Chawnghilh's Blog

Sual chi hrang hrang Sawm (10)

Posted in Qualitus : Habitus by chawnghilh on December 18, 2009

SUAL INTHUP lakah hian mi tifihlìm ang che —Lal Davida

Chatuana Nunna thurùk neih chian hmâa THIH ngawt mai hi vawi khat khawvèla rawn pianchhuah manah chuan —a pamhmai hle hian in hre ve em? ‘Misual nia in ngaih’ an thih hian —engnge in suangtuahsak ve thin le? Ka thian pakhat nèn nghakuai chiah tùrin kan chhuak dùn a. Kan chèttlatna tùr lui chungah chuan Lei ropui tak a indawh kai zuah mai a. Chumi ban hrawl takah chuan GANG-ho kutchhuak tih hriat reng reng hian “DON’T DIE BEFORE YOU LIVE,” tih hi a lo inziak kuau a. Ka chhiar pah chuan,  ‘a ziaktute GANG engemaw ber an ni tih a chiang si,’ tiin, suangtuah a tithui riau ta mai a. Ka kalpui-pâ hnènah chuan, “Va ding teh, saw thuziak lang thei sâwn i thlâ làk ka duh,” ka ti a. Ani pawh chuan a’n chhiar vang vang a, a thlalàk piaha lang tel atân a iai hauh lo va.

Tichuan, a thla ka la ta a ni. Beràm bo hi kan awm nual thei a, min zawng hmu lèttu ‘beràm vêngtu rinawm leh taima,’ kan taksa leh thlarau hmâ ngaia min kìlkawitute hian thihpui khawp sual leh thihpui khawp ni lo sualte hi min han hrilhfiah dap dap thìn sela … beràm hrisèl nih pawh hi a nuam zual ngawt ang chu.

 

 

Mahse, thu tak tak inzawh phawng phawng hi thian leh thian inkârah pawh a lo harsa duh khawp mai a! A hun remchâng a rawn inher chhuak ve leh mai bawk a.

Zan khat chu, “Thianpa, Pathian Fapa Isua Kristâ tlanna hi i pàwm zâwng a ni ve em?” tiin ka zàwt ta rawih a. Zàwt sual vak tùrah ka inngai lo. Ani chuan chiang tak mai hian ka mitah a rawn en a. “PAWM LO,” ti ta lo chuan — titak èm èm hian, “Thianpa, ka awih asin! Isua Krista hi mi Chhandamtuah leh ka Lalpa atân ka pawm ve khawp mai!” tiin mi chhâng ta a. Ka thinlung chhûng a dai nuam sawng sawng nghàl zu nia!

Mihring nunah hian beidàwn châng—beisei rèng nei loh châng pawh a awm bawk thìn! He thawnthu hi i hre tawh ngai em? Sipai Chaplain chu thusawina dawhsànah a lo thu fel hman tawh a. Sipai engemaw zàt lai Chapel-ah chuan tlai inkhàwm hun hmangin an rawn kal a. Thutna pawh a khat viau tawh tihin mi pathum thutna tùr chiah a la àwl a. Tichuan, thìr-khaidiat ri chhak chhak rî leh mi pathum rawn lùt an rawn awm nghàl a. Chapel chhûng chu a ngui ruai mai!

Mi pathum rawn lùtte zînga a laitàa mi chuan thìr-kutkawl leh ke-kawl a rawn bun lùt a. A sîr tawna rawn lùt vete chu a vêngtute an ni. Atùk leh maia tihhlum tùr a lo ni si a, a tâna Chapel Service hnuhnùng ber a ni dâwn tawh tih pawh inkhàwmho zawng zawngte chuan an hria —

Chaplain hian eng thu nge a sawi ngeia in rin? Awm khawmho zawng zawngte rilru a khawih kim ngei mai … a tùkleh hun atân maia inbuatsaih a ni lo … a chatuan hmun tùr a tichiang ta nghàl a. Chaplain chuan thuchah leh fuihna tawi tè chauh a sawi nàin thìr khaidiat nèn baptisma a chang zui ta —mamawhtu mamawh thuchah puangtu kan mamawh zual ta hle mai! Sual chi sawm tal hi hre chiang ila, NGAIHDAMNA awmzia leh SUAL SIMTE NGAIDAMTU chanchin tha THUTAK hian min tizalèn thei a lo ni e!

Kan ram CRUSADE SPEAKER-ten SUAL, SUALNA thupui hi an chai nasa ve hle mai! Hamartia bàk kan sawi lang lo lutuk a; chuvàngin, suahsualna a pung zèl bawk a—Bible-a SUAL sawina chi sawm rawn tàrlan hi a phû ve tawh e. Zir thahnemngai zualte tâna hlàwkpui tham a nih beisei ila. Tin, Crusade apianga Eden Bawhchhiatna chanchin chauh sawi tawh lovin, Kalvary Tlanna hnu lama Tlùksanna Ràpthlàk tak a thlen leh daih tawhzia leh AntiChrist pawh Hmangaih Johana te dam laia che hman tawh a nihzia te, chuta tanga Pathian Thutak leh Pathian dik taka kìr leh (about face) nân he LESSON hi tu tân pawha  a tangkai zui ka beisei bawk e.

 

Ka sualte kross chungah ka Lalpan a phur ta,
Eng zàta tam pawh A ngaidam duh;
Lungngaih sawi hleih theih loh tuarin Kalvary-ah
Ka sual man bat min tlàksak zo ta!

 

1. Tum thelh, sual (hamartia) : αμαρτίαν 266*Strong’s Concordance 

SUALNA (hamartia) avângin taksa a thi a ni; thlarau erawh chu felna avângin nunna a ni.” — Rom 8:10

“En teh u, Pathian Berâm No, khawvêl SUAL (hamartia) kalpuitu tûr saw!” — Johana 1:29

“Dân avângin SUAL  (hamartia) hriat famkimna a lo awm a ni si a.” — Rom 3:20

“Mi pakhat avàngin SUAL (hamartia) khawvèlah a lo lût a, SUAL  (hamartia) avàngin thihna a lo lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a.” — Rom 5:12

SUAL (hamartia) chuan thihnain ro a rêl ang takin, khawngaihna chuan felnain chatuan nun channa khawp hialin kan Lalpa Isua Krista zâra ro a rêl theih nân.” — Rom 5:21

SUAL (hamartia) man chu thihna a ni si a; Pathian thithlâwnpêk erawh chu kan Lalpa Krista Isua zârah chuan chatuana nunna a ni.” — Rom 6:23

“… Fapa Isua thisenin kan SUAL (hamartia) zawng zawng min tlenfaisak thìn a ni.” — I Johana 1:7

 

2. Rin chin pêl, dodâl (parabasis) : παραβάσεως 3847*Strong’s Concordance 

 “Nang dân chhuangtu, nangin dân i BAWHCHHIAT (parabasis) avângin Pathian i tihmingchhe thîn a ni maw?” —Rom 2:23

“Dân chuan thinurna a siam thîn si a; Dân awm lohnaah chuan BAWHCHHIATNA (parabasis) pawh a awm hek lo.” —Rom 4:15

“A nih loh leh, eng tiziaa Dân chu awm nge ni le? Chi thlah, thutiamna chu, a lo kal hma loh zawng BAWHCHHIATNATE (parabasis) avângin belhchhahin a awm a, vântirhkohte hmanga palai kuta rêl a ni.” — Galatia 3:19

 

3. Bawhchhiatna (paraptoma) : παραπτώματα 3900*Strong’s Concordance 

 “Tin, SUAL (paraptoma) a lan lehzual theih nân Dân a lo awm leh nghâl a. Nimahsela, SUAL (paraptoma) a punna apiangah khawngaihna a pung lehzual thîn.” — Rom 5:20

“Unaute u, mi, SUAL (paraptoma) engpawh a tih lai phâwkin awm sela, nangni thlarau mite u, “Thlêmna ka tâwk ve dah ang e,” tia invêng tha chungin chutiang mi chu thuhnuairawlh takin tungding leh rawh u.” — Galatia 6:1

“Tin, tawngtaia in din hun apiangin tu chungah pawh thu pawi engemaw in neih chuan ngaidam rawh u; in Pa vâna mi pawhin in BAWHCHHIATNATE (paraptoma) chu a ngaihdam theihna tûr che uin.” — Marka 11:25

 

 4. Pawisak lohna, fel lohna, khawlohna, Dân lova khawsa, Thil sual titute (anomia): ανομίαν 458*Strong’s Concordance 

“Nangni thil SUAL TITE (anomia) u, ka hre ngai lova che u….” — Matthaia 7:23

“Ring lo mite nên rual lo taka nghâwngkawl bât dûnin awm suh u; SUAHSUALNA (anomia) leh felnain engnge intâwmna an neih? A nih loh leh, thim leh êngin engnge inpâwlna an neih?” — II Korinth 6:14

“Tupawh Pathian hrin chuan, Pathian chi amahah a awm reng avângin thil a TISUAL (anomia) thîn lo; Pathian hrin a nih avângin thil a TISUAL (anomia) thei hek lo.” — I Johana 3:9; 5:18

 

5. Bâ, leibâ (opheilema) : ὀφειλήματα 3783*Strong’s Concordance 

“Vawiinah hian kan ei khawpin chaw min pe ang che. Kan BATTE (opheilema) hi min ngaidam ang che.” — Matthaia 6:11f

“Kan SUALTE (opheilema) hi min ngaidam ang che.” — Luka 11:4

“Chu mi avâng chuan, vân ram chu, lal ber tuemaw a bawite hnêna sum chanchin tihfel tum nên chuan, tehkhin a ni. Tin, a han tihfel tan chuan mi pakhat talent sîngkhat BA (opheilema) a hnênah an rawn hruai a. Tin, pêk tûr a neih loh avângin, a pu chuan, amah nên, a nupui nên, a fate nên, a neih zawng zawng nên hralh a, rulh tûr thu a pe a.” — Matthaia 18:23-25

 

6. Nungchang leh awmdân fel lohna (adikia) : αδικίας 93*Strong’s Concordance 

“Kan sualte thupha kan chawi chuan, kan sualte ngaidam tûr leh, kan FEL LOHNA (adikia) zawng zawng tlêngfai tûrin amah chu a rinawmin a fel a ni.” — I Johana 1:9

“Tupawh thil TISUAL (adikia) apiangin Dân pawh a bawhchhe thîn; sual hi Dân bawhchhiatna a ni si a.” — I Johana 3:4

“FEL LOHNA (adikia) zawng zawng hi sual a ni; thihna khawp ni lo sual pawh a awm bawk a ni.” — I Johana 5:17

FEL LOHNA (adikia)-ah a lâwm lo va; thutak erawh chu a lâwmpui thîn.” — I Korinth 13:6

 

7. Pathian ngaihsak lohna (asebeia) : ασέβειαν 763*Strong’s Concordance 

“Thu tak fel lo taka dâltute PATHIAN NGAIHSAK LOHNA (asebeia) leh fel lohna zawng zawng chungah chuan vân atangin Pathian thinur a lo lang a ni.” — Rom 1:18

 

8. Thu awih lohna (parakoe) : παρακοῆς 3876*Strong’s Concordance 

“Mi pakhat TIHMAWH (parakoe) avâng khân mi tam tak chu mi sual an lo ni ta a; chutiang bawkin, mi pakhat tih-awi avâng khân mi tam tak chu mi fel an lo ni ang.” — Rom 5:19

 

9. Chimawmna (poneria) : πονηροὺς 4190*Strong’s Concordance 

 “Khawvêl tâwp hunah chuan chutiang bawkin a awm ang; vântirhkohte chu an lo chhuak ang a, mi fel zîng ata MI SUALTE (poneria) chu an hlîr ang.” — Matthaia 13:49

“Chu mi lai chuan Pharisaite chuan a thu sawia an man theihnazia tûr an va inrâwn a. Tin, an zirtîrte, Heroda pâwla mite nên, a hnênah an tîr a, chu mite chuan, “Zirtîrtu, mi dik tak i ni a, tih tak zetin Pathian kawng thu i zirtîr thîn a, pawisak chuan tumah i nei lo tih kan hria e; tumah thlei bîk i nei si lo va. Chutichuan, engtin nge i ngaih? min hrilh teh khai! Kaisara hnênah chhiah chawi hi a thiang nge THIANG LO (poneria).” Matthaia 22:15-18

 

10. That lohna (kakos) : κακοi 2556*Strong’s Concordance 

“Kawchhûnga mi, mihring thinlung atangte chuan, ngaihtuahna sualte a lo chhuak si thîn: inngaihna te, rûkrûkna te, tualthahna te, uirêna te, awhna te, sualna te, bumna te, hurna te, îtsîkna te, sawichhiatna te, chapona te, âtna te hi; chûng THIL SUAL (kakos) zawng zawngte chu kawchhûng atangin a lo chhuak a, mirhing chu a tibawlhhlawh thîn,” a ti a. — Marka 7:21-23

“Bawi SUAL (kakos) chuan, a rilruin, ‘Ka pu a lo kal lawk dâwn lo ve,’ tiin…. — Matthaia 24:48

 

 Adama thlah, Nova atanga thlah la kal zêla mi kha ka ni. (Rom 5:12, 19 Cf. Genesis 3:4; Ephesi 2:1-3; II Timothea 2:26; I Johana 3:4) —SUAL CHI HRANG SAWMIN A BAWM KHAH LUK!

 

Isaia 1:5 Engati nge in hel zual deuh deuh va, vuaka in la awm cheu ni le? Lu chu a pumin a nâ a, thinlung pawh chu a pumin a chau ta. 1:6 Kephah hnuai atanga lû thleng zakin dam lai rêng rêng a awm lo; pem te, vuak duk chur te, pân hnai late hlìr a ni: chùng chu an hmet ping lo va, an tuam hek lo va, hriak an hnawih hek lo.
 
 
 

WELCOME!

Lèn luhna thlàkhlelhawmte —

 

 

Damna tluantling kan mamawh a ni!

 

Gelead thinghnai hnawiha dam mai mai chi kan ni ta lo! Damna tluantling ERAWH CHU a awm!

 

 

Aw, Aigupta fanu thianghlim,
Gilead-ah chho la, thing hnai hnawih mi han la rawh,
Damdawi tam tak i hmang thlàwn ta,
I tân damna rèng a awm lo ve.
Jeremia 46:11
Advertisements

2 Responses

Subscribe to comments with RSS.

  1. hmingtea said, on December 19, 2009 at 4:44 pm

    I lo ril ber e.

  2. chawnghilh said, on December 19, 2009 at 4:50 pm

    Mi(sual).com-ah ka lut-chhuak zing bawk a, SUAL kawnga RIL tak nih a ngai! 🙄 Kan ramah an sual ril lo deuh va, misual chhanchhuah dan kan la thiam tawk lo a ang.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: