Chawnghilh's Blog

Comics —very comical!

Posted in Qualitus : Habitus by chawnghilh on December 16, 2009

WELCOME!

 

Saptawng thumal pakhat MNEMONIC hmangin i sawi kai teh ang. MLJ … MLJ Comics i chhiar ngai em?

Maurice Coyne, Louis Silberkleit, John L. Goldwater tihna a ni. He mite pathum hian Archie Comics an din. Voice box-ah capital letters vek an hmang thìn. Archie Andrews, Betty Cooper, Veronica Lodge, Reggie Mantle leh Forsythe Jughead-te nèn fiamthu kan inchansemna bu a ni. An artist kha Montana a ni a; a thawnthu phuahtu erawh chu Vic Bloom a ni. 1941 December 22 khân a bu hmasa ber an chhuah. America rama an comics a ni.

FREW a rawn piang ve leh ta. 1948 September 9 khân PHANTOM-a comics ngei mai! Australia lam chhuak a ni a, FREW awmzia hi Ron Forsyth, Jim Richardson, Jack Eisen leh Peter Watson-a te surname hming bul hawrawb làwrkhawm a ni. Phantom-a Comics ka àtchilh lai chuan Phantoma beng awm miah lova a lukhim a khim thìn kha ka ngaimawh thei hle; Punjabi-ho an turban-a an beng an han tuam phui tlatte hi ka ngaimawh thìn, ka beng hriatna hi a hriam lo va, sol-fa leh zai lam pawh ka thiam loh phah rèng a ni.

Hal Foster-a’n duhtàwka Tarzan lem a siam thinte kha milem siam ka zirna bu a ni. A thawnthu tak erawh hi chu Edgar Rice Burroughs-a phuah a ni. Kum 1931 March 15 khân a hmelhmang hmuh hmasa ber, comics bu ang pawh ni chiah lovin Rex Maxon-a’n a chhuah.

The Adventure of Tin Tin leh a Snowy-te hi Belgian artist Herge (Heorges Remi-a) ziak a ni. An comics-a ram hrang hrang chanchin thawi làwk hmasain ram hrang hrang nungchang leh chezia an hre hneh vek, a hautak na’ngiang. France leh Belgium atanga zung rawn inkaih a ni. Tawng hrang 50-a lehlin, 200 maktaduai copy an siam chhuak thei. London-ah Tin Tin Shop a awm hial.

Albert Uderzo, milem siam thiam chungchuang leh mî dulthuar dèk za thiam Rene Goscinny (French Editor, Author, humorist)-ten Asterix an rawn siam chhuak a; mi inkawp fuh ber an ni hial. Goscinny kha kutbêng takmeuhva USA-a zuang lùt a ni; he Juda pa hian ngawrh takin a bei a; mî hnam nunzia a va han cheibâwl nuihzàtthlàk huatthlala lo thiam lawi si èm! Kum 22 chhûng ziaktu hlawhtling a ni. Paris lam atanga rawn inchherchhuak an ni thung.

USA atangin MAD a rawn chhuak—1952 khân Harvey Kurtzman-a a rawn che ta. MAD mascot atân Alfred E. Neuman an hmang a; a hmêl a hlim siu seu thei hle. Thawhpui tha a chhar thiam a—Wally Wood, Will Elder, Jack Davis leh John Severin—hèngho hian lemziak an lo thiam na’ngiang bawk a. Lemziak thiam dang dangten an rawn tawiàwm chho belh zèl bawk a. A hlawhtling na’ngiang.

SPIDERMAN pawh August 1962 khan a rawn piang ve ta! Stiv Dikto kha artist a ni a; a thawnthu duangtu erawh chu Stan Lee a ni. Marvel Comics tihchhuah a ni. SUPERMAN te, IRONMAN, Wonder Women, Snake Woman …. kan sawi kim seng rih lo vang. “Good writings and fresh ideas …. VIRGIN, Bangalore-a mite pawhin Comics an tichhuak nasa bawk a, artist 50 leh ziak-mi an chhawr nasa hle. Indian Culture tihmasàwntu atân Comics hi an hmang tangkai thiam. Ramayan Reborn tih pawh a hlàwk tham.

India ramah pawh Amar Chitra Katha, 1967 atangin comics 400 chuang, tawng 20-a lehlin, Maktaduai 90 chuang chuanga zawrh chhuah a hlawh.

Comics hi naupang tân emaw kan ti ngawt tùr a ni lo, puitling hlei hlei hian kan làwm. Kei phei chu silai tak tak aiin silai lem hi ka la làwm zàwk. Tom and Jerry-te pawh hi Palestinian Arafata lawm ber—a lawm àwm rèng pawh a ni. Tom & Jerry kalphung khan politics a khel hial ni te pawhin ka hre thin.

Kan Mizoram-ah hian mi Comics siamsa voice box thiat ruak a, hnawh khah chawp ang hi chu chuti teh vakah ka ngai lo. Mahnî thai thaia thaite hi ka ngaisâng; mahse, art school chhuak lo na nà nàte pencil hnuh hnùhmâ erawh hi chu a phuai deuh. R. K. Laxman-a te pencil hnùhmâ hi chu dang tak a la ni. Tin, America rama Thomas Nast-a pawh kha a namai lo hle —Santa Claus a siam phei hi chu ringtu intiten kan be urhsùn ta viau ni pawhin a lang e.

Stencil mai mai hman hun laia U Hmangaiha (Hrangaia fapa), Chhîngdailova Hnamte-te sùlhnu khàn ka mit an tlung khawp. Tùnlai hian Dialogue hi kan duhàm lutuk a, milem kan ziak thiam tàwk loh vàng a ang. A lemin thui tak a hril tùr a ni zàwk. SUDDEN MUANGA by Laisaizawk kha a pencil hnuhma a nalh vak lo nain, a caricature kha a ril phian mai a. Don Quixote chi khat a ni ber a. Tawng thar Dictionary a ni a; MAL-te ai mahin tawng a vawng khawl hnem zawk emaw chu aw ka ti. A awlsam dàn berah chuan Technology lamah kan hniam chhe tawh lo bawk a; PHOTO ROMANCE ang chia siam mai a har tawh miah lo a nia!

Comics a nih angin Comedy rawngkai a ni bawk tùr a ni. Lo ngeiawm deuh mah se, a lem talin min dèk nui rawh se! Thil kan sawisel tam ang hu erawh hi chuan hma kan sawn chak lo. Professional touch leh mahni tih tiha tih ve hi chu thlek chian a indawl hleih zel a. Kan rama lehkhabute pawh hi BENG TLAI, MIT erawh titlai riau ka la hmu hran lo. Kan Calendar-te chen hian thla khat chhung zaka a ngai tar tur kan nih avangin thlalak frame mawi lehzual hi chu kan nei thei ve thovin ka ring. Cobalt Therapy khawl chhia thla khat chhung banga kan han khaite kha chu Cancer ka vei hman thuak a ni.

ZO COMICS pawh a rawn awm ta a; artist ni chiah lo—a lem ziaktu chu in awm ve nual niin a lang. Tuichawi KIMA pawh a lang tel ve a, thil mi hriatchhuahtir, Primary School Examination-ah ‘tuichawi lem’ ziak tur a ni a, Zoram chhunga kan khawsak dan theuh hriat chian nan a tha khawp—khawthlang lama naupangten kawlaw bel kawnga pawm bet an draw a, khawpuia miten khawnvartui tin leh baltin an kawhtir a, thingtlanga miten tuium an phurhtir thung a; mark petu tur tan pawh endik a chakawm khawp chuan ka ring. Kan naupan laia mi a ni a; in hre pha ve lo. Mizo in lemte pawh tlema cartoon rawngkai, thuk, kailawn, sumhmun, tuium hmun tichiang tur deuhte pawhin ziak thiam an la awm ang. Chhura in rawn lang hi a box tinah a dang deuh zelte hi chik chian atan a tha. CBI pawn an chhui fuh thei lo vang e. Folk Tales lah kan ngah, COMICS kan siam thei.

Ka thianpa Colonel GK Rai chu NEHU hnuaiah folk tales a zir leh mek. Ralbei mite hian mi hnam thawnthu atanga mite kawm thiam dan an lo zir nasa mai. Mizo thalaite hi zai reng nih ai chuan lemziak reng ni ta zawk ila; kan la lut hnem zawk lo’ng maw!

WELCOME!   

Lèn luhna thlàkhlelhawmte   

Advertisements

23 Responses

Subscribe to comments with RSS.

  1. hmingtea said, on December 16, 2009 at 6:27 pm

    Bengvarthlak hle mai, kan tih ve theih awm tih tumna tak tak kan neih hma chuan a sawitu ka a kham thlawn mai tih hi kan la ni zel rih hi maw! Mite tihsa rin hi kan thiam tawkah kan la ngaih chhung chuan hma kan sawn dawn lo zawng a nih hi!

  2. Kima said, on December 18, 2009 at 6:09 pm

    HAHAHAHA Pu Chawnghilh, ka smiley duh ber ka image directory atangin natinge i hot-link? 😀 Khimi smiley buh lauh lauh lai khi right click la, “copy source” ti la, ka photobucket link (seraphicalrage) a rawn lang kiau mai ang. Kan man chiang lutuk che 😀

    But its ok. Pawilo reng reng. 🙂

    Khi lo pawh ka smiley dang i hot-link nual 😀

    • chawnghilh said, on December 18, 2009 at 8:36 pm

      Ka blog i va tlawh khat awm bik! “Engtikah nge i rawn hmuh ve teh nawlh ang aw?” tiin ka lo ngaichang rei tawh lutuk! Thil inruksaka thuhruk bo chi ni bek lo le! I nei nalh vei em atin a ni, ka lawm e.

      • Kima said, on December 19, 2009 at 9:20 pm

        I blog update te chu ka check zing eeee. Mizo zingah update regualer ber i ni ang. Mahse misual.com a “latest blog update” ka update dawn chauhvin i blog chu “DIRECT” in ka tlawh (permalink ka copy duh avangin). Ka update dawn loh chuan ka feed aggregator (bloglines) atangin i update zawng zawng chu ka chhiar ziah a lawm. Mahse tah chuan hetiang ang smileys ho hi a lang ve lova.

  3. VaiVa said, on December 19, 2009 at 10:15 am

    Very comical… he he! Sandman-a lem i rawn hmang hian a ti-comic lehzual a 😀 Sudden Muanga hi chu Mizo Comic bu ka chhiar veah chuan a la nuihzatthlak ber awm e! Me think 😛

  4. alexxfender said, on December 19, 2009 at 4:01 pm

    Thra hle mai.. a thram pawh i thram khawm tam hman hle mai.

  5. mesjay said, on December 21, 2009 at 4:25 am

    Very intersting info & suggestions. Mizo artist hovin rawn ti zel se a that hmel hle.

    Kei pawh comics thenkhat hi chu ka la lawm reng, Calvin and Hobbes leh Asterix te phei hi chu ka ning thei lo khawp mai. Archie hi chu tleirawl laiin kan tui pui thin a, tunah chuan ka en tha peih vak tawh lo.

  6. mesjay said, on December 21, 2009 at 4:35 am

    Ka download nghal, info bank atan. Pawi em?

    • chawnghilh said, on December 21, 2009 at 4:52 pm

      Download nawk nawk rawh u, Lalhmachhuana Zofa hian COMICS a siam ve a, milem thenkhat mit a tlung a; a thente erawh ka thlek peih lo lutuk a; chuta ka titi a ni. Khi aia ngaihnawm khian ka titi a, a tlangpui chauh ka lo kawl tawh a nih hi!

      Assam State Bus Sen (Laal Bus) ngei maiah comics nen kan han lut a, kawngtluana intithiam ve awm ang taka Comics kan bih char char laite kha ka rilruah a rawn lang chhuak. Cowboy leh Commando, Romance ka chhiar hnem ve thawkhat.

      Inah ka hawn a, ka pa a lo strict vei lutuk a, ka football boot leh comics chempuiin a lo sat sawm vel! Khang laia kan nu leh pate pawh kha Bible leh Text Books chauh emaw chhiar turin min lo duhsak a ni ta ber awm e. An meng sala tun vei nen! Kei pawh hian milem hi ka thai nasa ve thin a, character pakhat ka create a “CHONG” tih a ni a; mahse, publish lovin a zuzi hlen ta a ni.

  7. varte said, on December 21, 2009 at 9:06 am

    I blog tlawh a manhla thin e, thianpa Zaia’n a fak thei bawk che a, ka rawn leng lut ve ziah a nia.

    A awmzia pawh hre kim mang loa Archie comics, Amar Chitra, Tin tin etc kan keu nuap nuap hun lai kha a lo rei ve ta hle mai, lung i tileng e, comics bu hrang hrang hi ka khawl ve teuh thin asin, hmun hrang hrangah ka awm kual a, ka lehkhabute a tladarh ta nual.

    Hmanni chu Kolkata-ah Tintin series kimin ka hmu a, Rs. 7,500/- vel a ni hem mai, sum neih loh chu thu hran, a rit lutuk a, thlawhnaa ken a buaithlak dawn riau a, ka lei ta lo.

    • chawnghilh said, on December 21, 2009 at 4:57 pm

      Lungleia kan zin phei sawn ka ni fate hian (an tet laiin) Ziakloh Bu leh pencil, eraser nen min rawn pan tawp zel, Archie-a miho hi an lehkhabu-ah a tam thei ang ber min draw-tir thin. Ka draw nasa thei hle bawk … tunah chuan pasal fanau neiin an in dang ve vek hlawm tawh!

      Salt Lake Mizoram House piah lawka eng Mall emaw berah Tin Tin-ho chu an zuar khir iaih uaih ka hmu —ka dinchilh rei fu thin!

  8. tetea7 said, on December 23, 2009 at 6:01 am

    A ngaihnawm lehpek hle! Hetiang deuh hi Khiangte Sap hovin Local TV Channel pakhatah in sawiho tawh tlatin ka hria?

    Merry Christmas!

    • chawnghilh said, on December 23, 2009 at 9:07 am

      A dik, khata kan sawihonaah khan ka rawn tarlan portion lai chiah hi sawina ka chang mang raih lo va; mahse, tlem ka tiri hman chauh kha a nia —an telecast pawh ka thlir ve hman ta lo leh nghal. Synod HSS Principal-in record zel a inhuam a, ka la chang ve em ang chu!

  9. Maawma said, on December 23, 2009 at 7:36 am

    Asterix hi dulthuar na urhin ka nuihpui nasa thei lutuk, kan thenawmpa hian a fate tan a vaiin a leisak a, ka awt thei rups. School chawlh lai hian ni tin ka va len phei phah thin nia. Vitalstatistix, Roman-ho hming Paytoomuchtax tih ho velte kha tun thleng hian ka rilruah a la riak nia.

    • chawnghilh said, on December 24, 2009 at 9:24 pm

      A ziak chhiar chet chet chang ka nei, a lem en chet chet ka hrat zawk fo! Milem siam thiam na-lailengte hi chuan an lo ziak thiam em atin a ni!

  10. hmingtea said, on December 27, 2009 at 8:09 pm

    I lukhumparh khi a mawi ka ti zawk daih mai —i inhmeh ngawt ang. A leather dum ai kha chuan a nalh deuh ang chu maw!

  11. mzvision said, on December 29, 2009 at 10:12 pm

    The Adventure of Tin Tin leh Asterix hi chu ka tuipui thrin. MAD ah khan nawhchizuar 2 tii – Let’s go to new place and start new life like a virgin tih pawh a awm kha mawle. kan politiksian a khelh a khel te nen hian an inang duhawm ka ti

  12. Diktea_Pa said, on February 10, 2010 at 5:52 pm

    Ben-puah-silai(?) hian lung a len ru tlat!

    “Felt hat”(?)-te hian lung a kuai zui zek, muantea @mi(sual).com U in, ka ngaina tih hria a min pek kha, ka lawm tak zet . A Rs/- phei chuan cheng fe a ni ta ve ang!

    “Archie Comics ” – ka unau-nu {Far-nu (ka pa unau fa-nu) } in Sap-trawng zir na’n a thra tiin a khawn khawm thin. Zan rei lam a a nui ka khak(?) phah fo!

    “Phantom-a” ruhro-zung-bun mawlh kha.

    “Tin Tin” leh “Asterix” – mi-te(?) hriat reng nan pdf in ka zawng khawm nawn ngat, ka nei kim thaw-khat! Ziak mite ril zia ka hriatna pakhat a ni fo.

    “MAD” – phek khatah darh nuaih, hlawm zet a awm thin khan mit leh ngaihtuahna a ti bo lek lek zel!

    ……………………

    “Tom and Jerry” – “A chek-tui-hang hawp a, hrawk fan raih” Trawng lem lo, hlim(nuih) pui tur tam zet hi… Kum 16 pel awrh hian ka nuih pui zui zel fo nia!

    ……………….

    Ka Kawmen thui lutuk ang e. Ziak mi te’n in chhiar a, in tlir tam zia ka hmu nawn awn awn nia! I ziak chhiar/en loh tlak awm ngai hlei lo, i ziak/la thra leh tlawt e. 🙂

  13. Clio said, on March 28, 2010 at 4:17 pm

    Thra thei khop mai!!!!

  14. mzvision said, on April 3, 2010 at 6:54 pm

    E khai! I blog ka leng lut khat ta, i va fakawm tak em! I thu hi chu belhchian hi a dawl thrin avangin ka X-check lo vang. Asterix te, Tin Tin-te hi ka chhiar kim ve hial ka ring —Suddenmuanga nen.

    “Comic book character never grows old,” te pawh an lo tih reng hi le!

  15. ^-||RaLtE||-^ said, on August 2, 2010 at 2:14 pm

    Pu chawnghil, i blog chu tlawh man a awm hle mai. mai hlawm lutuk. Thu a tha hlawm bok si. Keep it up

  16. Krista Roluahpuia said, on May 25, 2011 at 7:49 pm

    Pu(?) Chawngilh hi hmeichhia emaw ka ti thin che a, ini hauh lo mai a. I thuziak ka chhiar a, i thlalak pawh ka en thuak thuak e.

  17. Puibawiha said, on February 15, 2012 at 12:46 pm

    A bengvar thlak hle mai. Comics hi ka chhiar tam lo ve hle a, Sudden Muanga erawh kha chu ka nuihpui nasa. Tin Politics leh kohhran ram a rawn sawi tel thin te kha tha tak a ni. Rawn thar thawhlehtu hi awm sela chhiar leh chakawm tak a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: