Chawnghilh's Blog

Kàngmei — khawtualin kan thelh thiam ve

Posted in Qualitus : Habitus by chawnghilh on January 10, 2010

Photo by ZoRock

Kum AD 2010 kan kai chho va — lìrtheia chètsual leh kàngmei chhuakin min rûn zing leh ta deuh ber em ni âw? Sumo leh Motorcycle chesual zing bìk leh Zemabàwk-a in kàng a awm zo chauh va, Saron Vêngah in kàng a awm leh thu —khawvèl lehlam atanga chhiar pawh a nuam lo thei hle mai! Kàngmei laka fîmkhur a va ngai tak èm! Kàng ral tawh hi chu neihkìr leh ngaihna a awm tawh lo —what burns never returns! 

Cadet Training ngawrh kan neih laiin, Luncheon hour a hnai thuak tawh tihin—alarm bell a ri ta zawih zawih mai a. Kan riltâm tawh deuhvin kan lo ngaihthah lui chiah mai kha chu; kan che fuh lo zui khawp mai!

Hockey Playground Number One leh Football Ground Number Two-ah kàngmei thelh tùr kha kan Drill Master-ten an lo chhep hluah mai chu niin. A khu a dum chho ngun ngun tawh a. Hetianga Fire-fighting kan beih dâwn hian inthàwtlàwkna a awm ngai lo. Kan Cadet Diary-ah erawh chuan DAILY CHORES a intârlang vek a, air-bedding, Principal’s Inspection Parade etc., FIRE FIGHTING erawh chu a inziak lang ve ngai lo thung!

 Thil thleng phuta chètchhuah vat leh minute engzàt chhûnga thelh mìt hman nge kan nih record kha hriat an duh vàng pawh a ni ngei ang! Oil kàng thelh nân kan Class, Dormitory bathlàrah te khân Fire-extinguishers a inkhai sen tiar tuar a. Tin, FIRE hmun bìkah tiang leh suahdûr, bàltîn chhûnga balu leh tui thehna tùr hmanruate pawh nei khip khep vek kan ni. Rìkrum thilthuah—kàngthelh hmanràw awmna lam panin, kàngmei awmna lamah a ranga rangin thelh mih dàn kawngkal nei tak hmangin kan che thìn.

Oil kàng thelh dàn bìk riau te, kàngmei pângngai leh Electric vànga kàngmeiah te hmanràw hman tùr chi bìk kan thlang thiam ngei bawk thìn! Uluk takin chalkboard-ah kan zir hmasa thlip thlep thìn a ni.

Khami tum kher kher khân, kan riltâmin min mawlh buai a ni ngei ang. Langar chung zàwna choàk leh mutè an thlawh bial laih laih tawh hi chuan—Mess-ah kelsa emaw, sangha emaw, arsa emaw kan hmeh dâwn tih ka hre kar mai a. ALARM ri vèl chuan kan rilru a lo pawt lo hle a ni mah nà; kan ngaihthah ta chiah mai kha chu … sazai kan hmu zui nghàl. Ril a tàm vei nèn, chaw-chhùn min ngheitîr a. Hockey playground-ah kan cadet full uniform-in sazai hahthlàk leh ninawm tak kan hmu zui a. Kan thlan a tla nasa mai—frontroll leh backroll, crawling min beihtîr nasa mai maw le! Khami nîa kan kàngmei thelh tùr pawh kha kan thelh miah lovin —amâ màng màngin a lo màng ve ràk a nih tàk kha!

A pawi thui mang thìn tak e. Kan mimal tin record-ah BLACK MARK a awm leh fir fer dâwn ta! Kan STUDENT RECORD-ah an ziak tel dâwn chiang si! Sipai nunchan hi chu a khirh teh e. Havildar, Jamedar, Captain, Major leh Lt Colonel-te lak atangin ànka nêm kan dawng lo chiang ngei mai!

Heat + Fuel + Oxygen = Flame

Thil sâ, alh thei thil leh Oxygen boruak —hèng thil pathumte hi an infinkhàwm hian MEI-ALH a chhuak ngei ngei zu nia! MEI-ALH hi thelh rèm tùr chuan khìng thil pathumte zînga a engemaw ber khi LAK HRAN DAN kan thiam ngei ngei tùr a ni bawk.

Entîrnân : I thianpa chu mei alhin a tuam hluai mai a. Blanket hnâwng/ro  hmangin i khuh thut a, chhuatah zialin i nawr lum (roll) vak ta mai a—a chhan ber chu OXYGEN boruak dahchah nân komol i hmang a; Oxygen i danchah theih chuan a alh/kàng zui thei lo! 

In kangah chuan Oxygen boruak a dang thei tawh lo va; kàng tùr thei thil awmte kha a kan belh zèl loh nân KAN INTHIAR/THUAM KAN CHUH ta thìn a ni; thuam kan chuhte kha FUEL an nih tlat avàngin! Chutiang bawkin, OIL tling puau kha, a chunglâng chiah a alh/kàn theih nachhan pawh Oxygen-in a pawlh theihna chin a nih miau vàng a ni. Lawng liana Oil kàng emaw, Petrol zuar vànduaina tàwk an awm chuan, Oil chunglâng a kàn mêk laiin, Oil tling kha hmun dang him chin daihah pipe emaw pawhin kan dah sawn tam hman èm èm ang. Fin thiam leh remhriat a va ngai tak èm!

HEAT (thil sa) a chhuah samkhai mai loh nân, engkimah kan fîmkhùr a ngai hle a ni. Nawalh te, Lighter-te pawh naupang ninhleite khawih phàkah kan dah mai mai tùr a ni lo. Tin, electric wire hmawr pawr (fray) leh wire himdam lote avàngin kàngmei kan tuar ngun tih a lang chiang tàwk a—Electric Department atangin zângnadàwmna kan dawnglèt dâwn chuang lo bawk a, kan vànduai palh hlauh chuan leh kan vànduai bik a ni mai dâwn a—mahni inchhûngkhurah A NEITUTE kan pawimawh ber a ni ta ber e.

INSURANCE-ah mahni house leh property dahkham nachâng hriat a pawi lo, Mizoramah pawh khân keinî chhûngkua chuan kan dahkham vek hial asin! Tin, flat tinah kan dah lo nàin, Fire-extinguisher hi ban mai remchângah kan dah nual hlawm bawk. Pakhat man hi Rs 3,500 te a nih thin kha!

An pathum (heat, fuel, oxygen) zînga pakhat, a remchàn dàn ang zèla kan làk hran thiam chuan, mei kan thelh mit thei/thiam ta tihna a ni! Hei hi khawtuala miten kan hriat a pawimawh hle, Firefighter-te kan la indaih theih rih loh avàngin! 

Hèng ram changkàngah te hi chuan—khawi lai kawtkaiah mai pawh hian tui herhchhuahna a inbun fer fur a; kàngmei chhuak pawh ni se—Kàngthelh-motor-ah tui awm remchang lo a nih pawhin, kawtkai atanga tui herhchhuahna atangin volume duh ang thâl herhchhuah theih a ni hrim hrim zèl a—chutiang chu Aizâwl kawtthlèr thenkhatah te chuan a tih ve theih a rinawm—kan pachhiatna hian a tlin rih lo a nih pawhin—hmangchâng hriatna leh kan nula leh tlangvâlte tlàwmngaihna hian kan khawtual theuhtea kàngmei chhuak thutah kan lung an timuang èm èm ang—chhiatna kan tawhin khawtlâng fel leh finzia hi kan hrechhuak chauh dâwn a lo ni ber e.

 TUI leh VAIVUT maia kàng thelh thìn kha kan ni a—tùnah zet chuan OIL, GAS, ELECTRIC avànga kàngmei nei ta fo kan ni a; chuvàngin, kan kàngmeite hre chianga hmaràw hman tùr chi bìk kan thlan thiam a ngai lehzual ta khawp mai! Ka lo chhùt rùk dàn chuan, kàngmei rau rau pawh hi in hnuai lam atanga kàng tan—thingtlâng-mi khawpuia rawn pêm lùt thar, kerosine stove, electric power leh LPG lam khawih zei chiah lote atangin a ni châwk a —eirawng bâwl tùr leh ni tin khawsak kawnga kan inzir belh ngai hlein a lang. Pêm tharte pawh Hall-a hruai khàwma VC leh YMA tangrualten AWARENESS leh EDUCATION an pèk a tùlin a lang ve tlat!

Tlàwmngaih luatah kàng thelhna hmuna innêk buai lovin, a sa kala inchèt chhàwk dàn kan thiam nân—Commander fel tak chu khawtual tina an awm a ngai hrim hrim—Firebrigade hi chu a tlìpna atân kan la hmang zèlin a rinawm a! Hei hi an vuaichà vàng ni vek lovin, kan ram hmunhmâ leh lawilènin a zir bìk ngang lo a ni e.

MEIDIL kan tih pawh hi Fuel (misual) + Heat + Oxygen a la awmna vek a ni dâwn hrim hrim!

In chhûnga kàngmeia tâng laklawhte chhanchhuah dàn kalhmang nei hretin kan la ziak leh dâwn nia!

 

 

 

 

 

 

 

 

 

  WELCOME!   

Lèn luhna thlàkhlelhawmte   

Advertisements

2 Responses

Subscribe to comments with RSS.

  1. dala said, on January 11, 2010 at 2:02 pm

    In kang chu i va khap fuh ve a…

    • chawnghilh said, on January 14, 2010 at 9:03 pm

      Dala : In kang thlalak hi ZoRock-a shot a ni. ZoRock hi ka mi hriat pawh a ni mai thei, mahse, ka la hmachhawn lo pawh a ni mai thei bawk.

      Misual.com-ah a rawn tarlang a, chhiattawhna thlalak mah ni se, a la fuh hle hian ka hria a, thu engemaw —kan Mizo khawtlang tana tangkaina awm thei thil a awm takah tiin thuziak cheimawi nana ka’n hman zuisak zauh a ni ber e. A lawmawm e.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: