Chawnghilh's Blog

Pandit Nehru in Lushai Hills

Posted in Qualitus : Habitus by chawnghilh on January 2, 2010

He thlalàk hi ka lo la hmu ngai lo—a rawngah hian cyan, magenta a tam lek lek. A sawi fiah thiamte phei chuan bawkbàwn rawng an ti mai thei a ni. Kodakcolor film-a làk a nih pawh a rinawm khawp. Mahse, a hun lai ngaihtuah chuan color ngata thlalàk a ni a. A process-na hmun tur pawh Lushai Hills pawn lam a nih a ngai hrim hrim. Kum AD 1980 khân Bombay (tùna Mumbai)-ah color film kan process tîrin, kan print tîr thìn. Processing chemical solution rèng rèngte hi prescribed temperature ang diaka vawn a ngai thìn a; chutiang a nih loh chuan—color hian true color a hloh hret thìn bawk, a paw-sen-uk rawng hian a kàp hmâ bìk thìn.

Thil mak ve mai maia ka rin chu, hemi nia mipui mimir tel vete pawh hian he thlalàk hi an hmuh kim ve leh vek ka ring hauh lo! A tam zàwk mipuite chuan mual an liam tawh pawh ka ring hrim hrim a—in sak thar, a chung an la chih loh pawh hi tùnlai chhanah hmuh tùr leh lèn luhna tùr a awm pawh ka ring hauh lo!

 

Jeep convoy hi khatih hun laia Lushai Hills-a thil thleng ngai mang raih lo a ni. Kum 1970 tawp vèla Mizoram nula hmêltha hmingthang Tlanthangi Chhangte, Maubuang khua—tlangvâl nunrâwngin Aizâwl vêng pakhata a thah khân, Aizâwl atangin a ruang Maubuangah Jeep caravan rual 18 zet inzuiin an phur phei ni àwmin an sawi. Hahîpa sawi a ni thìn. Tin, Pandit Jawaharlal Nehru khàn Lushai Hills a rawn tlawh tum khân—a fanu tleiràwl Indira Gandhi pawh a rawn hruai thu leh an thlalàk thenkhat chu ka thlîr ve ngei tawh mai. Pu Nehru-a zuitu Jeep-ho zîngah pawh WW II hun laia Army Jeep Windshield daidanna nei ngat chi  leh Land-Rover pawh a tel ngei mai! A hun laia a ropui tùrzia chu sawi thiam a har zàwk e. Khitih hun lai khian Mahindra Jeep an la ni ngut lovang a; Willis Jeep, four-wheel drive an nih baka left-hand drive an nih ngei a rinawm. Motor ka khalh thiam tanna hi left-hand drive Jeep-ah a ni hman ve ngat asin!

 

Aijal leh Lungleh inkâr Jeep kawng tùr laih tan a ni dâwn ta a —Aijal vêng tin atangin nula leh tlangvâl, patling nutling a thei thei an thawkchhuak hlawm a. Pu Nehrua ngei khàn bawngtuthlawhin a chèk hmasa ta ber a—lamlian kawngpui chu laih tan a ni ve ta a ni. Ka nu ngei pawh he mi nîa hnatlânga fehchhuak zîngah a tel ve a. Tin, Aizâwl Bazar Bûngkawn-a Bûng kùng khi chumi nî chiaha phun a nih thu min hrilh bawk thìn. Ka pu pawh Circle Interpreter a ni miau va; hetih hun lai hian a buai pâwlah a tang ngei ang le.

Buai (1966) hmâa Aijal leh Lungleh Jeep road inkâr hlat zâwng kha 128 miles a ni a. Zîng vàrtian atangin zàn dâr 8 vèlah paw tàwkin a ban theih vèl a ni. Hnahthial Gate, Lungleh Falkàwn Gate Pi Aiziki te hun lai thil a ni. Gate-pui awmna Tlùngvèl etc., hmunah timing an lo vawng thlap ang a, kawnglakah Jeep insùlpèlna tùr khawpa a zauh loh avàngin Gate hmunah Jeep an thleng khàwm hmasa phawt thìn a. Jeep dang —kawnglaka tawh tùr a awm loh hunah pan lam lam panin tluang takin, Jeep pang sîra âr-âwt inkhai ngeiin, vut dùr chungah khu tàwka zin a ni thìn. Jeep thenkhat chuan trailer an hnùk ve bawk thìn.

Mat Lei hmasa ber kha an la dawh zawh hmâin Lungleh lamah ka pa an transfer si a. Sakawr-lei an tih Mat lei hrûla miah kein kan kal kai. A lo rei tham ve leh ta, Mat lei contract-tu kha Pu Tuikhurliana em ni ta kha âw? Ka hre chiang tawh bìk lo. Mat leiah khian 1988 khân Bullet Bike-in ka tlusual nasa tawh mai a. Ka mi phurh Rinkima pawhin a ngal a dawm vawng vawng mai! Mahse, ka unaupa Rinkima hian mual min lo liamsan leh tawh a—khua a har duh khawp mai!

Hmàn hmànah i pakai leh daih teh ang —kha mi nî kher kher Pu Nehrua bawngtuthlawh hùm nî kha a sa èm èm mai a—nula Zaudawhthangi phei chuan nî a do sual a—a rilru leh taksain a tawrh zui phahna nîah a chang hlen ta bawk a ni. A lainatawm khawp—Mizo hmeichhe lehkhathiam hmasa a nih vei nèn! 

 

WELCOME!   

Lèn luhna thlàkhlelhawmte   

Advertisements

2 Responses

Subscribe to comments with RSS.

  1. hmingtea said, on January 2, 2010 at 7:02 pm

    Motor kawng laih hlate poh a awm kha —kan high school kai laiin kan zir trhin kha. Kha hla kha Lungleh kawng laih phuahna niin an sawi trhin kha!

  2. varte said, on January 11, 2010 at 12:00 pm

    A va’n ngaihnawm ve, Nula Zaudawhthangi i tih hi Khainii kan tih thin kha a ni hial lo maw le?


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: