Chawnghilh's Blog

Thlalèr Inbiakna Puan In Zekhelhna – Part I

Posted in Qualitus : Habitus by chawnghilh on December 20, 2009

 

 

Hei hi Krista Rawngbâwltuten hre chiang tlâng vek ila chuan—kan Mizoramah Chhandamna awmzia leh kalphung kan hril fuh lehzual ngei ang!

 

Thlalera Inbiakna Puan In leh a Nihphung

Inbiakna Puan In kha BAWKTE ang mai a ni a—a chung pawh pawnpui ang titiha khuh a ni; a tual zau zâwng pawh 150×75feet a ni. A hungna pal feet 7-a sâng, ban 120 lai nei a ni. Banah a hung phuina linen puanzaisìn an khai kual vek bawk.

Puan In (Inbiakna Puan In) bìk kha Hmun Thianghlim leh Hmun Thianghlimbera inpindan a ni. Puan in kha acacia thingphèk —rangkachaktuia luan a ni a; bang anga inchuktuah rem taka rem khàwm, feet 45 X feet 15-a thui leh sâng a ni. A chung lamah ni sa leh ruahtui laka puan in chhûng a hul theihna tùrin puanzar thuah li laia chhaha khuh a ni; a chhungril ber puan chu puannem (linen) a ni; cherubim lemtea zeh-mawi a ni nghe nghe. A thuah hnihna chu kel hmul atanga tah a ni thung a; thuah thumna chu berampa vun —rawng sena thlak hnana siam a ni. A pawnlang ber chu zawngdulinu vun a ni thung. Puanzarte chu chhuatah thir-khang kual neia chilh beh a ni.

Inbiakna Puan In kalphung leh a hungchhung kawtlaite hian awmze ril tak an nei vek a; Pathianin mihringte tana Amah an panna tur kawngkal awmzia fel fai taka a tarlanna a ni. A hungchhung kawtlai hi pal sang taka hung chhuah vek, luhka pakhat chiah chauh awm a ni. Inbiakna Puan Ina lut duh tan duh duh dana danglama lawn liam mai mai chi a ni lo —kawngkapui a\ang ngei chauhva luh tur a ni, chu Kawngkapui chu chhuahchhawng lama awm a ni a (a lutte reng reng chuan khawthlang lam an pan lut tihna a ni; milembemi —ni be thinte erawh chuan khawchhak lam hawi ziahin an pathian an be thung) Kawngkaa lut reng reng chuan, dar-maicham (brazen altar) an hmu hmasa ber a; chumi hmunah chuan an sualthawina ran an hlan ngei tur pawh a ni, chumi hnuah chuan puithiamte hnenah an hlan chhawng ang a —Puan In chhunga dilpui-rawngbawlna leh Pathian nena inpumkhatlehna rawng pawh an lo bawlsak chhunzawmna turin.

Hei hi a kawng kalhmang dik tak, Israel faten Pathian an rawn pan theihna kawngkal awmchhun chu a ni. Kawng dang reng reng a awm lo. Thuthlung Hluia Pathianin chiang taka Amah an pawh theihna tura kawnghmang a lo ruatsak ang chiah chiah tho hian keini pawhin Iesua Messia kaltlang chauhvin Pathian Nung Yahweh chu kan pan thlengin kan be ve thei ta bawk a ni.

Inbiakna Puan In Kawngkhar

Inbiakna Puan Ina mipuite an luhna tur hian Kawngkapui pakhat chiah a awm. Chu kawngkapui chu feet 30-a zau a ni. Inbiakna Puan In kawthmai lam, ni chhuah chhawng ngeia a hung phuina hmun lai takah Kawngkapui chu a awm a ni. Kawngkapui chu puan zarin a khuh hnup mai a; puanzaisin (linen) rawng Pawl, Senduk leh Senlar inphiar chuat a ni.

Kawngkapui pakhat awmchhun chuan Messia —chumi Kawngkapui chauh kaltlanga Pathian nena inpawhna leh Pathian va biakna kawng awmchhun chu a ni. Hetiang ti tur chuan, Pathian awmna va pawh turin he Kawngkapui kaltlang khera luh ngei ngei a ngai a ni. Amah Iesua vekin “KEIMAH,” a intihna thu leh hlaah pawh —-Isuan a hnenah, “Keimah hi kawng leh thutak leh nunna ka ni; keimaha kal lo chu tumah Pa hnenah an lo kal lo. —- Johana 14:6

tih leh

Kei kawngkhar chu ka ni; tupawh keimahah a luh chuan humhimin a awm ang a, a lutin a chhuak ang a, a ei tur a hmu bawk ang. — Johana 10:9

Heti hian a la sawi cheu bawk —-

“Kawngka zimah chuan lut rawh u; boralnaa kalna kawngka chu a zau va, a kawng pawh a zau bawk a, chu mi lama lut chu tam pawh an tam hle a ni; nunnaa kalna kawngka chu a zim a, a kawng pawh a chep bawk a, a hmutute pawh tlemte an ni. — Johana 7:13-14

Inbiakna Puan In Kawngkaa luh hi Israel-te tan phei chuan awmze nei tak a ni. Kawngkaa luh chuan miin a sual ngaihdamna a hmu theiin, Pathian nena inpawlna a nei thei thin a ni. Kawngkaa mi a luhin a thil hmuh hmasak ber chu DAR MAICHAM a ni, chumi hmuh tawh phawt chuan miin a sualzia a hrechhuak ngei a —Pathian nena inpawl turin sual thawina thisen a mamawhzia a hrechhuak bawk thin. Tichuan, sual sima hawikirin a sual thawi nan inthawinate a hlan ta thin a; sim ve lote chu he kawngka zimah hian an lut ve meuh lo. 

Dar-Maicham, dartuia luan —Inthawina Maicham chu Inbiakna Puan In kawngkapui luh phata Biakbuk kawtkai tualzawla inhung a ni. Hebrai tawngbul ang phei chuan MAICHAM tih hi ‘TALH, THAT, TIHLUM’ tihna a ni. Latin (Rom) tawnga ALTA an tih awmzia pawh ‘SANG (high)” tihna a ni a. Maicham ALTA chu sualthawi hlanna hmun dawhsana awm a nih avangin. Maicham chu lei chhunpawn chungah ngei a lo awm a; a kiang vela furniture dangte aia dah san a nih ang ngeiin, kan sual thawina Pathian Beramno Messia pawh kha tlang pakhat Golgotha-ah thinga khaikan a ni ta chiah reng a ni.

Inbiakna Puan Ina Dar-Maicham

He dar-maicham hi thing chi khat acacia an tiha siam; dartui luan a ni a (dartui-luan hi Bible kalphungah chuan Rorelna entirna symbol a ni); a kil li tin sei zawng kha 7.5 feet leh 4.5 feet-a thuk a ni. Sualthawina ran hlante an thlunna turin dar-maicham kil li tinah KI (horn) a awm kim vek a; chu chu ‘chhandamna ki (horn of salvation) an tih thin pawh a ni.

He maicham hi sual thawina ran talh an halralna hmun a ni. Thilsiam pawisawi lo thisen ngeia intihthianghlim hmasak kha misual lailet derin Pathian thianghlim a va pawh dawna thil tul ngei ngei ni hmasa a ni. Miin a sual thawi nan ran a rawn inkaihchawp a ngai thin a —ran rual zinga a pa, demawmna leh hmelhemna reng reng nei lo kha Inbiakna Puan In Kawngkapui kaltlang ngeiin puithiam hnen a rawn thlenpui a ngai thin a ni.

Tin, hâlral thilhlan lu chungah chuan a kut a nghat ang a; tichuan atân inremna siamna tûrin pawmsak a ni ang. —- Leviticus 1:4

Sualthawina tur ran lu chungah chuan sualthawitu chuan a kut a nghat ang. Mawhchhiat tur zawng zawng ran chungah a hlan ang. A sualna leh khawlohna chu ran chungah a nghat vek bawk ang. Tichuan, puithiamin ran chu a talh ang a, Hmun Thianghlim luhna puanzar hma lamah chuan ran thisen chu a theh ang a; inthawina ran talh chu a halral ang a; a bang zawng zawngte pawh maichamah a chhung lut ang. Thisen hi inremlehna atana hman (sual khuh bo nana hman thin) leh Thuthlung Hmasaa silfai rawngbawlna bera an hman thin a ni.

“Tisa nunna chu thisenah chuan a awm si a: in nunna atana inremna siamna tura maichâm chunga ka pêk che u a ni: nunna atana inremna siamna chu thisen ngei chu a ni si a . — Leviticus 17:11

Tin, Dan thu zawngin engkim thaw mai hi thisena tihthianghlimin a awm thin a, thisen chhuah lohvin ngaihdamna reng a awm lo. ——Hebrai 9:22

 

Inbiakna Puan Ina Sualthawi-Thilhlan awmze ken thilte Israel fate sualna khuh bon an inthawina thisente kha hman a lo ni thin tak nain, kum tinin inthawinate tihnawn tluk tluk ngai reng thil a ni thin a, khawlohna hriatchhuah nawn leh fona kha lak kian theih vek a nih loh avang khan. Engpawh ni se, Isua Krista, Pathian Beramno kha inthawina hnuhnung leh vawrtawp ni turin a rawn kal ta a —a nunna a rawn hlan fel tawh a ni. Zawlnei Isaia ngei pawhin a lo hrilhlawk tawh ang khan, talh turin Messia chu talhtu hmaa hruai leh kan bawhchhiatnate avanga a nakthawla feia vih a ni hial ta a nih kha. A thisen kha khaikanna thingah a bua a; Puithiam lalber a nih zui ang ngeiin Thenthilhlan Tuk khan van hmunah Pa Pathian hmaa zahngaihna lalthutphahah a thisen a han theh ta a nih zui bawk kha! Chutiang thu leh hla chu Bible pawhin min hrilh chiang hle a ni.

Tin, ani chuan an hnenah, “Hei hi ka thisen, mi tam tak tana chhuak tur, thuthlunna chu a ni. (Marka14:24)

In thlahtute pek chhawn, in awm dan engkhaw ni lawilo lak ata chu, thil chhe thei, tangka leh rangkachaka tlan in ni lo va, beram no hmelhem lo leh bawlhhlawh kai lo thisen anga Krista thisen hlu chuan tlan in ni zawk tih in hre si a; (1 Peter 1:18-19)

Kel leh bawngpate thisen leh bawngla vap, mi bawlhhlawh chung theh mahin tisa thiang khawpa a tihthianghlim si chuan, Krista, chatuana Thlarau zara hmelhem lova Pathian hnena inhlana thisen chuan Pathian Nung rawng bawl turin in chhia leh tha hriatna chu thiltih thite lakah chuan a va tithianghlim nasa dawn em! (Hebrai 9:13-14)

Chu mi duhzawng chuan Isua Krista taksa vawi khata hlan nghal vang khan tihthianghlimin kan awm ta. Tin, Puithiam tinrengin kawla ni chhuak chhiara rawngbawlin, sualte engtik maha tibo thei lo inthawina pangngai hlan fovin an ding thin; ani erawh hi chu chatuan atan sualte tana inthawina pakhat chauh a hlan hnuin, Pathian ding lamah a han thu ta zawk a; chuta chin chu a hmelmate a kephah nghahchhana siam an nih hma loh zawng a nghak reng a. Thil hlan pakhat chauhvin tihthianghlim tawhte chu chatuan atan a tifamkim tawh si a.Tin, Thlarau Thianghlim pawh chuan min hriattir bawk a: “Chung ni hnuah chuan an hnena thu ka thlun tur chu heng hi a ni, Lalpan a ti; An thinlungah ka thupekte ka dah ang a, An rilruah ka ziak bawk ang,”tia a sawi hnu khan, “An sualte leh an bwhchhiatnate ka hre reng tawh lo vang,”a ti si a. Tichuan, chutiangte ngaihdamna apiangah chuan sual tan thil hlan a awm tawh lo a ni. (Hebrai 10:10, 14, 18)

Amahah chuan Pathian felna kan lo nih theihna turin, sual reng reng hre lo chu Pathianin keimahni avangin sualah a siam a..” (II Korinth 5:21)

Ki (horns)-te hi Bible hun lai khan chakna leh thuneihna entirna a lo ni tawh thin a. Inthawina hlan a lo nihin, maichama ki-ah te thisen an tat thin, chu chuan sual thawi nan thisen ngei hman thin a nihzia leh inremna a thlen thinzia entirna a lo ni tawh thin a ni. Chutiang bawkin, Messia thisenah thiltihtheihna namai lo tak a awm bawk a. Iesua kha kan “chhandamna ki” a ni ve leh chiah bawk a ni.

LALPA chu ka lungpui leh, ka kulhpui leh, mi chhanhimtu a ni;
Ka Pathian, ka lungpui nghet tak a ni a, amahah chuan rinna ka nghat ang;
Ka phaw leh, ka chhandamna ki leh ka kulhbing sâng a ni.
Fak tlak LALPA chu ka ko vang a,
Chutichuan mi dotute lakah chhandamin ka awm ang.
—Sam 18:2

A chhiahhlawh Davida chhungte zingah chuan Chhandamna ki min siamsak a; —Luka 1:69

Inthawina beram hian Kalhlen Beramte a lo entir zualkai bik a; chu chu Israel faten Aigupta chunga rorelna lek a nih lai —hripui hnuhnung ber a thlen tuma an fatir mipate an hum nana an talh kha a entir chiang hle a ni (cf. Exodus 12:1-13). Chumi dungthul chuan, Kalhlen beramte an talhin a sa an ei a; inthawina beramte chu ei an ni zui zel thin bawk a ni. Inthawina beram hlana an ei ang chiahin, Iesua taksa pawh kha hlanin a awm a; an ei ve tho bawk a ni. Khatia Isua an khenbeh hun laia Kalhlen a intan zanah pawh khan Amah Iesua ngei khan chhang a lak a, lawmthu a sawi zawha a phel kha —a zirtirte hnenah a pe a, “La ula ei rawh u, hei hi ka taksa …” tia a sawi kha (Matthaia 26:26). Khami hun hma lamah pawh khan a zirtirte a lo zirtir lawk daih tawh bawk —-

Tin, Isuan an hnenah, “Tih tak meuhvin, tih tak meuhvin ka hrilh a che u, Mihring Fapa tisa in ei a, a thisen in a in bawk loh chuan, nangmahniin nunna nei hek lo che u. Tupawh ka tisa eia ka thisen in chuan chatuana nunna a nei tawh, tin, ni kin niah chuan ani chu ka kaitho vang. Ka tisa hi chaw tak a ni a, ka thisen hi in tur tak a ni si a. Tupawh ka tisa eia ka thisen in chu, keimahah a awm reng thin, kei pawh amahah ka awm reng thin. (Johana 6:53-56)

Isua ringtu dik tak te tan chuan Amah Iesua ngei kha Pathian Beramno, Kalhlen Beramno ni nghal bawk a ni e.

Maihun, chawhtawlh lianpui —Hmun Thianghlim leh Dar-Maicham inkar lai tak velah a lo inhung ve leh chiah a. Pathianin maihun len zawng tur a pe hran thlip thlep lo nain; darsen (bronze) hmanga siam vek a ni thung. Chutah chuan puithiamten an kut leh kete, Hmun Thiang-hlima rawng bawl tura an luh hmain an silfai ziah \hin a ni.

Inbiakna Puan Ina Dar-Maihun

Maihun inchhawpna hmun chu hmun remchang tak, va hmuh ngawt pawha Pathian pan tura insilfai leh intihthianghlim a ngaih em em zia hriatchhuahtirtu a ni ngawih ngawih nghal a. Puithiamte pawhin Dar-Maicham-ah sual thawina thilhlan an lo hlansak tawh pang a; Hmun Thianghlima rawng bawl zui leh hmain he maihuna tuiah hian anmahni leh anmahni an lo insilfai ve ziah thin a ni; chutiang taka an tih chuan Pathian thianghlim hmaa va thianghlimin an va thi mai mai dawn lo a ni. Tunlaia ringtute tan pawh Kross-a Messia hna thawh kaltlanga ngaihdamna chang kan ni tawh a; chumi hnu lehcheuva A Thu kaltlanga silfai kan la ni zui zel a ni. A Thu hmang chuan ni tina keimahni leh keimahni kan insilfai a ngaih nachhan pawh A hmaa rawngbawl tur leh a tana thawk kan nih vang a ni.

Pasalte u, in nupuite hmangaih rawh u, Kristan kohhranho a hmangaih a, an aia mahni a inpe ang khan, anni chu tuia sila thu chuan tifaiin a tihthianghlim theih nan; chutichuan kohhranho chu bawlhhlawh kai lo leh zur lo leh, chutiang thil reng pu lovin, thianghlim leh hmelhem lova awm zawkin, amah leh amah kohhranho ropui takah a inpe chawp thei ang. (Ephesi 5:25-27)

“Kan thinlunga chhia leh tha hriatna tha lo chu theh faisaka awma kan taksa pawh tui fima buala awmin, rinna famkim neia thinlung tak zet puin i hnaih ang u. (Hebrai 10:22)

 

   WELCOME!

Lèn luhna thlàkhlelhawmte —

 

 

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: