, a ke  hnuaia thla awm, arsi sàwm leh pahniha siam lallukhum khum a lo awm a;  ani chuan nau a pai a; nau vei nâin a sahràm a. Tin, thilmak dang vànah a lo lang leh a; ngai teh, dragon sen lian pui, lu  sarih leh ki sàwm nei, lallukhum pasarih khum a lo awm a.  A mei chuan vàn arsi hmun thuma thena hmun khat chu a hnùk a, leiah a paih  thla ta a; tin, a hrin huna a nau chu a lem theih nân dragon chu hmeichhe  nau hring tùr hmâah chuan a ding reng a. Tin, fapa, hnam zawng zawng chunga thîrtianga rorêl tùr a hring a; tin, a fa chu Pathian hnènah leh a lalthutphahah chuan làk chhohvin a awm ta a.

Khawchhak mifingte khàn Arsi an zui chhunzawm zèl a. Beràmpute chanchin kha chu hun liam tawha mi an ni daih! In chhûngah (ran thlèngah ni tawh lovin) naute leh a nu Mari an va hmu ta! Josefa pawh a lo awm hran lo (cf. Matt. 2:11). In chhûng luah ve thei tawh an nih awmzia hi Nau piang kha a lo berah pawh ni 40 aia upa;  Jerusalem Temple-a Puithiam Sumeoana’n Pathian hnèna a hlan fel diam tawh—a nu Mari pawh inthian thianghlim thlap tawh a nihzia a lang chiang.

Mi fingte khàn dap chawp taka hruaitu Chunglam Ârsi zuiin Judate Lal thar kha an zawng hmu a; zawn dân kaida inchen ta lo mah se—Pathian Lehkhathu ang zêlin mi fingten kawngkal dik leh fîmkhur takin kan la zawng hmu zui zêl zawng a nih hi!

Tin, khawchhak-mifingte rawn tel ve hian Jentail leh Juda-ten Isua an biak (worship) ve vena a hawi chiang ta a; chanchin ngaihnawm tak a tling. Khawchhak Kohhran (Grik Orthodox) chuan mifingte kha 12 lai a nih an ring thîn; Khawthlang Kohhran (Roman Catholic) chuan thilpêk chi thum—ràngkachak, beraw, murra-te denchhen khân mifing pathum angah an hmehbel hlen phah ta! Kum zabi 8-na atang phei kha chuan an lehkhabu Excerpta latina barbari-ah Arabia lal Balthasar, Persia lal Melchior, India lal Gaspar ni ang hialin an bel nghet zui ta bawk! Protestant Kohhrante rawn pianchhuahna kha Roman Catholic Church a ni miau va—an ziarâng leh kalphung an in-copy chak hle.

Naute kha Aigupta rama tlànbopui a ngaih miau avâng khân, thilpèk an dawnte pawh kha Aigupta rama an chàm chhûnga an nunkhaw inhaivùr nâna thil hlu leh tangkai tùrah ngai ila. Kum 1,500 zet liam taa Mosia hova Israel faten Ramtiam Kanaan an rawn panna kawng ngaiah ngei khân Josefa te nupa chuan an Fapa chu an tlàn thlâkpui ve ta thung si hian lung a tilêng zual duh hle mai! He an tlànchhiat hun lai hi thlasik vawh tawpkhawk lai emaw ni dâwn le? —Matthaia 24-ah khân tlànchhiat hun atân Sabbath leh thlasik hi Isuan a mite a duhsakpui loh hle thu kan hmu. Palestina rama thlasik vûr leh ruah chu palzam har Isuan a ti ve bawk niin a lang.

Tin, he an tlànchhiat lai chanchin tihngaihnawm nâna ‘Bethlehem Titi’ thawnthu phuahchawp Rev. Challiana (L) lehlin kha pulpit atanga thlarau mite chàwm nân taka ‘Dumaka leh Tita,’ ti duah hluah hluaha sermon thlâk chi a ni lo tih hre ta bawk ila, a tha ang e.

“A pian nî hi khawvêlin a hre lo,” tih mai mai te hi a fuh lo—a pian nî an hriat chian èm avàngin a serh pawh ni riatnaah chat an tan thei a. Fatìr hlan a nih nî leh a nû inthen fai nî pawh Puithiam Sumeona leh hmeithai rinawm Anna-i te hriatpuia tih ngei a nih thu Jentail mi Dr Luka zàwk zàwk pawhin a târlang thei. Jerusalem Temple record-ah  a inziak chiang hle ang; mahse, AD 70-a Rom sipaiten Temple an hàl a, an kar chim chhiat aleiah an record a bo ta tih zawng kan zèldin ve thei. Mahse, Isua âwm nghènga thle phei Hmangaih Johana’n Isua BIOGRAPHY hi a hriat kim loh i ring em ni?

Tu emaw chuan, “Isua pian ni chiah hi hriat a ni lo. Krismas nî atâna December ni 25 hmang hmasa bertute chu Rom Kohhran a ni. He nî hi Krismas nî atâna an thlan chhan chu ring lote rin dàn dodâlna hmanruaa hman an duh vâng a ni pakhat. Ring loten December 25 hi an pathian ‘Felna Nî’ an tih pian nia ngaiin ropui takin an làwm thìn a. Chu nî December 25, chu Isua pian nî atân an ruat ve ta a ni. Kum 353-ah Rom-ah hman tan a ni a, chuta tangin hmun hrang hrangah an hmang ve ta zèl a ni. Constantinople-ah chuan kum 378-ah an hmang tan. Alexandria khuaah chuan kum 400-ah an hmang tan. He nî hi Isua pian lawmna nî a nih avângin hlim takin an hmang thîn. Krismas hun hi Kristiante hun hlimawm ber a ni,” tiin (Kohhran Hmasa Chanchin, AD 1 – AD 500, Rev. Lalchhuanliana, pp. 92, 93 : ATC Publication 1979).

Mohammed, Guru Nanak, Krishna, etc., sakhaw hruaitute birthday pawh kan hre thei a: kan rama Sorkâr hna thawkte chuan holiday atân hial pawh an hmang—birthday dik hi an chhuti phah ni ngei pawhin a lang. Lal Isua birthday tia Christmas December 25-a an chàwl kher kher erawh hi chu ringtu tak tak tân chuan thlèk chìk deuh chu a ngai.

Birthday Lawm hi ringlo-mite tih dân a lo nih bûng bûng avàng zàwkin hèngte hi bih chiang leh ta ila — Genesis 40:20 Pharoa pianchamphaphàk lawmnaah inkhaihlumna (châng 22)-naah kan hmu. Marka 6:21-ah Heroda pianchamphaphâk lawmnaah Baptistu Johana lû tansak a ni. Pianchamphaphâk làwmtu Bible-in min record-sakte hi RINGTUTE an ni ngai lo.

Zàwlnei Jeremia ve thung chuan, “Ka pian chhuah nî chu ànchhedawngin awm rawh se, ka nuin mi hrin nî chu malsàwmin awm suh se. Ka pa hnêna, “Fapa i nei ta e,” tih thu rawn thlena, rawn tilàwmtu chu ànchhedawngin awm rawh se,” (Jeremia 20:14,15) a lo ti ve thung. Joba, mi fel—a fel èm èmna atanga fel belhchhaha pawhin, “Ka pian ni chu boral rawh se …” (Joba 3:3) a ti ve. A pian nî ànchhiaa lawhtu ve tho a lo ni (cf. Joba 3:1)! Engnge zir tùr kan neih tâk le? An piancham ni dik, an hriat chian ngei ngei pawh ànchhia an lo lawh ngam! “Happy Birthday to you … Happy Birthday to Job … Happy birthday to Jeremiah …” tih hla chu bati chhêm hlum pah leh cake ei îtawm tak dawm lerh lerh paha an sakho loh hmèl hle! Chunglam hrin, pian nawnna nî (pianthar) a pawimawh fê zâwk!

Christmas Tree! Mistletoe cheimawi nên …. rawng hring, a sena chawih …. Christmas Color —mit la tak mai nên, balloon thlàwk thei, a mùm … a sàwl —a sei chi … rawng chi hrang hrang naupangten an tleipui tan leh ta! Forest ngâwa fâr-tang hlawi ru an awm leh ta bawk! In kil tinah Santa Claus lim leh a lem a inhûng! American cartoonist, German rama piang, Thomas Nast (1840-1902)-a cartoon lem  (kum AD 1822-a Clement Moore-a hla phuah atanga Santa Claus lem hi duan) siam mai maiin lung a tilêng ta em ni? USA-a Democratic Party symbol (sabengtung) leh Republican Party symbol (sai), America rama duangtu khu amah Nast-a vèk hi alàwm. Middle Age (AD 1500 vêl atang khân) Europe-ah chuan Saint Nicholas kha thilpêk symbol-a an neih thin a ni a; mahse, USA-ah chuan Santa Claus (Masi Putar) hian Saint Nicholas chu a lo luahlàn hlen ta … in meikhuchhuaha a rawn luh nghàk zo ngang lovin, in kawngkapui ngei … Lal Isuan a kik a kik —in hawn theih si lovah khân in la lût ta si a ni lo’m ni?

Rev. Edwin Rowlands (Zosâpthara) hovin tûna Synod Press, Mission Vêng, Aizâwl-ah kum AD 1905 atang khân CHRISTMAS an lo hmang tan a. Chumi hun atanga kum 100 a pelh felah MASI chanchin kan zir chiang ve ta deuh a nih ber hi! Christmas Tree chungchângah hian Pathian Lehkhathu chuan Zàwlnei Jeremia hmangin thing cheimawi thin chu “Milem be mite awm dân (way of the heathen)” a ti. Jeremia 10:3, 4 bih ngei ang che. Chutah chuan “Hnamte awm dân zir suh u …” tih ziak i hmu ang. Heta “Hnamte” tih hi  Hebrai-ho chuan goyim an ti a; sâptawngin nations, heathens — ‘milem be hnam, hnamte,’ tihna a ni e. Zàwlnei Jeremia khàn milem be hnamte thil chìn thin ang zir tûrin emaw, chhawm nung tûrin min chah lo!

Hei hi han chhiar teh mah —

Ramhnuaiah thing an kit a,
Hreipuia mi themthiam kutin chei a ni
Tangkarua leh ràngkachakin an chei a,
A chêt loh nân thìrkilhna leh tubohvin an kilh a….

ti meuhvin Jeremia 10:3, 4-ah ziak a ni. Tùnlaia Kristian-a inchhâlten MILEM BE MITE nungchang diak diak vek kan lo chhawm zo ta! Zàwlnei Ezekiela chuan, “hmeichhiate Tammuz ngaia tapin an thu a,” (Ezekiela 8:14) a la ti ta deuh deuh. December 25 ngaiin a kûr bâng thei lo ve tho em? Jeremia 7:18-ah chuan, “Naupangten thing an fawm a, an paten mei an chhêm a, hmeichhiaten vàn lalnu hnêna hlan tùr chhang an hmet a, pathian dangte tân in tùr thilhlan an hûng chhuak a, mi tihthinrimna mai tùrin….” tih thu kan nun leh chètze mil ve tho kan hmu ta a nih si hi!

Vân Lalfapa a rawn pian chhan dik tak aiin Milem be hnamte awm dân leh tih dânphung, Pathian YAHWEH tenzâwng leh duhlohzâwng lamah hlîr kan pêng bo zo ve ta em ni? Mahni nuam tihzâwng zâwngah kan tlu pil ve mêk ta a ni ber lo maw? Inbih chiang nawn ngam tûrin hèng hi han rawlh lawk ila—

Messia rawn PIAN CHHAN ber kha kan hria em? Khawvêla a lo kal chhan kha kan hre phal bawk em?

Hun dang atân TOPIC inchhawpah kan hmang leh dâwn nia! I chhiar chhuah peih avàngin ka làwm e. Ethanim 15, 3757 Anna Mundi kha September 14, 4 BC (Sabbath) niin a lang, Juda-ho Calendar hi han click keuh teh!

WELCOME!

Lèn luhna thlàkhlelhawmte —
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: