Chawnghilh's Blog

New Year Menu

Posted in Qualitus : Habitus by chawnghilh on December 29, 2009

 

 

 

Ka hul riau,  a ngaihnawm leh dâwn chuang lo!

A thlìr tlàk vak loh leh —chùm ri bur mai rawh! 

 

 

A hmunhmâ hi a nuamin a zo vah mai a —he khuaah hian kawngkapui leh tukverh tala leh socketbolt-a kalh a la ngai chuang bìk hauh lo. Police lah an felin, engtik lai pawhin an kawtthlèr pêng tinah Police Car-in an vung ther ther reng a. An khuaah hian COUNTRY FOOD an la uar hle bawk. An thlànmualte leh dai hnai leilet leh Ranch pawhin lung a tilêng èm èm a. Shenandoah Lui tui thianghlim tak pawh an khaw sîrah dam diaiin a luang a—sangha manna nuam tak a tling. Hawina lam apiang a mawi bawk. A sik leh sa, tlawh hun a thu pawh a ni khawp ang!Thlìr phàk tàwkah tlângdung a paw kual ruih mai a, mi hausa pawhin he lai hmun hi an bawh viau. Chumi hmuna inkhalh chhoh chu Amerca ram àwm tinuam belhchhahtu a tling hrim hrim a—SKYLINE DRIVE tiin an vuah a, a kawng a zîm nàin a kual mawi èm èm thung.

Favàng hun lai hi a mawi zual hun a ni nghe nghe a —chutih hun lai ber kher chu mi tam takin tlawhna hun atâna hman hràm an tum thìn.

Country Food hi vawikhat ei $39.99c vèl a ni a, kan India tangka chuan Rs 1,850.00 vèl a ni lo thei lo! A to tham khawp mai! Oil lama a rich èm hlawm avàngin a mawm lam thil rèng rèng ei hmasak loh fo hi a finthlàk! Ngei mai a awl a, a man to to nèn—duhtàwka lim hmâin, puar chuang bawk si lovin kan tlàlàm liam mai mai ang tih a hlauhawm thìn. A chhawpna hmuna mi mahnia suah chhuah ngàwng ngàwng tawh mai tùr a ni a, a mawm lo lam atanga ei hmasak a chi ber. I duhtàwkin i ei thei a, rilru nei taka ei a ngai thung.

Duhtàwkin —WINE chi tin, LIQUOR chi tin order tùr a awm nghàl vek a, BAR ti tih pawh kil khata room sen deuh phêt phûtah stool sang taka thut kual chai chai theihin … an WINE BOTTLE RACK te chuan mit a la mai mai teh asin! Khawnge a thlâ ka làk hi ka zawng chhuak hman mai rih lo! Remchàn hunah ka la rawn upload leh mai dâwn nia!

Ngawi teh, OLD COUNTRY BUFFET (Awld Kantry Ba-fei) ka la rawn târlang hauh lo mai. USA-ah 192 lai a awm —duhtàwk êl euha mi-tlaw chaw ei ngheng theihna hmun, variety lah tam èm èm lak sèn loh a awmna hmun ka la rawn tilang hauh lo mai a! Chutiang hmunah chuan kan Zoram tlangvâl àwlthàwng riltâm ei thei tak tak te han lêng lùt ve thìn se ka ti khawp mai! Vaiho phei chuan nghàk se, “Labh Nahi, bilkul labh nahi …” an tihna tùr hmun ni ngei ngei tùr a ni—mahse, an hlàwkpui tho a ni chêk ang —ei tùr zawrhna hmun azawngah chuan a la lùn ber mai àwm e.

Tin, hmun hrang hrang, state hrang hranga OLD COUNTRY BUFFET pawh ni se, a Hotel chhûng lam pianhmang leh thil kalphung, thil an lo chhawp a inang vek—zunràm thiarna hmun tha lutuk nèn—vawikhat ei man hi Breakfast, Lunch leh Dinner a inthlau vek nàin, a inthlau tam èm èm hran lo. Weekend-ah a to lehzual hret a ni mai a. A lo berah $ 12.00-in kàwkì takin, duh leh a kârlakah pawh tlapawrha thei i va lo thiang èm èm a, duhtàwkin cold drinks chi tin i thâl reng thei a, a bul atangin i rawn ei leh mai dâwn a ni! Thei chi tin nèn, pastries chi tin,  ice cream chi hrang hrang duhtàwkin! I haw luhai mawih thei hrim hrim …

 

WELCOME!   

Lèn luhna thlàkhlelhawmte   

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: