Chawnghilh's Blog

Thlalèr Inbiakna Puan In Zekhelhna – Part II

Posted in Qualitus : Habitus by chawnghilh on December 21, 2009

 

 

 

 

 

 

 

 

 

 

Inbiakna Puan Ina Khawnvar Pasarih Dahna Kuang

Maihuna tui hmanga an kut leh kete an silfai zawh hnu chuan, puithiamte chu Hmun Thianghlimah chuan an lut thei ve chauh va; chu pindan chu Inbiakna Puan Ina a pindan hmasa zawk a ni. Hmun Thianghlimah hian furniture chi thum a inchhawp a —Khawnvar Pasarih dahna Kuang (Menorah), Chhang Dahna Dawhkan leh Rimtui Halna Rangkachak Maichamte an ni.

Menorah an tih, Khawnvar-pasarih Dahna, rangkachak-ti-hlanga siam, khawnvar chhitna fung an tih bawk chu Hmun Thianghlim pindan luha a vei lamah a inhung a. Rangkachak hlir hlak, hlawm khat atanga tuboha chher ngat a ni. Maihun ang bawk khan, Menorah len zawng hi bituk nei thlapa tuk a ni hran lo; mahse, rangkachak hlawm hlak hlawm khat atanga chher-chhuah chu chuti em ema lian turah chuan ngai lo ila.

Khawnvar dahna kuang chuan a lai takah kuangpui a nei chho va; a sir tawn tawnah pathum ve vein a zar chhuak a —tichuan, zar kak paruk leh a laita kuang telin zar sarih a nei ta a. A zar hmawr tin tawpah chuan olive hriak leh chhitna tur lachhum-phita (wicks) an dah far a. A zar peng chhuak tinte chuan vaiumkhal zar (tang) an ang hlawm hle a; kuhmum leh par chhuak tur ang maiin an sawrbawk ting teng bawk. Puithiamte chu englai pawha chung khawnvarte chu chhi eng chhunzawm zat tura hriattir vek an ni. A mit thiang lo va; Hmun Thianghlim chu a en reng tur a ni.

Pathianin Mosia a bia a, “Israela thlahte chu oliv hriak fim tak, chhit tura sawr, khawnvar tihalh reng nan I hnena rawn la turin thu pe rawh. Inbiakna puan ina thuhriattirna puanzar pawn lamah chuan tlai lam atanga zing lam thleng atan LALPA hmaah Aronan dah fel rawh se: hei hi in thlahte zel thlenga kumkhaw dan tur a ni. LALPA hmaah chuan khawnvarte chu dah fel thin rawh se.” (Leviticus 24:1-4)

Hmun Thianghlima eng awmchhun chu he khawnvar chiah hi a ni, he khawnvar hi awm ta lo se, he pindan thim tak chhungah hian puithiamte pawh an ngui nghuai ngei ang. Chu khawnvar eng chuan Chhang dahna Dawhkan leh Rimtui Halna maicham a va en a —chungah chuan puithiamten mipuite tana dilsak-rawngbawlna pawh Pathian hnenah an thlen theih phah ta thin a ni. Pathian biakpawh theihna hmuna khawvar a inhung ang chiah chuan, Isua kha “mi tin tana eng dik tak” kan dawn chu a lo ni ve ta (cf. Johana 1:9) —Ani chu khawvel thim rawn entu a nih ang ngeiin Ama zarah Pathian chu miten kan lo hmu fiah thei ve ta a; thimthama thlarau cheng mai mai kan ni ta bik lo a ni. Amah Iesua ngeiin,

“Kei khawvel entu ka ni; tupawh mi zui chu thimah a leng tawp loving a, nunna eng a nei zawk ang,” a ti a. (John 8:12)

Entua khawvela lo kal ka nih hi, tupawh mi ring apiang thima an awm reng loh nan. (Johana 12:46)

a lo tih tawh kha!

Khawnvar kuangpui ber khan Isua a lo entir reng a; keini ringtute hi a kuangpui atanga zar chhuak kuang parukte kha kan ni. Chu chu kan ni tih kan inhriat chian avangin “Eng fate (Ephesi 5:8)” kan lo ni ve tain —Iesua atanga eng dik tak chu kan lo dawng chhawng ve ta. Iesua ngei pawhin, “Khawvel eng in ni,” min ti tawh a; “Khawvel eng in ni e. Tlang chhipa khaw awm chu thuhruk theih a ni lo. Miin khawnvar halin hrai hnuaiah an dah ngai lo, a dahnaah an dah zawk thin; tichuan, in chhunga mi zawng zawng a en thin. Chutiang bawkin in eng chu mi mit hmuhin eng rawh se, chutichuan in thil tih thatte an hmu ang a, in Pa vana mi an chawimawi thei ang (Matthaia 5:14-16),” a ti. Chu chang a la ni lo, khawnvar dahna zar tinte chu Iesua nena kan inlaichinna entir nan a lo hmang leh bawk a, “Kei grep hrui tak tak ka ni, nangni a pengte … ka tel lovin engmah in ti thei lo (Johana 15:5),” a ti.

He khawnvar dahna kuang sarih nei kher kher hi rangkachak-ti-a luan mai mai a ni lo va; rangkachak hlir hlaka chher chhuah a nihna pawh hian awmze ril tak a nei a ni. Rangkachak thianghlim hlang hlak hian Iesua Messia that famkimzia leh a pathianna a lo entir chiang hle a —kuang sarih hian Bible number kimchang a entir lehzel bawk. Messia that famkimna azarah ringtute hi siam puitlinin kan lo awm ta a ni.

Inbiakna Puan Ina Chhang Dahna Dawhkan

Chhang Dahna Dawhkan hi acacia thinga siam, tereuh te —rangkachaktuia luanchhuah parh a ni. Feet 2 leh inchi 3-a sang awrh, feet 3-a sei, a vang lam feet 1 leh inchi 5 a ni. Hmun Thianghlim luha sir dinglam —khawvar dahna epa inhung a ni ve thung a; chutah chuan chhang 12 a inchhawp a —chung chhangte chuan Israel hnam 12-te an lo entir thin. Puithiamten chhangphut dip tha mi atangin chhang an ur a; chawlhkar tluanin dawhkanah chuan LALPA hmaah an chhawp chhuak thin a —sabbath ni apiangin puithiamten va lain, Hmun Thianghlimah chuan an ei ta thin a; tichuan, chhang tharlam zawkte dawhkanah an chhawp leh ziah thin bawk. Puithiamte chauhvin chhang hi an ei thiang a; eina hmun bik pawh Hmun Thianghlimah chauh —thil thianghlim chu hmun thianghlima ei tur a nih tlat avangin!

“Chhang chhawpchhuah” te chu “Chenpuina chhang” tiin an ko ve tho va; a chhan pawh LALPAN a chenchilh reng thin vang a ni. Dawhkan leh chuta chhang inchhawpte chuan Pathianin mihringte a chenchilh duhzia leh rinrawla an neih ve ve thil thuhmun a nihzia a lantir chiang hle. Thiana insiamna zau zawk, chawhlui inkilpui tura insawmna ngawih ngawih anga lantir chi a ni hial a. Chaw kilho na na na chu inpawhna pawh a thuk lo thei lo. Pathian hian inhawng takin mite chaw kilpui turin a sawm reng a; Amah nena chhungril taka inpawh turin leh mihringte chenchilh tlat turin rilru lian tak englai pawhin a pu reng thin a ni.

Isua ngei pawh khan chu rilru chu tilang chiang turin Juda-ho tualchhung khawsaknaah khan nawhchizuarte leh misual, chhiahkhawnte zingah chaw a kil ve tak hial kha! Kha kha he khawvela thian a rawn zawnna kawnga a tih a la ni chauh zawk. Iesuan Ama hnenah misuaksual zawng zawngte ko khawmin khawvelah a rawn kal a; Pa Pathian nung hnena a thlenpui theih tura chherchhuah atan a duhin—Pathian nena inlaichinna kumhlun nei turin a duhsak ngawih ngawih hlawm a ni.

Tin, Isuan an hnenah, “Kei hi nunna chhang chu ka ni; tupawh ka hnena lo kal chu a ril a tam lo vang, tupawh mi ring chu engtikah mah a tuihal lo vang. Nimahsela nangnin mi hmuh pawhin mi ring si lo tih ka hrilh che u kha. Pain mi pek zawng zawng ka hnenah an lo kal vek ang; tupawh ka hnena lo kal chu ka hnawt chhuak tawp lo vang. Mahni duhzawng ti turin van atanga lo chhuk ka ni lo va, mi tirtu duhzawng ti tura lo chhuk ka ni zawk e. Hei hi mi tirtu duhzawng chu a ni, anin mi pek zawng zawng engmah hloh lo ila, ni kin niah chuan kai tho zawk ila. Tin, hei hi ka Pa duhzawng a ni, tupawh Fa hmua ring apiangin chatuana nunna nei sela; tin, keiin ni kin niah chuan ani chu ka kai tho vang,” a ti a. Tin, “Van atanga chhang lo chhuk chu ka ni,” a tih avangin Judate chu a chungah an phunnawi a. “He mi hi Josefa fa, Isua a ni lo vem ni, a nu leh pa pawh kan hriat hi? ‘Van atanga lo chhuk kan ni,’ eng ti tiha ti nge ni le?” an ti a. Tin, Isuan an hnenah, “Phun phunnawi suh u. Pa mi tirtuin a hip loh chuan tumah ka hnenah an lo kal thei lo vang; tin, keiin ni kin niah chuan a lo kala chu ka kai tho vang. Zawlneite lehkhabuah, ‘Pathian zirtirin an awm vek ang,’ tih ziak a ni. Mi tin Pa thu hriaa zir apiang chu ka hnenah an lo kal thin. Tumahin Pa an hmu ngai ka ti lo, Pathian hnena lo chhuaka chauh lo chuan; ani chuan Pa chu a hmu. Tih tak meuhvin, tih tak meuhvin ka hrilh a che u, tupawh a ring chuan chatuana nunna an nei tawh a ni. Kei hi nunna chhang ka ni. In thlahtuten thlalerah manna kha an ei na a, an thi a. Hei hi van atanga chhang lo chhuk chu a ni, miin a eia a thih loh nan. Kei hi van atanga chhang nung lo chhuk chu ka ni, tupawhin he chhang hi a ei chuan chatuanin a nung reng ang, a ni, khawvel nun nana ka pek tur chhang chu ka tisa hi a ni,” a ti a. (Johana 6:35, 49-50)

Pathian chuan keimahni nena inpawlhona a thlakhlelh em avangin kan “nunna chhang” a nihzia tilang chiangin van atangin he khawvelah mi zawng zawng tana chatuana nunna pe turin leh Amah chu kan ei theihna turin a rawn kal phah a. Kalhlen ruai kil hma zanah pawh khan a zirtirte hnenah Amah ngei kha chhang nung a nihzia a intarlang nawn leh chiah a nih kha:

Tin, an ei laiin Isuan chhang a la a, mal a sawmsak a, a phel a; tin, zirtirte hnenah chuan a pe a, “La ula, ei rawh u; hei hi ka taksa a ni,” a ti a.” (Matthaia 26:26)

Isua taksa nghaisak leh tihduhdaha a awm avang chauh khan Pathian nena kan inpawhlehna a inhawng thei ta a. Tunlai huna LALPA Zanriah kan kil hian thutak pawimawh tak hriat reng kan neih vanga kil kan ni. Vawiin hian Mosia hun laia thlaler biakbuk ang khan, Pathian hian a mite kianga rawn chenchilha hlimna ruaipui rawn theh ve hi a la thlahlel cheu asin.

Ngai teh, kawngkhar bula dingin ka kik hi; tupawhin ka aw hriaa kawng a hawn chuan a hnenah ka lut ang a, a hnenah zanriah ka ei ang a, ani pawhin ka hnenah a ei bawk ang. (Thu Puan 3:20)

Inbiakna Puan Ina Rimtui Halna Rangkachak Maicham

Rimtui Halna Rangkachak Maicham leh Dar-Maicham hi ngaihfin chi a ni lo —Hmun Thianghlim leh Hmun Thianghlim ber daidangtu puanzar hmaah chiah Rimtui Halna Rangkachak Maicham hi a inhung thung a. He maicham hi Dar-Maicham ai khan a te zawk bawk. Feet 3-a sang, a kil tin feet 1 leh inchi 5-a hlai a ni. Acacia thinga siam, rangkachaktuia luan vek a ni nghe nghe. A kil li tinah ki pali a toh-lawr chhuak vek bawk.

He rangkachak maichamah hian tuk tin leh tlai tina rimtui mut khu vung vung turin Pathianin puithiamte kha a chah vek a; chutih hun lai chiah chu ni tina halral thilhlan an hlan hun lai pawh a ni ve chiah bawk. Rimtui khu leng chu nileng zankhuaa inmut khu riai riaiin LALPA tana rimtui duhawm a ni bawk thin. Thil hlu leh rimtui chi li inpawlh (stacte, onycha, galbanum leh frankincense)-te an ni a; thil thianghlima ruat an ni. Biakbuk pawn lamah anmahni duhthua Israel faten an hman ve ngawt kha Pathianin a remti hauh lo; hmang chiah sela chu chumi hnam atanga tihboral tur an ni (Exodus 30:34-38).

Tin, LALPAN Mosia hnenah, “Rimtui tui tak takte te, onuka te, ngalbanum te – la ang che; rimtui ti tak beraw fîm tak nên bûk inzât vekin; chu chu rimtui siamtu siam angin ch-a al, fîm leh thianghlim takin rimtui i siam tur a ni: a thente chu rawt dip dep tur a ni a, ka rawn biak thinna tur che inbiakna puan in chu thuhriattîrna bulah chuan i dah tur a ni: chu chu in tân thianghlim tak a ni ang. Tin, chu mi rimtui i siamtur, a siam dân tur anga siam chu zawng nangmahni tân in siam tur a ni lo ve: LALPA tâna thil thianghlimah i ngai tur a ni. Tupawhin hnim atân ngawta chutiang a siam chuan chu mi chu a chipuite zîng ata tihboral a ni ang,’’ a ti a.

Chu rimtui leng vel chuan mipuite tana tawngtaina leh Pathian hnena dilsakna chu rimtui duhawm tak a nihzia a entir a ni. Pathianin a awmna chu mipuite thlen phak leh an tawngtaina atana a duhzia lantirna ril tak a lo ni reng mai.

Anni ngei chu ka tlâng thianghlimah chuan ka hruai ang a, ka tawngtaina inah ka tihlim ang; hâlrala an thil hlante leh an inthawinate chu ka maichâmah chuan lawmin a awm ang: ka in chu mi tinreng tan tawngtaina in an ti dawn si a,” tiin. (Isaia 56:7)

Davida Hla —Sam-ah leh Thu Puan-ah pawh mi thianghlimte tawngtaina chu vana tleh chho delh delh rimtui hal khu anga lantir a ni chiah reng a ni.

Ka tawngtaina hi englo rimtui tak angin i hmaah tihchhuahin awm sela; Ka kut phar hi tlai lam inthawina angin awm rawh se. (Sam 141:2)

Tin, vantirhkoh dang a lo kal a, rangkachak rimtui halna bawm kengin maicham kiangah chuan a ding ta a: tin, lalthutphah hmaa rangkachak maicham chunga mi thianghlim zawng zawng tawngtainate belhchhahna turin, englo rimtui tam tak a hnenah an pe a. Tin, englo rimtui khu chu vantirhkoh kut ata Pathian hmaah a chho ta a, mi thianghlimho tawngtainate nen chuan. (Thu Puan 8:3-4)

Heng thil bakah hian, Rangkachak Maicham chuan Messia a lo entir leh chiah bawk a —Pa Pathian hmaa min dilsaktu dinhmun ngei chu a lang chiang lehzual a ni. Khatia Isua, khawvel a len lai nite khan ringtute tan khan dilsak-tawngtaina a hmang thin. Kaihthawh a nih hnu phei kha chuan Van Biakbuka rawng min bawlsaktu Puithiam Lalber ni zui tain, a awm-ah Israel hnam tinte hming Pathian hmaah a thlenpui a. Phatsan a nih hma lawka thi tura a chungthu rel a nih lai pawh khan a zirtirte leh ringtu zawng zawngte tan dilsak-tawngtaina neiin —Pathian chuan sual lakah min veng hlawm sela, Pathian Thua tihthianghlimna chang tur leh Pathian ropuina hmu chianga khawvela Messia thuhretu ni turin min dilsak a (Johana 17:1-26). Tun thleng pawh hian Pa kiangah kan Lalpa Isua chu kan Chatuan Puithiam Lalber a la ni cheu va; Pathian mite tan dilpui rawngbawlna min la hman zuisak zel a ni.

Tuin nge thiam loh chantir ang? Thia kha Krista Isua chu a ni si a; a ni, tho leh ta zawk a, Pathian ding lama awma min sawisaktu bawka kha a ni. (Rom 8:34)

Messia thisen avanga kan sualte ngaihdamna kan chan tawh hnuin, Iesua Messia hming ngeia huaisen taka tawngtai zui ta pawh kan ni. Isua hming ngeia kan tawngtai hian, keimahni theihna reng ni lo —thawh tur min thawh zawhsak tawh avanga Isua hminga tawngtai kan ni. A hming thiltithei taka chhandam tawh leh Isua hminga baptisma pawh chang tawh kan ni; a hming rinchhana nung, thil ti leh thu pawh sawi kan ni e.

Tin, ka hmingin engpawh in dil apiang chu ka ti zel ang, Pa, Fapa avanga chawimawia a awm theih nan. Nangnin ka hmingin engpawh mi dil chuan chu chu ka ti zel ang. (Johana 14:13-14)

Rangkachak Maicham kite chu ran thisena theh an lo ni tawh thin a, Israel fate sualna thenfai thianghlim nana tih thin a lo ni tawh thin (Leviticus 4:7, 16:18). Dar-Maicham kite pawh khan sualte ngaihdam nana Messia thisen thiltihtheihna a lo entir tawh thin ang khan Rangkachak Maicham kite pawhin A thisen thiltihtheihna hmangin kan sual thupha chawia kan tawngtaina chuan A mi ngaihdamna a thlen thei ta a ni.

Tin, rinnaa tawngtaina chuan damlo chu a chhandam ang a, Lalpa chuan ani chu a kai tho vang; tin, thil a lo tihsual tawh chuan ngaihdamsak a ni ang. Chutichuan, tihdama in awm theih nan in sualte thupha chawi tawn ula, intawngtaisak tawn thin rawh u.Mi fel tawngtaina chuan thil nasa tak a ti thin. (Jakoba 5:15-16)

Hmun Thianghlim Ber leh Daidanna Puanzar

Biakbuk chhunga Hmun Thianghlim piahah, pindan chhungril lehzual Hmun Thianghlim ber (Thianghlimte zinga Thianghlim) a awm hranpa leh a. A hming atang ringawt pawh hian, pindan thianghlim tawpkhawk a nihzia chu kan hrethiam mai awm e —he pindanah hian mi naran luh a thiang lo hulhual a ni. Pathianin a mite a rawn chenchilhna hmun bik a ni tlat a. Thlalera Israel faten an zinkawng an hman tauh tauh hun lai pawh khan, Pathian chu Chhum-ding leh Mei angin Hmun Thianghlim Ber chungah hian a rawn inlan \hin a ni. Hmun Thianghlim ber pindan sir kil tin hi 15 feet theuhva a dung leh vang baka a san zawng inchen vek a ni.

Hmun Thianghlim leh Hmun Thianghlim Ber daidanna atan parda chhah tak a awm thin. He parda hi PUANZAR tia hriat a ni bawk a —puanzaisin pawl, senduk leh la-hrawl senlara siam a ni. A puan ze intahah chuan vantirhkoh Cherubim lem zeh tel a ni bawk. Cherubim-te chuan Pathian rawng an bawl a —Pathian chu a thiltihtheihna namai lo taka a mite zinga a chen thinzia lantirna a ni. Vantirhkohte chuan Pathian Lal\hutphah chu an veng pah bawk. Cherubim-te chu Hmun Thianghlim Ber chungkhuhna puan hnuaihnung berah pawh an awm bawk a; thlir chhohvin Cherubim lem a lo awm chuai dawn tihna a ni.

“Puanzar” tih thumal hrin hrim hi Hebrai tawng kalhmang chuan DAIDANGTU, thil hliahkhuh tura puanzar, puan hrim hrim sawina a ni chawk. He puanzar hian engnge a hliah chu ni ta? Mi suaksualte lakah Pathian thianghlim chu he puanzar hian a lo zar-hliah thin a ni tih a chiang hle. Hmun Thianghlim Bera lut apiang chu Pathian chennaah a lut a ni tihna a ni. A tak tak ralah phei chuan, Hmun Thianghlim Ber-a lut puithiam lalber tih loh chu thi ngei tura ruat a ni. Puithiam lalber hrim hrim pawh ni se, kum khatah vawikhat chauh he Hmun Thianghlim Ber-ah hian YOM KIPPUR (Inremlehna Ni, Tishri/Ethanim 10)-ah chauh Pathian mite aiawh tura Pathianin a mi ruat bik puithiam lalber chuan ——inthawina thisen bikte nen a lut thiang chauh a ni.

Puan zar thin khan Pathian leh mihringte inkar a lo zar hliah tawh thin a; Pathian thianghlimna kha mihringten chuti maia an chilphul chi ngawt a nih lohzia a lanna a ni. Pathian mit kha thil sual thlir nan chuan a fim lu deuh bakah sual a palzam thei mai mai ngai si lo (Habakuka 1:13). Puan zar thin khan Pathian chenna hmun chu mihringte palphul mai mai theih lohvin a lo zar-hliah thin a ni. Puithiam lalber takngial pawh khan Inremlehna Ni-ah chauh, inbuatsaihna famkim nen, Hmun Thianghlim Ber kha vawikhat chiah chauh a lut thiang a nih kha! A inbual fai hmasak zet a, thuam chi kim a inbel hnuah, Pathianin a rawn hmuh tlang lutuk loh nan rimtui mut khu hmasain, rimtui leng vel a awmtir hmasa te te a —chumi hnuah sualte hliahkhuhna atana inremna thisen a keng lut ta chauh thin a nih kha.

A dawttuah erawh chuan Puithiam Lalber chauh kum tin vawi khat, thisen keng lo lovin a lut thin; chu chu mahni tan leh mite sual atan a hlan thin. (Hebrai 9:7)

Israel-te history hrim hrimah puanzar chhah tak inzar phui tlat thinin a lo zar-hliah thin kha Pathian awmna a ni thin. Engpawh ni se, Thing-a Isua inhlanna, a thihna khan thil danglam a rawn thlentir ta thung a. A thih takah chiah khan, Jerusalem Temple-a pindante daidanna puanzar kha a chhipler atanga a mawng thlengin a lo thler chhuak ta a nih kha. Mihring kuta ban phak rual loh leh pawhthler zawh rual loh kha Pathian zawkin a rawn tithler chhuak ta vek a ni. Jerusalem Temple puanzar san zawng kha feet 60 zet, a hlai zawng feet 30 leh a chhah zawng inchi 4 tling hial a ni asin! Chuti chung chuan, a chhip atangin a mawng thlenga a lo thler chhuak ta kha —Chunglam thiltihtheihna atang chauhvin a ni.

Puanzar a lo thler chhuah tak miau siah chuan Hmun Thianghlim Ber pawh a lo lang chiang ta! Mi zawng zawng tan Pathian awmna hmun chu kalpawh theihin a lo awm ta. Khami nia Temple-a puithiam rawngbawltute tan tak khan a va han thlabarthlak dawn tak em! Keini ringtute tan lah chanchin lawmawm a ni ta hleuh si! Isua thihna ngei chuan kan sualte ngaihdamna leh Pa Pathian nena kan inremlehna kawng chu a lo hawng thar leh ta si a. Puanzar thler chhuak vek chuan Isua taksa, kan tana a tawrhna a lo entir bawk a — Pathian hnen kan thlen theihna tura kawng insat kua a lo awm phah ta a ni. Khatia Isuan, “A kin ta” tia thinglera a au khan; a lei rawngbawlna chin kha chu a hlenchhuak ta a ni tih a puanchhuahna Hla Do a lo ni reng mai! Ran thisena inthawi bung bungna hun kha a lo liam fel ta. Inthawina vawrtawp kha hlan felin a lo awm ve ta chiah bawk. Tunah zet zawng, Pathian awmna ngeiah huaisen tak leh inrintawkna neiin Messia zarah kan lut tlang ve thei ta a ni e.

Chu beiseina chu nunna thirchakaiah kannei a, rinawm leh nghet tak a ni, puanzar chhunga mi-ah pawh chuan a lut a; chutah chuan Isua, Melkisedeka awm dan anga chatuana Puithiam Lalber lo ni tawhin, kan tan hmahruaituah a lo lut ta a. — Hebrai 6:19-20

Chutichuan, unaute u, kawng min ruatsak, kawng thar leh nungah chuan, puanzar chu (chu chu a taksa tihna a ni) kal tlangin, Isua thisen avang chuan Hmun Thianghlimah khan luh kan huam avang leh, Pathian chhungte chunga Puithiam ropui tak kan neih avangin kan thinlunga chhia leh tha hriatna tha lo chu theh faisaka awma kan taksa pawh tui fima buala awmin, rinna famkim neia thinlung tak zet puin i hnaih ang u. (Hebrai 10:19-22)

Hmun Thianghlim Ber chuan Pathian chenna van hmun ngei a lo entir si a; chumi hmun chu Isua Krista kaltlangin kan lo pan ve thei ta. Thu Puan-ah khan Johana khan inlarna hmangin van-hmun a hmu a —Jerusalem Thar —Hmun Thianghlim Ber dungthul chiahin chu khawpui dung leh vang leh san zawng kil tin inchen vek a nih ve chiah kha (Thu Puan 21:16).

Krista chu kuta sak hmun thianghlim, atak anpuiah chuan a lut si lo va; tunah Pathian hmaah kan aia ding turin vanah ngei a lut ta zawk a; nimahsela, Puithiam Lalber chu kum tinin mahni thisen lo, thisen keng chunga Hmun Thianghlima a lut thin angin, ani chu mahni inhlan fo turin a lut hek lo; chuti ni suh sela, leilung piantirh achin vawi tam tak a tuar tawh tur a ni; nimahsela, tunlai hun tawpah hian inthawi nana inhmang chawpin sual tihbo nan vawi khatah a lo lang ta nghal a ni. (Hebrai 9:24-26)

Awm zèl tùr

WELCOME!

Lèn luhna thlàkhlelhawmte —

 

Advertisements

2 Responses

Subscribe to comments with RSS.

  1. Puibawiha said, on December 22, 2009 at 5:38 pm

    Chhui ril raih raih hle mai.
    Rimtui hal khukna chhan tak khi, ziak thenkhatah chuan meikhu hian an tawngtaina Pa hnen a thlen thu entirna a ni, an ti. (Pathian mithmuh fiah loh phahna chu a ni lem ang em aw??).
    Rawn len luh fo chi a nih hi.

    • chawnghilh said, on December 22, 2009 at 8:32 pm

      Rimtui mut khu hian an tawngtaina Pa hnen a thlen thu entirna a ni —i ti dik e, chu tho chu a inziak tho khian ka hria! Thanks for your visit!


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: