Chawnghilh's Blog

Snow Slams Shut us Up —gonna be a White Christmas

Posted in Qualitus : Habitus by chawnghilh on December 19, 2009

1. Kan kawtkai sumtual leh leikapui kailàwn, thenfai ka la hmabàk!

2. Kan vêng lamlian phei vûrin a khat vek.

3. Synagog-a Inkhàwm tùr Juda Car a ni mai thei!

4. Kan vêng phei, motor veivàk awm loh tlawk tlawk zia!

5. Kan backyard-ah sîrvate’n tùkthuan an rawn kìlho, antam huan a chul zo ta! Fountain a chim dan atang hian a lo berah inches 13 a chìm tawh chiang mai! 

6. Ràlkhata saw Roadcruiser-in a nawr lai saw—thlîr chiang teh …

 

December 19, 2009 : Ka zìng tho peih lo lutuk zùnchhuakin mi kaiharh tho tho si! Room chu 68°F-ah ka set hrim hrim a. A lum nuam tàwk khawp. Meilum chhêmin kan ai ngai lo va, 1950 hun lai facility kha la hmang cheu mah ila —AC-ah hi chuan power supply a tha tàwk bawk a. Pathian zârah kan khawsa nuam ve viau. 

Mahse, tùkin zînga kawngkapui han hawn dâwn pawh kha nawr hawn a sak riau mai a—pâwn lamah vûr a lo khàwn sàn tawh èm vàng a ni ber. Han thlîr chhuak ila, a vâr vo ringawt a—thingkùng hnah tla kawlh tawh bàk hmuh tùr a vâng hle a. Zâr tin chunglam hi a khàwn vâr vek a. Vûr seh chu a na khawp ang. Kan Vêng kawng phei chu streetcruiser (dozer)-in a la rawn nawr fai bawk si lo va—car pakhat tlàn lai ka zu hmu a. Ka rin dànin kan piah lawka Synagog-a inkhàwm tùr Juda-ho an nih ka ring. Juda-ho synagog-a inkhàwm tùr hi—kea kal phàk china khawsa an nih ngat chuan—car an hàwlchhuak vak ngai lo. Mahse, kea dai chi rual a ni ta si lo. Kan chhehvèlah inches sarih vèl chauh a tla a, hmun tam zàwkah inches sawmlehpahnih a ni—fîmkhùr a ngai tàwpkhàwk a ni ber! Chhuahvah loh a him ber. Fîmkhur chuh hlè kârah, mi dang fimkhur thiam tàwk lote zârah chètsualnaah kan inhnamhnawih ve thei tho tih hriat tùr! “Misual lakah chuan min chhandam …” tih pawh kan tawngtaina hla a nih reng hi!

Tùkin zîng TV-ah ringawt pawh vehicle accident engemaw zàt lai a thlen leh tawh thu an rawn puang dup dup bawk. Car tam tak kawng sìrah pullover a ni a; emergency light nèn an de sup sup mai! Kawng a nàl a, driver experience lo fê fê a awm ve tih hriat chian nân a vàngtan zàwngin an tlèng zàwl zàwl mai! Monday-a kawngpui thianfai hman vek tùrin state sorkârte pawhin tan an la nasa nghàl hle. Kawngpui tluana chi phul a ngai dâwn—an insêngso mai mai leh ngawt ang! Skyline Drive-ah phei chuan inches 12 lai lai a tla! A kawng a zîmin, a chhuk-chho kìkawikual ve si a, fîmkhur a ngai zual khawp ang! Virginia hmun thenkhatah 13½ inches a tla bawk! 18 inches a tlàkna pawh a awm!

Copenhagen-a han kal Barrack Obama—US President-in a duh ber chu HAWN VAT VAT—vûrin a dan khawtlai a hlauthàwng hle a.  Tluang takin a rawn thleng tawh bawk e.

Thenawmhote pawhin an kawngkapui an la hawng rih bìk lo tih ka chianna pawh an kawtkai zawng zawng vùrin a la khuh hneh èm mai! Kei pawhin suahdûr ka la hùm peih rih lo!

Kan backyard-a feeder hnuai vèl chu robin red-breast leh chawngzawngten nuam ti takin an tùkthuan an rawn kìlho va. A reh tlawk tlawk ringawt a. Ka tihrìk chhun Television lah chuan AIRPORT DELAY a rawn tisek a, window blinds han hawng de de pawh ni ila, vûr a la sûr char char reng mai a. Chhuah ngaihna a awm lo. Buhfai ka lo inlei khàwl lo va; chhuan thum vèl min la daih mai thei! Bus tlàn thìnte pawh a khaihlak vek a, abìk takin Christmas Shopping hun atâna weekend a ni tak tak tawh a; hetiang vûr sûr nasa hnuaiah chuan thil a khirhkhàn hle a. Mall lamte pawh hawn ngaihna awm lo khawpa an buai a hlauhthàwnawm viau! Public Safety an ngaipawimawh a—englai pawhin fîmkhur chhuah reng tùrin an infuih chàmchî reng a ni.

He laiah hian vûr kan nei nàin, ruah leh vûr inkawp a ni lo hlauh va, a la ziaawm fê! Palestina ram kan sawi fo thin hi Mediterranean Type of Climate nei a ni a. Ruah leh vûr sûr nei kawp a ni. December hun lai phei hi chuan ke ngata Nazareth khua atanga Bethlehem (110 Kilometers or 80 miles) —kawng mùmal lo, raipuar chung leh sabengtung kaia kalna chi a ni lo hrim hrim! Rome Lalber Kaisara tân tak pawha a Lalram awp chhûng khawvèla Chhiarpui kohna HUN a ni lo hrim hrim tih chu literature zirmite chuan an hre thiam khawp ang —UNIVERSALITY a awm lo hle!

Nimahsela, Zirtîrna dik lo leh a mi ngaih chìnna wine —khawvèl mite a lo tulh ruihna fìr namai lo tak chu hre chiang phal lovin kan rui thle mêk zèl zawng a nih hi! 

“Hawh teh u, tui tam taka thu nawhchizuar ropui tak hremna chu ka entîr ang che; leia lalte chuan ani chu an ngai thìn a, leia awmte pawh chu a mi ngaih chînna wine chuan hrai ruihin an awm thìn,” a ti a. Chutichuan, ani chuan Thlarauvin thlalèrah mi kalpui a; tin, Pathian sawichhiatna hminga khat, lu sarih leh ki sàwm nei, Sakawlh sen tak chunga chuang hmeichhia ka hmu a. Chu hmeichhia chuan puan senduk leh senlàr a sin a, ràngkachak leh lungmantam leh tuikeplungin a inchei a, ràngkachak no, thil tenawm, a mi ngaih chìnna thil bawlhhlawha khat a keng a, a chalah chuan, “Thurùk Babulon khaw ropui, leia nawhchizuarte leh Thil tenawmte Nu,” tia hming ziak a awm a. Tin, chu hmeichhia chu mi thianghlimte thisen leh Isuâ màrtarho thisena rui ka hmu a …” —Thu Puan 17:1-6

 

 

 

Thosi-kàptuin ren miah lova nilênga DDT chawhkawi a kàp chur chur ang hi a ni deuh ber mai —hawina lam apiangah mahni car hai chhuah ngai deuh vek a ni ta! Sunday-ah a la sùr zawm ang a —Monday zîng chu loh theih lohva inthuam lum a, suahdûr lek chhuah hrim hrim a ngai tawh dâwn! Vûr a lo khal hman vaih chuan hna a khìn zual khawp ang. Black-ice a nih hman phei chuan che thei lo fe fe kan awm ngei ang! Mahni kawtkai tihfaite chu a nuam alâwm! A tlângpuithuin hetiang kawtkai tifaia inhlawh hi an awm thìn a, foot-path chin then faiah US $ 20 an hlawh tlângpui thìn!

Lushai Chhokra Bah Morning Star ngei maiin sàp nupui a neih nîa vûr thlipui mawlh kha—kha aia vûr tla nasa leh chhah kha helai hmunah hian a awm nawn mawh tawh khawp asin maw le. Nupui neih hun kha a hre hle ni tùr a ni!

WELCOME!

Lèn luhna thlàkhlelhawmte —
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: