Chawnghilh's Blog

Thlaler Inbiakna Puan In Zekhelhna – Part III

Posted in Qualitus : Habitus by chawnghilh on December 22, 2009

Thuthlunna Bawm leh a chhin —Zahngaihna Thutphah

Hmun Thianghlim Ber chhungah chuan bungraw pakhat, thil pahnih infin, mi naranin an va hmuh mai mai ngai loh a awm, chu chu Thuthlunna Bawm leh chumi chunga a chhin —Zahngaihna |hutphah an tih chu a ni. Bawm chu thingrem anga khawr-pum, acacia thinga siam a ni a —a chhung lam leh pawn lam zawng zawng rangkachaktuia luan vek a ni. Feet 3 leh inchi 9-a sei a ni a; feet 2 leh inchi 3-a hlai leh a san lam pawh ni bawk a ni. Pathianin Mosia hnenah khan bawm chhunga thil chi thum dah turin thu a pe a —manna dahna rangkachak bel, Aaron-a tiang chawr leh Thupek Sawm inziahna lungphek pahnihte kha. Heng thil chi thumte chanchin hi nakinah chipchiar hret zawkin kan la chhui belh dawn nia.

Thuthlunna Bawm chuan a chhin-phek a nei a; chumi chung hmawr tawn tawnah chuan cherubim pahnih inhmatawnin an awm a. Cherubim lem hi Pathian awmpuina leh thiltih-theihna symbol a ni hranpa ve liau liau a. Bawm chhin hmawr tawnah chuan an thlate tiparha inhawitawnin, hnuai lam an thlir ve ve a. Chung chu rangkachak hlir hlawm hlak a\anga chher chhuah an ni. Inremna Thuthlung Bawm chhin berkher chu Inbiakna Puan Ina Pathian rawn awmna bik a ni a; chumi kher chu Pathian Lal\hutthleng, vantirhkohten an karcheh chu a ni bawk. Pathianin Mosia hnenah he thu hi a sawi kha,

Chutah chuan I hnênah ka lo kal ang a, tin, thuhriattîrna bâwm chunga cherub pahnih inkâr, zangaihna \hutphah chung lam a\angin Israel mite thu ka pêk tûr apiang chungchang thuah chuan ka rawn be \hîn ang che.” (Exodus 25:22)

LALPAN Mosia hnenah, “I unau Aarona bia la, puanzar chhûng hmun thianghlimah, bawm chunga zahngaihna \hutphah hmaah chuan eng lai mahin lo lut hauh suh se, a thi dah ang e; zahngaihna \hutphah chungah, chhumah ka rawn inlar dawn a ni. (Leviticus 16:2)

Pathian Lal\hutthleng chungchang Pathian Lehkhathu vek chuan heti hian a sawi ——

Tin, Davida chu a tho va, Judai rama Baale khua a\angin, cherubte chunga chuang sipaihote LALPA hming an puttir Pathian bâwm chu la chho tûrin a hnêna mi awm zawng zawngte nen chuan an thawk ta a..” (II Samuel 6:2)

“Aw sipaihote LALPA, Israel-ho Pathian, cherub chunga \hua, nang hi, nang chauh hi, leilung luah ram zawng zawng Pathian chu i ni; nang chuan lei leh van hi i siam a ni. (Isaia 37:16)

Thuthlunna Bawm chung, a chhinah chuan Pathian ngei pawh “hnaih theih rual loh eng (unapproachable light)” nen a rawn inlan \hin (I Timothea 6:16). Chu eng chu achang chuan Sikaina Ropuina tia sawi a hlawh ve bawk \hin. He thumal Sikaina tih hi English Bible-ah chuan a chuang pha ve chiah lo nain, a \obul erawh chu Hebrai \awnga Bawkte (Chenchilh) tih te nen pawh inlaichinna hnaivai tak nei a ni —-LALPAN a chenchilh tih sawina a ni tlangpui.

Pathian mite zingah Thuthlunna Bawm ber kher kha Pathian Lal\hutthleng angin a awm ta \hin a, khawi hmuna an kal pawhin Pathian chu an zingah thiltihtheihna nen a awm reng \hin a ni tih entirna symbol pawh a ni hial a ni. Thuthlung Hlui Bu-ah pawh he Bawm chungchanga thilmak thleng tam tak ziakin a awm. He Bawm an zawn khan Jordan lui pawh a luang lai a in\hen phawk a, Israel faten leichar chunga kalin luikuang an kan thei mai a, Jeriko khaw kulh pawh he Bawm tel hian an tichimin an va hneh a nih kha (Josua 3:14-17, 6:6-21). He Bawm hi zahpah loh chi pawh a ni lo —Pathian rorelna leh thinurna a keng tel tlat a ni. Zawlnei Samuela hun laia Israel-ten an hmelma Philistia mite an va beih pawh khan, LALPA thupek pawisa lovin indona ruamah he Bawm hi hmachhuanin an tawngpawng zawn chhuah ngawt a, mangan hnuah Pathian puihna an ngen leh hnuhnawh a. Pathian chuan indonaa hnehna changtu atan Philistia-ho a ruat ta daih zawk a nih kha; Israel-te ropuina kha lak kiansaka awmin, LALPA Thuthlung Bawm pawh hmelmaten an chhuhsak ta hmak mai a ni (I Samuela 4:22). Engpawh ni se, Pathian pawhin Philistia-hote chungah a thiltihtheihna he Bawm hmang hian a la lantir zui ta cheu va —an pathian Dagon lim sira he Bawm an hun khan an pathian Dagon lim a chimchhe ta hial a; an chenna khawpuia Thuthlunna Bawm an kawl chhung zawng hripui rapthlak tak a leng chamchi bawk a (I Samuela 5). A tawpa tawpah chuan, mangan phah luat aleiah Bawm chu Israel-te hnenah an kir leh ta ringawt a nih kha!

Thuthlunna Bawm chhunga thil awmte

Vawiin thlenga thilmak dangdai la ni ta cheu chu Pathianin min chenchilhzia lantirna atana rangkachak bawm chhunga thil inkhung khiu khaute kha an ni a; ro hlu leh tlereuh hlu tham tak ang erawh chuan an lang hran lem lo —chung thil pathumte chu —manna dahna rangkachak bel, tiang-chawr leh lungphek pahnihte an ni. Pathianin heng thilte hi engvanga Bawm chhunga khung tura a lo tih tlatte nge ni ang aw tih hi chik ngun atan a \ha khawp mai.

Heng thil pathumte hi Israel mipuiho, an lawm loh ber hun lai leh an buai-phili hun lai ber pawha an tana thil chhinchhiahtlak ngawih ngawihte an lo ni —-

Pakhatna, Manna Dahna Rangkachak Bel : Tin, Mosian, “Hei hi alâwm LALPAN, ‘Hei hi in thlahte thlêngin omer khat vawng \ha rawh u: Aigupta ram ata ka hruaichhuah lai che u a, thlalêra ka chawm \hinna che u chhang chu an rawn hmuh theih nân,’ tia thu a pêk chu,” a ti a. (Exodus 16:32)

Thlalera Israel fate an teihawi kual lai leh an phunnawi lai khan Pathianin eitur-chaw atan MANNA a pe a. Van a\anga chhang a ni! An ni tin chaw atan rinawm takin (Sabbath ni tih lovah) a tlaktir zat zat a; nimahsela, mipuiten lawm nachang an hre zeng si lo. Phunnawiin thil dang an ngiat zel zawk a nih kha. Pathianin an nunna atan eitur manna-in a chawm tlauh tlauh nachungin, Israel faten eng teh-ualah an ngai si lo —chuvang tak chuan, an chanchin hluia Pathianin an tan eitur a pek ngawih ngawih an hriatchhuah leh ram ram nan Manna dahna rangkachak Bel leh manna chu a dah\hattir ta a nih kha.

Pahnihna, Aaron-a tiang rawn chawr kha: Itsik inelrel luat avangin Israel-te khan an puithiam lalber Aaron-a lakah an hel zui ta a. An thubuai chingfel turin, Pathianin mipuite hnenah tiang 12-a Israel hnam tinte hruaitu hming chuang \heuh rawn la khawm turin a ti a —thuthlunna bawm bula zankhat thilthua rawn la vek turin a ti a ni. Atuklehah chuan, Levia chhungkuaa Aarona tiang bik kher chu a rawn kuhmumin a rawn par tat lat mai a, vaiumkhal a rawn rah ta hial a. Pathian ngei chuan Aaron-a chhungte bik chu puithiam hna chelh turin a nemnghet thar nawn leh ta a nih kha.

Tin, LALPAN Mosia hnenah, “Helhmang fate an ni tih hriattir \hin nan Aarona tiang chu thuhriattirna bulah dah leh rawh: tichuan, ka chunga an helna hi i tihrehsak thei dawn nia, an thih loh nan,” a ti a.” (Numbers 17:10)

Israel faten, vawikhat chang ni lo —vawi tam Pathian thuneihna an pawisak loh \hinzia hriat-chhuahtir leh \hin nan he tiangchawr hi chhawpchhuah a lo ni ta a ni.

Pathumna, Thupek Sawm inziahna Lungphek Pahnih : Pathian khan Israel-te kha a mi bik ni turin a thlang miau a. Chu hnam thlan bik nihna hlenchhuak tur chuan Pathianin thil pakhat a ngiat ve bawk a. A Dan, Thupek Sawm an zawm ngei ngei tur a ni. Thu indelhkilh neia inremsiamna a ni zui ta reng a ni.

“Chuvângin, ka thu in ngaihthlâk takzet a, ka thuthlung hi in pawm chuan khawvêl hnam zawng zawng zîngah hian ka tân ro thlan bîk in ni ang: khawvêl pum pui hi ka ta a ni si a: tichuan ka tan puithiam chi, hnam thianghlim in ni ang,’ tiin hrilh ang che. Hêng thu hi Israela thlahte hnêna i sawi tûr chu a ni,” a ti a. (Exodus 19:5-6)

Lungsi takin Israel-te pawh chuan, “LALPA sawi ang zawng zawngte chu kan ti zêl ang e,” tiin, a rualin an chhâng dual dual a (cf. Exodus 19:8). Nimahse, eng ang chiahin nge an hlenchhuah leh tak si le? A manganthlak teh zawng a ni! Thupek Sawm chu dik fel famkima tisa maia zawm theih a lo ni si lo. Vawi duai lo Pathian dan thianghlim kalhin an hel ta \hin a; Pathian pawhin an sual dan azir zela thungrulhna fel tak hripuiin a nuaitir bawk \hin; an chunga rawng taka rawn che thei mai an kiang vela hnam kawlhsente a rawn tir thul; khuarel hrim hrima harsat mangannate an chungah a thlentir bawk. Tichuan, thuthlung bawm chhunga Lungphek pahnihte chu Pathianin Nunna Dan a pek an lo bawrh fo \hinzia hriatchhuahtirtu atana vawn \hat a ni zui ta bawk a ni.

Bawm chhungah chuan heng thil chi thumte hi Israel-ten an harsat hun lai leh an suahsualzia thlir chian nawn leh nan an kawl\ha zui ta zel a —Pathianin a chenchilha, an mamawh tinreng a pek vek chung pawha Pathian thuneihna leh an awm dan tidik tura fuih an ni chung pawha an hnawl fo \hin dan an hriatchhuah lehna darthlalang atana hman a ni zui ta a ni. Misuaksual puihtlak loh an nih \hinzia hriatchhuahtir fo nana hman zui a ni ta.

Heng thil chi thum vawn\hat hlawhte han thlirkir chian hi thil nuam fahran chu a ni lo tawp, Pathian hausakna chhiarsenloh leh mihring suahsualzia inthlunzawmna thil a ni tlat lawi si a. Nimahsela, heng thil chi thumte hi Pathian hnianghnarzia a rawn lan chianna a ni miau! Pathianin a Bawm chung a\anga a rawn thlir thlak hian, sual hriatchhuahnawntirtu a rawn hmu ve tawh lo thung a —chhintu Zahngaihna Lal\hutthleng-in a hliah tlat tawh avangin! A va ropui tak em!

Advertisements

One Response

Subscribe to comments with RSS.

  1. chawnghilh said, on December 22, 2009 at 11:08 pm

    He thil hi ka upload nalh thei reng reng lo mai, a corrupt zel a. Heti chauh rih hian a theih dan awmchhun a ni, a pawi ang reng. A hmel beibui hi chhiar a chakawm loh riau mai! Min lo ngaithiam hram mai r’u!


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: