Chawnghilh's Blog

Fishing … scoop them that spawn …

Posted in Qualitus : Habitus by chawnghilh on April 19, 2010

 

Kal thlàwn a hlauhthàwnawm riau tawh a. Inhmâkhua làwkin Inter-net atangin Potomac lui LOW TIDE nge HIGH TIDE tih kan thlèk hmasa tè tè a. Vànneihthlàk takin April 17, 2010 khân tlai lam dârkâr li vèl chhûng HIGH TIDE tùr a lo ni hlauh va. High Tide-ah hian sangha fuan tùr lui hnâr lam pana chho an tam deuh thìn a. Chu chu hre rànin, hmanrua kan han indap chawp ve ta a. Cool-Aid, Bucket, Nghakuai ngul leh a hrui … a chàw-chah tùr chu leichawp ngaiah kan dah a, a hmunah changpàt kan lei leh mai ang chu!

Mahse, nghakuai kan chiah hian kan hlawhtling mawh khawp a. Mi dang chiah vete pawhin an khai chhuak khât khawp mai. Thianpa Lushai-Chhokra chuan kutbênga hàwn a hlau tawh bawk a, a thianpa Dion-a chu K-Mart emaw Sports Authority emawah lènsuah zawng tùrin a tîr ta chûk chûk a. Dion-a hi US Coast-Guard-a khawsa thang ngang —viaktha tak a ni a.

Lènsuah awmna tùr nia a rin chu Internet atangin a’n thlèk puat puat a. A vir chhuak rang khawp mai. Dârkâr chanve pawh la tling lovah chuan Lènsuah a lei thu a rawn report lèt vat a. US $ 25 man chauh a ni bawk a. A rawn thlenpui leh meuh chuan chhuah nghàl ruai a ngai ta a. Beer Can 30 kan keng a, lui dung thlî chu tlai lamah a vàwt zual dâwn hlea kan hriat avàngin kan inthuam lum viau bawk.

Silver Spring Avenue atangin Piney-ah, University Blvd-ah, Belt-Way 495 kan pakai a, week-end a ni bawk nèn —traffic chu bumper to bumper a ni hawt e. Hmanhmawh nàk alaiin tlàn a chak mawh khawp mai. Exit 40-ah kan dùk phei ta zar zar a. CHAIN BRIDGE kianga Parking Lot-ah kan in-park a. Kan thuam neichhun chhun nèn Chain Bridge hnuaiah kan petek thla nawk nawk a. Pal an lo hung thar, làwn liam tùr nge, a hnuaia bungbùt luh tùr tih pawh ngaihtuah fê a ngai. Lushai Chhokra lah a’n tlusual nghàl pang a … nuih kan tiza hlawm khawp mai.

Lui kam lungpui khàwkràwk tak maiah chuan kan per kai nalh nalh lo hlawm khawp mai. Dul hrûtin kan bàwkvàk lo chauh! Lung khàwkràwk kârah lah tawng chen chen sangha thisâwn an lo lèt hèl hùl bawk a. Tuilianin a kiamsan avànga tâng ta laklàwh leh tui ngheia thawchhama thi tà te an ni. An nam hiam tawh hlawm a. Bawhvah an tinuam hran lo riau!

Chain Bridge banpui piah ber (Virginia State lam) kiangah tanhmun kan khuar ve ta. Lehlam ràl kha chu Virginia State a ni. Lènsuah kuang a lo tawi mah mah si chuan bân thà a tihah thei hle. Lui luang lah a chak fur fur riau mai a. Fuan tùra rawn chho sangha tân pawh mei-parh lèng vat vat a ngai khawp ang le. An pângpàrhte pawh an khâwng rang ve hlein a rinawm. Lènsuah hman fè hnuah te tak tè chu kan han man nghàl ve mai a. Man nawn leh mai nân hun a duh tam fû.

Fish-finder Khâwl tè kan keng hauh lo; mahse, STORK leh sangha man chi savàten lui hnâr an pan sang sang ta mai a. Kan awmna zàwn vèl an thlawh khùm zèl dànah finna min pe a. Sava chho-thlàwk thla zàp rang tak tak te tanhmun han khuarna lam chu kan pan chho ve ta. Kan thian Coast-Guard ber pawh thiamthai-nu mawngtawlhin a kal a ni ve ber e.

Lehlam ràlah lah lèn dêng meuhvin Khawchhak lam/Spanish-hoten an theh pharh ve ngial thìn a. Hnuh chhuah tehchiam an neih erawh chu kan va hmuhpui hràn lo! Nuam an ti ve hle chuan a lang.

Lushai Chhokra lah lungpui chhìr lêngin a tawlh thlu nawn a ni deuh ber! Lui hnâr kan chho chu —suah fuh tùr an lo awm tam ta hret, sava-ho zârah kan nihlawh ta fû. Khua a vawh èm avàngin kìr leh vat kan rilrùk ta zàwk a. Dârkâr khat emaw vèl Potomac lui kama hun kan zuk hman hnuin, sangha heti zàt khi kan hàwn ve thei a … nikuma kutbênga kan zuk hawi-khawthawng kha nuam hle mah se, kumin chuan kan hlawhtling ve ta riau!

Chokâ-ah kan sangha la âng chap chap chu a phuhlip/pângparh etc., kan ziat fai a, a ril kan khei a … tui an lo pai êm âwm hlawm viau a. Mawihnai takin kan chan a. Zo-Anthùr nèn kan han chhùm hâng ta a nih kha … beer nèna han hmeh pah tùr atân a then kan DEEP-FRY a, a tihchì mai mai khawp asin le! Culinary School lamah pawh kan lo duai bìk lo hle! 

Kârleh thlîrin —sangha man tùra ramchhuah leh kan chàk leh hle tawh mai! He Blog thlîrtute zawng zawng, chaw eiah kan sâwm vek a che u.

 

Advertisements

5 Responses

Subscribe to comments with RSS.

  1. H.Vangchhia said, on April 19, 2010 at 8:42 pm

    A nawm hmel hle mai, in zuk intihlim chu ka thik tep che u a ni.

  2. bawmrang said, on April 21, 2010 at 2:24 pm

    Nikum chhung zawng khan tum 4 nghakuai khaiin ka chhuak ve.sumsi pa 1 ka awk.
    ka la ti chhuak zui.lui kamah atlan chhuak a ka um zui peih ta lem lo.

    In sangha chu a lui a dik bawk a.a hang tui hmel sar sar ngawt mai.
    a rilte in kang lo maw.a kha hang tui ngawt ang.
    In Coast-Guard pa chuan a ril kan te a hre ve ngut a nge maw.

  3. David Ralte said, on April 23, 2010 at 4:50 am

    A van nawm hmel tak em.

    Khi(h), Tui-sava te khian nangni aiin a man thei zawk a va ang ve 🙂 Nice pics.

    In sangha man ang khi kan veng lamah pawh a awm ve thin, a to zek lehnghal, tui erawh a tui khawp mai. Telah han fry thuak ila, tumbu no deuh leh tomato te chi nen kan curry leh ila, a tui duh asin… sorsu tlem nen.. ihlipsss.. man thar Bazaar ah a awm a ngem aw.. ka va en ve hial teng.

  4. hmingtea said, on April 24, 2010 at 9:23 pm

    A nawm dan kha .Tuipui ah kan khai ve zeuh trhin man tam a har duh khawp mai.A chah ah chuan kaikuang emaw China changpat an tih mai tit ang deuh hi kan lei mai trhin.

  5. mzvision said, on May 15, 2010 at 10:19 pm

    Heng sangha man hi ke tem ve pha tlat, nawm hmelin telve lo chuan kan va chan nasa ve


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: