Chawnghilh's Blog

Pathian leh Pathian Fapa Hming Dik

Posted in Qualitus : Habitus by chawnghilh on December 17, 2009

 

 

A chunga thlalàk tàrlan teh ngawt hi —a mawina leh hlutna ka va han hre lo tak! Maryland leh Virginia state indawh zawmna Lei (Key Bridge over Potomac River) bul lawka building  a ni satliah ve ringawt! Virginia State lama mi a ni nghe nghe a. Hriat chian loh chuan en chet chet a tûlna kher pawh ka hre lo. Mahse, a thlâ ka rawn la ve miau si a … ka târlang duh hrim hrim!

Ka’n sawi chiang law law ang e —car chung i hmu a. Stairs (rahbi) indawh chho i hmu a—chumi sîr tawn tawnah building and retaining walls i hmu—chu zàwng chu! A ho lutuk. Mahse, he lai hmun kal pèl apiangten bih chian duh nachhan an nei ve tlat, bih chian duh nachhan an hriat chian phawt chuan … chu chu eng dang ni lovin Linda Blair-i film channa EXORCIST dangdai tak tàwpna scene an shoot-na hmun, puithiam beidawng a rawn lum thlàkna kailàwn a nih vàng chauh a ni! Chu thil hriate chuan an va thlèk hràm hràm zèl thìn.

Chutiang bawkin, a hnuaia THUCHAH hi han chhiar chhuak ve teh —Isaia 52:6   “Ka mite chuan ka hming an hria ang,” tih thu a ni a—Pathian mite zinga mi i nih avàngin Pathian hming dik leh a Fapa hming dik i hriat màkmawh an ni ta. KRISHNA, HANUMAN, ALLAH, CHEMOSH, ASTEROTH … pathian hming bil tam tak a awm; Juda-te leh Kristian-ten Pathiana kan biak hming chu … HRE CHIANG TURIN a hnuaia thuchah tawi tè hi han chhiar zawm zèl teh le! Tin, Rev. Dr. Zairema hriatreng nân he foliage hi ka dedicate a—hetih hun lai vèl hian Aizâwl-ah Rev Dr Zairema Lehkhabute an RELEASE dâwn tih a ni a … khawvèl hmun danga miten Pathian leh a Fapa hming dik Rev. Dr. Zairema pawhin a lo tihlan ve zauh zauh thin chu an lo hriat chian lehzual nâna dedicate a ni e.

“Ka unaute hnènah i hming ka hril ang a, Inkhàwmho zîngahte chuan ka fak ang che.” — Sàm 22:22

Kan Thurin Bu—sàphovin Bible an tihah hian hming pawimawhna hi chhuia hriat tùr tam tak a awm a ni, tiin bul i han tan phawt ang aw!

Hming lang hmasa ber : Bible-ah hian hming kan hmuh hmasak ber chu mihring hmasa ber Adama a ni (Genesis 2:19). Adama tih awmzia hi mihring tihna te (Genesis 2:5) emaw mihring zawng zawng —a vai huapa sawina (Genesis 1:26) leh vut sen atanga mihring chu siam a nih angin Adama hnènah hian thilnung tinrêngte chu an hming a vuahsak theuh thu kan hmu a; chùng atang rèng chuan mihring kan ni emaw, thilnung tawh phawt chuan hming neih a tùlzia a lo lang a ni.

Hming pawimawhna : Kan Bible chhûngah ngei pawh hian hming phuah tawh sa—an dinhmun azira phuah thar leh an awm, entîrnate—Abrama kha Abrahama, Saraii kha Sari, Jakoba kha Israela etc. Hèng hming thlàksak tàk te hian an dinhmun leh nunphung lamah pawh awmze thar leh tha zàwk a thlen a ni. Tu huatthu ni lo sela, khaw pakhatah lehkhathawn lo inhawn pawlhsak thin avànga thinrimna lo awm avàngin tualthahna a thlen hial a. He thu ziaktu pawh hian hming a ziak tel ta a, kum 40 ràl a lo kai chuan a hming tak aiin a hnam hminga hriat leh koh a lo hlawh ta zàw nia! Pathian hming dik leh a Fapa hming dik tak hi puangzâr tùr hian mahni phàk tàwk ang zèlin hmalàkna neih a lo ni tawh thìn a. Kan Mizo tawng Bible bu tàwp lam THU HAR HRILHFIAHNA tih hian a sawi fiah tùr ang takin a târlang fiah lo va; a chhan chu—a dik tàwk lo va, hming dik lo leh a aiawh kan lo neih hmasak tawh vàng a ni.

Pathian hming chungchâng : Kan Bible-ah hian Pathian hming kan târlang chiang tàwk lo tih hi mimir chuan kan hre pha lo a ang hle! Kan Pathian Thu thiamte zîngah hminghmerhin mi pahnih lek han târlang ila—Dr. R. L. Hnûni hian YAHWEH tih a ziak chhiar leh hmuh tùr a awm nual—a va làwmawm èm!

Rev. Dr. Zairema chuan a Lehkhabu ‘Kan Bible Hi’ tih phèk 204 (kum 2003-a chhut)-ah chuan he thu hi a rawn ziak—”Bible ziaktute’n Pathian hming an ziak kher ang hian ziak ve zèl ila; Bible thu, a boruak ken nèn a phawrh zàwk fo dâwnin kan hria a, Committee chu kan lungrual hle; mahse, a la thar deuh avàngin mi thenkhat chuan an duh lo a, “Kan pawm lo vang,” te an rawn ti a, kan hmang ta rih lo a ni,” tiin.

Kan ram, Mizoram ngeiah kum 100 chuang Chanchin Tha kan lo dawn tawh hnuah pawh hian Pathian hming dik chuan Bible-ah hmun a la chang lo tih hi Pathian Hming leh A Fapa Hming tùnah tak hian i hre ve ta chiah em? Tute nge “Kan pawm lo vang,” ti tute chu? Pathian hming dik tak chu i hre duh lo ve dâwn em?

Isaia 52:6 i han en teh ang u — “Ka mite chuan ka hming an hria ang,” tih a ni a. Kan Pathian hming chu kan hre tùr a ni.

Thu Har Hrilhfiahna : Kan Mizo Bible bu tàwp lamah THU HAR HRILHFIAHNA tih zîngah ‘Jehova’ (p.1236) tih chu hetiangin hrilhfiahna siam a ni.

Jehova : Mihringin hming bil kan nei thliah ang hian hei hi Hebrai Pathian hming bil a ni. A awmzia chu, “Ka Ni,” tihna emaw, “Awma,” tihna emaw a ni. He hming hi lam zen zen tùr a nih loh avàngin a hming lam dàn dik tak an hre tawh lo, Yahweh tih tùr niin an ngai. Hawrawp pali YHWH hi an ziak dàn chu a ni a; a lam dàn erawh chu vowel an dah ang anga chhiar tùr a ni. Lalpa tihna vowel an dah chuan ‘LALPA’ tia chhiar tùr a ni a, Pathian tihna vowel an dah chuan ‘PATHIAN’ tia chhiar tur a ni.

A thuphungin han sawipui phawt ila, heta Jehova tih pawh hi a dik tawh lo tih hre hmasa phawt ila. Pathian hming —a dik lova sawi te, inzirtîr te hi zàwlnei Jeremia chuan hetiangin a sawi —

i. “Ngai teh u, lehkha ziaktute kawlawm dawthei chuan, dàwt-ah an chantîr zàwk a ni,” (Cf. Jeremia 8:8)

ii. “Zàwlnei dàwt sawi thìn, mahni thinlung inbum chawpa thu sawi thìnte thinlungah chuan hei hi eng chen nge a awm dâwn? Anni chuan an vêngte hnènah an mumang hrilhin ka mite ka hming theihnghilhtîr an tum a, an pate’n Baala avànga ka hming an theihnghilh ta ang khân,” (Jeremia 23:26,27). Kan Mizo Bible buatsaih lama mawhphurtute pawhin kan Pathian hming leh a Fapa hmingte pawh chu a dik zàwka khungluh an duh laia “Kan pawm lo vang,” titute chu Pathian hming theihnghilhtîr tumtu zàwlnei Jeremia’n a lo sawi tawhte nèn rualkhat—kàwn khata liamho an ni tlâng thei àwm em? A nih leh Translation Committee-te chuan dik leh tha an tih anga an kalpui loh chuan—lehkhaziaktute kawlawm dawthei … an hmang zèl tihna a ni thei reng ang em?

Pathian hming chu kan duh amâka kan phuahsak tùr em ni ang? Mizoram-a Sorkâr milian Director pakhat chuan a hminga hawrawp pakhat ‘g’ a tel chuan, “Hei chu ka hming a ni lo,” tiin a thliar hrang thìn an ti. Keini mihring pawhin kan hming chu a dik taka ziak kan duh si chuan—kan Pathian hming chu A DIK TAK kan dapin, kan ziak bawk dâwn lo’m ni? Mizorama Politicians zînga pakhatin, ‘Pathian nung hmingin,’ tih hi a sawi zing phian a; mi thenkhat chuan Pathian zahlohna lamah an thlùksak ni hmiang! An sawisèl bawk thìn. Mahse, Pathian hming a lam ri tel ngai lo, ‘Pathian hmingin,’ a ti mai zàwk thìn asin!

Thupèk pathumna : A hma lama kan rawn tàrlan tàk, Jehova tih, Thu Har Hrilhfiahnaah khân — “He hming hi lam zen zen tùr a nih loh avàngin ….” tih thu kha.

Pathian hming lam zen zen loh tùr tih thu an tlawhchhan nia lang chu THUPÈK SAWM zînga a pathumna hi ni bera ngaih a ni. Exodus 20:7 —”YAHWEH i Pathian hming chu i lam mai mai tùr a ni lo, YAHWEH chuan a hming lam mai mai chu thiamlohchantîr lohvin a chhuah dâwn si lo va.”

He thua hawrawppui veka ziak ‘LALPA’ tih hi Pathian hming a ni lo va, a hming aia dah a ni. Tin, abìk takin miin thutiam leh chhechhamah mahni inhumhim emaw inthup nâna Pathian hming lama chhechham angte hi he Thupèk pathumna hi chuan a kawh tum tak niin a lang a; Amah chibai kan bùk laia a hming kan lam hi chu a khap dâwn em ni?

Hebrai hawrawp pali : Hebrai hawrawp pali Yodh, He, Waw, He—sàptawnga lama a hawrawp tlukpui palite chu YHWH an ni a, hèng hawrawp palite hi tetragrammaton an ti. Hèng hawrawp pali Y-H-W-H inkârah hian vowel zehin—YaHWeH tih hi kan Pathian hming a nih leh hei hi dik bera sawi a ni.

Rev. Dr. Zairema’n, “Pathian hming Yahweh tih chuanna Jerusalem Bible te, Anchor Bible-ah te,” tiin a rawn ziak a; chùng bàkah chuan Rotherham’s Emphasised Bible te, The Word of Yahweh te, Holy Name Bible te leh The New Jerusalem Bible-ah te hian LALPA (LORD) ti tawh lovin Yahweh tiin Bible chhûng thuah ziak a ni tawh a, a va làwmawm èm!

Sàptawng Bible—King James Version, Revised Version, New English Bible, Today’s Bible, New International Bible, New American Bible, New American Standard Bible, New King James Version, Easy to Read Version etc.-te hian Pathian hmingah LORD (LALPA) tiin Pathian hming aiah an dah. Tin, Pathian hming atâna ‘Jehovah’ tih sàptawng Bible-a ziakna Bible langsàr zualte chu hèngte hi an ni—New World Translation of the Holy Scriptures (JEHOVAH WITNESS KOHHRAN PUAL), Holy Bible American Standard Version te, Young’s Literal Translation of the Holy Bible etc., Restoration of Original Sacred Name Bible chuan ‘Yahveh’ tiin Pathian hming chu a khung lùt ve bawk; a chhan chu Hebrai hawrawp Waw tih hi vav a tih vàng niin a chhui theih. Jerusalem-a Bishop Jacob-a chuan Semitic alphabet (Israel-te hawrawp) zînga 7-te hi sàp hawrawpa tel lo an awm a, chùng zînga 6-te chu sàp-ho hian an lam dik thiam lo hrim hrim tih thu a ziak tel. Kan India ramah pawh hian kan Mizo hming leh hmun hmingte pawh kan thenawm Cachar District maiah pawh khuan an lam dik lovin—an ziak dik thei lo tih kan hria a; chutiang bawkin Hebrai tawng thiama inngai sàp pa fing leh inzir thiam tak tak te hian Bishop Jacob-a tàrlan angin Hebrai tawngah hian harsatna an nei ve tho a ni. Vai kan tih te hian Thingsulthliah tih te pawh hi Tinsukia an ti daih! Ni khat chu Jehovah Witness Kohhran hna thawktu pakhat, lehkhabu zuar thìn, a lehkhabu zawrh thenkhatte pawh kan leisak thin hi Pathian hming ka zàwt a —‘Jehovah’ tiin min chhâng mauh mai!

Jehovah tih thumal hi Pope Leo X-na hun lai, “AD 1520 vèla Galatinusa bul tan,” a nih thu Emphasized Bible (1994) phèk 24-naah kan hmu thei a, a chiang tàwk e. Seventh Day Adventist Bible Commentary (Revised 1978) Vol. I, phèk 172-naah pawh he thu hi kan hmu—”Pathian hming bil chu Yahweh” (… the personal name of God was Yahweh). The Jerusalem Bible te, New Jerusalem Bible tih te pawh hi Catholic Kohhran siam/tihchhuah an ni a. Yahweh tih chu LALPA (LORD) aia dah thleng biai a lo ni tawh a; hmasàwn zèl ila. Kan Mizo lamrìk (transliteration) Iauea emaw Iahua emaw dap a hun a; tùnah hian sàp hawrawp Yahweh tiin kan ziak thìn a; kan A AW B-ah hian Y kan neih hauh loh hi—Hebrai chuan yodh; Grik chuan iota.

Hebrai tawng leh Grik tawngah J hawrawp an nei lo ve ve! Tùnah chuan Israel-te’n an Pathian hming an ziak dàn leh hun hran hrana Bible chi hrang hranga an ziak dànte pawh kan lo târlang ta nual a — Yahvah ni lovin, Jehovah ni lovin —a dik chu YAHWEH a ni.

Pathian Fapa hming : A hmasain Mizo tawnga Pathian Fapa hming—Chanchin Tha Luka ziak leh Johana ziak leh Tirhkohte Thiltih —hèng lehchhuah hmasak, kum AD 1889 laia Pathian Fapa hming an ziak dàn chu ‘Jisua’ tih a ni.

Luka 1:31 — “Ngai roh, i rai ang a, fapa i hring ang a, a hminga JISUA i sha ang,” tiin ziak a ni. Tùnlaiah India Hmàr-Chhak lama chèngte leh Myanmar leh Bangladesh rama chèngte puala Bible lehlinah chuan Fapa hming ziak dàn a hrang ta nual mai — chùngte chu i han târlang phawt teh ang —

Mizo — Isua
Mara — Zisu
Hmàr — Isu
Gangte — Isu
Vaiphei — Jesu
Bàwm — Jisu
Lai (Haka) — Jesuh
Chin — Jesuh
Kau Bru (Riang) — Jisu
Paite — Jesu
Khasi — Jisu

He thuziak chhiartute’n kan hriat tùr pawimawh tak leh kan duhsak èm èm chu Hebrai mite hming hian awmze bìk (specific meaning) nei a ni a, a chunga tàrlan hming 11 laiah khian Mari (Hebrai – Miriam) hnèna vàntirhkohvin thu a rawn puan lai khân Hebrai hnama nula thianghlim bengah khân a eng ang ber khian nge Fapa hming a rawn phuah/puan ang le? Pathian Fapa hming dik leh awmze thùk tak nei hi Bible Translator-te hian an duh dàn dànin an phuah chhàwng ve mai zàwk tih i ring ngam ta em?

Tùnah hian kan sawi tawh lamah khân han lèt leh rih ila. Pa Pathian hming chu sàp hawrawpin ‘YAHWEH’ tia kan sawi tawh kha! Thuthlung Hlui lama LALPA tiha ziak zawng zawng leh JEHOVA tia ziakte hian hming dik an chhilh tlat si.

Sàm 68:4 thuah hian Pa Pathian hming a lamtawia ziak; Mizo Bible-ah chuan ‘JAA’ tih kan hmu a, Mara Bible (1987-1988) chhuakah chuan a awm ve lo nghe nghe.

Heta JAA tih hi Hebrai-ah chuan YAH tih a ni, Sàp Bible-ah chuan J an neih hman tàk avàngin JAH an ti ta mai zu nia! Pa Pathian hming – YAH-WEH —— Fapa hming – YAH-SHUA emaw YE-SHUA

YAH emaw YE chu Pa hming bul a ni a; SHUA tih awmzia hi Chhandamna tihna a ni e. Pathian Fapa hming chu Yahshua tih atang hian a awmzia chu Pathian chhandamna tih hming ropui tak a ni.

Hebrai leh Aramaic tawngin Ye-ho-shua an ti; chumi lamtawi/làktawi chu Yah-shua ti lovin Ye-shua an ti —a awmzia a paih chuang lo. Latin (Rome) tawngin Iesus an lo ti thìn a; sàp A B C-a J hawrawp hi kum AD 1630 vèla an lo telh belh tàk atang khân Iesus chu Jesus tiin sàpho hian Fapa hming sipel thar an lo chher ta a; kum 379 chhûng lai hman a lo ni ta! Kum AD 1950 lai vèl atang khân Fapa hming dik hi USA leh England ramah te khuan a chhui pâwl an lo awm ta a; chùng zîngah chuan Elder A. N. Dugger te, Elder C. O. Dodd-te kha an ni.

Zawhna leh Chhànna :

Tunge ni kâwlkil zawng zawngte tinghet?  Tunge ni a hming?  Tunge ni a Fapa-a hming pawh i hria em?

Kâwlkil zawng zawng tinghettu chu —Yahweh. A Fapaa hming pawh kan hria —Iesua a ni.

Iesua hminga thil tih khapna : Zirtîrte’n Pentekost Nia Chunglam Thlarau Thianghlima thuama an awm hnuah huaisenna leh thiltihtheihna nèn rawng an bâwl thìn a. Jerusalem khuaah Johana leh Petera-te chu SANHEDRIN hmaa chhuahchhalhin an awm a; Lalpa Iesua hminga kebai an tihdam avàng leh thìkthu avàng khân!

“Mi dang tuma hnènah chhandamna a awm lo; vàn hnuaia mihring sak zîngah, min chhandam tùr hming dang rèng a awm lo,” (Tirhkohte Thiltih 4:12) tih thu hi Petera’n huaisen takin a puang. Chutih laiin khapna thupèk an puan hnan ta — “Iesua hminga thu sawi tawp loh tùr leh zirtîr tawp loh an ti tlat a,” (Tirhkohte Thiltih 4:19).

Johana leh Petera te chhànna kha, “Pathian mithmuhin Pathian thu zawm aiin nangnî thu zawm a dik zàwk emaw chu ngaihtuah rawh u. Keini zawng thil kan hmuh leh kan hriatte kha sawi lovin kan awm thei lo,” (Tirhkohte Thiltih 4:19,20) tiin huai takin an chhàng a nih kha.

Pentekost Ni leh a hnu lamah, Iesua hmingin baptisma an chan thin thu Tirhkohte Thiltih Buah kan hmu. Paula’n Korinth khuaa Pathian Kohhranho Lehkha a thawnah chuan — thih ai thi leh chumi hminga baptisma chan a nih thin thu a tàrlang. Hetiangin, “Paula, in aia khenbehin a awm em ni? A nih loh leh, Paula hmingin baptis-in in awm em ni?” Kolossa 3:17 —Paula thuchah hi han chìk ve teh le! “Tin, in tih apiang chu thu sawiah emaw, thil tihah emaw Amâ zârah Pa Pathian hnèna làwmthu hril chungin Lalpa Iesua hmingin ti vek rawh u,” tih thu mawlh mai hi!

He thu hian Pa Pathian Yahweh leh Fapa Iesua chu kan innghahna thu pawimawh tak a nihzia a târlang kawp e. Kum a lo ral zèl a, Apostol-te mualliam hnuah zirtîrna dang a lo lian zèl a. Rom khaw Bishop leh an lal tangkawp zèlah  Nicean Council chuan Trinity Dogma leh Easter a lo pawm tàk avàng khân Kohhran dik kha a lo chèp tain, martar-na a lo awm ta.

Iesua hminga baptisma aiah Trinity formula an lo làr ta! Thudik tantu i nih chuan Seventh Day Adventist Bible Commentary (Revised 1978) Vol. 8, phèk 584-ah pawh ‘YESHUA’ tia Fapa hming chu tàrlan a ni e. Mizoram-a Kristian tam ber te hi Pa Pathian hming bil hre lo, Pathian Fapa hming dik hre lovin kan inchhuah mêk zèl a ang ta.

“Ka mite chu hriatna tlàkchham avàngin tihboral an ni a, Hriatna i hnar avàngin kei pawhin ka puithiam i nihna ata ka hnar tawh ang che, i Pathian dàn i theihnghilh vei a, kei pawh hian i fate ka theihnghilh ve ang,” (Hosea 4:6).

“Kan pawm lo vang,” titu i ni ve dâwn em? Thudik chu i pawm ang u hmiang.

“Pathianin kan ni tin mamawh leh thlarau lamah mal min sàwm theuh rawh se. Hallelu YAH Amen,” ti vek hlawm kan ti tho si —kan hriat chian lohvin Pathian hming dik chu HALLELU YAH tiin kan lam uar hlawm viau —ngaihtuah chian hret a va ngai èm!

 

WELCOME!

Lèn luhna thlàkhlelhawmte —
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: