Chawnghilh's Blog

Chhang-Ban—USA-ah pawh—a lem hun an lo hre tawh khawp!

Posted in Qualitus : Habitus by chawnghilh on February 19, 2010

Zo-chhang hi vai leh sàpin an ei a — ‘a lem hun an hre lo!’ an ti. A eitute an fing ve zèl tawh! Zo-chhangban an ei thiam ve mai ang tih ringin he Thai Chhangban chanchin hi rawn ziak a ni ta hlauh zàwk e.

Tih tak èmah chuan Thai-ho pawhin chhangban, kàwnglàwng ban mautheiin an âwm ve tawrh a, thil dang bean leh soya bean, rim nei nghir ngher thil thlum nèn an pawlhsawp a. Mauthei nà/pil an hìk fai leh a, belmang a lan zui loh nân! Mauthei hian chhèmthei pawh a tiat thathum lo. 

Label mawihnai takin an tuam hnan hmak a. A hnawh phui nân changkhen ni àwm tak cork atân an hmang. Chù zàwng chu — Nutrition lama a ingredients zawng zawng label-ah an târlang vek a, chu chu hèng khawthlang lam rama tihdàn ngei ngei tùr pawh a ni.  Mauthei khat lek hi US $ 1:20 cent-in an hralh zar zar thei.

Han phel chiah ila, Zopâ chaw bàr hnih èm pawh a tling thathum lo tih a chiang reng. Kàwnglàwng (sticky rice) Zopa bàr hnih pawh tling lovah chuan India tangkain Rs. 70.00p thuak an la thei dèr tihna a ni. Tùnah hian Mizoram motor kawngpui kam Hotel-ah te Rs 60 vèlin kaw-puar êl euh, irh hawk hawkna tham leh “Khaw’nge in daikàl in?” tia zawh nghàl vatna khawp tùrin Hotel-ten min hrai puar thei ta fer fur mai! Kan hralh hrawl nàin, a man kan va têl tlêm deuh bìk si ve!

Khawchhak lama chèng hnam dang, Zo hmêl pù ve tak tak te pawh hian mauthei chhûng rim nam hiam hi hmui tui an lo ti ve èm èm mai zu nia! Engemaw chenah kan hrawk chu a lo inang hlawm phian; mahse, bawngsa ruhkawl chhum, tui hmèl tak tak an han tithlum pùrh mai hi chu—kei, Zopâ hrawkah hi chuan a tui lo teh mai asin!

Mi fate hian mawihnai takin, thil ho tè tè hmang hian sum siam an va thiam bìk deuh ve le! 

Chhang Ban … kan topic hi ho takin lang mah se, a sâwngbàwl dàn athuin Mizoram pawhin Ram Hruaitu fing leh remhria kan neih theih ngat chuan ram pâwnah Chhangban tui tak tak kan thawn chhuah ve theih a beiseiawm tlat! Bàwngkawn Bus Stand-a kàwnglàwng âwmtu pawhin ni tin a hralh chhuak thei a, thil-hmui leh thlum pawlh miah lovin, chhawhchhi den pilh sàwk a phul iar chauh —a hralh thei hle thìn kha  a ni a. Kan Zoram Aizâwl kawtthlèr piah lamah —mi ram kawtthlèrah engtin nge kan hralh chhuah theih ve tàk ang le … CATCH THEM YOUNG chi khat CATCH THEM STICKY atân i hmang tel ve teh khiah ang hmiang!

WELCOME!   

Lèn luhna thlàkhlelhawmte   

Advertisements

5 Responses

Subscribe to comments with RSS.

  1. Zaia said, on February 19, 2010 at 5:48 am

    A va tha em! I thuziak tichiang turin thlalak i nei tha bawk si a, ngaihtuah a tithui khawp mai; ‘irh awk awkna’ (kan irh ‘hawk hawk’ thin em aw? NOI) tham a ni e.

    He ka post http://zaitea.blogspot.com/2009/04/hma-kan-sawn-lo.html hi i reader-te lo chhiartir ve la, heti lam hawia rilru pek a ngaihzia hi mi tam zawk hian hre zel teh ang u.

  2. sekibuhchhuak said, on February 19, 2010 at 8:21 am

    A ni asin, Mizote hi chuan han cheimawi deuh leh han chei tuihnai deuh hi kan peih lo em a ni! Thailand-a street food an zawrhnaah khian i kal tawh ngei ang a; chuta bai-thak leh rawt-thak an zawrh tuihmel bik dan chu(h)!

  3. hmingtea said, on February 24, 2010 at 11:13 am

    He lamah pawh a awm ve tho nia, Thailand atranga an rawn thawn —a dipin lei tur a awm a, buhban faite pawh; mahse kan Zoram chhangban kha chu a tluk lo deuhin ka hria. Mautheia han chhumhmin hi chu a tui danglam hrim hrim zel —thil dang poh. He lamah chuan mau a vang khawp mai, awm chu a awm ve tho.

  4. hmingtea said, on February 24, 2010 at 11:15 am

    Ser khi he lama Tpuz an tih hi niin ka hria, tui ngah deuh, thlum deuh chi nen a inang ka ti. Serthlum pangngai ni lo, Sisu lam pawl deuh. A nih leh sumdawng nih nge i duh sum dawng ha ha ha ha ha ha ha ha ha, U Is…?

  5. Mafaka said, on June 30, 2010 at 6:27 am

    i thil rawn rawt hi ka lo ngaihtuah ngai loh thil a ni a, a bengvarthlakin bawhzuithlak a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: