Chawnghilh's Blog

there was a time …. all roads led to Rome, even now in some ways

Posted in Qualitus : Habitus by chawnghilh on February 25, 2010

 

 

Jesus is Lord tih a ngamawm mai mai loh hun laia Yahshua hi Lalpa a ni tih tan ngamtuten nghaisak an tawrhna hmun kha a ni. HREHAWM NASA TAK (The Great Tribulation) hun lai khân Jerusalem hmunthuah ringawt pawh Juda mi 1,100,000 an boral a; 97,000 sala hruai darhsarhin an awm bawk. 

Tichuan, Vespasian-a chuan bul a lo tan tawh angin leh Juda saltângte chu rim taka chhawr zuiin Titus-a pawh chuan Flavian Amphitheatre, tùna Colosseum an tih tàk hi a sa pum ta a, kum riat zet zawt (AD 72-AD 80) chhûngin an sa pum hman a ni. Bruce Lee leh Chuck Norris pawh Colosseum chhûngah an in-sparring ngian ngianna film FIST OF FURY kha i en tawh em? Tin, Quovadis Film pawh kha he lai hmun behchhana an chan a ni tho bawk. 

Kum zabi riatna hun laia Bede-a phei kha chuan, “Colosseum a din chhûng chuan Rome a ding ang; Colosseum a chim chuan Rome pawh a tluchhia ang; Rome meuh a tlùkchhiat chuan a rualin khawvèl pawh a tluchhe ve nghàl bawk ang,” a lo ti hial! 

 

A chhûng lam lan dàn 

 

Tin, Titus-a thih hnuah, amah rawn thlàktu Senate Domitian-a khàn Arch of Titus (Tita Kulh) chu Colosseum kiangah ropui takin a din ve leh a. Titus-a’n Ad 70-a Jerusalem a hneh hriat rengna AD 81-a a siam a ni, Arch of Titus chhìp lamah chuan Jerusalem atanga râllàk sum an zàwn chhuak mup mup lai —Menorah an zàwn lai lem, an ker lang tel kher bawk zu nia! Kha AD 70 Jerusalem thil tawrh kha mi tam takin “Jakoba Mangang Ni (Jeremia 30:7)” emaw “The Great Tribulation” tia Matthaia 24-a Isua  thupuan làwk, an khatih lai Juda-te chhuan luhlul leh uirête chung ngeia a thlen dikna a ni tih an hrethiam pha lo rih cheu zu nia! 

Rom khuaa Arch of Titus piah lawkah hian Colosseum, catacomb martar-te ke hniak a tàwpna hmun a awm—Colosseum tih ri kan hriatin Messia ringtu, kan unau kal hmasate martarna min hriatchhuahtìr thìn se; Arch of Titus tih rì kan hriatin Messia phatsantute tlùkhlumna min hriatchhuahtìr thìn bawk se. A khawi zàwk chu nge pan ve kan duh zàwk tàk ang le? An dinna a inhlat lo viau nàin, engtikah mah a khuh hulna tùr an zàrzawm a rinawm loh! 

Matthai 24 thu kha Jentail-te hnèna sawi a ni lo. Messia khàn a zirtîr Juda mite hnènah a sawi a, khatih hun lai ngeia chhuan luhlul leh uirê Juda-te tawrh tur a ni miau, a dikna pawh Tirhkoh Paula chuan heti hian a ziak hman — 

“Nangni, unaute u, Judai rama Pathian kohhran pâwl Krista Isuaa awmte zirtu in lo nih kha, anni chuan Juda-te lakah an tuar angin, nangni pawhin nangmahni rama mite lakah in tuar ve bawk si a. Chùng Juda-te chuan Lalpa Isua leh zàwlneite pawh an that a, keini pawh min hnawtchhuak a, Pathian an tilàwm lo va, mi zawng zawng an kalh thìn; chhandam an nih theihna tùra Jentail-te hnèna thu hrilh min khap si thìn; an sual tehna tikhat fo tùrin; nimahsela, thinur (wrath) chu tàwpkhàwk (Grik – telos); English – uttermost) dèrin an chungah a lo thleng ta.” I Thessalonika 2:14-16 

 

Tui-chik-chhuak mawi 

 

St Peter’s Basilica, Rome hi Thu Puan Bu-a  

“Thuruk Babulon” a tih kha a ni. Ka pa pawh cowboy lukhum khum chunga luh a tum rawk a, an lo phal ikhaw lo! 

Tlùksanna hi a la thleng lo emaw titu ringtu an tam hle; tlùksanna a awm daih tawh avànga REFORMATION pawh Dr Martin Luther-a leh a thianten an lo huaihàwtna kha a rei ve hman tawh hle; mahse, Rom Kohhran hian Nuchhùr (Mother Church) nihna a la chang ta zèl a, a thil chìn tenawmte pawh Protestant Pâwl hming pu ting siin—pâwl tiak thar zèlte hian an chhawm tel zèl tlângpui. St Peter’s Basilica hi hmun namai lo tak a ni, Tirhkoh Paula chuan heti hian a chungchâng a lo sawi diam tawh—hrethiam mi tlêm tè an awm a, hrethiam lo an la tam zàwk cheu — 

 
Tuman engmahin tihder che u suh se; tlùksanna chu a lo thlen hmasak zeta Dàn Bawhchhepa, boral fapa chu a lo lan loh chuan chu mi Nì chu a thleng dâwn si lo va. Ani chuan Pathiana an vuah apiang leh, sakhua zawng zawng dovin, an chunga awm tumin a inchawimawi ang: chutichuan Pathian biak ina thûin Pathian ang hialin a intâr chhuak ang.II Thessalonika 2:3-4. 
Kum AD 1980 khân ka pa (my biological father and spiritual mate) ngei pawh Rom khawpui-ah hian man a tàwk tawh a. Mahse, a rilru a nà lo, “Paula pawh Rom khuaah ngei Krista Chanchin Tha avàng ve thovin man a lo tàwk tawh,” tih thu ber mai khàn a thlarau-nun a chophùr ting zu nia! Tichuan, Kupra thliarkar chung zawna thlawk thla thunga chhunpelhin, Tel Aviv-ah a tum thei a, Palestina ram dung leh vàng chipchiar takin a fang zui ta a. Paula zin dan nen chuan a la inthlau ta tho tho. Anni lawng chesualah, ani thlawhna himdam taka tum theiah.  Jerusalem hmunthûa Pathian faka an inkhâwmnaa thu sawiah an sâwm a, saphunte ang lo takin Hetah hian khaw hmun nghet (continuing city) kan nei si lo va, khaw lo la awm tùr chu kan zawng zàwk a ni. Hebrai 13:14” tih thu beiseiawm hi a ngaithlatute enghelh làwmna mittui luang zawih zawih khawpin a sawi ve thung a ni.

Photos : Dikteii & Dala, Paris

 

WELCOME!   

Lèn luhna thlàkhlelhawmte   

  

Advertisements

23 Responses

Subscribe to comments with RSS.

  1. hmingtea said, on February 26, 2010 at 2:43 pm

    Zorama kan engineer-te riruat leh enkawl leh kan Zoram contractor-te contract chu ni se —an ding tawh bik hauh awm si lo va! ha ha ha ha ha ha ha!

  2. Zaia said, on March 3, 2010 at 2:22 pm

    A hmuhnawm hlawm khawp mai. Milem chung ber khi thlawhna atanga lak a nih vang nge, ka duh aiin a fiah kak lo va, a hnuai chiah erawh khi chuan ka lung a dum chiang bang thung a. Ni khi a eng tha awm ka tia, mihring hlim awmna lam nia lang deuh ruak khi a dik chuan khi Colosseum thla pawh khi lang awm tak niin ka hre si a, khawii lamah nge Ni a awm ka hrethiam hauh lo. Mamit ka kal hmasak ber tuma ni chhuahna ka hai ang vel a ni hial awm e!

    Thlalak a hmuhnawm a, thuziak pawh a bengvarthlak takzet. A hnuai ber erawh i tarlan tum theme aiin—mawi lem lo taka mihring lo lang hi—a langsar fu mai!

    • chawnghilh said, on March 7, 2010 at 7:46 pm

      Tunlai camera hi chu, ni sa lang miah lova —(dim/diffused light)-ah hlei hlei hian an outcome hi a mawi tawh zawkmah asin! Mihring thla lak nan hlei hlei a tha, ni saah chuan kan meng sur dui mai a … kan naupan lai leh tunlai chu kei ngei pawh hian khaikhin chiah ka dah vak tawh lo zawk!

      Ka thu post erawh hi chu Bible zirmite rau rauvah pawh —Preterist nih baka Historical-te kalphunga rawn dah a ni e. Futurist (Dispensationalist)-te chuan an ei lo mai mai teh ang chu!

      “Ar talh dan chi khat chauh a awm lo,” an ti ang bawkin, Bible pawh hi a zir dan kalhmang chi khat chauh a awm bik lo a ni e.

  3. Jaspi said, on March 6, 2010 at 12:27 am

    A van mawi hlawm ve! Bengvarthlak khawp mai.
    chawnghilh, thlalak chunglam atanga chhiar, pa 2-na…nupa ni awm tak, pa 2 zinga a pa zawk khi nangmah em ni?

    • chawnghilh said, on March 7, 2010 at 7:48 pm

      Khitiang pa hmeltha leh naupang hmel turah khian mi dah reng reng em ni? Ka bulah awm ni la, ka samtuak chhiai chhuai hi dye dum sen ther turin i inpeih reng mai thei a nia!

  4. R.Lalropuia said, on March 7, 2010 at 2:42 pm

    Fan ngai loh ram ka fang leh ta

  5. keimah said, on March 8, 2010 at 5:42 am

    A hmuhnawmin a va ngaihnawm em! Pa thil chik leh hre zau thu leh hla nge nge, mit leh beng a tivar sawng sawng e!

    • chawnghilh said, on March 9, 2010 at 4:21 pm

      Matthaia 24 thu hi Grik tawnga i lo chik chian peih chuan, HUN TAWP, TAWPNA HUN i hmu ang a, thuhmun an ni lo. Grik tawnga TELOS hi Isua tisa put lai nia Juda chhuan awmte AD 70-a an tawpna leh SUNTELEIA , he khawvel hun (age) a tawp hun tur sawina hi a danglam a. Kum AD 1800 hnu lama awm tan ve chauh Dispensationalist-ten chu chu an zir pha ngai lo.

      “Khaw hmun nghet kan nei si lo va,” tih thu AD 68-ah an chhiar zo hman chauh va, Juda mipui chapo tak ten Jerusalem kha an khaw hmun ngheta an lo ngaih tawh vei nen … Zawlnei Daniela 9-ah khan Jerusalem chhiat tur hi RUAT LAWK a nih tawhzia in hmu ang a …AD 70-ah chuan Juda-te leh Pathian inkara an TRYST pui ber an Temple chu matthaia 24-a isua sawilawk ang chiahin lung intiang hmuh tur a awm ta lo! Chu chu an CHHUAN a TAWPNA (telos) chu a ni a; tawpna chi hnih Matthaia 24-a mi hi zir chian a ngai khawp, SUNTALEIA ve thung hi chu Krista rawn kal leh huna HUN TAWPNA a ni tawh dawn thung a ni.

  6. Jaspi said, on March 8, 2010 at 11:24 pm

    He heh, nia…
    Khitiang pa hmeltha leh naupang hmel turah ka lo ngai tlat che 😛

    • chawnghilh said, on March 9, 2010 at 4:18 pm

      Hmêltha èm èm tùrah mi hian min ngai ngawt zèl! Chheh chheh hlawm a! 🙄

    • chawnghilh said, on March 9, 2010 at 4:23 pm

      Ha ha ha, i tilàwmawm thìn teh mang e.

  7. David Ralte said, on March 9, 2010 at 3:53 am

    Hei zet chu a va pui ve. A bengvar thlak mai bakah a tifiah turin thlalak mawi tak in a belhchhah zel nen. A ngaihnawm ropui e.

    • chawnghilh said, on March 9, 2010 at 4:27 pm

      “A Tale of Two Cities” by Charles Dickens kha London leh Paris chungchang a ni, hnam inel leh iner tak an ni thin.

      Thu Puan-ah hian ‘a tale of two cities” a awm ve leh a, chu chu Vatican Rome leh Jerusalem an ni thung. Khawpui ropui ve ve an nih thu a tarlang a, mahse, Bible-in “Khaw Ropui” a tih chuan “khaw tenawm” an ni duh thung. Chunglam Jerusalem, he leia rawn innghat tur hi Christian-te hi chuan kan anticipate tur a nih laiin, anticipate dan dang neitu an tam zawk! Vana lawn chhoh inring an tam hle a, a dik tak chuan Isua a rawn kal thla dawn a, he lei siamthar-ah a lalram a din chatuan dawn tih hi Bible-a thu inziak ka chhiar ve dan chu a ni!

  8. mesjay said, on March 9, 2010 at 10:24 am

    Pui rep rep! Hmuhnawmin a bengvar thlak e.

    • chawnghilh said, on March 9, 2010 at 4:31 pm

      Pi Mesjay : “Time of the end” leh “end of time” tih thu Daniel 8-ah i hmu ngei ang, thu thuhmun an nih lohzia hre chiangtu English pawh English-hote aia thiam i nihzia hi ka hre chiang asin!

      Hmaichhana kan inhmuh thin lai i hre kir zo tawh bawk si lo!

      ZOZEM-ah comment ka pek ve ngial pawhin a lut thei lo, “Best ever recipe I’ve known —a cook-time superb poetry” ti talin heta tang hian ka comment mai e. A nik a nawk a ngiat hnem lutuk a, ka thiamin a tlin seng lo.

  9. tetea7 said, on March 9, 2010 at 4:47 pm

    Pu Chawnghilh, “The Lost Tribe of Israel” chungchanga i ngaihdan ka van hre duh em? An bo tak tak nge hnam dangin an assimilate zo zawk? Zau deuh hek hawkin han analyse teh khai.

    • chawnghilh said, on March 9, 2010 at 8:15 pm

      tetea7 : Lal Solomona hun lai khan UNITED ISRAEL an la ni a, hnam 12-te kha an la lungrual. Mahse, a fate Rehaboama leh Jeroboama te atang chiah khan Israel an kehchhe tan ta a.

      Hnam 10 kha Palestina hmar lamah an khawsa a; chhim lam Judai ramah hnam hnih Benjamin leh Juda-ah cheng ta thung a. Pathian Thu kalphungah chuan Judai ram lama chengte khan Pathian Thutak an zawm fel fai zawk.

      Kum 721 BC-ah Assuria salah hnam 10-te an bibo ta diak a. An saltan chhan kha ramdang mite pathian an lo biak ve tak vang a ni.

      Kum 606 BC-ah Judah leh Benjamin hnamte pawhin an suahsuala Pathian lam an hawi loh avangin Babulon salah an tang zui ta nih kha … Sam 137-na te hi Temple an neih zui tawh lohna Saltanna Ram Babulon-a an chetchhiatzia lungchhiatthlak taka an phuahna a ni.

      Jakoba Lehkhathawn-ah pawh hian Hnam 12-te chu lehkha a thawn hman daih tawh —

      Jakoba 1:1 Jakoba, Pathian leh Lalpa Isua Krista bawihin, Hnam Sawm leh Hnam Hnih darhte chu chibai a buk e.

      I Petera 1:1,2 Petera, Isua Krista tirhkoh chuan, Ponto ram te, Galatia ram te, Kappadokia ram te, Asia ram te, Bithunia ramtea Darhho awm, awih tur leh Isua Krista thisen theh dawng tura Thlarau tihhran a, Pa Pathian hriat lawk anga thlante hnenah chuan: In chungah khawngaihna leh remna tihpunin awm rawh se,” tiin Petera pawhin lehkha a lo thawn hman vek tawh —khing thu pawimawh chhiar lo, BO NIH CHAK hi an awm ve hranpa a, JERUSALEM SYNDROME veite an ni. Lalchhanhima Sailo kha ka fiam zauh tawh, “Bo nih hi in hlimpui ber a ni mai maw? Keinin Kalvary-a ZAWN CHHUAH kan nih kan hlimpui thung a,” tiin!

      HNAM BO an awm tawh lohzia a lan lehna chu Revelation (Thu Puan chhuah, zep then awm tawh lo Bu-ah) chiang takin kan hmu thei a, kum AD 100 emaw a hnu lam hreta Thu Puan Bu hi Patmos thliarkara Hmangaih Johana ziak a ni a.

      Tun laia Rabbi Avichail-a’n Hnam Bo a zawng ve chhen hi chu ‘Matthaia ziak atanga Thu Puan Bu’ chhiar ru ve pawh ni se, Thlarau Thianghlima hriatfiahtir (discerned) a nih lohzia a lanna a ni zual ngei ang.

      Hmangaih Johana khan Patmos thliakarah khan eng thu nge a lo ziak tih hi chik chiang phawt ila, he chanchin hi ka ziak tawi thiam i ti ve mai thei —

      Thu Puan 7: 4-8 thu hi ngun takin chhiar la, SEALED tih hi past tense a ni tih hrethiam chiang turin MA English lai i nih kha aw!

      7:4 Tin, an chhinchhiah zat chu ka lo hria a, Israela thlahte hnam tina mi 1,44,000 an chhinchhiah tawh a ni.

      7:5 Juda hnama mi 12,000
      Reubena hnama mi 12,000
      Gada hnama mi 12,000
      7:6 Asera hnama mi 12,000
      Naphtalia hnama mi 12,000
      Manasea hnama mi 12,000
      7:7 Simeona hnama mi 12,000
      Levia hnama mi 12,000
      Isakara hnama mi 12,000
      7:8 Zebuluna hnama mi 12,000
      Josefa hnama mi 12,000
      Benjamina hnama mi 12,000
      an chhinchhiah tawh.

      Chhinchhiah TAWH (sealed an nih leh vek tawh hun kha AD 100-ah chuan a ni leh hman daih tawh). Hnam hnih an la bo cheu em? Bo tawh lo, AD 100-ah pawh Israel thlahte hnam tina mi (hnam 12-te) an ni hman tlat tawh. Thu Puan Bu hi Pa Pathian Yahweh-in a Fapa Yahshua ha Messia kaltlanga, vantirhkoh tira Hmangaih Johana hnena thu kimchang a ziaktirna Bu a ni tlat! Dawt thu a awm lo vang.

      Thu Puan Bung 7 leh Bung 14 chhiar tawh, fingvar ve chi i nih chuan HNAM BO an awm tawh lohzia hi a lang chiang lutuk a; kan Mizo unaute inbarhluhna hi a nep lulai teh asin! Messia tlanna phatsana INTIH-ISRAEL-na atan ringawt hi chuan … a pawi vawng vawng ani e … hnam bo nihnaah chhandamna a awm lo va, Krista Isua min rawn zawn chhuahna zawkah khan Chhandamna Ropui a awm thung a ni.

      “1,44,000” hi Jehovah Witnesses leh Adventist-ten Pawl member zawn belh nana an lo tawktar ve chhen hi chu an HIT FUH LO REM REM khawp mai! Nuih pawh an tiza hrep lo ve!

      Kalvary Tlanna khan Israel hnam 12-te mai bakah Jentail-te min va ZAWNG CHHUAK KIMCHANG tak em! Hna hmasaah Israel hnam 12 a hmu kir leh hman vek tawh vei nen! Ethnos hnam chekhnawk tinrengte hriat ve ngei turin Lalram Chanchin Tha chu puang chhuak turin THU MIN PE ZUI TA, hnam 12 a chhinchhiah tawh chanchin pawh kha … Thu Puan 14:1 kan thlir chianin — Beram No Zion Tlanga ding leh an chala a hming leh a Pa hming ziak, mi 1,44,000 a hnenah ka hmu a. tih a ni a, Pathian Beram No Zion Tlanga a chenkual laia thil thleng a ni tih hriat chian a pawimawh khawp bawk. Chutih hun lai chu AD 30 vel leh a hnu hun tlemte kha a ni mai!

      • David Ralte said, on March 10, 2010 at 2:04 am

        Ngaihnawm hle mai.

        Zawhna dang leh. A nih leh Thupuan bu a Hmangaih Johanan AD 30 vela a Bo a hmuh a ziah ho leh Peteran lehkha a thawn tawh te kha tunah hian identify turin an la awm cheu em? Nge Bo Hnihna in an bo leh tawh zawk?

      • chawnghilh said, on March 11, 2010 at 7:43 pm

        David Ralte : BO tih hi ‘bo hnihna’ ni lovin, 721 BC hun laia chhuak ta kha, Israel-te-ah chuan ‘bova la inngaihna’ a ni zui tlat a; kan rin Thuthlung Thar Bu thu hi chhiar ve awm nual mah se, ring duh ve hlawm hek lo!

        Kristâ chhandam rawng bawlna famkim, kum AD 30-a hmuh theiha a van làwn hmaa kimchang hman diam kha (Adventist kaphunga 1844, October 22-a famkim chauh??? —heresies) ni ve lovin — Kristâ min rawn tlannaah chuan hnam tin kha hmuhchhuah nawn leh vek, anni pawhin pawm thlapa a record awm tawhsa kan hmu thei a ni zawk tawh e.

        “I once was LOST but now am FOUND …” tih sa ve theiin Crucified to death at Calvary, Empty Tomb resurrection leh Christ’s blood sprinkled over the Heavenly Mercy Seat through the priesthood of the Risen Christ hi Christian-te thurin chi kim ber chu a ni a, (pawl tam tak ten hre rih lo mah se) —a famkim lehzualna turin Second Advent hi chhuan tin zela kan anticipate (beisei) a ni ta thung e.

        Thanks, David Ralte …

  10. tetea7 said, on March 10, 2010 at 6:18 am

    Ngaihnawmin a bengvarathlak hle mai! Hmanniah mi pakhatin he thu hi chanchintha hrilh takin min sermon khum chiam mai a, kei lah ka lo bangbo na lam tak a lo ni vei bawk nen! Tunah chuan i Bible chang han tarlante atang pawh khian inchhiar zauna tur kawng a kaw ta e. Tin, internet atangin ka print chhuak nual bawk.

    Thanks

  11. varte said, on March 19, 2010 at 6:51 am

    Hmuhnawm bakah bengvarthlak ngei mai, Catacomb martarte tih kha min ti hrechhuak, ngaihnawm ka tiin ka chhiar nasa thei..


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: