Chawnghilh's Blog

Mother and Child Worship!

Posted in Qualitus : Habitus by chawnghilh on December 17, 2009

Christmas Card hmasa ber chu heta mi hi a ni e. Kum AD 1843-a J. C. Horsley-a’n a design; a thian Sir Henry Cole-a hnêna a thawn a ni!

Mizoram Presbyterian Kohhran Hmeichhia Centenary (1904-2004) Christmas leh New Year Cards kha  tu design nge?

Masi Putar Santa Claus! Lung tilêng ru ruih maia hi tû lo design nge? American cartoonist Thomas Nast-a maw le!  Santa Claus hi William Dankenbring chuan, “Satan’s Claws” a ti!

Sumdàwnna thlèr tin chu apui anawiin an khat leh ta nùlh nùlh mai—rual-awhna tùr hlìr a ni. Rùkrùk pawh a hluar zual lai a ni a. Jeans, jackets, sneakers, hàlpuah, hàlzît, GI Joe, Barbie, toy-pistol  etc.,—nu leh pa lû a hai, neihin a tlin ngang si lo. A bâthlauva lâk awk a ngai! MLA Thlan kum ni ziah thei se—a ziaawm phah mah nà! Nu leh paten an fate dawhthlàk an dawhtîr; faten inbumna a ni tih an hre pha si lo! Inbumin a hlimtlân theih zêk! Thupèk Sawma a pakua-na kan pawisa leh ta lo! Vêng thlèr hulùm laite chu Atheni kawtthlêr ang deuh mai a lo ni ve leh ta (Cf. TT 17:16)! Apui apang Simàt Putar, Vûr-ram sazuk, Mari Lim bulah thlâ an la leh chum chum ta! Rimawi thùm hulh hulh kârah lunglêng khawhar takin a inngaihtuah theih ve bawk. Cchhûng kim dâr ang lên lai ngai vawng vawngin, thlànmual a vul thar leh hun pawh a ni thìn! Phaia sikul leh college kalte rawn chawlh theih hun lai, râwlthar leh tleiràwl thenkhatte’n FAWR an ngawrh lai! Chhûng tam zâwk chu hetih vuakvêt lai hian lungngai, rual-awtin an chek tlawk tlawk thìn thung! Vêng thlèr tin deuhthawa bâwm sena light inkhaiah ‘VDP ON DUTY’ tih kan hmu. Police an thawk rim; YMA an tùl zual! Râlvêng ang hrima thawh chhuah a ngai! Lock-Up a lùn zual lai a ni bawk! Accident rate a pung! Hospital Casualty Room-a doctor leh nurse an rim zual—a kumleh March-a Damdawi In lama inentîr zui an awm leh nawk dâwn bawk! Ina nu leh pate thindamin an muhîl thei bîk lo! Christmas hi a nuam thlàwt a ni! Chhui chian pawh kan tum phal lo! 

Tûk khat, ka zîng jogging paha tlàn ve High School zirtîrtu leh KTP hruaitu ni pah bawk hian, “Christmas-a khawpui kawtthlêr kan chei dàn hi Vai Puja nên kan danglam vakna ka hre ta lo,” a ti ve phawng mai zu nia! (Durga lim aiah Mari etc., sakei lem aiah bàwng lem. Bati chu Bati, lehkhamawi lah inang vek, hàlpuah leh hàlzìt thuhmun!) Tuirial-ah vaihovin an lim siamte an paih a; KTP/TKP-ten an paih ve èm lo a ni deuh mai a!

Mother and Child Worship :

NU —pathian biaka hmâsâng Babulon milem biakna sakhuaa an lo be thìn ang bawk khân tùnlai hunah ngei pawh hian Rome Kohhran chuan Mari biakna chu an lo chîng ve leh ta! Hmâsâng Babulon-ah khân nu leh a naute thawnthu hi an lo chawilàr hle thìn a, an pathian biakna kawnga chhawm lùtin an lo uar hle tawh thìn. Babulon thil hlui tam takah pathiannu Samiramis-i leh a fa Tammuz a pawm lai lim a chuang hnem hle thìn bawk. Babulon mi—khawvèl hmun tina an kal darh tàkah khân, an lo biak thin nu leh a fa pawm limte chu an chhawm chhuak ta zèl si a. Hei vàng pawh hi a ni ta ve ang, hnam tam tak ten Chhandamtu dik tak Isua Krista rawn lan hmâ kum zà engemaw laiah tawh te pawh khân nu leh a fa pawm chu engemawti kawng zâwng tala an lo biak tàkna chhan pawh kha! Ram tam taka hetiang kawnga biakna a lo darh khân, nu leh a fa pawm chu hming hran hrana koh/vuahte an lo hlawh ta a, han dàwnkìr leh pawhin Babel kha tawng tihdanglamna a lo ni chiah bawk lahtak a.

Chinese-hoten Nu-pathiana an neih hming chu Shingmoo an ti a, “Nu thianghlim” tihna a ni. A fa pawm lai mai bàkah a lu chungah èng zung kual mawi (aureole) an lantîr tel bawk thìn. Aureole chu halo an ti bawk tho àwm e.

Hmâsâng German mite pawhin nula thianghlim Hertha, a fa a kuangkuah lai lim chu an lo be ve bawk thìn. Scandinavian-tena Disa an tihi chuan naute a pawm bawk. Etruscans-hoten Nutria tia an vuah, Druids-hoten Virgo-Paritura an tih chu “Pathian Nu” tiin an be bawk thìn. India ramah pawh Indrani an tih chuan naute a pawm a, an be huai huai bawk.

Grik-hotena pathiannu an tih Aphrodite emaw Ceres a awm leh hranpà a; Sumerians-hoten Nana an tih, hmàsâng Rome mi fèkfàwnhoten Venus emaw Fortuna an tih ten an fa pawm chu Jupiter an tih thin bawk kha le! Devaki leh Krishna pawh nufa inpawm an ni, Hindu-ho leh an zînga missionary chèngte chuan an hre chiang lehzual khawp ang. Kum tam tak chhûng chu India mite hian pathiannu ropui an tih Isi leh a fa Iswara biain, an hmingchawiin Mandir tam tak pawh lo din tawh hial thìn zu’nia!

Asia ramah chuan Cybele chu an pathiannu a ni a; a fa chu Deoius a ni. Ziaktu pakhat erawh chuan, “a hmun leh hming târlang kher lo mah se—Baala nupui, vàn lalnu thianghlim, rai lova fa hring a ni,” a ti.

Israel fate an kalsual khân, hèng nu leh fa lim rawng bâwla bia hian an khawsa ve thìn. Rorêltute 2:13-ah chuan, “Tin, Yahweh chu an hawisan a, Baala leh Astoreti rawng an bâwl ta a,” tih a ni. Astoreti emaw Ashtaroth-i tih chu Israel fate zînga pathiannu hming an vuah dàn a ni. Pathian dik hre tawhten milem be mite pathiannu lama an han pènsan mai chanchin hriat hi a thinnatthlàk viau! Vawi duai lo a inziak miau si—Rorêltute 10:6; I Samuela 7:3, 4; 12:10; I Lalte 11:5; II Lalte 23:13. “Vàn lalnu,” tiin an pathiannu chu an ko bawk thìn a (Jeremia 44:17-19). Zàwlnei Jeremia khàn pathiannu an biak avàngin a zilhhau chiam a; nimahsela, a zilhna thu an helsan tlat thung.

Ephesi khuaah pawh an pathiannu chu Diana a ni. Hmâsâng khawvèl thilmak pasarihte zîngah chu khawpuia Temple, Diana puala an lo din hial chu a chuang pha asin! Ephesi khuaah mai pawh ni lovin, Asia ram leh khawvèl zawng zawngah pathiannu chu an be bawk thìn (cf. Tirhkohte Thiltih 19:27).

Aigupta-ah chuan an pathiannu (goddess) chu Isis an ti a, a fa chu Horus an vuah. Aigupta ram thil hlui sùlhnuah chuan nausên Horus a nû mal chunga a thu lai lem an chuantîr tam hle.

Babulon atanga hnam tam tak zînga tai darh—biak dàn dik lo chu, kawng hrang hrangin a tàwpah Rome leh Rome Lalram-ah a rawn indin thar tha leh a. Chùng hun lai chanchin ziaktu pakhat pawhin, “Nu Ropui biak chu Rome Inawpna hnuaiah khân a hluar hle a ni. Ziaka a lan dàn pawhin nu leh naute-te hian zahna (homage) an dawng hle a … Italy ngawt ni lovin—abìk takin Rome-ah leh hmun thenkhat Africa, Spain, Portugal, France, Germany leh Bulgaria-ah te pawh a hluar hle,” a ti.

Hèng hun laia nu biakna a hluar èm èm tawh lai hian Isua Krista chuan Thuthlung Thar Kohhran dik tak a rawn din ta thung a. Khàng hun laia Kohhran a lo awm tà kha a va nihlawhthlàk tak èm! Kum zabi thumna leh lìna hun lai khân, kohhran hming pu sì khân kawng tam takin rinna bulthut atangin a pêng ta a, Apostol-ten an lo vaukhàn làwk ang ngei khân rinlohnaah an lo tlu ta! “Tlùksanna” a lo thlen lai khân, milem biak kawnghmang kha Kristianna nèn a lo inchiahpiah hman leh hle tawh a. Kohhrana rawng bâwl tùrin milem bia—piang thar lo an la lùt a, kawng tam takah milem be mite thil chìn dàn leh puithùnate an chhawm telin, a thenah an rizàp tlat a—Kristian Thurin nèn a inzùl theih dàn an thlîr ber zàwk niin a lang.

Milem biakna atanga chhawm luh kan hmuh theihte zîngah Kohhranin nu ropui biak chhunzawmtîr a phalna hi a ni —hming thara kawng dang deuh hreta biaknain a ni ta thung!

Hriat tlàn angin, kristiannaah milembe mite chu hìp an lo ni a; nimahsela, pathiannu an lo biak thin ngaihsànna a lo sosâng hle tawh si a, an thlauhthla phal ta thìn lo a ni. Ngaizam thei mai thìn Kohhran hruaituten pathiannu biak chu Kristianna nèna inzùlna a awm theih nàw nàw tho chuan, mi tam zàwk an hui lùt dâwn tih an lo hre ve tumhrang bawk si. Nimahsela, milem be mite nu ropui chu eng thila thlàkthleng chi nge ni ta ang?

 

ISUA NU, MARI ber kher hmang hian duh thlantîr chhunzawm a lo samkhai khawp!

Pathiannû hnèna tawngtai leh inhlanna ang kha engvàngin nge an tihchhunzawm theih loh lèm ang le! An pathiannu hming an lo lam rìk thin ang aiah “MARI” an ti ve mai dâwn lo’m ni? Chu chu a kawnghmang awmchhun a ni ta ber rèng a—chutiang chiah chuan thil a thleng ta! Zawi zawiin, milem be mite biak thin nu chu Mari biakna kawngin a lo inchèr nghet ta thung a ni.

“Mari Chibai, Khawngaihnaa khat Lalpa chu i hnènah a awm; hmeichhia azàwnga engthâwl i ni, i rîla rah Isua pawh a eng a thâwl e. Mari Thianghlim—Pathian nu, keini misualte tân min tawngtaisak la, tùnah leh kan thih dâwn dârkârah,”

tiin! Mahse, Mari biak chu Kristian hmasa berte rinna a ni ngai si lo. Mari, Isua nu kha—fel, inpe tak leh Pathian ngaihsak hmeichhia a ni khawp mai, min Chhandamtu pai tùra thlan pawh a ni hial. Amaherawhchu, Apostol-te zînga mi emaw amah Isua ngei pawhin Mari biak tùr thu hi an lo kamkeu chhin ngai eih lo!

Encyclopaedia Britannica pawhin, “Kum zabi khatna hun laia kohhranah, Mari chungchâng an leklàm ngai lo,” a ti. Chu chu The Catholic Encyclopedia pawhin a pawmpui, Mari biakna hi chu tlaikhawhnua rawn tiak hnuhnawh mai a ni.

Lal Constantine-a hun a thlen hmâ, kum zabi lìna tawntirh atang khân Mari chu pathiannu anga enna a lo awm tan ta a. Chutih lai vèk chuan Kohhranah ni biakna (sun worship) a awm ru a ni tih Epiphanius-a (403 AD-a thi) thu leh hla atangin a lang chiang—Mari chu pathiannu anga Trace leh Arabia leh hmun dangtea an biakna kawnga hmun thianghlima chhang an hlàn tel a dem thu atangte hian! “Zah tùr chu a ni nameuh mai a; mahse, Mari chu tuman an be tùr a ni lo,” a ti. Nimahsela, kum rei lo tè kâr chhûng lekin Mari biak chu Catholic Kohhran angah te chìn chhuah a lo ni ta chauh pawh ni lovin, AD 431-a Ephesi Inkhàwmpui-ah official doctrine-a làkluh a lo ni ta zèl a ni.

 

Ephesi-ah maw? He khawpuiah hian hmeichhe thianghlim leh nu an tih Diana kha hmâkhawsâng atang tawh rènga an lo biakna hmun a ni thìn asin! Inthlahchhàwnna lama thiltihtheihna a neihzia lantîr nân hnute-bu tam tak neiin Diana Lim chu an lantìr thìn. A lallukhum chu in chhàwng sâng—Babel in sâng symbol-a hmangin a kimtlâng chei mawi a ni.

Kum za tam chhûnga miin thil a lo rin laklawh tawh, a lo bel èm èm tawh si chu chuti mai maia thlauhthlàk a lo har tawh khawp! Tlùksanna a lo thlen khân Ephesi Kohhran hruaitute rilruah pawh anmahnia rawn inlet duh mi tam zàwk an neih theihna tùrin pathiannu an lo biak thin ang kalphunga Kristiannaa thil inpawlhsawp zîngah Mari biaknaa thlàkthleng mai tùrin an lo tì a ni ber. Nimahsela, hei hi Pathian duh dàn a ni lo. Ephesi khuaa hun hmasa lama Paula a va kal khân, milem biakna thil nèna inremna rèng rèng a awm loh kha. Dik taka mi an rawn inlamlèt a nih chuan an milimte leh pathiannute an tichhe vek mai a nih kha (cf Tirhkohte Thiltih 19:24-27).

Kum 100 emaw a lo vei leh hnua Ephesi Kohhranin pathiannu biakna a lo pawm leh a, a lo thlunzawm leh ta mai chu Ephesi Inkhàwmpuiin Official Doctrine-a a lo keuh thlùk a ni ta maw! Milem be miten an lo hneh lèt leh ta tih a lang chiang e.

Fa duatte u, milem biaknate lakah inthiarfihlìm rawh u (Little children, keep yourselves away from idols — I John 5:21) tihna khua ni thìn ngeiah khân heti mai mai hi a lo ni zo leh ta màw!

Hmâsâng atanga pathiannu biak thinna chuan Mari biaknaah a hlângkai tih a hriat theihna chu Mari hi “Madonna” tia koh a ni thìn bawk. Thuril chhui Hislop-a chuan, he hming Madonna hi Babulon mite pathiannû nihna an lehlin niin a sawi. An ngaih pathianna lam ang hawi chuan Nimrod-a pawh kha baal tih a ni. A nupui hming pawh baalti an ti leh mai a; a awmzia chu sàptawng hcuan, “My Lady,” tihna a ni a; chu chu Latin tawng chuan, “Mea Domina” an ti a; Italy (Rom) miten “Madonna” an tichhàwm ta a ni.

Phoiniki —Pheonix, Fi-niks tia lamrìk-ho zîngah chuan, pathiannu chu “The Lady of the Sea (Tuipui Lalnu)” an ti a; chu nihna chu Mari-ah an bel a—mahse, Mari leh Tuipui chuan inkungkaihna an nei lèm chuan a lang si lo!

Pathian Lehkhathu chuan mihringte leh Pathian inkârah palai pakhat chauh, mihring Isua Krista a awm thu a târlang a (I Timothea 2:5). Roman Catholic erawh chuan Mari pawh palai vein an zirtîr! Mari hnèna tawngtai chu Catholic biak-phung zînga pawimawh tak a ni. Nimahsela, he ngaihdàn hian Pathian Lehkhathua innghahna a nei lo va, pathiannu biakna nèn a inhlat lo zàwk a ni. A hming an vuah tam tak te zîngah Mari chuan he hming “Mylitta” hi a pu a, chu chu “Mediatrix” an ti bawk a—a awmzia chu palai tihna a ni.

Mari hi “vàn lalnu” tia koh a ni ve fo mai! Nimahsela, Isua nu Mari kha vàn lalnu a ni lo. “Vàn Lalnu” tia an lo koh thin pathiannu (Mother goddess) kha chu Mari pian hma daih—kum za tama an lo biak tawh kha a ni zàwk. Jeremia hun laiah miten, ‘vàn lalnu’ laka inserhin, khùnkhàn takin an lo be tawh thìn. Jeremia 7:18-20-ah pawh, “Naupangten thing an fawm a, an pate’n mei an chhêm a, hmeichhiate’n vàn lalnu hnèna hlan tùr chhang an hmet a, pathian dangte tân in tùr thilhlan an hûng chhuak a, mi tihthinrimna mai tùrin…”

Isis-i nihnate zînga a hming pakhat chu “Pathian Nu (Mother of God)” a ni. Theologian Alexandria-a chuan tlai khawhnuah chù nihna chu Mari-ah a bel. Mari chu tih tak èmah chuan Isua nu, a mihrinna leh mihring a rawn nihphunga a nu nihna chauh a kàwk. “Pathian Nu (Mother of God)” tih thu awmzia bulbàl tak hi zawng a thùk daih zàwk a—NU dinhmun ropuizia a keng tel a, chutiang takin Roman Catholic-ten Mari chungchâng an zirtîr thìn!

Milembe mite rilruah chuan nghet takin pathiannu leh a fa pawm lai thla a inziak thìn; tlùksanna a lo thlen khân—hetiang hian ziaktu pakhat chuan, “Hmâsâng hun laia Isis-i leh a fà kuangkuah Horusa chu ngaih mai aia ril, puithiamten Nula Thianghlim leh a fa anga an lo zirtîr vàng a ni,” a ti. Isis-i leh a fa lem chu pangpâra chei mawia, zàm hualtîrin an lantîr deuh zèl a. Mari biaknaa an thil chìn thinah pawh chu tho chu a ni tih Medieval hun laia lemziak atangtein a hriat theih.

Astarte, Phoiniki-hote chi thlah malsàwmtu pathiannu chu thla detìr inchhawng lei hâ nèn an târlang dùn thìn a, tangkapui hlui atangte pawhin a finfiah theih a ni. Aigupta mite chi thlah malsàwmna pathiannu Isis-i pawh thla de tìr chunga ding, a lùa årsia chei mawiin an lantîr bawk thìn. Europe ram zawng zawnga Roman Catholic Kohhranah chutiang chiah chuan Mari lem an sâwngbâwl thìn zu nia!

Tlùksannaa Hruaitute chuan Mari chu milem be mite pathiannu anga sâwngbâwlin, kawng hrang hrangin an chawimawi a. Milem be miten pathiannu lìm an nei ang chiah khân Mari lim an siam ve ta zèl a. Kawng thenkhatah chuan Isis-i (a fa nèna) lim an biak thin nèn inang chiah a ni—Mari leh Nausen Krista tia a hming vuah danglam a ni lekfang a. “Kristianna khàn ram a làk zèl laiin Madonna leh a fa lem paintings-te hi chatlak lova an siam zui zèl vàng hian Archeologist pawh ràwn hran ngai lovin a tuate pawhin kan hre chiang vek a ni,” a ti.

Hèng lim—Aigupta-ho biak thin ang leh Hindu-te biak thin ang hi, an hmingte chher thar chawpin, tlereuh thil hlua cheimawi an ni ta thìn a. Nimahsela, Mari—Isua nu kha zawng a hausa ve lo (cf. Luka 2:24; Leviticus 12:8). Hèng lallukhum leh ràngkachak thil hlûa a lim an cheinate hi amâ tà engtin nge a nih theih zozai ang le?

Hmâsâng hun laia pathiannu biakna inthup tam tak te kâra thil lang chiang—Kohhran Tlùksanna huanga la kal zui ve zèlin, hming hmasate aiah Mari hming put thartîrnaa thlàkthlengin inzawmna a lo awm ta! 

 

WELCOME!

Lèn luhna thlàkhlelhawmte —
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: