Chawnghilh's Blog

Fletcher Boat House

Posted in Qualitus : Habitus by chawnghilh on April 11, 2010

 Han Click ve mai mai teh …  Iwo Jima Monument daih a ni thung! Fletcher lam chu a ni lo ve aw …

Hmun nuam tak chu a ni. Potomac lui ràl lehlam chu Virginia State a ni mai a, Fletcher Boat House awmna hi Maryland chhûng a ni. Tùnlai zet chu lawnglêng leh vaukam atangin nghakuai chiah intihhmuh hun a ni bawk a. Mi an lùn thei hle. Tui kuang chìm chin a phai rih a, sangha a tam lo tih a hriat a. Han khai chhuak inleng che bat bat hmuh tùr a vâng hle bawk. Mahse, mi chi tin chi tang chetla vèl a hmuhnawm ve hrim hrim thung.

Thing hnah a lo chawrno hman tawh bawk a, hmuh phàk chin na nà nà chu a mawi duh khawp mai. Mahse, helai Fletcher hmun hi pangpâr a tam vak lo bawk a—pâr vul chêk chûk—mit han la èm èm hmuh tùr a vâng phian! Nghakuai chiaha a chaw-chah (lure/bait) atân hian hnampui pawhin changpàt a tha tih an hai lo va, Fletcher Boat House atangin an hralh chhuak hnem thei hle.

Nghakuai chiah mai hi thil thiang a ni lo va; permission la thlapin, man chawi ve ngei pawh a ngai. Sangha man rùk chu a hlàwk lo hle. Potomac lui dung tluan hi vêngtuten an vil ngun reng a. Chung lamah helicopter pawhin an hrût kual reng bawk thìn. Vaukam tak takah zunram thiarna hranpà a awm tawh bìk loh avàngin, mî hmuh loh lai chuh ru zauh zauh an awm ve ngei a ni tih a hriat theih mai a—lungpui phèn vèl a hîng ve hiam rèng a ni.

Lawngte hi pawisa chawiin a hman hawh theih bawk. Mawngte hi chu FREE-in a thlìr theih!

Potomac Lui hi nèl sual a awl a. A chunglâng hi luang muang dulh anga lang, a hnuai lamah erawh tuizangkhauh a awm thin avàngin tla hlum pawh an awm zauh zauh. Fîmkhur hle a ngai. Tùnlai chuan vûr tuiral hun lai a la ni kaltluang a, a tui pawh hik tham mem mem tak a la ni. 

Sàp naupang tè tèin nuam an ti berin a lang bawk. Sangha mante pawhin an man tawhsa hi hàwn huna chawhmeh atân an ti a ni hran lo—thlâ an làkpui a. A sangha len zâwng leh rih zâwng an bùk a. Record fel takin an ziak a. A nungin an chhuah leh mai zèl. Chu chu an hlimpui èm èm thung.

WELCOME!   

Lèn luhna thlàkhlelhawmte   

Advertisements

2 Responses

Subscribe to comments with RSS.

  1. zaia said, on April 12, 2010 at 4:52 am

    A bengvarthlak thin. Zing Office han luh chiaha i thlalak original lutuk, a en leh turte ngaihtuah tel rana lak tih hriat ngawih ngawih han hmuh te, a bul vela Mizo tawng mawi tinreng luang tel ve zelte nen…. a hahdamthlak takzet.

  2. Zuala12 said, on April 13, 2010 at 6:25 am

    Chawnghilh, i tibengvarthlak hle mai, a nawm hmel hle bawk. Keini Zoram lamah pawh ami chengte hi kan ngo ve puak lo naa kan sawrkar chak lo tak hmalakna muang lutuk pawh tunah chuan a hmin tai ve tan dawn ta a, Serlui Mini hydel Proj. pawh karlovah hawn theih mai tura beisei a ni ve ta. Hemi denchhen hian kan Fisheries Deptt. lam pawhin vai sangha chi thahnem tak he luiah hian an chhuah ve a, chumi par chu kan tlan ve ta mek a nih hi, thenkhat chuan nuam an ti ve fu awm e…


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: