Chawnghilh's Blog

Sazuk sa a tui hle …

Posted in Qualitus : Habitus by chawnghilh on February 18, 2010

Deuteronomy 15:22 : “Nangmahnì awmhmunah in ei tùr a ni; thianghlim lote leh thianghlimte pawhin, hèng Sangai te, Sakhi te ang hi chu in ei thei ang; a thisen erawh chu in ei hauh lo tùr a ni; tui angin in leih bàw mai tùr a ni …”

 

 

 
 
 
 

 

Tùn lai kan boruak chu —chaw eia insàwm hlawhtlin mai mai pawh a har! Kan khua hi in hre mai a, vûrin min bawh lêk lûk mai zàwng a ni. Chawlhkâr hnih dâwnthàw a liam fel ta, vûr tla hnek hnuk kha a la zawp ral dèr chuang si lo. Lushai Chhokra pawh chaw eiah ka sâwm ngawt a, a chil chu a pùt hle. A drive way atanga tawlh chhuah chi zia zâng a ni si lo, vûrin a khuh vek a. A car hnungah tunge lo in-park laklawh ve bawk nì … a pakhat a chèt phawt loh chuan tawlh chhuah mai mai chi a ni tawh si lo.

Eng le khàw le, Mizoramah chuan zu in miten kèlsa, uisa … Gorkha unaute ang diakin an sâwngbâwl tui thiam a. Kei ve —a châng chânga ice cream chàk, ei ngai chuang meuh lo, tuisik lem zeuh zeuh tân chuan han siam tui danglam èm èm chu a har khawp ang le. Mahse, ka thìrbêl leh sazuk malpui ruhkàwl ka chhumna hi ngun takin lo en ula, mi(sual) MI nân lo hmang ve theuh mai teh u. A ruhkawl tan chhumna tùr hian Chempui ka lo kawl si lo, tubohvin ka chhu tliak tawp! A tuina a hloh phah chuang lo!

Minute 15 vèl vûr kâra rawn drive a ngai a; tin, kan kàwmchâr bathlàra icycle uai thla zuar mai kha Lushai Chhokra hian a kuai bung a, a thlâ ka la duh lawk lo va, vìn deuhvin, “La thuai thuai rawh, ka hùmna kut a vàwt tawh a nia,” a ti chùl mai! Vûr khal uai thla, zum sèl sùl hi dârthlalang hriam tak ang an ni a, pâwn chhuaha lu-a a rawn tlàk vaih chuan chemte thlàwk thei a ni ringawt!

Lushai Chhokra-a bân, a chaw-ei-thlèng chunga mi khi a phiar tha teh mai asin! Zofa thalaite pawh, hna thawhna lamah chuan an tha a phiar vak lo, chhûngte thawhchhuahsa phùr leh thatho tak maia an han bâr tàwn tàwn erawh hi chu hmuhnawm tham an tling, an kut tha bâwr phiarzia hi chaw-ei-thlèng chungah a hriat chian theih chauh zu nia!

A chunga Bible thuchâng ka rawn tàrlan khi hre chiang lo kan lo awm palh ang e, sa zawng zawng a thianghlim leh bawlhhlawh pawh ei thiang veka sawi chîng an awm a, khitah khian Mosia dàna mitthi ruang avànga mi an bawlhhlawh emaw, hmeichhiatna thla-bì avàng zàwk pawhin an thianghlim lo thei—mahse, chùng Mosia dàna bawlhhlawha ngaihte chuan an chàk chângin sakhi leh sathâr sate an ei a thian ve thozia tàrlannna mai a ni zàwk e. Pathian hian sa ei thiang thisente hi ei a phal ngai lo va, a Fapa thisen a dah chungnùn duh vàng tih a chiang hle. Pathian Fapa Isua Krista (Yahshua Messiah) thisen chauh hi thisen zînga ei thiang awmchhuna puanchhuah a ni!

Tin, Tirhkohte 10:14-ah khân “thiang lo leh bawhhlawh” tih kha sàptawng lamah chuan, “Common or unclean” tih a ni thung a, Mizo tawnga min lehlinsak dàn hi a dikhlel bawk! Kan ram Theologian-te’n a tharin tan han la leh teh se … UNCLEAN chu Leviticus 11-ah a inziak chiang viau va; sa ei thiang, a thiang lo zînga awmte kha COMMON an ni ta thung a …

Mahse, Tirhkohte Thiltih Bung 10-ah hian DIETARY LAWS anga lang lek lek siin, JENTAIL-ho tân pawh Pathian Lalram Chanchin Tha a inhawng ual-au ta, tihna a ni zàwk e! JUDA-te tân chauhva Judate’n an ngaih thin kha, Krista Lalram Chanchin Thaah tawh hi chuan Jentail mi pawh kan lo tel thiang ve tawh a ni zàwk e.

Sazuk sa hi a tui ve khawp asin! (Sawi hmaih hauh loh tùr — Ni 141 chhûngin in zârah VIEWERS 10,000 in chuang ve ta zak mai! Lasi Nula chanchin pawh ka rawn ziak vat ang!) 

WELCOME!   

Lèn luhna thlàkhlelhawmte   

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: